LESEN 3
KÉL 35 “Filätä Mine A Fokun Mürina”
Eáni Kefil mi Apwapwaai Jiowa
“Ach niuokusiti ewe Samol mi Lapalap iei popun tipachem, nge ach silei Ewe mi Pin iei popun ach weweöch.”—SALF. 9:10.
MENLAPAN
Ussun ach sipwe áeá ach sile, weweéch, me mirit le eáni kefil mi múrinné.
1. Met a weires ngenikich meinisin ach sipwe féri?
ITEITEN RÁN a lamot sipwe féri kefil. Ekkóch me leir ra mecheres, áwewe chék ren met sipwe áni mwéngéén lesossor are ineet sipwe méúr. Nge ekkóch, a weires pún eli met sipwe filaatá epwe kkúú péchékkúlen inisich, ach pwapwa, chón ach famili, are ach fel ngeni Jiowa. Sia mochen pwe met sipwe eáni kefil epwe atoto feiéch ngenikich me chón ach famili. Nge ewe mi lamot seni meinisin, sia áneán pwe minne sia filaatá epwe apwapwaai Jiowa.—Rom 12:1, 2.
2. Ikkefa ekkewe mettóch repwe álisuk le eáni kefil mi múrinné?
2 Ka tongeni eáni kefil mi múrinné iká kopwe (1) silei tichikin pwóróusen ewe mettóch, (2) ekieki met meefien Jiowa ussun, me (3) ekiekifichi met ka tongeni filaatá. Ei lesen epwe fós ussun ekkena mettóch, me epwe pwal álisikich le kúna ifa ussun sia tongeni anganga ach tufichin ekiek.—SalF. 2:11.
SILEI TICHIKIN PWÓRÓUSEN EWE METTÓCH
3. Eáni eú kapas áwewe mi affata lamoten óm kopwe akkomw silei tichikin pwóróusen och mettóch mwen kopwe féri kefil wóón.
3 Ewe áeúin mettóch mi lamot kopwe féri pwe kopwe eáni kefil mi múrinné, ina óm kopwe silei tichikin pwóróusen ewe mettóch. Pwata a lamot ena? Anchangei emén mi úri eú semmwen mi chou me a ló chuuri emén tokter. Itá ewe tokter epwe filaatá met sókkun sáfei epwe ngeni nge esaamwo cheki are kapas eis ngeni ussun an semmwen? Aapw, esap ina. En kopwe pwal eáni kefil mi múrinné iká kopwe akkomw ekiekifichi ekkewe mettóch mi weneiti nónnómum. Ifa ussun ka tongeni féri ena?
4. Me ren met mi mak lón Än Salomon Fos 18:13, met kopwe féri pwe kopwe silei tichikin och pwóróus? (Pwal ppii ewe sasing.)
4 Lape ngeni ka tongeni silei tichikin pwóróusen ewe mettóch ren óm kapas eis. Áwewe chék, anchangei pwe ka ketiw ngeni eú pari. Kopwe ló fiti? Iká kese sissilei ewe emén mi wisen efisi ena pari are kese silei kókkótun, mi lamot kopwe eisini ekkeei esin kapas eis: “Ia epwe fis ie ewe pari, me ineet epwe fis? Fitemén repwe fiti? Ié epwe wisen emmweni? Ié kewe repwe fiti? Met epwe fis lón? Epwe wor sakaw?” Pélúwen ekkena kapas eis epwe álisuk le eáni kefil mi múrinné.—Álleani Än Salomon Fos 18:13.
Kakkapas eis pwe kopwe silei tichikin ewe mettóch (Ppii parakraf 4) a
5. Met a lamot kopwe féri mwirin óm ka silei tichikin pwóróusen ewe mettóch?
5 Mwirin óm silei tichikin pwóróusan, iwe kopwele ekiekifichi unusen ewe mettóch. Áwewe chék, kopwe fet iká ka silei pwe mi wor chókkewe rese súféliti án Paipel emmwen repwe fiti ena pari, are iká ka silei pwe epwe kawor sakaw nge ese wor chón túmúnú pwe ekkewe mi ún resap kon únnúmmóng? Óm ekiek, ena pari a tongeni wiliiti eú pari mi ngaw? (1 Pit. 4:3) Iwe nge, met kopwe féri iká kulókun ena pari a sereni kulókun óm mwiich are óm fiti afalafal? Lupwen kopwe ekieki meinisin ekkena mettóch, epwe mecheres ngonuk le féri kefil mi múrinné. Nge mi pwal wor och mettóch mi lamot kopwe féri. Ka silei meefiom ussun ena mettóch, nge epwe met meefien Jiowa ussun?—SalF. 2:6.
EKIEKI MET MEEFIEN JIOWA USSUN
6. Me ren Jemes 1:5, pwata a lamot ach sipwe tingor án Jiowa álillis?
6 Tingorei Jiowa an epwe álisuk le weweiti meefian. Jiowa a pwonei pwe epwe fang ngenikich tipáchem pwe sipwe tufichin etittina minne sipwe filaatá iká epwe apwapwaai i. A “fangafangéch ngeni meinisin” ena esin tipáchem, me “esap song ngeni ena emén mi tingor.”—Álleani Jemes 1:5.
7. Ifa ussun kopwe silei meefien Jiowa ussun och mettóch? Áweweei.
7 Mwirin óm tingorei Jiowa an emmwen, ppiiéchú met a pélúwen ngeni. Iei eú kapas áwewe: Iká ka sái nge ka rukoló, ese mwáál kopwe tingorei emén chón ena leeni an epwe álisuk. Nge met, itá kopwe fetál seni me mwen an epwe kapas? Aapw. Kopwe aúselingéch ngeni. Iwe, pwal ina chék ussun, mwirin óm tingorei Jiowa óm tipáchem, achocho le kútta pélúwan ren óm kútta menni allúk are kapasen emmwen lón Paipel a weneiti óm we osukosuk. Áwewe chék, atun ka ekieki iká kopwe fiti are kosap fiti ewe pari sia fen fós ussun, neman kopwe mochen kútta met Paipel a apasa ussun pari mi ngaw, chiechi mi ngaw, me lamoten óm kopwe akkomwa angangen ewe Mwúún Kot lap seni pwisin mochenum.—Mat. 6:33; Rom 13:13; 1 Kor. 15:33.
8. Met ka tongeni féri iká a lamot ngonuk álillis le kútta och pwóróus? (Pwal ppii ewe sasing.)
8 Iwe nge, fán ekkóch eli a lamot ngonuk álillis le kútta ewe pwóróus ka mochen. Eli ka tongeni kútta álillis seni emén chienach mi lipwákéch. Iwe nge, ka pwal tongeni kúna feiéch iká kopwe pwisin research. A wor chómmóng ach minen álillisin káé mi tongeni álisuk, áwewe chék ren ewe Research Guide for Jehovah’s Witnesses me ewe Scriptures for Christian Living. Chemeni pwe ewe mettóch ka mochen achocho ngeni, ina óm eáni kefil epwe apwapwaai Jiowa.
Ekieki met meefien Jiowa (Ppii parakraf 8) b
9. Ifa ussun sia tongeni lúkúlúk pwe minne sia eáni kefil epwe apwapwaai Jiowa? (Efisus 5:17)
9 Ifa ussun sia tongeni lúkúlúk pwe minne sia eáni kefil epwe apwapwaai Jiowa? A lamot sipwe silefichi i. Ewe Paipel a apasa: “Ach silei Ewe mi Pin iei popun ach weweöch.” (SalF. 9:10) Ewer, weweéch a feito seni ach silei napanapen Jiowa kewe, minne a tipeni, me minne a sani are oput. Pwisin eisinuk, ‘Me ren met úa silei ussun Jiowa, met sókkun kefil úa tongeni féri epwe apwapwaai i?’—Álleani Efisus 5:17.
10. Pwata án Paipel emmwen a kon aúchea lap seni éérenien ach famili are fénúach?
10 Ren ach sipwe apwapwaai Jiowa, fán ekkóch sia féri och mettóch mi eletipengawa chón ach famili are chiechiach kewe. Áwewe chék, ekkóch sam me in mi chúngú nónnómun néúr, eli repwe fókkun péchéú án néúr we nengngin epwe pwúlúweni emén mwán mi wéúéch, are emén mi tongeni awora watteen kisan, inaamwo iká ese péchékkúl án átena riri ngeni Jiowa. Ewer, ra mochen án néúr na epwe túmún lón pekin áion, nge ié epwe álisi neminna lón an riri ngeni Jiowa? Ifa ekiekin Jiowa ren ena mettóch? Sipwe kúna pélúwan me lón Mattu 6:33. Lón ei wokisin, Jises a pesei Chón Kraist ar repwe “kúkkútta akkomw án Kot we Mwú.” Inaamwo iká sia asamolu semach kewe me inach me súféliti aramasen lón leeniach we, nge ewe mi kon lamot ngenikich, ina ach sipwe apwapwaai Jiowa.
EKIEKIFICHI MET KA TONGENI FILAATÁ
11. Ifa ewe mettóch epwe álisuk le silei met kopwe filaatá? (Än Salomon Fos 2:11)
11 Lupwen ka kúna ekkewe kapasen emmwen mi weneiti óm we kefil, a lamot kopwe ekiekifichi met ekkewe ka tongeni filaatá. (Álleani Än Salomon Fos 2:11.) Mirit a tongeni túmúnuk, weween epwe álisuk le kúna met a tongeni fis lón ekkewe kefil kopwe filaatá. Fán ekkóch, a mecheres ewe kefil kopwe féri, nge esap ina ussun ren kefil meinisin. Mirit epwe álisuk le eáni kefil mi múrinné pwal mwo nge ekkewe kefil mi áweires.
12-13. Ifa ussun mirit a tongeni álisuk le eáni kefil mi múrinné ren menni angang kopwe eáni?
12 Anchangei ei. Ka kút óm angangen moni pwe kopwe atufichi óm famili. A wor ruu angang mi suuk. Ka ekieki meinisin tichikin pwóróusan, áwewe chék ren met sókkun angang ena, kókkótun ren kulókun me ránin, ifa úkúúkún towauen óm kopwe sái ngeni, me pwal ekkóch. Iir me ruu ekkena angang rese ú ngeni án Paipel emmwen. Ese mwáál, ka kon sani ewe eú pokiten ka efich angangen lón are a watte peioffun. Iwe nge, a pwal wor ekkóch mettóch mi lamot kopwe akkomw ekieki ussun me mwen kopwe filaatá.
13 Áwewe chék, kulókun ekkena angang ra taitap ngeni kulókun óm kewe mwiich? Ekkena angang repwe angealó ewe fansoun itá kopwe áeá le álisi chón óm we famili ar repwe meefi túmún, pwapwa, me ririéch ngeni Jiowa? Óm ekieki ekkena esin kapas eis, epwe álisuk le akkomwa “ekkewe mettóch mi fókkun aúchea,” weween óm fel me met mi lamot ngeni óm famili, lap seni óm alapaaló noum moni. (Fil. 1:10a) Iwe, ka tongeni eáni eú kefil Jiowa epwe efeiéchú.
14. Ifa ussun ach eáni mirit me pwáári tong a álisikich ach sisap áchepeteki ekkewe ekkóch?
14 Mirit a pwal amwékútúkich ach sipwe ekieki ifa ussun sipwe túmúnú met sipwe filaatá pwe site “áchepeteki ekkewe ekkóch.” (Fil. 1:10b) A mmen lamot ena atun sipwe féri ach kefil wóón ekkóch mettóch, ren choweán úfach are foutach. Áwewe chék, eli sia kon sani och sókkun stylin úf are fout. Nge met sipwe féri iká emén lón ewe mwichefel are lúkún ewe mwichefel epwe chepetek ren? Mirit epwe álisikich le súféliti meefian. Tong epwe amwékútúkich le kútta “feiéchún ekkewe ekkóch” me pwáári súfél. (1 Kor. 10:23, 24, 32; 1 Tim. 2:9, 10) Iká ina, iwe sipwe eáni kefil mi pwáári pwe sia tongei me súféliti aramas.
15. Met a lamot kopwe ekieki ussun me mwen óm kopwele féri minne ka filaatá?
15 Iká kopwe féri eú kefil mi aúchea, ekieki met ekkewe mi lamot kopwele féri lón minne ka filaatá. Jises a áiti ngenikich pwe me mwen sipwe féri och mettóch, a lamot sipwe “apacha úkúúkún méméén.” (Luk 14:28) Ina minne, kopwe ekieki úkúúkún ewe fansoun, pisek, me tufich mi lamot ngonuk pwe epwe sópwéch ena kefil. Fán ekkóch, eli kopwe akkomw fós ngeni chón óm we famili ren met a lamot emén me emén epwe féri ren an epwe sópwéch ewe kefil. Pwata a aúchea ena esin kókkót? Ena mettóch, eli a tongeni álisuk le mirititi pwe a lamot ekkóch siwil lón minne ka filaatá, are fen pwáári pwe mi wor eú mi fen kon múrinné seni. Pwal och, iká ka apachaalong chón óm famili me aúseling ngeni meefier, repwe fókkun mochen álisuk pwe epwe sópwéch ewe kefil.—SalF. 15:22.
EÁNI KEFIL EPWE SÓPWÉCH
16. Ikkefa ekkewe mettóch epwe álisuk le eáni kefil mi sópwéch? (Pwal ppii ewe pwóór “ Ifa Ussun Kopwe Féri Kefil mi Múrinné?”)
16 Iká ka fen féri meinisin ekkeei mettóch asan, iwe, ka mmólnetá le féri kefil mi múrinné. Ka fen silei unusen ewe pwóróus me etittina ekkewe kapasen emmwen mi weneiti epwe álisuk le féri kefil mi apwapwaai Jiowa. Iwe iei, ka tongeni tingorei Jiowa an epwe álisuk le féri óm kefil pwe epwe sópwéch.
17. Ifa kiien óm féri kefil mi múrinné?
17 Inaamwo iká ka eáni chómmóng kefil mi sópwéch me lóóm, nge chemeni pwe kiien óm féri kefil mi múrinné, ina óm lúkúlúk wóón ewe tipáchem seni Jiowa, nge esap wóón pwisin óm tipáchem are met a fen fis ngonuk lóóm. I chék a tongeni fang ngonuk sile mi enlet, weweéch, me mirit. Meinisin ekkena, iir kinikinin tipáchem. (SalF. 2:1-5) Jiowa a tongeni álisuk le eáni kefil mi apwapwaai i.—Kölf. 23:2, 3.
KÉL 28 Wiliti Chiechien Jiowa
