1-3. (a) Eli ineet a mak Kölfel 147? (b) Met sia tongeni káé seni Kölfel 147?

 SIA kan mwareiti emén ika sia ingeló ren met a apasa are féri. Nge a ifa me watteen popun ach sipwe mochen mwareiti Jiowa Kot! Sia mwareiti i ren an manaman mi lap mi pwá lón férian kewe mi amwarar, me sia mwareiti i ren an tong mi alóllóól ngenikich mi pwáló ren án Néún we asorun méén kepich.

² Lupwen sia álleani Kölfel 147, a ffat ngenikich pwe ewe chón mak a fókkun mochen mwareiti Jiowa. A pwal apéchékkúla ngeni ekkewe ekkóch ar repwe fiti i le mwareiti Kot.​—Álleani Kölfel 147:1, 7, 12.

³ Sise silei ié a makkeei Kölfel 147, nge neman ewe chón mak a manaw leatun án ekkewe chón Israel liwiniti Jerusalem mwirin án Jiowa angasereló seni Papilon. (Kölf. 147:2) Ewe chón makkeei kélfel a mwareiti Jiowa pokiten Néún kewe aramas ra tongeni férsefáli ar kókkótun fel ngeni i lón pwisin fénúer. Mwirin, ewe soumakken kélfel a pwal erá ekkóch popun aramas repwe mwareiti Jiowa. Ikkefa? Me met popun kopwe ‘mwareiti Jiowa’?​—Kölf. 147:1.

4. Lupwen King Sirus a angasaaló ekkewe chón Israel, epwe itá ifa meefier, me pwata?

⁴ Sótun anchangei meefien ekkewe chón Israel lupwen ra eoló lón Papilon. Chókkewe mi uweireló ikenan ra turunufaseer me erá: “Oupwe eäni ngenikem echö ekewe kölün Sion.” Nge ekkewe chón Jus rese mochen kél. A taló Jerusalem, ewe populapen ar pwapwa. (Kölf. 137:1-3, 6) Letiper a tatakkis, me a lamot ngeniir ourur. Nge Jiowa a álisi néún kewe aramas usun minne a fen apasa lón an oesini. Ifa usun? Sirus ewe kingen Persia a okkufu Papilon, me iei met a erá usun Jiowa: “A filiei pwe üpwe aüetä eu imwenfel fän itan me lon Jerusalem.” A pwal ereni ekkewe chón Israel: “Ämi meinisin mi iteni nöün Kot aramas oupwe feila Jerusalem. Ewe Samol mi Lapalap ämi we Kot epwe etikemi.” (2 Kron. 36:23) Ese mwáál ena mettóch a fókkun oururu ekkewe chón Israel lón Papilon!

5. Met ewe soumakken kélfel a erá usun án Jiowa manaman le echikarakich?

⁵ Jiowa a awora ourur ngeni iteiten emén me emén chón Israel, nge esap chék ngeni unusen ewe mwúún Israel. A pwal ina usun ngenikich ikenái. Ewe soumakken kélfel a makkeei pwe Kot a “apöchöküla ir mi tatakis leluker o filiti kinaser.” (Kölf. 147:3) Lupwen sia semmwen are letipechou, sia tongeni lúkúlúk pwe Jiowa a tongekich. Jiowa a mwétéres le oururukich me echikara kinásen letipach. (Kölf. 34:18; Ais. 57:15) A ngenikich tipachem me péchékkúl pwe sipwe tongeni likiitú fán ese lifilifil osukosuk a torikich.​—Jas. 1:5.

6. Ifa usun sia tongeni kúna feiéch seni minne ewe soumakken kélfel a makkeei lón Kölfel 147:4? (Ppii ewe sasing lepoputáán ei lesen.)

⁶ Mwirin, ewe soumakken kélfel a sachetá láng me erá pwe Jiowa “a apwüngala iteiten ekewe fü o aita eföü me eföü ngeni itan.” (Kölf. 147:4) Ewe soumakken kélfel a tongeni kúna ekkewe fúú, nge ese fókkun silei chóchóór. Ikenái, ekkewe scientist ra silei pwe a wor fite fite billion fúú lón ach ei galaxy are mwichen fúú. Nge me lúkún ach na galaxy neman a fen wor lap seni fite fite billion galaxy lón unusen fán láng! Aramas rese tongeni álleani meinisin ekkewe fúú, nge ewe Chón Fératá a tongeni. I a silefichi eféú me eféú me a fen eiteer. (1 Kor. 15:41) Ewe Kot mi silei ia eféú me eféú fúú a nóm ie a pwal silei en. A silefichi ia ka nóm ie, met meefiom, me met a lamot ngonuk!

7, 8. (a) Met Jiowa a weweiti usuch? (b) Apwóróusa eú pwóróus mi pwári pwe Jiowa a tongei aramas.

⁷ Jiowa a weweiti ewe osukosuk ka nóm fan, me a wor an tufich le álisuk. (Álleani Kölfel 147:5.) Neman ka meefi pwe a kon áweires nónnómum me kese tongeni likiitú ngeni. Nge Kot a weweiti aúkúkún ach tufich, “a chemeni pwe kich pwül echök.” (Kölf. 103:14) Kich sise unuséch, iwe neman sipwe kan féfférisefál met sia mwáálliló wóón, me lichippúng. A ifa me  niamamelóch ren met sia apasa, ach mochen ese pwúng, are lólówóch! Jiowa a unuséch me ese wor met a tongeni mwáálliló wóón, nge a unusen weweiti meefiach.​—Ais. 40:28.

⁸ Ka fen pwisin meefi péún Jiowa mi manaman lón an apéchékkúlasefáluk seni eú sóssót? (Ais. 41:10, 13) Ina met a fis ngeni emén pioneer itan Kyoko. A fókkun lichippúng mwirin an mwékút ngeni eú mineféén leeni fán iten wisan. Nge ifa usun Kyoko a silei pwe Jiowa a weweiti an kewe osukosuk? Lón ewe mineféén mwichefel a fiti, a wor chómmóng mi tongeni weweiti meefian. A meefi pwe usun Jiowa a ereni: “Ua tongeok, esap chék pokiten en emén pioneer, nge pokiten en nei me ka fangóló manawom ngeniei. Ua mochen kopwe pwapwaiti manawom pwe en emén nei Chón Pwáraatá!” Ifa usun Jiowa a pwári ngonuk pwe “an mirit esap wor aükükün,” iwe a fókkun weweiti meefiom?

9, 10. Ifa ewe álillis mi kon lamot Jiowa epwe awora ngenikich? Apwóróusa eú pwóróus.

⁹ A lamot ngenikich mwéngé, úf, leeni, me metakkan. Neman ka lólilen ika epwe naf onom mwéngé. Nge Jiowa a féri ei fénúfan lón eú napanap mi awora naféchún mwéngé fán iten meinisin, pwal mwo nge fán iten “ekewe apansüsün ängä mi tik.” (Álleani Kölfel 147:8, 9.) Ika Jiowa a amwéngééni ekkewe ángá, sia tongeni lúkúlúk pwe epwe awora met mi lamot ngenikich lón pekin aion.​—Kölf. 37:25.

¹⁰ Nge ewe mi lamot seni meinisin, Jiowa a awora met mi lamot pwe sipwe akkamwéchú péchékkúlen ach lúkú, me a ngenikich an we “kinamwe mi tekia seni ach tongeni weweiti.” (Fil. 4:6, 7) Emén pwiich itan Mutsuo me pwúlúwan we ra kúna ifa usun Jiowa a álisiir. Lupwen eú lóó watte a tori Japan lón ewe 2011, chippú chék repwe máló, nge ra manaw ren ar tétá wóón osun imwer we. Lón ena rán, a péút seniir arapakkan meinisin pisekiir kewe. Unusen ena pwiin ra chék nóm lón oruuen sássárin imwer we mi patapat me kiroch. Sorotáán ena rán ra kútta met epwe tongeni apéchékkúler. Ra chék kúna ewe 2006 Yearbook of Jehovah’s Witnesses. Atun Mutsuo a suukaaló ena puk, a kúna ewe itelap “The Deadliest Tsunamis Ever Recorded” (Ekkewe Lóó Watte mi Fen Efeiengaw Lap Seni Meinisin). Ena kinikin a fós usun ewe chechchechin fénú lón Sumatra lón ewe 2004 mi efisi ekkewe lóó watte mi efeiengaw lap seni meinisin lón uruwo. Mutsuo me pwúlúwan we ra kechiw atun ra álleani pwóróusen chiener kewe Chón Kraist. Ra meefi pwe Jiowa a awora ewe mettóch mi fókkun lamot ngeniir lón ena atun. Jiowa a pwal álisiir lón pwal ekkóch napanap. Pwiir kewe lón pwal ekkóch leeni lón Japan ra awora mwéngé me úf fán iter. Nge met a kon apéchékkúler lap seni meinisin, ina án pwiich kewe seni án Kot mwicheich chuuri ar mwichefel. Mutsuo a erá: “Ua meefi pwe usun Jiowa a nónnóm únúkkún emén me emén me túmúnúkem. A ifan me watteen ena ourur!” Kot a akkomw awora met mi lamot ngeni apéchékkúlen ach lúkú, iwe mwirin epwe ataweei met sia osupwangan lón pekin aion.

11. Met a lamot sipwe féri ren ach sipwe tongeni angei án Kot álillis?

¹¹ Jiowa a “atekiatä chokewe mi tekison.” A tongekich me a chék mómmólnetá le álisikich. (Kölf. 147:6a) Ifa usun sia tongeni angei án Kot álillis? A lamot sipwe ririéch ngeni. Ren ach sipwe ririéch ngeni, a lamot ach sipwe tipetekison. (Sef. 2:3) Chókkewe mi tipetekison ra witi ngeni Jiowa an epwe áwena meinisin met mi pwúngúngaw me áwesaaló ar riáfféú. Jiowa a pwapwa rer.

12, 13. (a) Met a lamot sipwe ttii senikich ren ach sipwe angei án Kot álillis? (b) Ié kewe Jiowa a pwapwaitiir?

¹² Iwe nge, Kot “a aturätiu ekewe aramasangau lepwül.” (Kölf. 147:6b) Sise mochen an epwe fis ngenikich ena! Sia mochen Kot epwe pwári ngenikich an tong mi  fiti tuppwél. Iwe, mi lamot sipwe oput minne a oput. (Kölf. 97:10) Áwewe chék, a lamot sipwe oput lisowumwáál. Iwe, a wewe ngeni ach sipwe pwal ttii senikich mettóch meinisin epwe tongeni emmwenikichelóng lón ena, kapachelong sasingin me kachitoon kapasingaw. (Kölf. 119:37; Mat. 5:28) A tongeni weires ach sipwe ú ngeni ena, nge ach achocho ese lamotmwáál pún epwe atoto rech án Jiowa feiéch.

¹³ Sise tongeni fiu wóón pwisin ach. A lamot sipwe lúkúlúk wóón Jiowa. Itá epwe pwapwa ika sia lúkúlúk wóón ekkewe mettóch aramas ra kan lúkúlúkú? Aapw, Jiowa “esap sani pöchökülen oris.” Itá sipwe lúkúlúk wóón pwisin ach péchékkúl are wóón ekkewe ekkóch? Jiowa “esap pwal pwapwa ren pöchökülen aramas.” (Kölf. 147:10) Sipwe fen sópweló le tingorei Jiowa an álillis me tingormaú ngeni an epwe selánikich seni ach kewe apwangapwangen tipis. Jiowa esap fókkun chipwang le aúseling ngeni ekkena iótek. Jiowa a ‘pwapwa ren chokewe mi niuokusiti i, chokewe mi eäni apilükülük an tong ellet.’ (Kölf. 147:11) Pokiten i emén mi tuppwél me a tongekich, sia silei pwe epwe sópweló le álisikich le okkufu ach kewe mochen rese pwúng.

14. Met ewe soumakken kélfel a lúkúlúkú?

¹⁴ Jiowa a alúkúlúkúkich pwe epwe álisikich lupwen sia nóm lón osukosuk. Lupwen ekkewe chón Israel ra liwiniti Jerusalem, ewe soumakken kélfel a ekieki usun án Jiowa álisiir. A erá: “A apöchöküla lokkun asamalapom kewe o afeiöchü noum kewe aramas mi nom reöm. A awora kinamwe lon fanüom.” (Kölf. 147:13, 14) A meefi núkúnúkéch ren an silei pwe Jiowa epwe apéchékkúla asamalapen ewe telinimw. A alúkúlúkú pwe Jiowa epwe túmúnú néún kewe aramas.

15-17. (a) Fán ekkóch, met sia tongeni meefi usun ach kewe sóssót, nge ifa usun Jiowa a néúnéú an we Kapas an epwe álisikich? (b) Apwóróusa ifa usun án Kot kapas a “müttir säfetal.”

¹⁵ Eli ka aúreki óm kewe osukosuk, nge Jiowa a tongeni fang ngonuk tipachem pwe kopwe tongeni likiitú fan. Ewe  soumakken kélfel a erá pwe Kot a “tinato an allük won fanüfan, an kapas a müttir säfetal.” Mwirin, ewe soumakken kélfel a fós usun sno me féún ais, me a eis: “Iö a tongeni pwäk ngeni patapatan?” Mwirin, a erá pwe lupwen Jiowa “a kapas, ewe ais a telila.” (Kölf. 147:15-18) Ach we Kot a fókkun tongeni álisuk le pwákini ese lifilifil osukosuk ka kúna pwe a silei mettóch meinisin me tongeni féri met chék a mochen, kapachelong an nemeni ekkewe féún ais me sno.

¹⁶ Ikenái, Jiowa a emmwenikich ren an we Kapas, ewe Paipel. Ewe soumakken kélfel a erá pwe án Jiowa we kapas a “müttir säfetal” ren an awora emmwen lón eú napanap mi pwúng me lón fansoun fich. Ekieki usun óm kúna álillis seni ewe Paipel, ekkewe puk férien ewe “chon angang mi allükülük o tipachem,” JW Broadcasting, jw.org, ekkewe mwán mi ásimaw, me chienom kewe Chón Kraist. (Mat. 24:45) Ka fen kúna lón pwisin manawom pwe Jiowa a kan mwittir le awora ngonuk emmwen?

¹⁷ Emén pwiich fefin itan Simone a kúna ifa usun án Kot Kapas a álisi. A meefi pwe ese wor aúchean, me a meefi pwe Jiowa ese pwapwaiti. Iwe nge, lupwen a lichippúng, a ikkiótek ngeni Jiowa me tingormaú ngeni an epwe álisi. A pwal sópweló le káé Paipel. Simone a erá: “Iteiten fansoun an toriei osukosuk, ua chék memmeefi án Jiowa apéchékkúlaei me emmweniei.” Ena mettóch a álisi le eáni ekiek pwúng.

18. Pwata ka meefi pwe Jiowa a arap ngonuk, me ikkefa ekkewe popun kopwe mwareiti i?

¹⁸ Ewe soumakken kélfel a silei pwe Jiowa a filatá ewe mwúún Israel lóóm me lein aramas meinisin wóón fénúfan ar repwe néún aramas. Iir chék ewe mwú Kot a ngeni “an kapas” me “an kewe allük.” (Álleani Kölfel 147:19, 20.) Lón ei fansoun, sia fókkun feiéch ren ach iteit seni iten Kot we. Sia kilisou ren ach silei i, ren an nóm rech an we Kapas an epwe emmwenikich, me ren ach tongeni ririéch ngeni. Usun chék ewe chón makkeei Kölfel 147, a wor reom chómmóng popun óm kopwe mwareiti Jiowa me pesei ekkewe ekkóch ar repwe pwal ina usun.