A ffat pwe Jesus a wiliti Souasor mi Lap atun a papatais lón ewe ier 29. Pwata sia silei ena? Atun Jesus a papatais, a pwári an tipemecheres le fangóló manawan wóón ewe rongen asor lón kapas áwewe mi wewe ngeni “letipen” Kot. (Kal. 1:4; Ipru 10:5-10) Pokiten ewe rongen asor ina eú kinikin mi aúchea me lón ewe imwenfel, iwe ese mwáál ewe imwenfel lón pekin lúkú a pwal pwá ewe atun Jesus a papatais. Án Jiowa we imwenfel mi lap lón pekin lúkú, a liosuetá meinisin met ekkewe mi atufichi ach sipwe fel ngeni fán pwúng mi lóngólóng wóón án Jesus we asor.​—Mat. 3:16, 17; Ipru 5:4-6.

A lamot an epwe wor emén souasor mi lap lón ewe imwenfel mi lap lón pekin lúkú. Ina popun Jiowa a ninatiw wóón Jesus an we “Ngünmifel o ngeni an manaman.” (Föf. 10:37, 38; Mark. 1:9-11) Nge ifa usun sipwe tongeni lúkú pwe Jesus a fen kepit pwe epwe emén Souasor mi Lap mwen an we máló me manawsefálitá? Sipwe silei pélúwen ena kapas eis seni pwóróusen Aaron me ekkewe souasor mi lap mi tapw mwirin i.

Ewe allúk Jiowa a ngeni Moses, a apasa pwe ekkewe chék souasor mi lap ra tongeni tolong lón ewe leeni mi Unusen Pin lón ewe imwenfel mangaku. A wor eché chech mangaku mi refifeseni ena leeni mi Unusen Pin me ewe leeni mi Pin. Ewe souasor mi lap epwe chék tolong pekilongen ena chech mangaku lón ewe Ránin Asoren Omusomusen Tipis. (Ipru 9:1-3, 6, 7) Aaron me chienan kewe ra kepit ar repwe souasor me mwen repwe pwerelong pekilóón ewe chech mangaku ngeni ewe Leeni mi Unusen Pin. Pwal ina usun ren Jesus, a lamot epwe kepit an epwe Souasor mi Lap me mwen an máló, mwirin pwerelong “pekilan ewe cheech mangaku, wewen iei püsin inisin,” atun a feitá láng. (Ipru 10:20) Pokiten ena, ewe aposel Paulus a erá pwe Jesus a feito lón wisan “wisen Souasor mi Lap” me a pwerelong lon “ewe imwenfel seni mangaku . . . a lap o fokun unusöch. Esap för ren pöün aramas,” nge “lon läng.”​—Ipru 9:11, 24.

Ese wor sókkofesenin ineet ewe pwonen etipeeú mi fé a pwúngúló me ineet a poputá. Pwata? Lupwen Jesus a feitá láng me mwe ngeni Kot aúchean manawan mi unuséch fán ásengesich, a poputááni ewe áeúin tettel me lein ekkewe úlúngát mettóch epwe apwúngaló ewe pwonen etipeeú mi fé. Ekkena úlúngát tettelin mettóch ra pwal poputááni ewe pwonen etipeeú. Ikkefa ekkena úlúngát tettel?

Áeúin, Jesus a tolong mwen mesen Jiowa, oruuan, a mwe ngeni Jiowa aúchean an we asor, me aúlúngátin, Jiowa a etiwa aúchean chchaan Jesus we mi niniló. A poputá manamanen ewe pwonen etipeeú mi fé mwirin án ekkena úlúngát mettóch ra fis.

Paipel ese affata ngenikich wesewesen ineet Jiowa a etiwa aúchean án Jesus we asor. Ina popun sise tongeni tichiki ineet atun a pwúngúló me poputá manamanen ewe pwonen etipeeú mi fé. Iwe nge sia silei pwe Jesus a feitá láng engol rán me mwen ewe Pentikost. (Föf. 1:3) Lón ekkena fitu rán, Jesus a mwe ngeni Jiowa aúchean an we asor, me Jiowa a etiwa. (Ipru 9:12) Minne a fis lón ewe Pentikost ier 33, a fókkun ánnetatá pwe a poputá angangen ewe pwonen etipeeú mi fé. (Föf. 2:1-4, 32, 33) Iwe seni ena atun, a ffat pwe manamanen ewe pwonen etipeeú mi fé a poputá le angang.

Iwe, ewe pwonen etipeeú mi fé a pwúngúló me poputá mwirin án Jiowa etiwa aúchean chchaan Jesus we mi niniló me etiwaalong ekkewe mi kepit lón ena pwonen etipeeú. A poputá manamanan ren angangen ewe Souasor mi Lap, Jesus, lón wisan we Chón Affér.​—Ipru 7:25; 8:1-3, 6; 9:13-15.