A MAK lón ewe Paipel meefien chókkewe mi eáni ekkewe esin memmeef “usun chök kich.” (Jas. 5:17) Áwewe chék sia tongeni mwittir weweiti meefien Paulus lupwen a erá ekkewe kapas mi mak lón Rom 7:21-24: “Lupwen üa mochen föri mine a mürina, üa chök filätä ai üpwe föri mine a ngau. . . . Ngang eman aramas mi attong o weiresikis!” Ach silei enletin meefien Paulus kana, a oururukich atun sia fiffiu ngeni pwisin ach kewe apwangapwang.

Paulus a pwári pwal ekkóch memmeef seni enletin letipan. A erá “Nöün Kot mi echeniei o fangala manauan fän itei.” (Kal. 2:20) Paulus a fókkun lúkú ena. Ka pwal lúkú met a lúkú? Eli fán ekkóch chék.

Ika sia fiffiu ngeni mengiringirin letipach ren met sia eáni tipis me lóóm, eli fán ekkóch sisap lúkú pwe Jiowa a tongekich me a fen omusaaló tipisich, me eli epwe tongeni áweires ach sipwe lúkú pwe án Jesus asorun méén kepich ina eú liffang fán pwisin itach. Itá Jesus a mochen ach sipwe lúkú pwe ewe méén kepich ina eú liffang fán itach? Ika ina, iwe met epwe tongeni álisikich le eáni ena sókkun ekiek? Sipwe etittina ekkena ruu kapas eis.

Jesus a enletin mochen ach sipwe ekieki pwe an we asor ina eú liffang fán iten pwisinkich. Ifa usun sipwe tongeni lúkú ena? Anchangei minne a mak lón Lukas 23:39-43, emén mwán a eitiwetá wóón efóch iráán ninni únúkkún Jesus. Ena mwán a pwári pwe a féri minne mi mwáál. Ese mwáál a kon ngaw minne a féri pwe iwe a ninniiló wóón efóch iráán ninni, kapwúngún chókkewe mi kon chou ar atai allúk. Ena mwán a fókkun lólilen, ina popun a tingormaú ngeni Jesus: “Kose mochen chechemeniei lupwen om kopwe tolong lon mwumw.”

Met Jesus a féri? Anchangei metekin inisin Jesus lupwen a kul me nelóói ewe chón atai allúk mi eitiwetá únúkkún. Inaamwo ika a kon ssenúk metekin, nge Jesus a emelimel ngeni me a oururu ren an ereni: “Enlet, üpwe ürenuk, ikenai kopwe etiei lon Paratis.” Itá Jesus a chék tongeni áchema ngeni pwe ewe “Nöün Aramas . . . a feito an epwe . . . fangala manauan fänäsengesin chomong aramas pwe möön manauer.” (Mat. 20:28) Nge, fán tong Jesus a ereni pwe an we asorun méén kepich epwe fán iten pwisin ena mwán. Jesus a kirekiréch me a néúnéú ekkewe kapas “kopwe” me “upwe.” Me Jesus a ereni ewe mwán pwe epwe manaw lón paratis wóón fénúfan.

Ese mwáál, Jesus a mochen pwe ena mwán epwe weweiti pwe an we asorun méén kepich, i epwe pwal kúna feiéch seni. Ika Jesus a eáni ena esin memmeef fán iten emén chón atai allúk ese mwo nge tufichin angang ngeni Kot, iwe epwe fókkun mochen án emén Chón Kraist mi papatais mi fen angang ngeni Kot epwe kúna feiéch seni an we asor. Met epwe tongeni álisikich le wesewesen lúkú pwe án Kraist we asor epwe pwisin efeiéchúkich inaamwo ika sia féri tipis me lóóm?

Pokiten Jesus a ewisa ngeni Paulus an epwe afalafal, iwe a tongeni weweiti pwe Jesus a máló fán itan. Ifa usun? Paulus a erá: “Üa kilisou ngeni Kraist Jesus ach Samol, ewe mi fang ngeniei pöchökül fän iten ai angang. Üa kilisou ngeni ren an ekieki pwe ngang mi allükülük o a awisaei pwe üpwe angang ngeni. Inamwo ika me lom üa kapasingau usun i, üa ariaföüü o turunufaseei.” (1 Tim. 1:12-14) Wisen Paulus we a ámmeef ngeni pwe Jesus a lúkúlúkú, úméúméch ngeni me tongei. Jesus a pwal ewisa ngenikich meinisin ach sipwe afalafala ewe pwóróus allim. (Mat. 28:19, 20) Itá wisach we le afalafal ngeni aramas a tongeni álisikich le weweiti pwe Jesus a pwal máló fán ásengesich?

Iei alon Albert ewe mi kerán liwiniti Jiowa mwirin an katowu arapakkan 34 ier: “Ua kan chék chechchemeni ai kewe tipis. Nge lupwen ua fiti ewe angangen afalafal, ua meefi met ewe aposel Paulus a meefi, Jesus a pwisin ngeniei wisei we le afalafal. A apéchékkúlaei me a efisi ai upwe pwapwa ren pwisin ngang, manawei, me ai ápilúkúlúk fán iten mwachkkan.”​—Kölf. 51:3.

Me mwen án Allan káé ewe enlet, a atai allúk fán chómmóng me a fókkun akkachofesá, a erá: “Ua chúen ekkekieki usun meinisin ekkewe weires ua efisi ngeni aramas. Fán ekkóch ua mmen letipengaw. Nge ua kilisou ngeni Jiowa pokiten a mut ngeni emén chón tipis, usun chék ngang, an epwe uwei ngeni aramas ewe pwóróus allim. Atun ua kúna án aramas etiwa ewe kapas allim, a áchema ngeniei úkúkún múrinnéén Jiowa me an tong. Ua meefi pwe a néúnéú ngang le álisi chókkewe mi féri met mi ngaw usun chék ngang me lóóm.”

Atun sia fiffiti ewe angangen afalafal, sia féri met mi múrinné, me sia eáni ekiek mi pwúng. A alúkúlúkúkich usun án Jesus úméúméch, tong, me an lúkúlúk wóóch.

Tori talóón án Satan ei ótót, letipach epwe chúen akkapwúngúkich ren mwáállich kewe me lóóm. Met epwe álisikich le úkkú ngeni ekkena sókkun memmeef?

Jean emén mi fiffiu ngeni an mengiringir ren an eáni ruu sókkun manaw lesáráféén, a erá: “Ua mmen sani pwe ‘Kot a tekia seni mwelien letipach.’” (1 Joh. 3:19, 20) Sia pwal tongeni kúna ourur ren ach silei pwe Jiowa me Jesus ra weweiti pwe kich chón tipis. Kopwe chemeni pwe ra awora ewe méén kepich fán tong, esap fán iten chókkewe mi unuséch, nge fen fán iten chókkewe mi tipis nge ra aier.​—1 Tim. 1:15.

Sia alúkúlúkú letipach pwe ewe méén kepich fán pwisin itach ren ach iótek fiti ach ekilonei féfférún Jesus ngeni aramas rese unuséch me atun sia fókkun achocho le apwénúetá ewe angangen afalafal a ewisa ngenikich. Ren ach féri ena, sia usun Paulus me sia tongeni erá, Jesus a “echeniei o fangala manauan fän itei.”