1. Me ren 3 Johannes 3, 4, met a tongeni efisi ach pwapwa?

KA TONGENI anchangei pwapwaan aposel Johannes atun a rong pwe chókkewe a álisiir le silei ewe enlet ra sópweló le angang ngeni Jiowa fán tuppwél? Ekkena Chón Kraist mi tuppwél, ra kúna chómmóng osukosuk, me Johannes a angang weires le apéchékkúla ar lúkú, usun itá nge iir néún. Pwal ina chék usun ren kich, sia kan pwapwa lupwen néúch kewe are chókkewe sia álisiir le silei ewe enlet, ra fangóló manawer ngeni Jiowa me sópweló le angang ngeni.​—Álleani 3 Johannes 3, 4.

2. Met popun Johannes a makkeei ekkewe taropwe?

² Lón ewe ier 98, usun Johannes a nóm lón Efisos are arapakkan ngeni. Eli a mwékút ngeni ikkena mwirin an musowu seni an fétek wóón ewe fénú Patmos. Eli lón ena atun, án Jiowa ngún mi fel a amwékútú an epwe makkeei ekkena úlúché taropwe. Popun an makkeei ekkena taropwe pwe epwe pesei ekkewe Chón Kraist mi tuppwél ar repwe akkamwéchú ar lúkú Jesus me sópweló ar manaweni ewe manawen let.

3. Ikkefa ekkewe kapas eis sipwele pélúweniir?

³ Johannes, i ewe sáingoon aposel mi chúen manaw, me a lólilen ren met epwe fis ngeni chón ekkewe mwichefel ren etipetipaen ekkewe sense chofona. * (1 Joh. 2:18, 19, 26) Ekkena chón rikiló ra erá pwe ra silei Kot, iwe nge rese álleasochisi án Jiowa kewe allúk. Lón ei lesen sipwe pwóróus wóón ewe kapasen emmwen Johannes a eáni fán emmwenien Kot me pélúweni ekkeei úlúngát kapas eis: Met weween ach sipwe manaweni ewe manawen let? Met a tongeni aúkúkichetiw le manaweni ewe manawen let? Me ifa usun sipwe tongeni álillisfengen le chék nónnóm lón ewe enlet?

4. Me ren 1 Johannes 2:3-6 me 2 Johannes 4, 6, met a lamot sipwe féri pwe sipwe manaweni ewe manawen let?

⁴ Ren ach sipwe manaweni ewe manawen let, a lamot ach sipwe silei ewe enlet mi nóm lón án Kot Kapas, ewe Paipel. Pwal och, a lamot sipwe “aleasochisi än [Jiowa] kewe allük.” (Álleani 1 Johannes 2:3-6; 2 Johannes 4, 6.) Jesus a isetiw eú leenien áppirú mi unuséch ren an álleasochisi Jiowa. Iwe eú alen ach sipwe álleasochisi Jiowa, ina ach áppirúfichi án Jesus leenien áppirú úkúkún ach tufich.​—Joh. 8:29; 1 Pet. 2:21.

5. Met a lamot ach sipwe fókkun lúkú?

⁵ Ren ach sipwe sópweló le manaweni ewe manawen let, a lamot ach sipwe fókkun lúkú pwe Jiowa i ewe Koten enlet, me meinisin met a erenikich me lón an we Kapas, ewe Paipel, mi enlet. A pwal lamot ach sipwe fókkun lúkú pwe Jesus i ewe Messaia mi pwonetiw. Chómmóng aramas ikenái ra tipemwaramwar ika Jesus a kepit an epwe King lón án Kot we Mwú. Johannes a erá pwe a wor “chomong chon atuputup,” iir kewe ra tongeni otupwaaló chókkewe ese kon núkúchar ar lúkú ewe enlet usun Jiowa me Jesus. (2 Joh. 7-11) Johannes a apasa: “Iö ewe chon chofona? Ätewe mi apasa pwe Jesus esap ewe Mesaia!” (1 Joh. 2:22) Ach kákkáé án Kot we Kapas, ina chék alen ach sipwe túmúnúkich pwe sisap tupuló. Ach féri ena, ina chék alen ach sipwe silei Jiowa me Jesus. (Joh. 17:3) Iwe, sipwe unusen lúkú pwe minne sia silei, ina ewe enlet.

6. Met a tongeni aúkatiw ekkewe Chón Kraist sáráfé le manaweni ewe manawen let?

⁶ A lamot ngeni Chón Kraist meinisin ar repwe túmúnúéch pwe resap tupuló ren tipachemen aramas. (1 Joh. 2:26) A ákkáeúin lamot ngeni Chón Kraist sáráfé ar repwe túmúnúéch ren ena sókkun ssár. Iei alon Alexia, * emén Chón Kraist fépwúl 25 ierin seni France: “Atun ua chúen sussukul, ua káé usun ewe lúkú pwe aramas ra pop seni man me pwal ekkóch tipachemen aramas, me ekkena káit ra etipemwaramwaraei usun ewe enlet. Fán ekkóch ua sani ekkena sókkun káit. Nge ua ekieki pwe ese pwúng ai upwe tunaló áitien Paipel me lúkúoló meinisin met nei kewe sense ra apasa.” Alexia a káé ewe puk Life​—How Did It Get Here? By Evolution or by  Creation? Mwirin chék fitu wiik, ese chúen wor án Alexia tipemwaramwar. Iei alon: “Ua ánneta ngeni pwisin ngang pwe ewe Paipel a masou ren ewe enlet. Me ua mirititi pwe ai álleasochisi an kewe emmwen epwe atoto ngeniei pwapwa me kinamwe.”

7. Met sisap féri, me pwata?

⁷ A lamot ngeni meinisin Chón Kraist, kúkkún me watte, ar repwe túmúnú pwe rete angang ngeni Jiowa nge pwal féfféri minne mi ngaw. Johannes a menlapei pwe sise tongeni manaweni ewe manawen let nge pwal manaweni eú manaw mi limengaw. (1 Joh. 1:6) Ika sia mochen án Jiowa epwe pwapwa rech, a lamot sipwe chechchemeni fansoun meinisin pwe a kúna meinisin met sia féri. Inaamwo ika aramas rese tongeni kúna met sia féri lemonomon, nge Jiowa a tongeni kúna meinisin met sia féri.​—Ipru 4:13.

8. Met a lamot ach sipwe ttii senikich?

⁸ A lamot ach sipwe ttii senikich ewe ekiek chón ei fénúfan ra eáni usun tipis. Aposel Johannes a apasa: “Are sia apasa pwe esap wor ach tipis, sia püsin atupukich.” (1 Joh. 1:8) Lón fansoun Johannes we, ekkewe chón rikiló ra erá pwe emén a tongeni féri mettóch Kot a erá pwe mi ngaw, nge epwe chúen tongeni chiechian. Lón ei fansoun sia manaw lein chókkewe mi pwal eáni ena sókkun ekiek. Chómmóng ra erá pwe ra lúkú Kot, nge rese tipeeú ngeni án Jiowa ekiek usun tipis, ákkáeúin ika a weneiti ewe mettóch lisowu. A wor sókkun féfférún lisowu Jiowa a erá pwe a mwáál, nge ekkena aramas ra erá pwe a mumu ngeni ié chék a mochen féri ekkena mettóch ika a mochen féri.

9. Pwata a éch án ekkewe sáráfé apwénúetá áitien Paipel kewe?

⁹ A tongeni fókkun áweires ngeni ekkewe Chón Kraist sáráfé ar repwe eáni ekiek mi pwúng usun lisowu atun chiener lón angang are sukul rese etiwa met Paipel a apasa usun  lisowu. Iei met a fis ngeni Aleksandar. A erá: “Ekkóch nengngin lón ai we sukul ra sótun etipetipaei ai upwe lisowu ngeniir. Nge lupwen use tipeeú ngeniir, ra erá pwe ngang emén mi sani mwán.” Ika ka kúna ena sókkun sóssót, chechchemeni pwe ika ka kamwéchúnnúk wóón minne ka lúkú seni Paipel, kopwe meefi kinamwe, túmúnú péchékkúlen inisum, ttii sonuk letipengaw, me a túmún óm riri ngeni Jiowa. Me iteiten óm sópwéch le ú ngeni sóssót, pwal ina mecheresilóón óm kopwe féri minne mi pwúng. Kopwe pwal chechchemeni pwe án chón ei fénúfan ekiek usun lisowu a wesewesen pop seni Satan. Iwe, ika kese eáni ekiekin chón ei fénúfan, ka “akufu ewe Eman mi Ngau.”​—1 Joh. 2:14.

10. Ifa usun 1 Johannes 1:9 a álisikich ach sipwe angang ngeni Jiowa fán eú mwelien letip mi limeliméch?

¹⁰ Sia silei pwe mi wor án Jiowa pwúúng le affata met sókkun féffér a wewe ngeni tipis. Me sia achocho úkúkún ach tufich pwe sisap féri tipis. Nge atun sia féri tipis, sia pwáraatá ngeni Jiowa lón iótek ach kewe mwáál. (Álleani 1 Johannes 1:9.) Me ika sia féri eú tipis mi chou, sia kútta álillis seni ekkewe mwán mi ásimaw, iir kewe Jiowa a néúnéú ar repwe túmúnúkich. (Jas. 5:14-16) Nge a lamot ach sisap ekkekieki usun minne sia mwáálliló wóón me lóóm. Pwata? Pún Semach we mi tong a awora án Néún we asorun méén kepich pwe ach kewe tipis repwe tongeni musoló. Lupwen Jiowa a apasa pwe epwe omusaaló tipisich ika sia enletin aier, i epwe wesewesen féri ena. Iwe, epwe atufichi ach sipwe angang ngeni fán eú mwelien letip mi limeliméch.​—1 Joh. 2:1, 2, 12; 3:19, 20.

11. Ifa usun sipwe túmúnúkich seni ekkewe sókkun afalafal mi tongeni atai ach lúkú?

¹¹ A lamot sipwe ttii senikich minne ekkewe chón rikiló ra eáni asukul. Seni me lepoputáán ewe mwichefelin Chón Kraist, ewe Tefil a néúnéú chómmóng chón otuputup le efisi  tipemwaramwar lón ekiekin néún Kot kewe chón angang mi tuppwél. Ina popun, a mmen lamot ach sipwe sile le álefila lefilen pwóróus mi enlet me pwóróus mi chofona. * Ekkewe chón oputakich eli repwe áeá ewe Internet are social media le achéwú pwóróus mi chofona pwe repwe apwangapwangaaló ach lúkúlúk wóón Jiowa me ach tongei pwiich kewe. Chechchemeni ié we a wesewesen achéwú ekkena sókkun kapasen angngaw, me kosap lúkúúr!​—1 Joh. 4:1, 6; Pwär. 12:9.

12. Pwata a lamot ach sipwe apéchékkúlaló ach lúkú ekkewe pwóróus mi enlet sia fen káé?

¹² Ren ach sipwe ú ngeni án Satan kewe minen otuputup, a lamot ach sipwe apéchékkúlaló ach lúkú Jesus me lúkú ifa usun Jiowa a néúnéú i le apwénúetá letipan. A pwal lamot ach sipwe lúkúlúkú ewe chón angang mi alúkúlúk me tipachem, me lúkú pwe iir chék ewe Jiowa a néúnéú lón ei fansoun le emmweni an we mwicheich. (Mat. 24:45-47) Ach kákkáé án Kot we Kapas, epwe apéchékkúlaló ach lúkúlúk. Iwe, ach lúkú epwe usun efóch irá mi péchékkúl waran lón ewe pwúl. Paulus a pwal apasa ena atun a mak ngeni chón ewe mwichefel lón Kolose. A erá: “Pokiten oua fen etiwa Kraist Jesus pwe ämi Samol, oupwe le sopwela lon ämi nonom lon i. Oupwe warar lon i usun efoch irä mi warar, oupwe fefeitä lon manauemi o pöpöchökülela lon ämi lükü.” (Kol. 2:6, 7) Ika sia angang weires le apéchékkúlaló ach lúkú, esap fókkun tufich ngeni Satan are chiechian kewe ar repwe aúkúkichetiw seni ach manaweni ewe manawen let.​—2 Joh. 8, 9.

13. Met sia silei pwe epwe fis ngenikich, me pwata?

¹³ Sia silei pwe sipwe kúna koput me ren chón ei fénúfan. (1 Joh. 3:13) Johannes a áchema ngenikich pwe “unusen fanüfan a nom fän nemenien Ewe mi Ngau.” (1 Joh. 5:19) Án Satan lingeringer a lallapóló atun a kakkanoto muchúlóón ei ótót. (Pwär. 12:12) Satan ese chék áeá ekkewe sókkun sóssót aramas rese mwittir tepereni, áwewe chék ren otuputupun lisowumwáál are án ekkewe chón rikiló afalafal chofona, nge a pwal áeá ekkewe esin sóssót mi pwápwááló, áwewe chék ren riáfféúmwáál mi kon ssenúk. Satan a silei pwe a chék mwochomwoch an fansoun le sótun aúkaló ach angangen afalafal are atai ach lúkú. Ina popun ese ámáirú ngenikich pwe ach angang a pinepin are aúkúk lón ekkóch fénú. Inaamwo ika a fis ena, nge pwiich kewe lón ekkena fénú ra chék likiitú. Ra ánnetatá pwe ese lifilifil met ewe mi ngaw epwe féri ngenikich, nge sia tongeni akkamwéchú ach tuppwél ngeni Jiowa!

14. Ifa eú alen ach sipwe tongeni álisi pwiich kewe le nónnóm chék lón ewe enlet?

¹⁴ Ren ach sipwe álisi pwiich kewe ar repwe nónnóm chék lón ewe enlet, a lamot ach sipwe tongeer me weweiti meefier. (1 Joh. 3:10, 11, 16-18) A lamot ach sipwe tongfengen esap chék lón fansoun kinamwe nge pwal atun a ppiitá osukosuk. Áwewe chék, ka silei emén mi má seni attongean nge mi lamot ngeni ourur are pwal och álillis? Are, ka rong pwe a ta seni chienom kewe Chón Kraist chómmóng pisekiir ren feiengaw watte me ra osupwangen álillis ren kaúsefálin ar kewe Leenien Mwich are imwer kewe? Sia pwári úkúkún ach tongei me weweiti meefien pwiich kewe esap chék lón ach kapas, nge lap seni meinisin, lón ach féffér.

15. Met a lamot sipwe féri me ren 1 Johannes 4:7, 8?

¹⁵ Lupwen sia tongfengen lefilach, sia áppirú Semach we mi tong lón láng. (Álleani 1 Johannes 4:7, 8.) Eú mettóch mi lamot  sipwe féri pwe sipwe pwári tong, ina ach omusaaló tipisin aramas. Áwewe chék, eli emén a asongakich nge mwirin a omusomus. Sia pwári ach tongei ren ach omusaaló tipisin me ménúkaaló met ewe a féri. (Kol. 3:13) Emén Chón Kraist alúwél itan Aldo, a kúna ena esin weires atun a rong án emén Chón Kraist mwán, i a súféliti, fósongaw usun aramasen fénúan we. Aldo a erá, “Ua ikkiótek ngeni Jiowa an epwe álisiei pwe usap eáni ekiek ese pwúng usun átena.” Nge esap chék ina met Aldo a féri. A filatá an epwe tingorei átena ar repwe mwin le afalafal. Atun ra mwin, Aldo a áwewe ngeni meefian ren met ewe a apasa. Aldo a erá: “Atun a silei minne ua meefi ren met ewe a apasa, iwe a omusomus. Ua tongeni esilla seni léúwan úkúkún an niamam ren met ewe a apasa. Mwirin ena, aua chiechiéchsefál.”

16-17. Met sipwe tipeppós le féri?

¹⁶ Ewe aposel Johannes a fókkun tongei pwiin kewe Chón Kraist me mochen an epwe péchékkúl ar lúkú. An tongeer me chúngúúr a enletin pwá me lón an kewe kapasen emmwen ngeniir lón néún kewe úlúché taropwe. A fókkun múrinné ach silei pwe ekkewe mwán me fefin repwe fiti Jesus le nemenem seni láng, repwe pwal tongeei me chúngúkich usun chék Johannes.​—1 Joh. 2:27.

¹⁷ Amwo sipwe lefareni ekkeei kapasen emmwen sia kerán pwóróus usur. Ousipwe tipeppós le manaweni ewe manawen let, weween sipwe álleasochisi Jiowa lón mettóch meinisin sia féri. Kákkáé an we Kapas ewe Paipel, me lúkúlúk wóón. Apéchékkúla ach lúkú Jesus. Sipwe ttii senikich tipachemen aramas me minne ekkewe chón rikiló ra eáni asukul. Sipwe túmúnú pwe site angang ngeni Jiowa nge pwal féfféri minne mi ngaw, me sisap aúseling ngeni chókkewe iir mi etipetipakich le féri minne mi ngaw. Sipwe etipeeúfengeni manawach ngeni án Jiowa kewe allúk. Me sipwe álisi pwiich kewe ar repwe péchékkúl lón pekin lúkú ren ach omusaaló tipisin chókkewe mi ámeteki letipach me álisi chókkewe mi osupwangen álillis. Iwe, ese lifilifil met sókkun weires sipwe kúna, sipwe chék sópweló le manaweni ewe manawen let.