Ekkóch mwán ra mámmááritá lón ekkewe fénú chómmóng mwán ra aúcheangawa fefin. Áwewe chék, Hans, emén chónemmwen mi wisen sáifetál lón Bolivia, a erá pwe ekkóch mwán ra mámmááritá lón eú fénú mi apéchékkúla án ekkewe mwán repwe lamalamtekia. Ekkena mwán ra lúkú pwe iir mi tekia seni ekkewe fefin me fán chómmóng ra ésúfélúngawer. Emén mwán mi ásimaw itan Shengxian seni Taiwan a erá: “Lón fénúei we, chómmóng mwán ra ekieki pwe ese éch án fefin repwe waalong meefier lón án mwán fós. Iká emén mwán a waalong meefien emén fefin ussun och mettóch lón ar pwóróusfengen, neman chienan kewe repwe esiita.” Pwal ekkóch mwán ra aapaap ngeni fefin lón pwal ekkóch napanap. Áwewe chék, eli repwe apwóróusa pwóróus mi atakirikir ussun fefin nge mi ésúfélúngaw.

Sia kilisou pwe ese lifilifil menni ééreni emén a mámmááritá lón, nge a tongeni ekkesiwil. A tongeni káé pwe mwán me fefin ra taitap chék. (Efi. 4:​22-24) A tongeni fis ena ren an áppirú án Jiowa leenien áppirú. Lón ei lesen, sipwele káé ifa féfférún Jiowa ngeni fefin, ifa ussun ekkewe Chón Kraist mwán repwe káé le féfféréch ngeni ekkewe fefin ussun chék Jiowa, me ifa ussun ekkewe mwán mi ásimaw repwe akkomw le pwáári súfél ngeni fefiner kewe Chón Kraist.

IFA FÉFFÉRÚN JIOWA NGENI FEFIN?

Jiowa a isettiw ewe leenien áppirú mi unuséch ren an féfféréch ngeni fefin. I emén Sam mi kirekiréch me a tongei néún kewe meinisin. (Jon 3:16) Me ekkewe Chón Kraist fefin mi túppwél ra ussun néún mi áchengicheng me ren. Iei ekkóch alen án Jiowa pwáári an tongei me súféliti fefin.

Ese lifilifil ngeniir. Jiowa a féri mwán me fefin lón pwisin napanapan. (Ken. 1:27) Ese féraatá  ekkewe mwán ar repwe tipáchem are lipwákéch lap seni ekkewe fefin, me ese pwal aúcheani mwán lap seni fefin. (2 Kron. 19:7) A fang ngeni mwán me fefin ewe tufich le weweiti ewe enlet seni Paipel me áppirú napanapan kewe mi múrinné. A aúcheani ekkewe mwán me fefin mi lúkú i. A ngeniir ewe ápilúkúlúkún manaw esemuch wóón fénúfan are ewe wis king lón souasor me láng. (2 Pit. 1:1) A ffat pwe Jiowa ese aapaap ngeni ekkewe fefin.

A aúseling ngeniir. Jiowa a aúcheani meefien ekkewe fefin me ar kewe osukosuk. Áwewe chék, a aúseling ngeni me pélúweni án Rahel me Hana kewe iótek. (Ken. 30:22; 1 Sam. 1:​10, 11, 19, 20) Jiowa a amwékútú ekkewe soumakken Paipel ar repwe waalong pwóróusen ekkewe mwán iir mi aúseling ngeni meefien ekkewe fefin. Áwewe chék, Eperiam a álleasochisi án Jiowa emmwen le aúseling ngeni meefien pwúlúwan we Sara. (Ken. 21:​12-14) King Tafit a aúseling ngeni Apikael. Ren enletin, a meefi pwe Jiowa a tiinaaló Apikael pwe epwe fós ngeni. (1 Sam. 25:​32-35) Jises, ewe mi áppirúfichi napanapen Seman we, a aúseling ngeni inan we Meri. (Jon 2:​3-10) Ekkena pwóróus ra menlapei pwe eú alen án Jiowa pwáári pwe a súféliti fefin, ina ren an aúseling ngeniir.

A lúkúlúk wóór. Áwewe chék, Jiowa a lúkúlúk wóón If an epwe álillis wóón túmúnún unusen fénúfan. (Ken. 1:28) Atun a féri ena a pwáári pwe me ren, If emén chón álillisin Atam mi aúchea. Jiowa a pwal lúkúlúk wóón ekkewe soufós fefin iter Tepora me Hulta le éúréúra aramas, kapachelong emén soukapwúng me emén king. (Souk. 4:​4-9; 2 King 22:​14-20) Lón ei fansoun, Jiowa a ewisa ngeni ekkewe Chón Kraist fefin ar repwe féri an angang. Ekkena fefin mi túppwél ra wisen chón afalafal, pioneer, me misineri. Ra álillis lón chúngaan, kaúún, me elimelimen ekkewe Leenien Mwiich me keangen ofesilap. Ekkóch me leir ra angang lón Bethel me lón ekkewe ofesin chiyakú. Ekkena Chón Kraist fefin ra ussun eú mwichemmóngun soufiu Jiowa a kan néúnéú le apwénúetá letipan. (Kölf. 68:11) A ffat pwe me ren Jiowa ekkewe fefin rese apwangapwang are lipwákingaw.

IFA USSUN CHÓN KRAIST MWÁN REPWE KÁÉ LE FÉFFÉRÉCH NGENI FEFIN USSUN CHÉK JIOWA?

Ámi kana Chón Kraist mwán, ren ach sipwe silei iká kich mi áppirú Jiowa le féfféréch ngeni ekkewe Chón Kraist fefin, a lamot sipwe enletin etittina ekiekich me féfférúch. Ren ach sipwe féri ena, a lamot ngenikich álillis. Ussun chék eú mwesinen X-ray are fich sasing a tongeni pwáári och semmwen lón féún ngasangasen emén, iwe emén chienach mi múrinné me án Kot we Kapas a tongeni álisikich le esilla iká sia eáni ekiek ese pwúng ussun ekkewe fefin. Met sia tongeni féri pwe sipwe angei ena álillis?

Eisini emén chiechiom mi múrinné. (SalF. 18:17) Sia tongeni tingorei emén chienach mi alúkúlúk me a silleló me ren ekkewe ekkóch pwe a kirekiréch me itepék me rúúepek ekkeei kapas eis: “Mi fet napanapei ngeni ekkewe Chón Kraist fefin? Iir mi esilla pwe úa súfélitiir? Met úa tongeni féri le émúrinnéló napanapei ngeniir?” Iká chienom na a erenuk ekkóch mettóch kopwe angang wóón, kosap song. Nge kopwe fen tipemecheres le féri siwil.

Káé án Kot we Kapas. Eú alen ach sipwe silei iká sia féfféréch ngeni ekkewe Chón Kraist fefin, ina ach néúnéú án Kot we Kapas le etittina ekiekich me féfférúch. (Ipru 4:12) Atun sia káé ewe Paipel, sia állea ussun ekkóch mwán mi kirekiréch ngeni fefin me chókkewe rese. Sia tongeni aléllééi féfférúr ngeni féfférúch kewe. Pwal och, sipwe etittina chómmóng wokisin mi affata féfféréchún emén mwán ngeni emén fefin nge sipwe túmúnú pwe sisap etittina eú chék wokisin mi tongeni álisaatá och ekiek mi mwáál ussun fefin. Áwewe chék ren 1 Piter 3:​7, a erá pwe emén mwán epwe súféliti pwúlúwan pokiten a “apwangapwang.” a Itá a wewe ngeni pwe ewe mwán a aúchea, tipáchem, me lipwákéch lap seni ewe fefin? Aapw! Aléllééi alon Piter ngeni met Kalesia 3:​26-29 a affata, pwe Jiowa a filaatá fefin me  pwal ekkewe mwán ar repwe eti Jises le nemenem láng. Atun sia káé án Kot we Kapas me eisini emén chienach mi múrinné ussun napanapach ngeni ekkewe fefin, iwe sia tongeni silei ifa ussun sipwe súféliti chienach kewe fefin lón ewe napanap mi pwúúng.

IFA USSUN MWÁN MI ÁSIMAW RA PWÁÁRI AR SÚFÉLITI FEFIN CHÓN KRAIST?

Ekkewe Chón Kraist mwán lón ewe mwichefel ra tongeni káé seni án ekkewe mwán mi ásimaw mi tong leenien áppirú le súféliti ekkewe Chón Kraist fefin. Ifa ussun ekkewe mwán mi ásimaw ra akkomw le pwáári súfél ngeni ekkewe Chón Kraist fefin? Ren ar féri ekkeei mettóch.

Ra apúnga fefiner kewe Chón Kraist. Ewe aposel Paul a isettiw eú leenien áppirú mi múrinné fán iten ekkewe mwán mi ásimaw. A apúnga fitemén Chón Kraist fefin lón néún we taropwe ngeni ewe mwichefel lón Rom. (Rom 16:12) Ka tongeni anchangei úkúúkún pwapwaan ekkena fefin atun ra rong álleaan néún Paul we taropwe ngeni ewe mwichefel? Pwal ina chék ussun, ekkewe mwán mi ásimaw repwe apúnga ekkewe Chón Kraist fefin fán chómmóng ren napanaper kewe mi múrinné me ewe angang ra féri fán iten Jiowa. Repwe ámmeef ngeniir pwe chón ewe mwichefel ra súfélitiir me aúcheaniir. Eli án ewe mwán mi ásimaw kapasen apéchékkúl, fen ina met mi lamot án ekkena Chón Kraist fefin repwe rong pwe repwe tongeni sópweeló lón ar angang ngeni Jiowa fán túppwél.—SalF. 15:23.

Ekkewe mwán mi ásimaw repwe enletin apúnga ekkewe fefin me apúnger wóón met ra féri. Pwata? Emén Chón Kraist fefin itan Jessica a erá: “A mmen éch atun ekkewe Chón Kraist mwán ra ereni ekkewe fefin ‘ka mmen angéch.’ Nge áúa kon aúcheani atun ra apúngakem ren och mettóch áúa féri, áwewe chék ren ám áiti néúm kewe ar repwe mosonoson lón mwiich are ren ám awora fansoun le uwei néúm kewe chón káé ngeni mwiich.” Atun ekkewe mwán mi ásimaw ra apúnga ekkewe fefin wóón och mettóch ra féri, ra ámmeef ngeniir pwe ra aúchea me lón ewe mwichefel.

Ra aúseling ngeni ekkewe Chón Kraist fefin. Ekkewe mwán mi ásimaw mi tipetekison ra mirititi  pwe esap iir chék ra tongeni ekiekietá och kókkót mi múrinné. Ra etiwa ekkewe fefin ar repwe uwawu meefier, me ra aúselingéch atun ra fós. Atun ra féri ena, ra apéchékkúla ekkena fefin me ra pwisin kúna álillis seniir. Ifa ussun? Emén mwán mi ásimaw mi angang lón Bethel itan Gerardo, a erá: “Úa kúna pwe atun úa eisini ekkewe fefin meefier, ra álisiei le émúrinnéló ái angang. Fán chómmóng, ekkóch me leir ra fen féri och angang ren langattam fansoun lap seni ekkewe mwán.” Lón ewe mwichefel, chómmóng fefin ra wisen pioneer, me ra silei chómmóng pwóróusen ekkewe aramas lón ar leenien afalafal. Emén mwán mi ásimaw itan Bryan a erá: “Fefinach kewe Chón Kraist ra napanapeni chómmóng napanap mi múrinné me a wor rer ekkewe tufich mi lamot ngeni ach mwicheich. Ina popun kopwe káé seni ar leenien áppirú!”

Ekkewe mwán mi ásimaw mi mirit, resap mwittir tunaaló án ekkewe fefin kapasen pesepes. Pwata? Emén mwán mi ásimaw itan Edward a erá, “Meefien emén Chón Kraist fefin a tongeni álisi emén Chón Kraist mwán an epwe alapaaló an weweiti och mettóch, me minne a erá a tongeni álisi le weweiti meefien ekkewe ekkóch.” (SalF. 1:5) Inaamwo iká emén mwán mi ásimaw ese tongeni áeá án ewe fefin kapasen pesepes, nge a chúen tongeni kilisou ngeni fán iten an álillis.

Ra asukula ekkewe Chón Kraist fefin. Ekkewe mwán mi ásimaw mi mirit ra kútta atun mi fich ar repwe asukula ekkewe fefin. Áwewe chék, ra tongeni asukuler ren ifa ussun repwe emmweni ewe mwichen afalafal lón ekkewe atun ese wor emén mwán mi papatais an epwe emmweni. Ra tongeni asukuler ren néúnéún ekkewe pisekin táikú are mwesin pwe repwe tongeni álillis lón ewe angangen kaú, me elimelimen me fférsefálin ekkewe imw ach we mwicheich a áeá. Ekkewe chónemmwen lón Bethel ra asukula ekkewe fefin ar repwe túmúnú sókkopaten angang, ren choweán pekin elimelim, kamé, moni, computer, me pwal ekkóch. Atun ekkewe mwán mi ásimaw ra asukula ekkewe fefin, ra pwáári pwe ra lúkúlúk wóón ar tufichin féri ekkena angang.

Chómmóng ekkewe fefin ra áeá minne ra káé seni ekkewe mwán mi ásimaw le álisi ekkewe ekkóch. Áwewe chék, ekkóch me leir ra áeá met ra káé seni ar angangen kaú le álisi ekkewe ekkóch le férsefáli imwer mi ta mwirin och feiengaw watte. Nge ekkewe ekkóch ra áeá ekkewe tufich ra káé atun ra afalafal lein chómmóng aramas le asukula chómmóng Chón Kraist fefin lón ena esin angang. Met meefien ekkewe fefin ussun ekkewe mwán mi ásimaw mi asukuler? Emén Chón Kraist fefin itan Jennifer a erá: “Atun úa álillis lón eú ekkewe angangen kaú Leenien Mwiich, emén chónemmwen a awora fansoun le asukulaei. A kúna ewe angang úa féri, me a apúngaei. Úa sani le angang ren pún úa meefi aúcheai me a lúkúlúk wóói.”

FEIÉCHÚN ACH ÁMMEEF NGENI CHÓN KRAIST FEFIN PWE IIR ACH FAMILI

Sia tongei ekkewe fefin Chón Kraist mi túppwél ussun án Jiowa tongeer! Sipwe ámmeef ngeniir pwe ra kapachelong lón ach famili. (1 Tim. 5:​1, 2) Sia aúcheaniir me pwapwa le angangfengen me iir. Me sia fókkun pwapwa atun ra silei pwe sia tongeer me mochen álisiir. Emén Chón Kraist fefin itan Vanessa a erá: “Úa fókkun kilisou ngeni Jiowa ren ái chóni an we mwicheich, mi wor chómmóng Chón Kraist mwán lón mi fókkun apéchékkúlaei.” Emén Chón Kraist fefin seni Taiwan a erá: “Úa fókkun kilisou pwe Jiowa me an we mwicheich ra fókkun aúcheani fefin me súféliti meefier. A apéchékkúla ai lúkú me a alapaaló ái aúcheani ái chóni án Jiowa we mwicheich.”

A ifa me pwapwaan Jiowa atun a kúna án ekkewe Chón Kraist mwán mi túppwél aúcheani me súféliti fefin ussun chék i! (SalF. 27:11) Emén mwán mi ásimaw seni Scotland itan Benjamin a erá, “Chómmóng mwán lón ei fansoun rese kan súféliti fefin. Iwe atun ekkewe fefin ra tolong lón ewe Leenien Mwiich sipwe fókkun ámmeef ngeniir pwe sa súfélitiir me tongeer.” Amwo oukich meinisin sipwe fókkun achocho le áppirú Jiowa me pwáári ngeni chienach kewe fefin mi áchengicheng ewe sókkun tong me súfél mi fich ngeniir.—Rom 12:10.