1. Pwata a múrinné ach sipwe fiti Áchechchemen án Jises máló iteiten ier?

 KOPWE fókkun tipeeú ngeni pwe ewe méén kepich ina eú liffang mi fókkun aúchea! (2 Kor. 9:15) Án Jises asoresini manawan, a atufichi óm ririéch ngeni Jiowa Kot. A pwal atufichi óm kopwe eáni ewe ápilúkúlúkún manaw esemuch. A mmen fich ach sipwe pwáári ach kilisou ren ewe méén kepich me ngeni Jiowa, ewe a awora ena méén kepich pokiten a fókkun tongekich! (Rom 5:8) Ren ach sipwe sópweeló le pwáári ach kilisou ren ewe méén kepich me chechchemeni minne Jiowa me Jises ra féri fán itach, Jises a allúkú ngenikich ach sipwe féri iteiten ier Áchechchemen an we máló.—Luk 22:​19, 20.

2. Met sipwe káé lón ei lesen?

² Lón ei ier, epwe fis ewe Áchechchem lón April 12, 2025, a sereni Ammól. Ese mwáál, kich meinisin sia akkóta le fiti. Sipwe fókkun feiéch iká sia awora fansoun atun ewe Áchechchem le ekilonei a met Jiowa me Néún we ra fen féri fán itach. Sipwe káé lón ei lesen met ewe méén kepich a áiti ngenikich ussun Jiowa me Néún we. Lón en lesen mwirin, sipwe káé ifa ussun sia tongeni feiéch seni ewe méén kepich me ifa ussun sia tongeni pwáári ach kilisou.

MINNE EWE MÉÉN KEPICH A ÁITI NGENIKICH USSUN JIOWA

3. Ifa ussun málóón emén mi unuséch a tufichin angasaaló fite million aramas seni tipis me máló? (Pwal ppii ewe sasing.)

³ Ewe méén kepich a áiti ngenikich ussun án Jiowa pwúngiéch. (Tut. 32:4) Atun Atam a álleasolapa Kot, a wiliiti chón tipis me a máló. Pokiten kich mwirimwirin Atam, sia pwal wiliiti chón tipis me sia máló. (Rom 5:12) Ren án Jiowa epwe angasakicheló seni tipis me máló, a akkóta án Jises epwe awora  ewe méén kepich. Nge ifa ussun málóón emén mi unuséch a tufichin angasaaló fite million aramas seni tipis me máló? Iei met aposel Paul a apasa: “Ussun chék ren án ewe emén aramas [Atam] álleasolap, chómmóng ra wiliiti chón tipis, iwe pwal ren án ewe emén [Jises] álleasochis, chómmóng repwe wiliiti aramas pwúng.” (Rom 5:19; 1 Tim. 2:6) Weween pwe aramas meinisin ra tipis me máló ren án emén mwán mi unuséch álleasolapa Kot. Ina minne, ren ach sipwe ngaseló seni tipis me máló, a lamot án emén mwán mi unuséch epwe álleasochisi Kot.

4. Pwata Jiowa ese chék mut ngeni néún Atam kewe mi álleasochisi i ar repwe manaw tori feilfeiló?

⁴ Itá a wesewesen lamot án Jises epwe máló pwe epwe angasakicheló? Pwata Jiowa ese chék mut ngeni néún Atam kewe mi álleasochisi i ar repwe manaw tori feilfeiló? Me ren kich aramas sise unuséch, pwe ussun a fen éch an epwe chék féri ena pwe epwe tawe ewe osukosuk. Nge iká Jiowa epwe féri ena, iwe esap tongeni tipeeú ngeni an féfférún pwúngiéch. Pokiten Jiowa mi pwúng, esap fókkun tunaaló án Atam féfférún álleasolap.

5. Pwata sia tongeni lúkúlúk pwe fansoun meinisin Jiowa epwe chék féfféri minne mi pwúng?

⁵ Iwe nge, ifa ussun iká Jiowa ese awora ewe méén kepich nge a fen tunaaló an féfférún pwúngiéch ren an mut ngeni mwirimwirin Atam kewe rese unuséch ar repwe manaw tori feilfeiló? Eli aramas repwe ekieki iká Kot epwe pwal tunaaló an féfférún pwúngiéch lón ekkóch mettóch. Áwewe chék, eli aramas repwe tipemwárámwár iká Jiowa epwe apwénúetá meinisin met a eáni pwon. Ese pwal lamot ach sipwe lólilen iká epwe fis ena. Pwata? Pún Jiowa a féri minne mi pwúngiéch inaamwo iká an féri ena a wewe ngeni an epwe asoresini manawen pwisin Néún we. Ina minne, sia tongeni lúkúlúk pwe fansoun meinisin epwe chék féfféri minne mi pwúng.

6. Ifa eú alen án ewe méén kepich pwáári án Jiowa tong? (1 Jon 4:​9, 10)

⁶ A pwal wor eú napanap mi ákkáeúin amwékútú Jiowa le awora ewe méén kepich, ina an tong. (Jon 3:16; álleani 1 Jon 4:​9, 10.) Ewe pwóróus ussun ewe méén kepich a pwáári pwe Jiowa ese chék mochen ach sipwe eáni manaw esemuch, nge a pwal mochen ach sipwe chóni an we famili. Ekieki ei: Atun Atam a tipis, Jiowa a atowu i me lein chón An we famili. Ina popun atun sia uputiw, sise pwal chóni ena famili. Iwe nge ren ewe méén kepich, Jiowa a omusaaló ach kewe tipis me ló, ló, ló, epwe atolonga lón an we famili meinisin chókkewe mi  anganga ar lúkú me álleasochisi i. Pwal mwo nge iei sia tongeni ririéch ngeni Jiowa me chienach kewe Chón Kraist. Ewer, Jiowa a enletin tongekich.—Rom 5:​10, 11.

7. Ifa ussun án Jises riáfféú a álisikich le weweiti úkúúkún án Jiowa tongekich?

⁷ Sia tongeni weweéchúiiti úkúúkún án Jiowa tongekich iká sipwe ekieki úkúúkún metekin letipan ren an kúna riáfféún Néún we. Setan a erá pwe ese wor emén me lein néún Jiowa kewe chón angang epwe akkamwéchú an túppwél atun a nóm lón weires. Ren án Jiowa epwe pwáári chofonan Setan, a mut ngeni Jises an epwe kúna riáfféú me mwen an epwe máló. (Hiop 2:​1-5; 1 Pit. 2:21) Jiowa a kúna án ekkewe néúwisin lamalam turunufasa Jises, án ekkewe soufiu awata, me ar chúfélúetá wóón efóch irá. Jiowa a kúna án Néún na mi áchengicheng máló lón ewe napanap mi fókkun áweires. (Mat. 27:​28-31, 39) A wor án Jiowa manaman le aúkaló met a fiffis, ussun chék ren met ekkewe chón oputa ra apasa, “Iká Kot a pwapwaiti, iwe, Kot epwe amanawa i.” Jiowa a fókkun tongeni féri ena. (Mat. 27:​42, 43) Iwe nge, iká epwe angolong me aúkaló met a fiffis, iwe esap wor ewe méén kepich, me esap wor ach ápilúkúlúk. Ina popun, Jiowa a mut ngeni Néún we an epwe likiitú fán weires tori an máló.

8. Jiowa mi meefi weires atun a kúna án Néún we nóm fán riáfféú? Áweweei. (Pwal ppii ewe sasing.)

⁸ Sisap ekieki pwe pokiten Kot mi unusen manaman, iwe ese wor ren memmeef. Sia silei pwe kich sia ffér lón napanapan me a wor rech memmeef, iwe weween a pwal wor ren memmeef. Áwewe chék, ewe Paipel a néúnéú ekkewe esin kapas ‘chou’ me ‘song’ le áweweei án Jiowa memmeef. (Kölf. 78:​40, 41) Pwal och, áwewe chék ren pwóróusen Eperiam me Aisek. Jiowa a ereni Eperiam an epwe eáni asor néún we ákkáláemén. (Ken. 22:​9-12; Ipru 11:​17-19) Ekieki ussun ekkewe sókkopaten memmeef Eperiam a meefi atun a ammólnatá ninniilóón néún we Aisek. Iwe, epwele fen ifan me letipechoun Jiowa atun a kakkatol án ekkewe aramas mi ngaw eriáfféwú Néún we tori an a máló!—Ppii wóón jw.org ewe video Imitate Their Faith—Abraham, Part 2.

9. Met sia tongeni káé seni Rom 8:​32, 38, 39 ussun án Jiowa tong?

⁹ Ewe méén kepich a áiti ngenikich pwe ese wor án emén tong epwe léllé ngeni án Jiowa tongekich, esap pwal mwo nge án emén aramasach tongekich are án emén chiechiach. (Álleani Rom 8:​32, 38, 39.) Sia tongeni unusen lúkúlúk pwe Jiowa a tongekich lap seni ach tongei pwisinkich. Ka mochen manaw tori feilfeiló? A fen kon lap án Jiowa mochen óm kopwe manaw. Ka mochen an epwe musoló óm kewe tipis? A fen kon lap  án Jiowa mochen an epwe musoló. Nge a chék wor eú an tingor, ina ach sipwe etiwa an we liffang mi aúchea ren ach anganga ach lúkú i me álleasochisi. Ewe méén kepich ina eú liffang mi aúchea mi pwáári úkúúkún watteen án Jiowa tongekich. Me lón ewe ótót séfé, epwe fen kon lapóló ach silei ussun án Jiowa tong.—SalAf. 3:11.

MINNE EWE MÉÉN KEPICH A ÁITI NGENIKICH USSUN JISES

10. (a) Ifa ewe mettóch a ákkáeúin áweiresi Jises atun a ninniiló? (b) Ifa ussun Jises a pwáári pwe Setan a kapas chofona? (Pwal ppii ewe pwóór “ Án Jises Túppwél A Pwáári pwe Setan A Kapas Chofona.”)

¹⁰ Jises a fókkun chúngú itéchún Seman we. (Jon 14:31) Jises a fókkun weires pwe kapwúngúlóón an ninniiló ussun emén mi ésúfélúngawa Kot me emén chón atai allúk, a tongeni eitengawa Seman we. Ina minne, a iótek: “Semei, iká mi tufich, amwo ei kap epwe ló seniei.” (Mat. 26:39) Ren án Jises akkamwéchú an túppwél ngeni Jiowa tori an máló, a unusen pwáári pwe Setan a kapas chofona fán iten Seman we.

11. Ifa ussun Jises a pwáári watteen an tongei aramas? (Jon 13:1)

¹¹ Ewe méén kepich a pwal áiti ngenikich pwe Jises a fókkun tongei aramas, ákkáeúin néún kewe chón káé. (SalF. 8:31; álleani Jon 13:1.) Áwewe chék, Jises a silei pwe epwe fókkun áweires ekkóch ekkewe mettóch epwe féri wóón fénúfan, nge ákkáeúin ren málóón mi eriáfféú. Iwe nge, a féri meinisin ekkena mettóch mi áweires, esap chék pokiten ina met Jiowa a ewisa ngeni an epwe féri, nge ákkáeúin pokiten a tongei aramas. Jises a pwáári watteen an tongei aramas ren an afalafal ngeniir, asukuler, me álisiir. Pwal mwo nge lón ewe pwinin mwen epwele máló, a télú pechen néún kewe aposel,  asukuler, apéchékkúler, me oururuur. (Jon 13:​12-15) Mwirin, inaamwo iká epwele máló wóón ewe iráán ninni, nge a alúkúlúkú letipen emén chón féfféringaw mi nóm únúkkún, me a pwal akkóta túmúnún inan we. (Luk 23:​42, 43; Jon 19:​26, 27) Jises a pwáári watteen an tongei aramas, esap chék ren an máló fán iter, nge pwal ren an féfférún tong me kirekiréch ngeniir.

12. Met Jises a féfféri fán itach lón ei fansoun?

¹² Inaamwo iká Kraist a máló “fán eú chék fán iten fansoun meinisin,” nge a chúen féri chómmóng mettóch fán itach. (Rom 6:10) Ifa ussun? A chék sópwósópwoló le angang pwe epwe fang ngenikich chómmóng mettóch mi múrinné mi tufich iei ren chék ewe méén kepich. Áwewe chék ren met a féfféri iei. Iei a fen wiseni ewe wis King, Souasor mi Lapalap, me mékúren ewe mwichefel. (1 Kor. 15:25; Efi. 5:23; Ipru 2:17) A kan ekkemmweni ewe angangen ionifengeni ekkewe mi kepit me ewe mwiich mi chóchó, ewe angang epwe wesiló me mwen sópwólóón ewe riáfféú mi lapalap. b (Mat. 25:32; Mark 13:27) A pwal néúnéú ewe chón angang mi túppwél le akkawora met mi lamot ngenikich le angang ngeni Jiowa fán túppwél lón ekkeei ránin lesópwólóón. (Mat. 24:45) Me atun epwe Nemenem Úkúúkún Engéréú Ier, epwe sópweeló le angang fán itach. Jiowa a wesewesen fang Néún we fán itach!

KOSAP FÓKKUN ÚKÚTIW LE KÁKKÁÉ

13. Ifa ussun óm ekilon epwe álisuk le sópweeló le káé ussun án Kot me Kraist tong fán itach?

¹³ Ka tongeni sópweeló le káé ussun án Jiowa Kot me Kraist Jises tong fán itach iká kopwe sópweeló le ekilon ussun. Eli mwen me mwirin ewe Áchechchem lón ei ier, ka tongeni álleaniéchú eú are fitu ekkewe Puken Kapas Allim. Kosap sótun áwesaaló fitu sópwun fán eú chék. Nge kopwe fen kaúló mwo me kútta pwal ekkóch popun mi lamot ach sipwe tongei Jiowa me Jises. Me achocho le apwóróusa ngeni ekkewe ekkóch met ka káé seni óm állea.

14. Ifa ussun ach research epwe álisikich le sópweeló le káé ussun ewe méén kepich me pwal ekkewe ekkóch pwóróus? (Kölfel 119:97) (Pwal ppii ewe sasing.)

¹⁴ Iká ka fen nóm lón ewe enlet ren fite fite ier, eli kopwe ekieki iká epwe chúen wor minefé pwóróus kopwe káé ussun án Kot pwúngiéch, an tong, me ewe méén kepich. Ren enletin, ese wor múchchún met  sia tongeni káé seni ekkena mettóch me pwal ekkewe ekkóch pwóróus. Iwe, met ka tongeni féri? Alamota ekkewe chómmóng pwóróus mi nóm lón néúch kewe puk. Atun ka sereni eú pwóróus lón Paipel kese kon lien weweiti, kopwe research wóón. Unusen rán, kopwe ekilonei minne ka káé me met ka silei ussun Jiowa, Néún we, me ar tong fán itom.—Álleani Kölfel 119:97.

15. Pwata a lamot óm kopwe sópweeló le kúkkútta ekkewe pwóróus mi aúchea lón Paipel?

¹⁵ Kosap lichippúng iká kese kúna och pwóróus mi minefé are ámmeseik iteiten atun óm állea Paipel are research. Kopwe ekieki pwe en ka ussun emén chón kút kolt. Lape ngeni, a lamot án emén chón kút kolt epwe néúni fitu awa are áeá fitu rán le kút tori an epwe kúnékún. A fókkun achocho pwe inaamwo iká ekis chék kolt a kúna, nge a fókkun aúchea me ren. Iwe, ekkewe pwóróus sia káé seni Paipel ra fen kon aúchea seni kolt. (Kölf. 119:127; SalF. 8:10) Ina minne, kopwe mosonottam me fitipachei óm we kkótun álleaan Paipel.—Kölf. 1:2.

16. Ifa ussun sipwe tongeni áppirú Jiowa me Jises?

¹⁶ Atun ka káé, ekieki ifa ussun kopwe apwénúetá lón manawom minne ka káé. Áwewe chék, áppirú án Jiowa pwúngiéch ren óm kosap aapaap ngeni ekkewe ekkóch. Áppirú án Jises tong ngeni Seman we me ngeni ekkewe ekkóch ren óm mmólnetá le tolong lón riáfféú fán iten Jiowa me ren óm pennúkúóló manawom fán iten chienom kewe Chón Kraist. Pwal eú, áppirú Jises ren óm afalafal ngeni ekkewe ekkóch pwe repwe pwal tongeni etiwa án Jiowa we liffang mi aúchea, ina ewe méén kepich.

17. Met sipwe káé lón en lesen mwirin ei?

¹⁷ Lapólóón ach weweiti me aúcheani ewe méén kepich, epwe pwal ina lapólóón ach tongei Jiowa me Néún we. Iká ina, epwe pwal lapóló ar tongekich. (Jon 14:21; Jem. 4:8) Ina popun sipwe sópweeló le áeá meinisin met Jiowa a awora le kákkáé ussun ewe méén kepich. Lón en lesen mwirin ei, sipwe káé ussun pwal ekkóch alen ach sipwe tongeni kúna feiéch seni ewe méén kepich me pwáári ach kilisou ren án Jiowa tong.