Ua uputiw lón St. Paul, Minnesota, U.S.A., lón 1954. Semei kewe me inei rese kon pwal wéúéch me aua fiti ewe lamalamen Katolik. Ám nimmén, nge ngang ewe nampa ruu. Ua sukul lón eú Katolik elementary school, me ngang emén chón álillis ngeni patere. Nge ese watte sileei lón Paipel. Ikaamwo ua lúkú pwe mi wor emén Kot mi fératá mettóch meinisin, nge use lúkú pwe ewe lamalamen Katolik epwe tongeni álisiei le fel ngeni i.

Lón áeúin ierin ai fiti ewe sukul itan William Mitchell College of Law, Chón Pwáraatá Jiowa ra tori imwei we. Ua tawengaw lón ena atun pún ua sóópw, iwe ewe pean pwúpwúlú ra tipeeú ngeni ar repwap liwinsefál. Atun ra liwin, ua eisiniir ekkeei ruu kapas eis: “Pwata ekkewe aramas mi ngaw ra fen kon sópwéch lón manawer lap seni ekkewe aramas mi éch?” me “Ifa usun aramas repwe kúna enletin pwapwa?” Ra ngeniei ewe puk itelapan, Ewe Enlet Mi Emmwenikich Ngeni Manau Esemuch, me ewe New World Translation of the Holy Scriptures mi anúwen fetil. Ua pwal tipeeú ngeni ai upwe káé Paipel rer. Ena mettóch  a álisiei le weweiti chómmóng mineféén pwóróus. Ua fókkun pwapwa le silei pwe án Kot we Mwú ina ewe Mwú epwe nemeni ei fénúfan. Ua tongeni kúna pwe án aramas nemenem a fen unusen sópwongaw me efisi watteen metek, riáfféú, me pwúngúngaw wóón fénúfan.

Ua fangóló manawei ngeni Jiowa lepoputáán ewe ier 1982, me mwirin ua papatais lón ewe mwichelap itelapan, “Kingdom Truth” mi fis lón St. Paul Civic Center. Mwirin eú wiik, ua liwiniti ewe civic center pwe upwe angei ewe test mi lamot án emén chón sukulen allúk epwe angei ren an epwe wiliti emén lawyer. Lepoputáán October, ua silei pwe ua passini ena test, weween pwe ua tongeni emén lawyer.

Atun ena mwichelap “Kingdom Truth,” ua chuuri Mike Richardson, emén chón angangen Bethel lón Brooklyn, me a ereniei pwe a wor eú ofesin pekin allúk lón ewe ofesilap. A cheme ngeniei alon ewe iunok chón Itiopia mi mak lón Föför 8:36, me ua pwisin eisiniei, ‘Met a eppeti ai upwe tingor le angang lón ewe Ofesin Pekin Allúk?’ Iwe, ua apply ngeni Bethel.

Semei kewe me inei rese pwapwa ren ai wiliti emén Chón Pwáraatá Jiowa. Semei we a eisiniei ika ai angang Bethel a wor feiéchún ngeni ai angangen lawyer. Ua áwewe ngeni pwe ese wor peioffun ai angang lón Bethel. Ua ereni pwe ekkewe chón angangen Bethel ra kan angei 75 chala álillisiir iteiten maram.

Lón 1984, ua poputá le angang Bethel lón Brooklyn, New York, mwirin wesin ekkóch ai angang lón eú imwen kapwúng. Ua kewis pwe upwe angang lón ewe Ofesin Pekin Allúk. Ai angang lón imwen kapwúng a ammólnaeitá ngeni met ewe mi múrinné epwe fis mwirin.

Lón November 1983, ewe mwicheich a mééni ewe Stanley Theater lón Jersey City, New Jersey. Ekkewe Chón Kraist mwán ra amasoua taropween tingoren mumutáán fférsefálin selin fiifiin me paipen ewe imw. Atun ekkena mwán ra mwichfengen me néúwisin ena leeni, ra áwewe ngeniir pwe ra mochen eáni ewe Stanley Theater leenien mwichelap án Chón Pwáraatá Jiowa. Me ikena ie, a ppiitá eú osukosuk. Me ren ewe allúkún Jersey City usun áeáán imw, pwe ekkewe imw fán iten leenien fel, epwe chék nóm lón ekkewe leeni mi wor imwen aramas ie. Nge ewe Stanley Theater a nóm town, ina popun ekkewe néúwis lón ena leeni rese mut ngeniir ar na tingor. Pwiich kana ra tingorei ekkena néúwis ika ra tongeni siwili ar ekiek, nge rese mochen.

Lón áeúin wiiken ai angang lón Bethel, ewe mwicheich a uwaalóng lón kapwúng ena  osukosuk. Pokiten ua kerán chék áwesi ai angang lón ewe imwen kapwúng lón St. Paul, Minnesota, iwe ua silefichi ekkena sókkun case. Emén me lein néúm kewe lawyer a erá pwe aramas ra fen ákkáeá ewe Stanley Theater lón ar kewe minen apwapwa, áwewe chék ren kachito me kél. Iwe pwata chék epwe pinepin fán iten angangen lamalam? Ewe imwen kapwúng a etittina ena osukosuk me apwúngaló pwe Jersey City a atai ach pwúúng lón pekin angangen fel. Ewe imwen kapwúng a apwúngaló pwe Jersey City epwe mutawu ewe taropween mumutá, iwe me ikena ie ua poputá le kúna usun án Jiowa efeiéchú an we mwicheich lón pekin allúk pwe epwe lapóló an angang. Ua fókkun pwapwa le álillis lón ena angang.

Pwiich kewe ra poputááni eú watteen angangen fférsefálin ena imw. Iwe kis seni eú ier mwirin poputáán ena angang, lón ewe September 8, 1985 a fis sochungioon ewe fiik me tiuwen Sukulen Gilead lón ena Leenien Mwichelap lón Jersey City. Ua fókkun pwapwa le álillis lón ena angang fán iten Jiowa. A efisi watteen ai pwapwa lap seni ai we angangen lawyer mwen ai tolong lón Bethel. Use fen tepereni lón ena fansoun pwe Jiowa epwe néúnéú ngang lón chómmóng case lón pekin allúk.

Seni ewe ier 1980 feiló, tokter me pioing rese kan súféliti án Chón Pwáraatá tingor ar resap áeá chcha. Fán chómmóng ekkewe soukapwúng ra kan ekieki pwe ese wor án ekkewe fefin mi pwopwo pwúúng le filatá ar resap angei IV chcha. Ekkewe soukapwúng ra apasa pwe ika ewe inelap ese angei IV chcha, iwe eli epwe máló me esap chúen wor inen ewe ménúkol.

Lón December 29, 1988, a watte chcha a towu seni emén Chón Kraist fefin itan Denise Nicoleau mwirin an néúnatiw néún we át. A fókkun nafangaw chchaan me néún we tokter a mochen an epwe angei IV chcha. Denise ese mochen. Sorotáán ewe soran, ekkewe chón angangen pioing ra tingorei emén soukapwúng mumutáán ar repwe ngeni neminna IV chcha. Ewe soukapwúng ese mwaren mut ngeni Denise are pwúlúwan we ar repwe áweweei ar ekiek wóón ena mettóch, me ese pwal mwo nge esile ngeniir pwe a fen mut ngeni chón pioing ar repwe ngeni IV chcha.

Lón Enimu December 30, ekkewe chón angangen pioing ra ngeni Denise IV chcha inaamwo ika pwúlúwan we me ekkóch chón an we famili mi nóm ren lón ena atun rese fókkun tipeeú ngeni. Lón ena kuniolun, ekkóch chón án Denise we famili me emén are rúúemén ekkewe mwán mi ásimaw ra ares ren ar eppeti án ekkewe tokter repwe tikelong ren án Denise we bed me ngeni ewe  IV chcha. Lesossorun Ammól December 31, a katowu lón simpung, TV, me radio lón unusen New York City repotun án chókkana ares.

Lesossorun Sárinfál ua fós ngeni Milton Mollen, emén soukapwúng lón eú imwen kapwúng tekia. Ua áwewe ngeni pwóróusen ewe case, me affata ngeni pwe ewe soukapwúng a chék apwúngaló ewe tingoren IV chcha nge ese wor arongorong wóón. Soukapwúng Mollen a ereniei ai upwe chuuló lón an we ofes lekuniolun ena rán pwe aupwe fósfengen wóón ena case me ekkewe allúk mi weneiti. Iwe nei we overseer itan Philip Brumley a fitiei le chuuló lón án Soukapwúng Mollen we ofes lón ena kuniolun. Ena soukapwúng a pwal etiwa ewe lawyer mi wisen álisi pioing an epwe fitikem. A fókkun chou masouen ám pwóppwóróusfengen. Atun ám pwóppwóróusfengen, Pwiich Brumley a makkeei lón néún we puk pwe upwe “ekis mosonosonetiw.” An na fén, a fich lón ena atun pwe itá ua fókkun song ren ai resin ánneta mwáállin ewe lawyer mi álisi pioing.

Ina epwe mwirin eú awa, Soukapwúng Mollen a erá pwe lesossorun lesor ina ewe case epwe akkomw fis kapwúng wóón. Lupwen aupwele towu seni án Soukapwúng Mollen we ofes, i a erá pwe lesor epwe fókkun chou án ewe lawyer mi wisen álisi pioing angang. Weween pwe epwe fókkun weires ngeni le ánneta pwe mi wor án ewe pioing pwúúng le echchimwa Denise Nicoleau an epwe angei IV chcha. Ua meefi pwe Jiowa a alúkúlúkú ngeniei pwe aua tongeni winneni ewe case. Ua fókkun mwaar le kúna ifa usun Jiowa a néúnéú ám le apwénúetá letipan.

Lón ena pwinin aua nelóttam pwe aupwe ammólnatá met aupwe apasa lón ena sossoran. Ewe imwen kapwúng mi chék kkan ngeni ewe Bethel lón Brooklyn, ina popun lape ngeni chókkewe seni ám we kúkkún Ofesin Pekin Allúk ra chék fetál. Mwirin án ekkewe fémén soukapwúng rongorong ngeni ám kewe kapasen otuttur, ra apwúngaló pwe itá úrúrún ese pwúng án pioing allúkú ngeni Denise an epwe angei IV chcha. Ewe imwen kapwúng tekia a peni Denise me ra erá pwe án emén apwúngaló och mettóch fán iten emén chón semmwen nge ese akkomw angei meefian, a ú ngeni án aramas pwúúng fán allúk.

Ekiseló mwirin ena, ewe imwen kapwúng tekia lón New York a wesewesen apwúngaló pwe mi wor án Denise pwúúng an epwe sáfei nge esap angei chcha. Iei áeúin me lein ekkewe rúáánú  case usun IV chcha mi kapwúngúló me lón ekkewe imwen kapwúng tekia ua álillis lón. (Ppii ewe pwóór “ Ekkewe Kapwúng Chón Pwáraatá Jiowa Ra Win Lón.”) Ua pwal álisi ekkewe ekkóch lawyer lón Bethel wóón ekkewe case mi weneiti kapwúngún semirit, mufesen, me allúk wóón áeáán fénú me imw.

Atun ua kerán chuuri pwúlúwei we itan Dawn, a fen wor úlúmén néún me ra mufesen me pwúlúwan we. A atufichi pwisin manawer me pioneer. A weires manawan, me ua fókkun ingeiti an tipeppós le angang ngeni Jiowa. Lón ewe 1992, aua fiti ewe mwichelap lón New York City, itelapan “Light Bearers” me ua tingorei pwe aupwe kammwet. Mwirin eú ier, aua pwúpwúlú. An wor pwúlúwei mi akkomwa Jiowa lón manawan me emén mi atakirikir, a eú liffang me ren Jiowa. Dawn a enletin atoto ngeniei pwapwa lón ánein ám manawfengen.​—SalF. 31:12.

Atun aua pwúpwúlú, ierin néún Dawn kewe, a 11, 13, me 16. Ua mochen ai upwe emén sam mi múrinné ngeniir, ina popun ua álleanifichi me apwénúetá meinisin ekkewe emmwen lón néúch kewe puk usun sam are in mi néúlapei nau. Fán ekkóch a wor ám osukosuk lón ekkena ier, nge ua mmen pwapwa pwe ekkewe semirit ra etiwaei pwe upwe emén chiechier ra tongeni lúkúlúk wóón me semer mi tong. Chiechien néúm kewe ra ketiw ngeni imwem we iteitan, me aua mmen sani le nónnóm lein ekkena sáráfé.

Lón ewe 2013, ám me Dawn aua mwékút ngeni Wisconsin pwe aupwe túmúnú semei we mi apwangapwang me inen me semen Dawn kewe. Ua máirú pwe ai angangen Bethel ese much. Ren och fansoun, ua ketiw le akkawora álillis lón pekin allúk ngeni ach we mwicheich.

Lón ewe September 2018, ua mirititi pwe a wor och osukosuk lón chiorei. Ua ló cheki ren tokter, nge ese silei met a efisi ai we osukosuk. Mwirin och fansoun, pwal emén tokter a ereniei pwe upwe chuuri emén tokterin waa. Iwe, lón ewe January 2019, ena tokter a ereniei pwe neman a úriei och semmwen ese kon lien terú nge epwe chéúló lón unusen inisi.

Mwirin úlúngát rán, atun ua fiti eú urumwot ua mmen sani, ua turuló me a kup kumwuchun peliemwánin pei. Lón unusen manawei ua fen fiffiti ena urumwot, me ua mmen angéch lón. Nge me ikena ie, ua esilla pwe use chúen tongeni nemeni mwékútúkútún inisi. Ua máirú ren mwittirin chéúlóón ai we semmwen. A wekkeiresiló ai fós, fetál, me oromaaló mettóch.

Ua mmen pwapwa pwe ua tufichin álillis lón án Jiowa mwicheich lón ai angangen lawyer. Me ua mmen pwapwa pwe ua tongeni makkeei chómmóng taropwe me ekkewe tokter, lawyer, me soukapwúng ra tongeni álleani. Ua pwal wisen fós wóón unusen fénúfan le peni án néún Jiowa kewe aramas pwúúng le filatá sókkun reirei me sáfei repwe eáni nge ese fiti chcha. Ikaamwo ina, nge ua chék aloni alon ewe soumakken Paipel lón Lukas 17:10 ewe mi erá: ‘Ngang chon angang mi lomotongau, ua chök föri mine wisei.’