1-2. (a) Me ren án Jesus allúk mi mak lón Mateus 28:18-20, ifa ewe angang ewe mwichefelin Chón Kraist a ákkáeúin féri? (b) Ikkefa ekkewe kapas eis sipwe ekieki lón ei lesen?

ATUN ekkewe aposel ra chufengen wóón eú chuuk, ese wor tipemwaramwar pwe ra mwétéresiti minne epwele fis. Mwirin án Jesus manawsefál, a akkóta ar repwe chuuri me ikena. (Mat. 28:16) Neman ina ewe atun a “pwä ngeni lap seni limupükü chon lükü i lon eu chök fansoun.” (1 Kor. 15:6) Pwata Jesus a emwichafengeni néún kewe chón káé? Pwe epwe ewisa ngeniir ei angang mi amwarar: “Oupwe feila o asoulängala chon ekewe mwü meinisin.”​—Álleani Mateus 28:18-20.

² Ekkewe chón káé mi rong alon Jesus kana ra chóni ewe popun mwichefelin Chón Kraist. Ewe angang ena mwichefel a ákkáeúin achocho ngeni, ina ewe angangen álisi aramas le wiliti néún Kraist chón káé. * Lón ei fansoun, a wor chómmóng mwichefelin Chón Kraist mi enlet wóón unusen fénúfan, me pwal ina ewe angang ra ákkáeúin féri. Lón ei lesen, sipwe pwóróus wóón ekkeei rúáánú kapas eis: Pwata a kon lamot ewe angangen álisi aramas le wiliti chón káé? Met sipwe féri pwe sipwe álisi aramas le wiliti chón káé? Itá meinisin Chón Kraist ra kapachelong lón ena angang? Pwata a lamot mosonottam lón ach féri ena angang?

3. Me ren Johannes 14:6 me 17:3, pwata a kon lamot ewe angangen álisi aramas le wiliti chón káé?

³ Pwata a kon lamot ewe angangen álisi aramas le wiliti chón káé? Pún aramas rese tongeni chiechi ngeni Kot ika pwe rese néún Kraist chón káé. Pwal eú, a échúló manawen chókkewe mi tapweló mwirin Kraist iei, me a pwal wor ar ápilúkúlúkún manaw esemuch. (Álleani Johannes 14:6; 17:3.) A watte lamoten ewe angang Jesus a ewisa ngenikich, nge sise áláemén le féri ena angang. Iei met ewe aposel Paulus a makkeei usun pwisin i me pwal ekkóch chiechian kewe: “Kich sia akkangangfengen me Kot.” (1 Kor. 3:9, NW) A ifa me feiéchúch ren ach fiti Jiowa me Kraist lón ena angang ra ewisa ngeni kich chón tipis!

4. Met sia tongeni káé seni pwóróusen Ivan me Matilde?

⁴ Ewe angangen álisi aramas le wiliti chón káé a tongeni atoto ngenikich watteen pwapwa. Áwewe chék ren pwóróusen Ivan me pwúlúwan we Matilde lón Colombia. Ra afalafal ngeni emén alúwél itan Davier, nge a ereniir: “Ua mochen siwili manawei, nge use tongeni.” Davier i emén chón boxing mi sousakaw me angei drugs, me a nónnóm ren néún we kammwet itan Erika. Ivan a erá: “Aua poputá le ló chuchchuuri lón sópwun we mi towau, nge ren ám aupwe tikeri, aua wawa pasiken fite awa wóón ekkewe al mi pwakak. Mwirin án Erika kúna án Davier siwili féfférún me ekiekin, a pwal poputá le fiti ewe káéén Paipel.” Ló, ló, ló, Davier a péútaaló drugs, sakaw, me boxing. A pwal apwúpwúlú ngeni Erika. Iei alon Matilde: “Lupwen Davier me Erika ra papatais lón ewe 2016, aua chechchemeni án Davier a kan erá, ‘Ua mochen siwili manawei, nge use tongeni.’ Ause tongeni pwouni ssúrún mesem.” Ese wor tipemwaramwar pwe sia meefi watteen pwapwa lupwen sia álisi aramas le wiliti chón káé.

5. Ifa ewe áeúin mettóch sipwe féri ren ach sipwe álisi aramas le wiliti chón káé?

⁵ Ewe áeúin mettóch sia féri le álisi aramas le wiliti chón káé ina ach “pii iön aramas” mi letipwenechar. (Mat. 10:11) Sia pwári pwe kich Chón Pwáraatá Jiowa ren ach afalafal ngeni aramas meinisin sia chuuriir. Sia pwáraatá pwe kich Chón Kraist ren ach álleasochisi án Kraist we allúk ach sipwe afalafal.

6. Met a tongeni álisikich le sópwéch lón ewe angangen afalafal?

⁶ Ekkóch aramas ra pwapwaiti le káé Paipel, nge chómmóng usun rese pwal pwapwaiti. Neman mi lamot sipwe peseer ar repwe mochen silei ewe enlet. Ren ach sipwe sópwéch lón ena angang, mi lamot ach sipwe mmólnéch. Fili ekkewe sókkun itelap ka meefi pwe aramas repwe sani. Mwirin, ekieki met kopwe tongeni apasa le poputááni ámi pwóróusfengen me eménnewe wóón ewe itelap.

7. Ifa usun kopwe tongeni poputááni eú pwóróusfengen, me pwata ka meefi pwe mi lamot óm kopwe aúseling me pwári súfél?

⁷ Áwewe chék, neman kopwe eisini emén chón imw: “Kose mochen upwe eis meefiom wóón eú mettóch? Chómmóng ekkewe osukosuk sia kúkkúna lón manawach, a pwal fis ngeni aramas wóón unusen fénúfan. Me reom pwe mi lamot an epwe wor eú mwú epwe nemeni unusen fénúfan pwe epwe ataweei osukosuken fénúfan?” Mwirin ka tongeni pwóróus ngeni wóón Taniel 2:44. Are ka tongeni ereni emén chón órum: “Me reom, ifa kiien ach sipwe emiriti néúch kewe ar repwe mosonoson me féfféréch? Ua mochen silei meefiom.” Mwirin, pwóróus ngeni wóón Tuteronomi 6:6, 7. Ese lifilifil menni itelap ka  filatá, nge kopwe ekieki usun chókkewe kopwe afalafal ngeniir. Anchangei usun ekkewe feiéch repwe kúna seni ar káé met ewe Paipel a wesewesen apasa. Lupwen oua fósfengen, a lamot kopwe aúselingéch ngeniir me súféliti meefier. Ika ina, kopwe tongeni weweiti ar ekiek me neman repwe fen pwal mochen aúseling ngonuk.

8. Pwata a lamot likiitú lón ach lilliwiniti chókkewe sia fen chuchchuuriir?

⁸ Neman epwe lamot óm kopwe áeá óm fansoun le lilliwiniti emén me mwen an epwe mochen káé Paipel. Pwata? Pún neman esap nóm lón imwan lupwen ka sótun chuursefáli. Pwal eú, neman mi lamot kopwe liwiniti fán fite me mwen an epwe meefi kinamwe le etiwa óm káé Paipel ngeni. Chechchemeni pwe ach ékkétútúúi efóch irá epwe álisatá mámmááritáán. Pwal ina chék usun, ach pwóppwóróus ngeni emén usun án Kot we Kapas, epwe álisatá mááritáán an tongei Jiowa me Kraist.

9-10. Pwata sia tongeni erá pwe emén me emén chón afalafal Chón Kraist a kapachelong lón ewe angangen kútta chókkewe mi letipwenechar?

⁹ Emén me emén chón afalafal Chón Kraist a kapachelong lón ewe angangen kútta chókkewe mi letipwenechar. Sia tongeni apépééi ena angang ngeni án aramas angangen kútta emén semirit mi mworukoló. Ifa usun? Ekieki ei pwóróus mi fis ngeni emén semirit úlúngát ierin mi mwóruk seni imwan we. Ina epwe 500 aramas ra álillis le kút. Mwirin 20 awa, emén a kúna ewe át lón eú watteen atake. Nge ese mochen aramas repwe erá pwe i chék pwisin a kúna ewe semirit. A erá: “A pwá ewe semirit ren án fitepúkú aramas álillisfengen.”

¹⁰ Chómmóng aramas ra usun ena semirit pún ra meefi pwe usun itá ra mworukoló. Ese wor ar ápilúkúlúk, nge ra mochen emén epwe  álisiir. (Ef. 2:12) Oukich lap seni walu million, ousia sótun kútta chókkewe mi letipwenechar. Neman en pwisin kese kúna emén epwe mochen káé reom ewe Paipel. Iwe nge, neman a wor ekkóch ekkewe chón afalafal lón leeniom we repwe kúna emén mi mochen silei ewe enlet seni ewe Kapasen Kot. Lupwen emén chón afalafal a kúna emén nge a wiliti emén néún Kraist chón káé, meinisin mi fiti ewe angangen kút repwe pwapwa.

11. Ikaamwo ese mwo wor emén ka káé ngeni Paipel, nge met ka pwal tongeni féri pwe kopwe álillis lón ewe angangen álisi aramas le wiliti chón káé?

¹¹ Ikaamwo ese mwo wor emén ka kan káé ngeni Paipel, nge ka tongeni álisi aramas le wiliti chón káé ren pwal ekkóch mettóch kopwe féri. Áwewe chék, ka tongeni etiwaéchú ekkewe minefé mi etto fiti mwich me chiechiéch ngeniir. Óm féri ena epwe alúkúlúkú ngeniir pwe tong a esissillatá pwe kich Chón Kraist mi enlet. (Joh. 13:34, 35) Lupwen ka pélúweni kapas eis atun ewe mwich, inaamwo ika mi chék mwoch, ka áiti ngeni ekkewe mineféto usun ar repwe pwal tongeni áweweei ar lúkú fán wenechar fiti súfél. Ka pwal tongeni fiti emén mineféén chón afalafal lón ewe angangen afalafal me álisi le néúnéú Paipel le asukula aramas. Lupwen ka féri ena, ka áiti ngeni an epwe áppirú Kraist.​—Luk. 10:25-28.

12. Itá mi pwal lamot ach sipwe fókkun lipwákéch ren ach sipwe tongeni álisi aramas le wiliti néún Jesus chón káé? Áweweei.

¹² Sisap ekieki pwe mi lamot ach sipwe fókkun lipwákéch ren ach sipwe tongeni álisi aramas le wiliti néún Jesus chón káé. Pwata? Ekieki pwóróusen Faustina seni Bolivia. Lupwen a kerán chuuri Chón Pwáraatá Jiowa, ese sile állea. Nge mwirin, a mwaren káé állea. Iei a papatais, me a fókkun sani le asukula aramas. A kan káé Paipel ngeni aramas fán nimu iteiten wiik. Inaamwo ika Faustina ese kon lipwákéch le állea esin néún kewe chón káé, nge a fen álisi wonomén le papatais.​—Luk. 10:21.

13. Inaamwo ika sia osukosuk ren chómmóngun ach angang, ikkefa ekkóch feiéch sipwe kúna ren ach fiti ewe angangen álisi aramas le wiliti chón káé?

¹³ Chómmóng Chón Kraist ra fókkun tamangaw ren chómmóngun wiser kewe. Iwe nge ra awora fansoun le káé Paipel ngeni aramas, me a atoto ngeniir watteen pwapwa. Áwewe chék ren pwóróusen Melanie me lóóm lón Alaska. A lipich nge a wor emén néún nengngin walu ierin. A pwal wor an angangen moni full-time me a álillis le túmúnú seman we mi kanser. I chék Chón Pwáraatá Jiowa lón sópwun we mi fókkun towau. A kan soun iótek pwe Jiowa epwe apéchékkúla le ló afalafal inaamwo ika a patapat lón leenian we pún a fókkun mochen kúna emén a tongeni káé ngeni ewe Paipel. Ló, ló, ló, a kúna Sara, me Sara a fókkun pwapwa lupwen  a kerán silei pwe a wor pwisin iten Kot. Mwirin och fansoun, Sara a mochen káé Paipel. Iei alon Melanie: “Lekuniolun Enimu, ua kan fókkun pekkus, nge ám me nei we aua feiéch ren ám ló káé ngeni. Aua pwapwaiti ám research pélúwen án Sara kewe kapas eis, me aua fókkun pwapwa le kúna an a wiliti chiechien Jiowa.” Sara a pwora le likiitú fán án aramas ú ngeni, a towu seni an we lamalam, me a papatais.

14. (a) Ifa usun ewe angangen álisi aramas le wiliti chón káé a usun ewe angangen attaw? (b) Ifa usun alon Paulus lón 2 Timoty 4:1, 2 a kkúú letipom?

¹⁴ Ikaamwo ka meefi pwe usun itá ese sópwéch óm angangen afalafal, nge kosap fangetá lón óm ápilúkúlúkún kúna chókkewe mi mochen wiliti néún Kraist chón káé. Chechchemeni pwe Jesus a apépééi ena angang ngeni ewe angangen attaw. Ekkewe chón attaw ra tongeni attaw fite awa me mwen ar repwe tongeni liap. Fán chómmóng ra attaw lukenipwin are wilingách, me fán ekkóch ra sái towau. (Luk. 5:5) Pwal ina chék usun, ekkóch chón afalafal ra afalafal fite fite awa lón sókkopaten leeni me lón sókkopaten fansoun. Pwata? Pwe epwe chómmóng chókkewe repwe tongeni fós ngeniir. Chókkewe mi féri ena ra kan kúnékún chókkewe mi mochen rong minne sia eáni afalafal. Ka tongeni afalafal lón eú fansoun epwe ámecheresi óm kopwe kúna chómmóng, are afalafal lón eú leeni kopwe kúna chómmóng me ie?​—Álleani 2 Timoty 4:1, 2.

15. Pwata a lamot ach sipwe mosonottam atun sia káé Paipel ngeni aramas?

¹⁵ Pwata a lamot ach sipwe mosonottam lupwen  sia káé ngeni aramas Paipel? Eú popun, pún ese chék naf ach álisi ewe chón káé an epwe silei me aúcheani áitien Paipel kewe. A lamot sipwe álisi an epwe silei me tongei ewe Sounemenemen Makken ewe Paipel, ina i Jiowa. Pwal eú, ese chék naf ach sipwe áiti ngeni ewe chón káé met Jesus a allúkú ngenikich, nge mi lamot sipwe pwal áiti ngeni ifa usun epwe apwénúetá ekkena allúk. Mi lamot sipwe álisi fán mosonottam atun a achocho le apwénúetá án Paipel kewe kapasen emmwen lón manawan. Ekkóch ra tongeni siwili ar ekiek me féffér mwirin chék fitu maram, nge ekkóch, a lamot watteen fansoun.

16. Met ka káé seni pwóróusen Raúl?

¹⁶ Pwóróusen emén misineri lón Peru a pwáraatá aúchean ach sipwe mosonottam. A erá: “Ua fen káé ruu puk ngeni emén chón káé Paipel itan Raúl. Nge a chúen wor watteen osukosuk lón manawan. Iir me pwúlúwan we ra kan soun osukosuk, a kan kapasingaw, me a weires ngeni án néún kewe repwe súféliti. Iwe nge, a kan fiffiti ekkewe mwich, iwe ua sópweló le chuuri me álisi me an we famili. Lap seni úlúngát ier mwirin ai akkomw chuuri, a tongeni papatais.”

17. Met sipwe pwóróus wóón lón en lesen mwirin ei?

¹⁷ Jesus a erenikich ach sipwe “feila o asoulängala chon ekewe mwü meinisin.” Ren ach sipwe apwénúetá ena, sia kan fós ngeni aramas mi fókkun sókkóló ar lúkú seni ach lúkú, kapachelong chókkewe ese wor ar lamalam, are chókkewe mi lúkú pwe ese wor Kot. En lesen mwirin ei epwe áiti ngenikich ifa usun sipwe tongeni afalafal ngeni ekkena sókkun aramas.