Minne Kopwe Féri pwe Óm Káéén Paipel Epwe Álilliséch me Apwapwa

PLAY

JOSUA epwe emmweni ewe mwúún Israel ngeni ewe Fénúen Pwon. Ei mettóch epwe fókkun áweires. Iwe nge, Jiowa a apéchékkúla i ren an apasa: “Kopwe chök apöchökülok o tipepwora.” A ereni Josua pwe ika a álleani me álleasochisi ewe Allúk, iwe epwe kefiliéch me sópwéch.—Jos. 1:7, 8.

Sia nónnóm lón “fansoun weires,” ina minne manawach a pwal tongeni weires. (2 Tim. 3:1) Ika sia mochen sópwéch usun chék Josua, a lamot ach sipwe álleasochisi án Jiowa kapasen fén ngeni. A lamot ach sipwe ákkálleani Paipel iteitan me áeá minne sia káé pwe sipwe kefiliéch.

Nge neman ekkóch me leich sise silei ifa usun sipwe káé, are sise pwapwaiti ewe mettóch káé. Iwe nge, a fókkun lamot ewe mettóch pwisin káé Paipel. Atun ka enniwili ewe pwóór “ Sótuni Ekkeei Kapasen Pesepes,” kopwe kúna ekkóch minen álillis mi tongeni álisuk óm kopwe feiéch seni óm káé me epwe pwal lapóló óm pwapwaiti.

Iei alon ewe soumakken kélfel: “Kopwe emweniei pwe üpwe tongeni aleasochisi om kewe allük, pun ngang üa pwapwaäsiniir.” (Kölf. 119:35) Ka pwal tongeni pwapwaiti le káé án Kot we Kapas. Kopwe kúna chómmóng pwóróus mi múrinné atun ka sópweló le káé Paipel.

Ikaamwo kese emmweni eú mwú usun Josua, nge a pwisin wor óm osukosuk. Ina minne, kopwe usun chék Josua, kopwe káé me álleasochisi án Kot we Kapas. Ika kopwe féri ena, kopwe kefiliéch me kopwe sópwéch.

SÓTUNI EKKEEI KAPASEN PESEPES

Iótek me mwen kopwe káé. Ewe Paipel a masou ren ekiekin Jiowa, me ra makketiw pwe kopwe kúna feiéch seni. Ina minne, atun ka álleani Paipel, tingorei Jiowa an epwe álisuk óm kopwe weweiti minne ka álleani, óm kopwe chechchemeni, me óm kopwe áeá pwe kopwe kefiliéch lón manawom.—Esr. 7:10.
Pwisin eisinuk ekkóch kapas eis atun ka álleani Paipel are ekkewe puk mi lóngólóng wóón Paipel. Áwewe chék: ‘Met ei kinikin a áiti ngeniei usun Jiowa? Ifa usun a riri ngeni itelapen ewe Paipel? Ifa usun ua tongeni áeá ekkeei pwóróus le álisi ekkewe ekkóch?’
Ekilonei minne ka káé. Kopwe ekis mwo kaúló, me ekieki minne ka kerán álleani. Pwisin eisinuk: ‘Ifa meefiei ren ei pwóróus? Met popun a iei usun meefiei? Ifa usun a riri ngeni met a fis ngeniei lón ekkewe fansoun, met a fiffis ngeniei iei, are met a tongeni fis ngeniei lón mwachkkan? Ifa usun ua tongeni apwénúetá lón manawei án Paipel keei kapasen emmwen are kapasen fén?’ (Hiop 23:5; Kölf. 49:3) Atun ka ekilon, ppii ika ka tongeni áweweei pwata Jiowa a ereni néún kewe aramas ar repwe tti seniir och sókkun féffér. Are ekieki ika epwe met mwirilóón minne ewe emén ka kerán álleani pwóróusan a féri met ewe a féri nge mi sókkóló seni me mwan.—Tut. 32:28, 29, Kapasen God.
Áeá óm tufichin anchang atun ka állea. Áwewe chék, en mi tongeni anchangei minne a fiffis atun pwiin Josef kewe ra améméló i ngeni ekkewe chón Ismael? (Ken. 37:18-28) Met ka kúna, rong, me fáreni? Ekieki pwe itá en emén me leir. Met ra kan ekieki me meefi? Atun ka áeá óm tufichin anchang, óm káé epwe fókkun masou me apwapwa.
Néúnéú ekkewe minen álillisin káé ewe mwicheich a awora. Ekkeei mettóch epwe efisi apwapwaan óm kúttafichi pwóróus. Kopwe káé néúnéún ekkewe minen álillis mi kawor lón fósun fénúom wóón Internet me lón ekkewe puk. Kosap sáw le tingorei ekkewe ekkóch ar repwe álisuk ren ifa usun kopwe néúnéúéchú ekkena minen álillis. Áwewe chék, ewe puk itelapan Watch Tower Publications Index are ewe Research Guide for Jehovah’s Witnesses repwe álisuk le kútta pwal ekkóch pwóróus a fen kawor fán iten och itelap me repwe áweweei chómmóng wokisin lón Paipel. Kopwe néúnéú ewe kúkkún puk itelapan Minen Álillis fán Iten Káéén Paipel. Ekkena puk ra masou ren pwóróus mi álilliséch usun napanapen fénú, tettelin fansoun, paun me kaúk, me pwal ekkóch pwóróus.
Menlapei ekkewe pwóróus mi lamot. Ei epwe álisuk óm kopwe chechchemeni minne ka fen káé. A fen pwal múrinné ika kopwe apwóróusa ngeni ekkewe ekkóch minne ka fen káé. Mi wor met ka tongeni áeá lón óm angangen afalafal? Ika ka féri ekkeei mettóch, kopwe chechchemeni ekkewe pwóróus mi lamot me ekkewe ekkóch repwe pwal kúna feiéch seni óm káé.