1. Met Jiowa a fen féri fán itom?

IFA USUN ka wiliti emén Chón Pwáraatá Jiowa? Akkomw, eli ka rong “ewe Pworausen Manau” seni semom kewe me inom, emén chienom chón angang are chón sukul, are atun emén Chón Pwáraatá Jiowa a etto afalafal lón imwom we. (Mark. 13:10) Mwirin, emén a awora watteen fansoun me achocho le kákkáé ngonuk. Atun ena káé, ka poputá le tongei Jiowa me silei pwe a tongeok. Jiowa a fen paanukoto ngeni ewe enlet, me iei ka wiliti emén néún Jesus Kraist chón káé, me ka eáni ewe ápilúkúlúkún manaw esemuch. (Joh. 6:44) Ka fókkun kilisou pwe Jiowa a néúnéú emén le asukula ngonuk ewe enlet, me a etiwok pwe kopwe emén me lein néún kewe chón angang.

2. Met sipwe pwóróus wóón lón ei lesen?

² Pokiten sia silei ewe enlet iei, iwe a wor wisach le álisi aramas le fitikich le fetál wóón ewe al mi ale ngeni manaw. Neman a mecheres ngenikich afalafal imw me imw, nge eli a weires ach sipwe eisini emén ika a mochen káé ewe Paipel me poputá le káé ngeni. Pwal ina usun meefiom? Ika ewer, iwe eli ekkóch ekkeei kapasen emmwen lón ei lesen, repwe álilliséch ngonuk. Sipwe pwóróus wóón met a amwékútúkich le álisi aramas le wiliti chón káé. Sipwe pwal pwóróus wóón ifa usun sia tongeni pwákini met ekkewe eli ra eppetikich le káé ngeni emén. Nge akkomw, sipwe pwóróus wóón popun mi lamot ach sisap chék chón afalafal, nge sipwe pwal chón asukula ewe pwóróus allim.

3. Pwata sia afalafal?

³ Atun Jesus a nóm fénúfan, a ewisa ngeni néún kewe chón káé ar repwe féri eú angang mi wor ruu kinikinin. Áeúin, a ereniir ar repwe afalafala pwóróus allimen ewe Mwú, me a áiti  ngeniir ifa usun repwe féri ena. (Mat. 10:7; Luk. 8:1) Áwewe chék, Jesus a ereniir met repwe féri atun aramas ra etiwa pwóróus allimen ewe Mwú, me met repwe féri atun rese mochen etiwa. (Luk. 9:2-5) A pwal áweweei pwe repwe afalafal ngeni chómmóng aramas me lón chómmóng leeni lupwen a erá pwe epwe “eu minen pwärätä ngeni aramas meinisin.” (Mat. 24:14; Föf. 1:8) Ese lifilifil ika aramas ra etiwa are rese, nge Jesus a allúkú ngeniir ar repwe ereni aramas pwóróusen ewe Mwúún Kot me met epwe féri.

4. Me lúkún ach afalafala pwóróusen ewe Mwú, met a pwal lamot sipwe féri me ren Mateus 28:18-20?

⁴ Ifa oruuen kinikinin ewe angang Jesus a ewisa ngeni néún kewe chón káé ar repwe féri? A ereniir ar repwe asukula aramas ar repwe álleasochisi meinisin minne a allúkú. Nge itá ena angangen afalafal me asukul a chék weneiti ekkewe popun Chón Kraist usun met ekkóch ra erá? Aapw, Jesus a erá pwe ena angang mi aúchea epwe sópwósópwóló tori pwal mwo nge lón ach ei fansoun, “tori sópwólóón ótóten ei fénúfan.” (Álleani Mateus 28:18-20 seni ewe footnote.) * Eli Jesus a eáni ena allúk atun a pwá ngeni lap seni 500 néún kewe chón káé. (1 Kor. 15:6) Lón ewe lángipwi Jesus a ékúna ngeni Johannes, a pwári pwe a mochen án meinisin néún kewe chón káé repwe álisi aramas le káé usun Jiowa.​—Pwär. 22:17.

5. Me ren 1 Korint 3:6-9, ifa usun Paulus a áweweei ririfengennin ewe angangen afalafal me ewe angangen asukul?

⁵ Ewe aposel Paulus a aléllééi ewe angangen álisi aramas le wiliti chón káé ngeni angangen atake, me a pwári pwe a pwal wor met a lamot sipwe féri me lúkún ach chék fóffót. Iei met a áchchema ngeni ekkewe chón Korint: “Üa fotuki ekewe pwükil, Apolos a atütüür, . . . nge ämi än Kot tanipi.” (Álleani 1 Korint 3:6-9.) Pokiten kich chón angang lón “än Kot tanipi,” iwe sise kan chék fóffót, nge sia pwal ékkétútú me chechcheki mámmáárin fótach kewe irá. (Joh. 4:35) Nge sia mirititi pwe Kot, ewe a wisen ámááriiretá, weween i ewe a wisen paniireto ngeni i.

6. Met a kapachelong lón ach angangen asukul?

⁶ Sia kúkkútta chókkewe “letiper a páengeni ar repwe etiwa ewe enlet mi awora manaw esemuch.” (Föf. 13:48, NW) Ren ach sipwe álisi chókkana le wiliti chón káé, a lamot ach sipwe álisiir le (1) weweiti, (2) etiwa, me (3) apwénúetá met ra káé seni ewe Paipel. (Joh. 17:3; Kol. 2:6, 7; 1 Tes. 2:13) Meinisin chón ewe mwichefel ra tongeni álisi ekkewe chón káé ren ar isetiw leenien áppirú lón ar pwári ngeni ekkena minefé pwe ra tongeer, me ar etiwaéchúúr atun ra fiti ekkewe mwich. (Joh. 13:35) A lamot án ewe mi wisen káé ngeni ewe chón káé epwe pwal awora watteen fansoun me achocho le álisi le likitaló ekkewe lúkú are eéreni mi “pöchökül.” (2 Kor. 10:4, 5) Eli epwe fitu maram óm álisi ena emén an epwe féri ekkewe siwil lón manawan, iwe ló, ló, ló, epwe tikeri an mochen papatais. Nge epwe watte feiéchún ach achocho.

7. Met a amwékútúkich le fiti ewe angangen afalafal me asukula aramas le wiliti chón káé?

⁷ Pwata sia afalafala me asukula aramas le wiliti chón káé? Áeúin, pokiten sia tongei Jiowa. Atun ka achocho úkúkún óm tufich le álleasochisi ewe allúk le afalafala me asukula aramas, ka pwári pwe ka tongei Kot.  (1 Joh. 5:3) Ekieki ei mettóch: Óm tongei Jiowa a fen amwékútuk óm kopwe afalafal imw me imw. Mi mecheres óm kopwe afalafal ngeni aramas? Neman ese. Ka pireir atun ka kerán fiti ewe angangen afalafal? Ewer! Nge ka silei pwe iei ewe angang Jesus a mochen óm kopwe féri, iwe ka álleasochisi ena allúk. Nge ló, ló, ló, neman a mecheresiló óm fiti ewe angangen afalafal. Nge met meefiom iei ren óm kopwe káé ngeni emén? Óm chék ekieki ena, a efisi óm pireir? Ese mwáál. Nge ika ka iótek ngeni Jiowa me tingorei an epwe apworaók le eisini emén ika a mochen káé, iwe i epwe álisuk le mochen féri ena.

8. Me ren Markus 6:34, pwal met a tongeni amwékútúkich le asukula aramas?

⁸ Oruuan, ach tongei chón óruch a amwékútúkich ach sipwe asukuler usun ewe enlet. Lón eú atun, Jesus me néún kewe chón káé ra fókkun pekkus ren ar angang weires lón ewe angangen afalafal. A lamot ngeniir ar repwe asésé lón eú leeni, nge eú pwiin aramas mi chómmóng ra ló tokumwer. Pokiten Jesus a fókkun tongeer, a poputá le afalafala ngeniir “chomong mettoch.” (Álleani Markus 6:34.) Inaamwo ika Jesus a fókkun pekkus lón ena atun, nge a chék achocho. Pwata? A silei úkúkún meefien ena pwiin aramas. A kúna úkúkún weiresiir, úkúkún lamoten ewe ápilúkúlúk ngeniir, me a mochen álisiir. Inaamwo ika usun itá aramas lón ei fansoun ra pwapwa me menemenéch lón manawer, nge a pwal wor ar osukosuk me a lamot ngeniir ápilúkúlúk. Ra usun chék siip mi mwálecheló, nge ese wor chón maser mi emmweniir. Aposel Paulus a áweweei pwe ekkena sókkun aramas, ra towau seni Kot me ese wor ar ápilúkúlúk. (Ef. 2:12) Ra fetál wóón ewe “al mi ale ngeni feiengau esemüch!” (Mat. 7:13) Atun sia ekieki úkúkún lamoten án aramas repwe silei Kot lón ach we leenien afalafal, iwe sia tongeer me mochen álisiir. Nge ach eisiniir ika ra mochen ach sipwe káé ngeniir, ina alen ach sipwe fókkun álisiir.

9. Me ren Filipi 2:13, ifa usun Jiowa a tongeni álisuk?

⁹ Eli ka pireir le eisini emén ika a mochen káé pokiten ka silei pwe a lamot óm kopwe áeá watteen fansoun lón óm káé ngeni. Ika ina, iwe ereni Jiowa meefiom. Tingorei an epwe álisuk le ámááraatá óm mochen le kútta me káé ngeni emén. (Álleani Filipi 2:13.) Aposel Johannes a erenikich pwe Kot epwe pélúweni ekkewe iótek mi fich ngeni letipan. (1 Joh. 5:14, 15) Ina popun, ka tongeni lúkúlúk pwe Jiowa a tongeni álisuk le ámááraatá óm mochen le asukula aramas.

10-11. Eli pwata sia pireir le káé ngeni emén?

¹⁰ Sia silei pwe a fókkun aúchea ach sipwe asukula aramas, nge neman a weires ach sipwe féri ena. Sipwe pwóróus wóón ekkóch mettóch mi áweiresikich me ifa usun sia tongeni pwákiniir.

¹¹ Eli sia meefi pwe a aúkúk met sia mochen féri. Áwewe chék, ekkóch chón afalafal ra chinnap are ra apwangapwang. A pwal ina usum? Ika ewer, iwe ekieki eú me lein ekkewe mettóch sia káé atun ewe COVID-19 pandemic. Sia kúna pwe a sópwéch ach káé ngeni aramas wóón phone are wóón néúch kewe device! Iwe, ina popun ka tongeni káé ngeni emén seni pwisin imwom we. Pwal och, ekkóch ra mochen káé lón ekkewe atun esap úrúrún atun án pwiich kewe afalafal. Iwe nge, eli ra tawe lesossorusich are atun a pwinimaw. Ka tongeni káé ngeni emén lón ekkena atun? Jesus a asukula Nikotemus lepwin, lón ewe atun Nikotemus a tawe ngeni.​—Joh. 3:1, 2.

12. Met a tongeni alúkúlúkú ngenikich pwe sia tufichin asukula aramas?

¹² Eli sia ekieki pwe sia lipwákingaw le káé  ngeni emén. Eli sia meefi pwe a lamot an epwe watte sileach are sipwe lipwákéch le asukul me mwen ach sipwe tongeni káé ngeni emén. Ika a ina usun meefiom, ekieki ekkeei úlúngát mettóch epwe alúkúlúkú ngonuk pwe ka tongeni káé ngeni emén. Áeúin, me ren Jiowa, a fich ngonuk óm kopwe asukula aramas. (2 Kor. 3:5) Oruuan, Jesus, ewe mi eáni “nemenem meinisin won läng me fanüfan,” a fen allúkú ngonuk óm kopwe asukula aramas. (Mat. 28:18) Me aúlúngátin, ka tongeni lúkúlúk wóón álillisin ekkewe ekkóch. Jesus a lúkúlúk wóón met Seman we a áiti ngeni an epwe apasa, iwe ka pwal tongeni ina usun. (Joh. 8:28; 12:49) Pwal och, ka tongeni tingorei ewe chónemmweni kúmiin chón afalafal, are emén pioneer mi lipwákéch, are emén chón afalafal an epwe álisuk le poputá le káé ngeni emén. Eú mettóch a pwal tongeni alúkúlúkuk pwe ka tufichin káé ngeni emén, ina ren óm fiti emén me lein ekkena chón afalafal le káé ngeni néúr chón káé.

13. Pwata a lamot ach sipwe tipemecheres le eérenaaló le káé ngeni aramas lón ekkewe mineféén napanap?

¹³ Eli a weires ach sipwe eérenaaló le áeá ekkewe mineféén napanapen afalafal me néúnéú ekkewe mineféén minen álillis. Napanapen ach káé ngeni aramas iei, a siwil. A lamot ach sipwe ammólnatá lón ach káé ngeni aramas lón ewe puk, Eáni Manaw mi Pwapwa Tori Feilfeiló!, me ach néúnéú ena puk a sókkóló seni met sia féfféri me lóóm. Sia álleani fitu chék parakraf, me a chék lap ach pwóppwóróusfengen me ewe chón káé. Atun sia káé ngeniir, sia alapa ach néúnéú video me ekkewe pwóróus seni ach we website me JW Library^®. Ika kese kon sile néúnéún ekkena minen álillis, iwe tingorei emén an epwe áituk néúnéúr. Kich aramas, sia kan chék sani le féri met sia fen eérenaaló, ina popun ese mecheres ach sipwe eérenaaló ekkena mineféén napanapen afalafal. Nge ren álillisin Jiowa me ekkewe ekkóch, epwe ámecheresaaló óm eérenaaló, me pwal mwo nge sani le káé ngeni aramas. Usun chék met emén pioneer a erá pwe ena napanapen káé a “apwapwa ngeni ewe chón afalafal me néún we chón káé.”

14. Met a lamot sipwe chemeni ika sia nóm ikewe a weires án aramas repwe etiwakich, me ifa usun 1 Korint 3:6, 7 a apéchékkúlakich?

¹⁴ Eli sia nóm ikewe mi weires ach sipwe kúnékún néúch chón káé. Eli aramas rese sani le aúseling ach afalafal, are eli ra pwal mwo nge oput. Met a tongeni álisikich le chék eáni ekiek mi pwúng usun ena esin leenien afalafal? Chemeni pwe nónnómun aramas lón ei ótót mi uren fitikoko, a tongeni mwittir siwil, me chókkewe rese kan etiwakich me lóóm, eli repwe mirititi pwe a lamot án Kot emmwen lón manawer. (Mat. 5:3) Ekkóch rese kan sani néúch kewe puk me lóóm, nge iei ra etiwa eú káéén Paipel. Sia pwal silei pwe Jiowa, i ewe Samolun rás. (Mat. 9:38) A mochen ach sipwe chék sópweló le fótuki pwikilin enlet me ékkétútúúr, nge i Ewe epwe wisen ámááriiretá. (1 Kor. 3:6, 7) A ifan me péchékkúletáách le chemeni pwe inaamwo ika sise tongeni káé ngeni emén iei, nge Jiowa epwe efeiéchúkich pokiten ach achocho, nge esap pokiten úkúkún chómmóngun aramas sia anéúnéú ngeniir néúch kewe puk are káé ngeniir! *

15. Met meefien Jiowa atun emén a etiwa eú káéén Paipel me apwénúetá met a kákkáé?

¹⁵ Jiowa a pwapwa atun emén a etiwa ewe enlet me poputá le afalafala ngeni aramas.  (SalF. 23:15, 16) A ifan me pwapwaan Jiowa atun a kúna met a fiffis lón ei fansoun! Áwewe chék, inaamwo ika a fis wóón unusen fénúfan ewe pandemic, nge lón ewe 2020 service year, a wor 7,705,765 chón káé, me a wor 241,994 ra fangóló manawer ngeni Jiowa me papatais. Iwe ekkena mineféén Chón Kraist, repwe pwal káé ngeni aramas me álisiir le wiliti Chón Kraist. (Luk. 6:40) Ese wor tipemwaramwar pwe sia apwapwaai Jiowa atun sia álillis lón ewe angangen álisi aramas le wiliti Chón Kraist.

16. Ifa eú mettóch mi éch sia mochen achocho ngeni?

¹⁶ Ewe angangen álisi aramas le wiliti Chón Kraist, ina eú angang mi áweires, nge ren álillisin Jiowa, sia tongeni apwénúetá wisach we le asukula ekkena minefé le tongei Semach we lón láng. Sia tongeni achocho le káé ngeni mwaren emén? Eli sipwe máirú ika sia kúna met epwe fis atun sia alamota iteiten fansoun mi suuk ngenikich le eisini chókkewe sia chuuriir ika ra mochen káé. Sia tongeni lúkúlúk pwe Jiowa epwe efeiéchú ach achocho.

17. Met sipwe meefi ika sia káé ngeni emén?

¹⁷ A ifan me aúchean wisach le afalafala ewe enlet me asukula ngeni aramas! Ena angang a atoto ngenikich enletin pwapwa. Iei meefien aposel Paulus, ewe mi álisi chómmóng lón Tesalonika le wiliti Chón Kraist: “Ämi chök popun äm apilükülüköch, äm pwapwa, pwal popun äm aingaing lon äm win mwen mesen ach Samol Jesus lupwen epwe liwinsefälito. Enlet, ämi chök popun äm ling me äm pwapwa!” (1 Tes. 2:19, 20; Föf. 17:1-4) A pwal ina usun meefien chómmóng lón ei fansoun. Iei alon emén Chón Kraist fefin itan Stéphanie, iir me pwúlúwan we ra fen álisi chómmóng le papatais: “Ese wor eú sókkun pwapwa mi lap seni ewe pwapwa sia meefi seni ach álisi aramas le fangóló manawer ngeni Jiowa.”