1. Met a lamot ekkewe sáráfé repwe filatá? Met a tongeni álisiir ar resap kon aúrek? (Ppii ewe sasing lepoputáán ei lesen.)

 ÁMI kana sáráfé, ese mwáál oupwe tipeeú ngeni pwe me mwen án emén epwe poputááni eú sái, a lamot epwe akkomw akkóta ia epwe ló ie. Fetálin manawach a usun eú sái, me atun ka chúen sáráfé ina ewe atun a fich óm kopwe akkóta met ka mochen féri lón manawom. Pwúngún pwe a tongeni weires ach sipwe akkóta ena sókkun kókkót. Emén nengngin itan Heather a erá: “Mi eniwokkus án emén epwe filatá met epwe féri lón ánein manawan.” Ika a ina usun meefiom, iwe chechchemeni pwe Jiowa a apasa: “Kosap pwal apilüküngau, pun ngang om Kot. Üpwe apöchökülok, üpwe pwal alisuk.”​—Ais. 41:10.

2. Pwata ka silei pwe Jiowa a mochen kopwe akkóta óm kopwe manaweni eú manaw mi pwapwa?

² Jiowa a peseok le akkóta fán tipachem met kopwe féri lón manawom. (SalAf. 12:1; Mat. 6:20) A mochen pwe kopwe pwapwa. A pwá ena atun ka kúna, rong, me neni ekkewe mettóch  a fériiretá. Jiowa a pwal túmúnúkich lón ekkóch napanap. A éúréúrakich me áiti ngenikich ifa usun sipwe manaweni manawach lón eú napanap mi fókkun múrinné. Iwe ese pwapwa atun aramas ra péútaaló an kapasen éúréúr mi fókkun múrinné. A ereni chókkewe rese fiti an éúréúr: “Oua . . . filätä mine üsap efich. . . . Nei chon angang repwe pwapwa, nge ämi oupwe säw. Nei chon angang repwe köl fän pwapwan letiper.” (Ais. 65:12-14) Nge sia elingaaló Jiowa atun sia kefiléch lón manawach.​—SalF. 27:11.

3. Met Jiowa a peseok le féri?

³ Met sókkun kókkót Jiowa a peseok le filatá? Jiowa a fératá aramas ar repwe enletin pwapwa ika repwe chék silei i me angang ngeni fán tuppwél. (Kölf. 128:1; Mat. 5:3) Ekkewe man ra chék mwéngé, ún, me néúnéú. Nge Jiowa a mochen kopwe akkóta manawom pwe epwe wor apwapwaan me aúchean. Ewe mi féruk, i “ewe Koten tong” me “Kot mi pwapwa,” ewe mi féri aramas “lon püsin lapalapan.” (2 Kor. 13:11, Testament Mi Fö; 1 Tim. 1:11, NW; Ken. 1:27) Kopwe pwapwa lupwen ka áppirú ach we Kot mi tong. Paipel a apasa: “Sia feiöch ren ach fang lap seni ach angei mettoch.” (Föf. 20:35) Pwúkún ina usun aramas. Nge ka pwal meefi ena esin pwapwa lón manawom? Ina minne, Jiowa a mochen pwe kopwe féri kókkót lón manawom epwe lóngólóng wóón óm tongei aramas me tongei i.​—Álleani Mateus 22:36-39.

4, 5. Met a eselipato án Jesus pwapwa?

⁴ Jesus Kraist a isetiw eú leenien áppirú mi unuséch fán iten ámi kana kúkkún me sáráfé. Lupwen a chúen kúkkún, ese mwáál a kan urumwot me kukkunou. Án Kot we Kapas a erá pwe a wor “fansoun takir” me pwal “fansoun pwörük.” (SalAf. 3:4) Jesus a pwal ririéch ngeni Jiowa ren an kákkáé Paipel. Lupwen a 12 ierin, ekkewe sense lón ewe imwenfel ra mwaar ren an “weweöch me an silelap le pölüeni ekewe kapas ais.”​—Luk. 2:42, 46, 47.

⁵ Lupwen Jesus a wattetá, an féfféri met Kot a ereni, a eselipato an pwapwa. Áwewe chék, Kot a mochen epwe “afalafala ewe Pworausen Manau ngeni ekewe chon mwelele” me “ekewe chon chun pwe repwe küna mwer.” (Luk. 4:18) Kölfel 40:8 a áweweei meefien Jesus: “Üa pwapwa le föri letipom, ai Kot.” Jesus a pwapwa le asukula aramas usun Seman we. (Álleani Lukas 10:21.) Fán eú, wesin án Jesus fós ngeni emén fefin usun fel mi enlet, a ereni néún kewe chón káé: “Anei mongö ai üpwe aleasochisi letipen ewe mi tiniei o awesala ewe angang a awisa ngeniei pwe üpwe föri.” (Joh. 4:31-34) Jesus a pwapwa pokiten a pwáraatá an tongei Kot me aramas. Ika ka pwal ina usun, kopwe pwal pwapwa.

6. Pwata a éch óm kopwe fós ngeni ekkewe ekkóch usun óm kewe kókkót fán iten mwachkkan?

⁶ Chómmóng Chón Kraist ra poputá le pioneer lesáráféér, me a eselipato ar pwapwa. Ka tongeni fós ngeni ekkóch me leir usun óm kewe kókkót? “Are esap wor kapasen  öüröür, esap fis mine aramas ra ekiekietä. Nge are a wor chomong chon öüröür, a fisiöch mine ra ekiekietä.” (SalF. 15:22) Ekkena Chón Kraist neman repwe erenuk pwe ewe angangen pioneer a usun och asukul epwe álisuk lón unusen manawom. Jesus a káé chómmóng mettóch seni Seman we lupwen a nóm láng. Nge, atun an angangen afalafal wóón fénúfan, a sópweló le káé pwal chómmóng mettóch. A meefi pwapwa atun a apwóróusa ngeni aramas ewe kapas allim me atun a akkamwéchú an tuppwél fán weires. (Álleani Aisea 50:4; Ipru 5:8; 12:2) Sipwe pwóróus usun ewe popun óm angang ngeni Kot full-time epwe atoto ngonuk pwapwa.

7. Pwata chómmóng sáráfé ra pwapwaiti ar álisi aramas le wiliti Chón Kraist?

⁷ Jesus a erenikich ach sipwe álisi aramas le wiliti néún chón káé me asukuler. (Mat. 28:19, 20) Ika ka akkóta le akkomwa ena angang lón manawom, epwe atoto ngonuk pwapwa me epwe elingaaló Kot. Usun chék ren meinisin pekin angang, ekis me ekis kopwe lipwákéchúló. Emén pwiich itan Timothy mi poputá pioneer atun a teenage, a erá: “Ua sani ai angang ngeni Jiowa full-time pún ina alen ai pwári pwe ua tongei. Akkomwan, use tongeni kúnékún nei chón káé, nge mwirin, ua mwékút ngeni pwal eú leeni, iwe kis seni eú maram ua poputá le káé ngeni fitemén. Emén leir a poputá le fiti ekkewe mwich lón ewe Leenien Mwich. Mwirin ai fiti ewe Sukulen Paipel fán Iten Ekkewe Mwán mi Lipich ren ruu maram, ra tiinieiló ngeni pwal eú leeni ikewe ie ua poputááni fémén chón káé. * Ua fókkun sani le asukula aramas, pún ua tongeni kúna pwe ewe manaman mi fel a siwili manawer.”​—1 Tes. 2:19.

8. Met ekkóch sáráfé ra féri ren ar repwe tongeni alapaaló ar angangen afalafal?

⁸ Ekkóch sáráfé ra káé pwal eú fós. Áwewe chék, Jacob, seni North America, a makkeei: “Lupwen a fisu ieri, chómmóng chienei kewe chón sukul iir chón Vietnam. Ua mochen fós ngeniir usun Jiowa, iwe, mwirin och fansoun, ua akkóta ai upwe káé fósun fénúer na. Lap ngeni, ua káé ena fós ren ai apépéfengeni ewe Leenien Mas lón fósun Merika me ewe lón fósun Vietnam. Ua pwal chiechi ngeni chón eú mwichefel mi eáni fósun Vietnam mi kkan ngeni leeniei we. Lupwen a 18 ieri, ua poputá le pioneer. Mwirin, ua fiti ewe Sukulen Paipel fán Iten Ekkewe Mwán mi Lipich. Ena sukul a álisiei lón wisei iei. Me ikena ie ua pioneer me ngang chék lón wisei we mwán mi ásimaw lón ewe kúmi mi eáni fósun Vietnam. Chómmóng chón Vietnam ra fókkun mwaar ren ai sile fósun fénúer. Ra etiwaei lón imwer, me fán chómmóng ua tongeni poputá le káé Paipel ngeniir. Ekkóch me leir ra fen papatais.”​—Apépé ngeni Föför 2:7, 8.

9. Met sia káé ren ach fiti ewe angangen álisi aramas le wiliti Chón Kraist?

⁹ Ewe angangen álisi aramas le wiliti Chón Kraist ina eú asukul mi múrinné. Áwewe chék, ka káé óm kopwe chófó lón óm angang, ifa usun kopwe pwóróus ngeni aramas, me ifa usun kopwe kapas fán lúkúlúk me súfél. (SalF. 21:5; 2 Tim. 2:24) Nge ena  angang a ákkáeúin apwapwa pún ka káé ifa usun kopwe ánneta minne ka lúkú seni Paipel. Ka pwal káé ifa usun oupwe angangfengen me Jiowa.​—2 Kor. 6:1.

10. Ikaamwo ese chómmóng mi mochen káé Paipel lón leeniom we nge ifa usun ka tongeni pwapwaiti ewe angangen afalafal?

¹⁰ Ka tongeni pwapwaiti óm angangen afalafal pwal mwo nge ika ese chómmóng mi mochen káé Paipel lón leeniom. Meinisin chón ewe mwichefel ra angangfengen usun eú kúmi le álisi aramas le wiliti Chón Kraist. Inaamwo ika neman emén chék pwiich a kúna me álisi emén mi wiliti Chón Kraist, nge kich meinisin sia pwapwa pokiten oukich sia álillis le kúkkútta aramas. Áwewe chék, iei alon Brandon, ewe mi pioneer ren tiu ier ikewe mi chék chókúkkún chókkewe mi káé Paipel ie: “Ua sani le afalafala ewe kapas allim, pún ina met Jiowa a erenikich ach sipwe féri. Ua poputá le pioneer ekiseló mwirin ai áwesi high school. Ua pwapwaiti le apéchékkúla ekkewe át lón ám we mwichefel me kúna ar feffeitá. Mwirin ai fiti ewe Sukulen Paipel fán Iten Ekkewe Mwán mi Lipich, ewe mwicheich a tiinieiló pwe upwe pioneer lón eú mineféén leeni. Pwúngún pwe esap fán eú án emén chókkewe ua káé ngeniir lón ai we leenien afalafal feffeitá me papataiseló, nge a fen fis ngeni ekkóch pwiich kewe. Ua pwapwa pwe ua akkóta le unusen fiti ewe angangen álisi aramas le wiliti Chón Kraist.”​—SalAf. 11:6.

11. Met sókkun angang chómmóng alúwél me fépwúl ra fen pwapwaiti lón án Jiowa angang?

¹¹ A wor chómmóng sókkun al mi suuk ngonuk lón án Jiowa angang. Áwewe chék, chómmóng alúwél me fépwúl ra álillis lón ewe angangen kaú imw. A lamot an epwe kaútá fitepúkú mineféén Leenien Mwich. Ekkena leeni ra elingaaló Jiowa, iwe kopwe pwapwa lupwen ka álillis le aúretá. Ka pwal tongeni kúna pwapwa ren ámi angangfengen me pwiium kewe Chón Kraist. Me ka tongeni káé chómmóng mettóch, choweán óm kopwe férfichi óm angang, túmúnúéch pwe ete wor feiengaw, me ifa usun kopwe álleasochisi ekkewe mi emmwenuk.

12. Ifa usun ewe angangen pioneer a tongeni suuki ngonuk pwal ekkóch sókkun angang?

¹² Emén alúwél itan Kevin a erá: “Seni lekúkkúni, ua mochen angang ngeni Jiowa full-time. Iwe, ua poputá pioneer lupwen a 19 ieri. Ua atufichi manawei ren ai angang fitu chék awa iteiten wiik ren emén pwii Chón Kraist mi kan kaú imw. Ua káé le pachapachetá osun imw, asammwacho, me asam. Mwirin, ua angang ruu ier ren ewe kúmiin chón álillis atun taifun, me aua férsefáli ekkewe Leenien Mwich me imwen pwiich kewe. Lupwen ua rong pwe a wor osupwangen angangen kaú lón South Africa, ua amasoua nei we application iwe ua ketiw le fiti. Ikeei ie lón Afrika, iteiten  mwirin fitu wiik ua kan mwékút seni eú angangen kaú Leenien Mwich ngeni pwal eú. Usun itá aua fen eú famili me ai we kúmiin chón kaú imw. Aua nónnómfengen, káéfengen Paipel, me angangfengen. Ua pwal pwapwaiti le fiti chón ei fénú le afalafal iteiten wiik. Ekkewe kókkót ua akkóta me lekúkkúni ra atoto ngeniei och sókkun pwapwa use tepereni.”

13. Pwata chómmóng alúwél me fépwúl ra pwapwaiti le angang ngeni Jiowa lón Bethel?

¹³ Ekkóch mi piin pioneer ra angang lón Bethel iei. Angangen Bethel a atoto pwapwa pokiten meinisin met a fis ikena ie, fán iten Jiowa. Ewe familien chón Bethel ra álillis lón kaworen ewe Paipel me néúch kewe puk mi álisi aramas le silei ewe enlet. Emén chón Bethel itan Dustin a erá: “Lupwen a tiu ieri, ua filatá ai upwe achocho le angang ngeni Kot full-time, me ua poputá pioneer lupwen ua áwesi high school. Mwirin eú esopw ier, ua ketiw ngeni Bethel, me ikena ie ua káé le anganga ekkewe mwesinen peres, me mwirin, ua káé och angangen computer. Lón Bethel, ua pwapwaiti ai pwisin rongorong repotun feffeitáán ewe angangen afalafal wóón unusen fénúfan. Ua fókkun pwapwaiti ai angang ikeei pún minne aua féri a álisi aramas le riri ngeni Jiowa.”

14. Met ka tongeni féri iei pwe kopwe mmólnetá le angang ngeni Kot full-time?

¹⁴ Ifa usun ka tongeni ammólnaketá ngeni óm kopwe angang ngeni Kot full-time? Ren óm kopwe angang ngeni Jiowa lón ewe napanap mi unusen múrinné, a lamot kopwe ámááraatá ekkewe napanap mi fich ngeni Chón Kraist. Káé án Kot Kapas iteitan, ekilonei, me achocho le uwawu meefiom fán lúkú lón ekkewe mwich. Atun ka chúen sussukul, ka tongeni elipwákéchukóló lón óm fós ngeni aramas usun ewe kapas allim. Káé le áfánni aramas ren óm eis meefier fán súfél me aúseling met ra apasa. Pwal och, ka tongeni awora álillis lón ewe mwichefel, áwewe chék le elimelima me férisefáli met mi ta me wóón ewe Leenien Mwich. Jiowa a pwapwa le néúnéú chókkewe mi tipetekison me tipemecheres le awora álillis. (Álleani Kölfel 110:3; Föf. 6:1-3) Aposel Paulus a etiwa Timoty an epwe fiti ewe angangen misineri pokiten “a iteüöch me ren ekewe chon lükü.”​—Föf. 16:1-5.

15. Ren óm kopwe kúnékún óm angangen moni, ifa usun ka tongeni ammólnatá?

¹⁵ A lamot ngeni lape ngeni chókkewe mi angang ngeni Kot full-time ar repwe kút ar angang. (Föf. 18:2, 3) Neman ka tongeni fiti eú sukulen pekin angang mi mwoch pwe kopwe kúnékún óm angang part-time lón leeniom. Angei emmwen seni ewe mwán mi ásimaw mi wisen sáifetál me pwal ekkóch pioneer usun óm kewe kókkót. Iwe, usun met Paipel a apasa, “kopwe lükü ngeni ewe Samol mi Lapalap om angang, pwe mine ka ekiekietä epwe fisiöch.”​—SalF. 16:3; 20:18.

16. Ifa usun óm angang ngeni Kot full-time a tongeni ammólnaketá ngeni pwal ekkóch mettóch lón mwachkkan?

¹⁶ Ka tongeni lúkúlúk pwe Jiowa a mochen kopwe kamwéchúnnúk wóón ewe manaw mi enlet. (Álleani 1 Timoty 6:18, 19.) Atun oua angangfengen me chienom kewe mi pwal angang ngeni Kot full-time, epwe álisuk le ásimawóló. Pwal eú, chómmóng ra kúna pwe ar fiti ewe angang full-time lealúwélúr me lefépwúlúr a álisiir lupwen ra pwúpwúlú. Chómmóng mi pioneer me mwen ar pwúpwúlú ra sópweló le pioneer fengen mwirin ar pwúpwúlú.​—Rom 16:3, 4.

17, 18. Ifa usun letipom me óm féri kókkót lón manawom ra ririfengen?

¹⁷ Iei met Paipel a apasa usun Jiowa: “Amo epwe ngonuk minne ka mochen o föri pwe om kewe ȯtȯt meinisin repwe pwonueta.” (Kölf. 20:4, KG) Atun ka akkóta usun fansoun mwach, ekieki usun met ka wesewesen mochen féri lón manawom. Ekieki usun met Jiowa a féfféri lón ei fansoun me met ka tongeni féri lón an angang. Iwe mwirin, akkóta le féri met epwe apwapwaai i.

¹⁸ Áeá manawom le angang ngeni Jiowa ren unusen tufichum, iwe kopwe fókkun pwapwa atun ka elingaaló i. “Ewe Samol mi Lapalap i chök epwe om pwapwa, nge i epwe ngonuk mochenin lelukom.”​—Kölf. 37:4.