1. Met sia tongeni féri pwe sipwe apwapwaai Jiowa?

 ANCHANGEI pwe ka liffang ngeni emén ka tongei och mettóch mi aúchea, ling, me a tongeni áeá. Epwe ifa me letipengawom iká ena emén a angei ena liffang me waalong lón eú kapet me ese pwal ekieki! Nge iká eménna a áeáéchú ena liffang me pwáári an kilisou ngonuk, ese mwáál kopwe fókkun pwapwa. Ifa ussun ena kapas áwewe a riri ngeni án Jiowa we liffang, ewe méén kepich? Jiowa a fangoló Néún we fán ásengesich. Jiowa epwe fókkun pwapwa atun sia pwáári ach kilisou ren ena liffang mi aúchea me pwal ren an tong, ewe mi amwékútú i le awora ewe méén kepich!—Jon 3:16; Rom 5:​7, 8.

2. Met sipwe káé lón ei lesen?

² Iwe nge ló, ló, ló, eli sisap chúen ekieki pwe ewe méén kepich, ina eú liffang mi aúchea. Ussun itá sia waalong ena liffang lón eú kapet, ikewe sise tongeni kúna me ie are ekieki ussun. Ren an esap fis ena, a lamot ach sipwe kan ekkekieki ussun meinisin met Kot me Kraist ra féri fán itach. Ei lesen a tongeni álisikich le féri ena. Sipwe káé ifa ussun sia tongeni feiéch seni ewe méén kepich iei me ifa ussun sia tongeni feiéch seni lón fansoun mwach. Sipwe pwal káé ifa ussun sipwe pwáári ach kilisou ren án Jiowa tong, nge ákkáeúin atun fansoun ei Áchechchem.

USSUN ACH KÚNA FEIÉCH LÓN EI FANSOUN

3. Ifa eú mettóch sia feiéch ren iei seni ewe méén kepich?

³ Sia fen kúkkúna feiéch seni án Kraist we méén kepich. Áwewe chék, pokiten ewe méén kepich, Jiowa a omusaaló ach kewe tipis. Ese pwal lamot an epwe omusakicheló, nge a mochen. Ewe soumakken kélfel mi meefi an kilisou a apasa:  “Pun en, ai Samol, ka kirikiröch o amusala tipis.”—Kölf. 86:5; 103:​3, 10-13.

4. Jiowa a awora ewe méén kepich fán iten ié? (Luk 5:32; 1 Timoty 1:15)

⁴ Eli ekkóch ra meefi pwe ese fichitiir án Jiowa epwe omusaaló tipisiir. Ren enletin, ese wor emén leich a fichiiti an epwe omusaaló tipisin. Ewe aposel Paul a erá pwe ‘ese fichiiti an epwe iteni emén aposel’ pokiten a “eriáfféwúmwááli ewe mwichefelin Kot.” Nge mwirin, a pwal erá: “Pokiten án Kot kirekiréch mi somwoló ngeniei, úa tufichin féri ei angang.” (1 Kor. 15:​9, 10) Lupwen sia áier seni ach kewe tipis, Jiowa a omusakicheló. Pwata? Esap pokiten a fichiitikich, nge pokiten a tongekich. Iká ka lichippúng ren óm meefi pwe ese fich ngonuk án Jiowa omusaaló tipisum, kopwe chemeni pwe Jiowa ese awora ewe méén kepich fán iten aramas ese wor tipisiir, nge a awora fán iten aramas mi tipis mi áier.—Álleani Luk 5:32; 1 Timoty 1:15.

5. Itá mi wor án emén pwúúng le angei án Jiowa úméúméch? Áweweei.

⁵ Ese wor emén me leich epwe meefi pwe a fichiiti án Jiowa úméúméch pokiten chék a fen angang ngeni ren fite fite ier. Ewer, Jiowa a aúcheani mettóch meinisin sia féri fán itan. (Ipru 6:10) A fang ngenikich Néún we ussun chék eú liffang ese kamé, nge esap méén eú angang sia féri. Ina minne, epwe mwáál ach sipwe ekieki pwe pokiten sia féri chómmóng mettóch fán iten Jiowa, iwe a fichiitikich an epwe omusa tipisich. Iká sia eáni ena ekiek, iwe ussun itá ese pwal lamot án Jises epwe máló fán itach.—Apépé ngeni Kalesia 2:21.

6. Pwata Paul a angang weires lón án Jiowa angang?

⁶ Paul a silei pwe an angei án Jiowa chen ese lóngólóng wóón úkúúkún met a féri fán itan. Nge pwata chék a fókkun angang weires fán iten Jiowa? Esap ren an epwe pwáári pwe a fich ngeni án Jiowa chen, nge ren an epwe pwáári an kilisou ren án Jiowa úméúméch mi somwoló. (Efi. 3:7) Sia pwal ussun Paul le sópweeló le tinikken lón ach angang ngeni Jiowa esap ren ach sipwe angei an úméúméch, nge ren ach sipwe pwáári ach aúcheani an na úméúméch.

7. Ifa pwal eú feiéch sia kúna lón ei fansoun ren ewe méén kepich? (Rom 5:1; Jemes 2:23)

⁷ Pwal iei eú feiéch sia kúna lón ei fansoun ren ewe méén kepich. Sia tufichin ririéch ngeni Jiowa. a Ussun met sia káé lón ewe lesen mwen ei pwe atun sia uputiw, ese wor ach riri ngeni Kot. Iwe nge pokiten ewe méén kepich, sia tongeni pwapwaiti ach “kinamwe ngeni Kot” me pwal ririéch ngeni i.—Álleani Rom 5:1; Jemes 2:23.

8. Pwata a lamot ach sipwe kilisou ngeni Jiowa ren ach tufichin iótek ngeni?

⁸ Ach iótek ngeni Jiowa ina eú mettóch mi fókkun aúchea mi tufich ren ach eáni eú ririéch ngeni. Jiowa ese chék rong án néún kewe aramas iótek atun ra chufengen lón ar kewe mwiich, nge a pwal rong án emén me emén iir pwisin iótek. Ach iótek a tongeni ekinamwei letipach me ekiekich, nge esap chék ina met iótek a álilliséch lón. A tongeni apéchékkúlaló ach riri ngeni Kot. (Kölf. 65:2; Jem. 4:8; 1 Jon 5:14) Atun Jises a nóm fénúfan, a kan ikkiótek ngeni Jiowa pwe a silei pwe Jiowa a aúseling ngeni me a silei pwe an iótek epwe apéchékkúla an riri ngeni Seman na. (Luk 5:16) Sia fókkun kilisou pwe pokiten ewe méén kepich, sia tongeni chiechien Jiowa me pwal mwo nge fós ngeni lón iótek!

 USSUN ACH KÚNA FEIÉCH LÓN MWACHKKAN

9. Lón fansoun mwach, ifa ussun ewe méén kepich epwe efeiéchú ekkewe chón fel ngeni Jiowa mi túppwél?

⁹ Ifa ussun ekkewe chón fel ngeni Jiowa mi túppwél repwe feiéch ren ewe méén kepich lón fansoun mwach? Jiowa epwe fang ngeniir manaw esemuch. Chómmóng aramas ra ekieki pwe esap tufich ewe manaw esemuch pokiten ren fite fite ier aramas ra kan mámmáló. Nge letipen Jiowa pwe aramas repwe manaw tori feilfeiló. Iká Atam ese tipis, iwe esap wor emén epwe ekieki pwe ese tufich ewe manaw esemuch. Me inaamwo iká a weires ach sipwe ekieki pwe sia tongeni manaw tori feilfeiló, nge sia tongeni lúkú pwe epwe fis pokiten sia silei pwe Jiowa a méénikich ren manawen pwisin Néún we, ewe liiwin mi mémmóng.—Rom 8:32.

10. Met ekkewe mi kepit me ekkewe ekkóch siip ra mwétéresiiti?

¹⁰ Inaamwo iká manaw esemuch ina feiéchúch lón fansoun mwach, nge Jiowa a mochen ach sipwe ekkekieki ussun lón ei fansoun. Ekkewe mi kepit ra mwétéresiiti manawer mi apwapwa lón láng atun repwe fiti Kraist le nemeni unusen fénúfan. (Pwár. 20:6) Ekkewe ekkóch siip ra pwal mwétéresiiti ar repwe manaw lón ewe paratis wóón fénúfan, ikewe esap chúen wor metek, riáfféú, are letipechou ie. (Pwár. 21:​3, 4) En emén lein ekkewe ekkóch siip mi eáni ápilúkúlúkún manawffóch wóón ei fénúfan? Ese kisikis aúchean ena liffang seni ewe manaw lón láng. Jiowa a férikichetá pwe sipwe manaw wóón ei fénúfan, ina popun ach manaw tori feilfeiló epwe atoto ach unusen pwapwa.

11-12. Ikkefa ekkóch ekkewe feiéch sia mwétéresiiti repwele fis lón ewe Paratis? (Pwal ppii ekkewe sasing.)

¹¹ Anchangei epwe ifa ussun manawom lón ewe Paratis wóón fénúfan. Esap chúen wor óm lólilen ussun semmwen are máló. (Ais. 25:8; 33:24) Jiowa epwe fang ngonuk meinisin ekkewe mettóch mi múrinné ka mochen. Met sókkun mettóch ka mochen káé? Ka mochen alapaaló óm silei ussun ekkewe man? Ka  mochen káé ettikin ekkewe pisekin nikáttik? Ka mochen káé chúnga? Lón paratis, epwe lamot ngenikich chókkewe iir mi sile anapanapen me kaúún imw, me epwe pwal lamot án aramas repwe atake me ffér mwéngé, ffér ekkewe pisekin angang, me fót irá me túmúnúúr. (Ais. 35:1; 65:21) Pokiten esap wor múchchún manaw, iwe epwe naf óm fansoun le káé ese lifilifil met ka ekiekin káé.

¹² A ifan me apwapwaan ach sipwe souni ekkewe repwe manawsefál! (Féf. 24:15) Pwal anchangei ussun óm kopwele pwapwa le alapaaló óm káé ussun Jiowa ren óm etittina ussun chómmóng férian kewe. (Kölf. 104:24; Ais. 11:9) Nge lap seni meinisin, sisap chúen tipis, iwe sipwele tongeni angang ngeni Jiowa nge esap pwal chúen lamot ach sipwe tingor omusomus. Itá kopwe péútaaló ekkena feiéch fán iten chék ewe pwapwa kopwe ‘meefi ren ekis fansoun ren óm féri tipis’? (Ipru 11:25) Aapw! Ena manaw mi amwarar sipwele eáni, epwe fókkun múrinné lap seni met sia tongeni angei lón ei ótót iei. Chemeni pwe ach wikkiti ewe Paratis epwe much, pwe ekiseló chék sipwele fen nóm lón. Iká esap pwúlún án Jiowa tongekich ren an awora ewe méén kepich, esap tongeni fis ekkena mettóch!

PWÁÁRI ÓM KILISOU REN ÁN JIOWA TONG

13. Ifa ussun sia tongeni pwáári ngeni Jiowa úkúúkún ach aúcheani an tongekich? (2 Korint 6:1)

¹³ Ifa ussun sia tongeni pwáári ngeni Jiowa úkúúkún ach aúcheani an awora ewe méén kepich fán itach? Sia tongeni féri ena ren ach akkomwa an angang lón manawach. (Mat. 6:33) Ren enletin, Jises a máló “pwe ekkewe mi manaw resap chúen manaw fán pwisin iter, nge fán iten ewe emén a máló fán iter me manawsefálitá.” (2 Kor. 5:15) Sise fókkun mochen an epwe tiwe senikich án Jiowa kirekiréch mi somwoló.—Álleani 2 Korint 6:1.

14. Ifa ussun sipwe pwáári pwe sia lúkúlúk wóón án Jiowa emmwen?

¹⁴ Sia pwal tongeni pwáári ngeni Jiowa úkúúkún ach aúcheani an tongekich ren ach lúkúlúk wóón i me álleasochisi an emmwen. Ifa ussun? Atun a wor ach kefil, áwewe chék ren úkúúkún ach sukul are met sókkun angangen moni sipwe eáni, a lamot ach sipwe kútta met Jiowa a mochen fán itach. (1 Kor. 10:31; 2 Kor. 5:7) Atun sia pwáári ach lúkú ren ach féffér, epwe fis ekkeei mettóch mi amwarar, áwewe chék epwe lallapoló ach lúkú me sipwe ririéchúló ngeni Jiowa. Me ach ápilúkúlúkún manaw tori feilfeiló, epwe fókkun núkúchar.—Rom 5:​3-5; Jem. 2:​21, 22.

15. Ifa ussun sipwe pwáári ach aúcheani ewe méén kepich atun ewe Áchechchem?

¹⁵ A pwal wor eú alen ach sipwe pwáári ngeni Jiowa úkúúkún ach aúcheani an tong. Ina ren ach achocho úkúúkún ach tufich atun ei fansoun Áchechchem le pwáári ngeni Jiowa úkúúkún ach aúcheani ewe méén  kepich. Me lúkún ach akkóta ach sipwe fiti, sia pwal tongeni etiwa ekkewe ekkóch ar repwe pwal fiti. (1 Tim. 2:4) Áweweei ngeni chókkewe ka etiwer met epwe fis atun ena Áchechchem. Epwe álilliséch iká kopwe akkatola ngeniir ekkewe video, Pwata Jesus A Máló? me Chechchemeni Málóón Jesus, mi nóm wóón jw.org/chk. Ekkewe mwán mi ásimaw repwe túmúnú ar repwe etiwa chókkewe rese chúen akkapwénúetá wiser wisen emén Chón Kraist. Anchangei ewe pwapwa lón láng me wóón fénúfan atun ekkóch néún Jiowa kewe siip mi mwálecheló ra liwinsefál! (Luk 15:​4-7) Atun ewe Áchechchem, sipwe achocho le kapwong ngeni esap chék chienach kewe, nge ákkáeúin ekkewe mineféto are chókkewe a ttam ar rese chúen fiffiti mwiich. Sia mochen ámmeef ngeniir pwe sia etiwaéchúúr.—Rom 12:13.

16. Pwata a lamot ach sipwe alapaaló ach fiti ewe angangen afalafal atun fansoun ewe Áchechchem?

¹⁶ Ka tongeni alapaaló óm fiti ewe angangen afalafal atun fansoun ewe Áchechchem? Ina eú alen óm pwáári óm kilisou ren meinisin met Jiowa me Jises ra féri fán itom. Lapólóón óm fiffiti ewe angangen afalafal pwal ina lapólóón óm kúna án Jiowa álillis, me óm lúkúlúk wóón i epwe pwal péchékkúleló. (1 Kor. 3:9) Pwal och, túmúnú pwe kopwe fiti ewe kókkótun álleaan Paipel fán iten ewe Áchechchem mi nóm lón ewe Etittina Paipel Iteiten Rán are lón ewe minen káé fán iten mwiich. Eli kopwe pwal mwo nge mochen filaatá le áeá ena kókkótun álleaan Paipel fán iten óm pwisin káéén Paipel.

17. Met a apwapwaai letipen Jiowa? (Pwal ppii ewe pwóór “ Minne Ka Tongeni Féri pwe Kopwe Pwáári Óm Kilisou Ngeni Jiowa.”)

¹⁷ Ese mwáál pokiten nónnómun manawom, iwe epwe weires óm kopwe apwénúetá meinisin ekkeei emmwen lón ei lesen. Iwe nge, chemeni pwe Jiowa ese nefótófót wóón úkúúkún met ka tongeni féri me apépééi ngeni met ekkewe ekkóch ra féri. I a kúna met masouen letipom. A pwapwa atun a kúna úkúúkún óm kilisou ngeni ren ewe liffang mi aúchea a fang ngonuk, ina ewe méén kepich.—1 Sam. 16:7; Mark 12:​41-44.

18. Pwata sipwe pwáári ach kilisou ngeni Jiowa Kot me Jises Kraist?

¹⁸ Pokiten chék ewe méén kepich, ach tipis a tongeni musoló, sia tongeni chiechi ngeni Jiowa, me eáni ewe ápilúkúlúkún manaw esemuch. Amwo fansoun meinisin sipwe pwáári ach kilisou ren án Jiowa tong, ewe a amwékútú an epwe fang ngenikich ekkena feiéch. (1 Jon 4:19) Amwo sipwe pwal pwáári ach kilisou ngeni Jises, ewe mi fókkun tongekich ina popun a fangoló manawan fán itach!—Jon 15:13.