1. Met a ppiitá lón ekiekum atun ka ekieki ussun Jiowa?

 KA FEN sótun anchangei iká mi fet napanapen Jiowa? Met a ppiitá lón ekiekum atun ka fós ngeni lón iótek? Sise tongeni kúna Jiowa, nge ewe Paipel a áweweei ussun i lón chómmóng napanap. A kér ngeni Jiowa “saram” me minen ‘apet seni feiengau’ me “eú ekkei mi unusen efeiengaw.” (Kölf. 84:11; Ipru 12:29) Lón kúnaien Isikiel we, a áweweei pwe Jiowa a ussun ewe faw mi aúchea itan safaia, a ussun ewe piras mi misimis, me a ussun ewe resim mi lingéch. (Is. 1:​26-28) Ekkóch ekkena pwóróus mi áweweei ussun Jiowa, eli epwe efisi ach sipwe fókkun ingeló, are epwe pwal mwo nge efisi ach sipwe niwokkus.

2. Met a tongeni eppeti ekkóch le ririéch ngeni Jiowa?

² Eli epwe weires ach sipwe lúkú pwe Jiowa a tongekich pokiten sise tongeni kúna. Ekkóch ra ekieki pwe Jiowa esap fókkun tongeni tongeer pokiten met a fis lón manawer me lóóm. Eli ese fókkun wor semer mi tongeer. Jiowa a weweiti meefiach me a silei pwata a weires ach sipwe ririéch ngeni. Ren an epwe álisikich, a áiti ngenikich me lón an we Kapas napanapan kewe mi echipwér.

3. Pwata sipwe káéfichi ussun án Jiowa tong?

³ Ewe kapas mi áweweéchú ussun Jiowa, ina tong. Ewe Paipel a apasa pwe “Kot i tong.” (1 Jon 4:8) Mettóch meinisin a féri, a chék féri pokiten an tong. Án Kot tong a fókkun lapalap me ese wor éúkúúkún pwe ese chék tongei chókkewe mi tongei i, nge a pwal mwo nge tongei chókkewe rese tongei i.  (Mat. 5:​44, 45) Lón ei lesen, sipwe káéfichi ussun Jiowa me an tong. Lapólóón ach káé ussun ach na Kot, epwe pwal ina lapólóón ach tongei i.

JIOWA A FÓKKUN TONGEKICH

4. Met ka meefi ren án Jiowa tong? (Pwal ppii ewe sasing.)

⁴ “Jiowa i emén Kot mi uren tong.” (Jem. 5:11) Lón ewe Paipel, a aléllééi pwisin I ngeni emén inelap mi fókkun tongei néún. (Ais. 66:​12, 13) Anchangei emén inelap mi fókkun túmúnúéchú néún we kúkkún. A kan onómu wóón pechen me fóffós ngeni fán pwetete me kinamwe. Atun a kechiw are metek, a nochchei an epwe wor met mi lamot ngeni. Atun sia nóm lón weires, sia tongeni lúkúlúkú án Jiowa tong. Iei met ewe soumakken kélfel a makkeei: “Lupwen a wor chomong ai öürek, en ka achipaei o apwapwai lelukei.”—Kölf. 94:19.

5. Met weween ngonuk án Jiowa tong enlet?

⁵ Jiowa mi túppwél. (Kölf. 103:8) Ese fangetá wóóch atun sia mwáálliló. Chón ewe mwúún Israel ra asonga Jiowa fán fite, nge a chúen pwáári an tong ese wor éúkúúkún ngeni néún kewe aramas mi áier. A ereniir pwe ra aúchea, me ra itetekia me ren, me a pwal echeniir. (Ais. 43:​4, 5) Án Kot tong, ese siwil. Fansoun meinisin sia tongeni lúkúlúkú an tong. Inaamwo iká sia féri eú tipis mi watte, i esap likitikicheló. Atun sia áier me liwiniti Jiowa, sipwe kúna pwe a chúen tongekich. A pwonei pwe epwe “müttir le amusala tipis.” (Ais. 55:7) Ewe Paipel a apasa pwe an omusaaló tipisich a atoto “fansoun ngaseló . . . seni pwisin Jiowa.”—Féf. 3:19.

6. Met Sekaraia 2:8 a áiti ngenikich ussun Jiowa?

⁶ Álleani Sekaraia 2:8. Jiowa a alélléfengenikich ngeni futuken lón mesan are chólochólun lón mesan. Féún mesach a fókkun áchichchin me ina eú kifetin inisich mi aúchea. Ina minne, ussun itá Jiowa a apasa, ‘Nei aramas, ién a efeiengawók, a efeiengawa ewe mi aúchea me rei.’ Pokiten Jiowa a tongekich, a mwittir meefi meefiach me a fókkun mochen túmúnúkich. A letipechou atun sia nóm lón weires. Ina pwata sia tongeni iótek ngeni fán lúkúlúk: “Kopwe tümwünüei usun chök fituken lon mesom.”—Kölf. 17:8.

7. Pwata a lamot óm kopwe apéchékkúla óm lúkú án Jiowa tong?

 ⁷ Jiowa a mochen óm kopwe lúkú pwe a tongeek wóón winikapóm. Nge a silei pwe pokiten met a fis ngonuk me lóóm, eli epwe efisi óm ekieki iká epwe tongeni tongeek. Are eli ka nóm fán eú sóssót iei mi sótuni óm lúkú án Jiowa tong. Iwe met epwe apéchékkúla óm lúkú pwe a tongeek? Ina óm káé ifa ussun Jiowa a pwáári an tongei Jises, ekkewe mi kepit, me kich meinisin.

USSUN ÁN JIOWA PWÁÁRI AN TONG

8. Pwata Jises a lúkú án Seman we tong?

⁸ Jiowa me Néún we ra fen nónnómfengen ren fite fite ier lap seni ekkewe ekkóch. Atun ekkena fite billion ier ar nómfengen lón láng, ra fókkun ririéchfengen me tongfengen. Jiowa a fókkun pwáári an tongei Jises seni met sia álleani lón Mattu 17:5. Jiowa a tongeni chék apasa, ‘Iei i ewe úa pwapwa ren.’ Iwe nge, a mochen ach sipwe silei úkúúkún an tongei Jises, ina popun a kér ngeni “nei Át, ewe mi áchengicheng.” Jiowa a pwapwa ren Jises, ákkáeúin ren an tipemecheres le fangoló manawan. (Efi. 1:7) Jises ese pwal tipemwárámwár iká Seman we a tongei. A fókkun lúkú pwe Jiowa a tongei. Fán chómmóng, a apasa fán lúkúlúk pwe ewe Sam a tongei.—Jon 3:35; 10:17; 17:24.

9. Ifa ewe kapas áwewe mi pwáári án Jiowa tongei ekkewe mi kepit? Áweweei. (Rom 5:5)

⁹ Jiowa a pwal pwáári an tongei ekkewe mi kepit. (Álleani Rom 5:5.) Ekieki ei kapas “ninilóng.” Eú puken pekin káé a áweweei pwe ena kapas a wewe ngeni, “a feito rech ussun pwuun konik.” Ena kapas áwewe a affata úkúúkún watteen án Jiowa tongei ekkewe mi kepit. Ekkewe mi kepit ra silei pwe Kot a “tongeer.” (Juta 1) Aposel Jon a pwáári meefier lón met a makkeei: “Nengeni úkúúkún watteen án ewe Sam tongekich, pwe sipwe iteni néún Kot!” (1 Jon 3:1) Itá Jiowa a chék tongei ekkewe mi kepit? Aapw, a fen pwáári an tongekich meinisin.

10. Ifa ussun Jiowa a fókkun pwáári an tongeek?

¹⁰ Ifa ussun Jiowa a fókkun pwáári an tong? Ina ren ewe méén kepich. Ina ewe mettóch Jiowa a pwáári an tong lón, lap seni án ekkewe ekkóch pwáári tong! (Jon 3:16; Rom 5:8) Jiowa a fang Néún we mi aúchea. A mut ngeni an epwe máló fán iten aramas meinisin pwe epwe musoló ar tipis me repwe wiliiti chiechian. (1 Jon 4:10) Lapólóón ach ekilonei ewe liiwin Jiowa me Jises ra awora, epwe pwal ina lapólóón ach weweiti úkúúkún ar tongei emén me emén kich. (Kal. 2:20) Jiowa ese chék awora ewe méén kepich ren an epwe mase ngeni an féfférún pwúng, nge a awora pwe ina eú liffangen tong. Jiowa a pwáári an tongekich ren an pennúkú met ewe mi kon aúchea me ren, ina i Jises. A mut ngeni Néún na an epwe kúna riáfféú me máló fán ásengesich.

11. Met sia káé seni Jeremaia 31:3?

¹¹ Ussun met sia kúna pwe Jiowa ese chék meefi an tongekich nge a pwal erenikich úkúúkún an tongekich. (Álleani Jeremaia 31:3.) Jiowa a panikicheto ngeni i pokiten a tongekich. (Apépé ngeni Tuteronomi 7:​7, 8.) Ese wor eú mettóch are emén epwe tongeni áimukicheló seni ena tong. (Rom 8:​38, 39) Met ena tong a ámmeef ngonuk? Álleani Kölfel 23, me ppii ifa ussun Tafit a meefi án Jiowa tong me ifa ussun sia pwal tongeni meefi ena tong.

MET ÁN JIOWA TONG A ÁMMEEF NGONUK?

12. Met Kölfel 23 a menlapei?

¹² Álleani Kölfel 23:​1-6. Kölfel 23, ina eché kél mi fós ussun án Tafit lúkúlúkú án  Jiowa tong me túmún. Tafit a áweweei ussun ewe riri mi péchékkúl lefiler me Jiowa, ewe mi eita ngeni Chón Mmasen Siip. Tafit a meefi núkúnúkéch ren an mut ngeni Jiowa an epwe emmweni me unusen onómu an lúkúlúk wóón i. Tafit a silei pwe iteiten rán, Jiowa epwe pwáppwári ngeni an tong lón unusen manawan. Pwata a fókkun lúkú ena?

13. Pwata Tafit a lúkúlúkú án Jiowa túmún?

¹³ “Üsap osupwang ren och mettoch.” Tafit a meefi túmún pokiten Jiowa a chék akkawora meinisin met an osupwang. Tafit a pwal silei pwe Jiowa i chiechian me Jiowa a pwapwa ren. Ina popun a lúkúlúk pwe ese lifilifil met epwe fis ngeni lón fansoun mwan, nge Jiowa epwe chék sópweeló le awora meinisin met a osupwangan. Pokiten Tafit a lúkúlúk pwe Jiowa a tongei me epwe túmúnú, a álisi an esap lólilen nge epwe chék pwapwa me menemenéch.—Kölf. 16:11.

14. Ifa ussun Jiowa a tongeni túmúnúkich fán tong?

¹⁴ Jiowa a túmúnúkich fán tong, ákkáeúin atun a fis osukosuk lón manawach. Áwewe chék ren Claire, a emén chón angangen Bethel ren lap seni 20 ier. Ese silei ifa ussun epwe álisi chón an we famili atun a chék akkatapw ar kewe osukosuk. Seman we a stroke, pwiin we kúkkún a katowu, a peló án ar we famili we ekis business, me ese chúen wor imwer. Ifa ussun Jiowa a pwáári an tongeer me túmúnúúr? Claire a erá: “Jiowa a nochchei an epwe chék wokkor met a lamot ngeni ái we famili iteiten rán. Fán chómmóng, a fen luluuló met Jiowa a awora lap seni met áúa osupwangan! Úa kan ekieki  fán chómmóng ekkewe fansoun úa meefi án Jiowa tong, me úa fókkun aúcheani. Ekkena mettóch úa chechchemeniir, ra álisiei le sópweeló le chék akkangang ngeni Jiowa fán pwapwa atun a pwal ppiitá ekkóch osukosuk lón manawei.”

15. Pwata a péchékkúlsefál letipen Tafit? (Pwal ppii ewe sasing.)

¹⁵ “A apöchöküla lelukei.” Fán ekkóch, Tafit a meefi weires ren meinisin ekkewe osukosuk a kúna me ekkewe sóssót a tori. (Kölf. 18:​4-6) Nge án Jiowa túmún fán tong, a apéchékkúla letipan. Jiowa a emmwenaaló chienan na mi mélúlú ngeni “eu maasies” me ngeni “ekewe koluk mi kurufat.” Me ikena ie, Tafit a péchékkúlsefál me tufichin sópweeló an angang ngeni Jiowa fán pwapwa.—Kölf. 18:​28-32.

16. Ifa ussun án Jiowa tong a apéchékkúla letipom?

¹⁶ Pwal ina ussun lón ei fansoun, “pwokiten än ewe SAMOL tong a fókkun lapalaap kich sisap rosoló” atun sia kúna weires me riáfféú. (KölK. 3:​22, Paipel mi Pin—Agapé; Kol. 1:11) Áwewe chék ren Rachel. A fókkun riáfféú atun pwúlúwan we a likitiireló me Jiowa atun ewe COVID-19 pandemic. Met Jiowa a féri fán iten Rachel? A erá: “Jiowa a nochchei met úpwe meefi ren án ekkewe ekkóch tong. A awora ngeniei chómmóng chienei mi kan awora fansoun ngeniei, uwouto enei, tiin ngeniei ekkewe pwóróus me wokisin mi apéchékkúlaei, emelimel ngeniei, me ákkáchema ngeniei pwe Jiowa a kan túttúmúnúei. Fansoun meinisin, úa kan ereni Jiowa ái kilisou ren an awora ngeniei eú watteen famili mi tongeei.”

17. Pwata Tafit ese “niueiti och feiengau”?

¹⁷ “Üsap niueiti och feiengau, pun en ka etiei.” Fán chómmóng, manawen Tafit a nóm lón feiengaw, me a chómmóng chón oput i mi wor maner. Iwe nge, án Jiowa tong a anúkúnúkúéchú me túmúnú. Tafit a tongeni meefi pwe Jiowa a chék nónnóm ren fansoun meinisin me ina met a alúkúlúkú i. Ina minne a tongeni eáni ei kél: “[Jiowa a] angasaei seni ai kewe niuokus meinisin.” (Kölf. 34:4) Inaamwo iká Tafit a fókkun niwokkus fán ekkóch nge a tongeni pworacho ngeni pwe a silei pwe Jiowa a tongei.

18. Ifa ussun ach silei án Jiowa tong a tongeni apéchékkúlakich atun sia nóm fán niwokkus?

¹⁸ Ifa ussun ach silei án Jiowa tong a tongeni apéchékkúlakich atun sia nóm lón fansoun  mi eniwokkus? Emén pioneer itan Susi a áweweei meefier me pwúlúwan we atun néúr we a angealó manawan. A erá: “Atun a weiweitá fisin eú mettóch mi fókkun áweires, a tongeni kkúú unusen manawom, me ka pwal niwokkus iká epwe pwal fissefál mettóch mi áweires.” Iei met Rachel ewe sia fós ussun me mwan a chemeni: “Eú rán, atun úa fókkun meefi letipechou me fókkun lólilen me niwokkus, úa léúwommóng le iótek ngeni Jiowa. Lón ena atun, úa meefi pwe Jiowa a ekinamwei letipei ussun chék emén inelap mi ekinamwei néún we ménúkol, iwe úa annut. Úsapw fókkun ménúki ena atun.” Emén mwán mi ásimaw itan Tasos a kalapus ren úkúúkún rúáánú ier pokiten ese mochen emén soufiu. Ifa ussun a meefi án Jiowa tong me túmún? A erá: “Jiowa a awora lap seni met a lamot ngeniei. Ena mettóch a alapaaló ái lúkúlúk pwe úa tongeni unusen lúkúlúk wóón i. Pwal eú, me ren án Jiowa we ngún mi fel, úa meefi pwapwa inaamwo iká úa nóm lón kalapus, eú leeni mi eletipechou. Ena mettóch a álisiei le kúna pwe lapólóón ái lúkúlúk wóón Jiowa, epwe pwal ina lapólóón ái meefi an tong ngeniei. Ina pwata úa poputá le regular pioneer atun úa chúen nóm lón kalapus.”

ARAP NGENI ÓM WE KOT MI TONG

19. (a) Epwe ifa masouen ach iótek iká sia silei pwe Kot a tongekich? (b) Menni lein napanapen án Jiowa tong ka fen kúna lón manawom? (Ppii ewe pwóór “ Ekkewe Wokisin mi Álisikich le Meefi án Jiowa Tong.”)

¹⁹ Meinisin pwóróusen ekkewe aramas sia káé, ra pwáári pwe Jiowa, “ewe Koten tong,” a nóm rech! (2 Kor. 13:11) A chúngú emén me emén kich. Sia lúkúlúk pwe an ‘tong enlet a chok pwellifetalekich.’ (Kölf. 32:​10, Testament mi Fö.) Lapólóón ach ekilonei ifa ussun a pwáári an tongekich, epwe pwal ina lapólóón ach meefi pwe a tongekich. Sise niwokkus le iótek ngeni me ereni úkúúkún lamoten an tong ngenikich. Sia tongeni ereni meinisin met sia eáni aúrek pwe sia lúkúlúk pwe a weweitikich me a fókkun mochen álisikich.—Kölf. 145:​18, 19.

20. Ifa ussun án Jiowa tong a efisi ach sipwe arap ngeni?

²⁰ Sia kan mochen nóm ppen eú ekkei atun fansoun patapat, iwe pwal ina ussun ach mochen nóm ren Jiowa pokiten an tong. Inaamwo iká án Jiowa tong a fókkun péchékkúl, nge a pwal ekinamwe. Ina pwata kopwe pwapwa pokiten Jiowa a tongeek. Me amwo itá kich meinisin sipwe liiwini an tong ren ach apasa: “Üa echeni [are tongei] ewe Samol mi Lapalap.”—Kölf. 116:1.