Jiowa a enletin mochen án rúúemén mi pwúpwúlú repwe pwapwa, me eáni eú ririéch me epwe núkúchar. (Mat. 19:4-6) Ika ka mochen pwúpwúlú, ifa usun kopwe tongeni kúna emén pwúlúwom mi pélúwéch ngonuk? Pokiten Jiowa i ewe Chón Férikichetá, a silei met a lamot sipwe féri pwe sipwe tongeni eáni eú pwúpwúlú mi pwapwa. Ina minne, ika ka apwénúetá ekkewe kapasen emmwen a fen awora, kopwe enletin pwapwa. Ikkeei ekkóch me lein ekkena kapasen emmwen.

Akkomw, a lamot sipwe weweiti ei pwóróus usun pwisinkich: “Letipen aramas a fokun atuputup lap seni mettoch meinisin, a unusen ingau.” (Jer. 17:9) Atun rúúemén ra mochen pwúpwúlú me poputá le kammwet, a tongeni mwittir máár ar memmeefin sanifengeniir. Lape ngeni, atun aramas ra alónga ar kefilin pwúpwúlú wóón chék ar memmeef, ra lichippúng. (SalF. 28:26) Ina popun, esap eú alen tipachem án rúúemén repwe mwittir pwárfengeni ar memmeefin sanifengeniir are pwonfengen me mwen ar repwe enletin sissilefengeniir.

Än Salomon Fos 22:3 a apasa: “Eman aramas mi mirit a küna ewe feiengau mi feito o opola, nge ekewe chon wewemang ra chök feilong lon o feiengau.” Ifa efeiengawen ach áeá ekkewe website le kút pwúlúwach? A elichippúng pwe ekkóch aramas ra fen fóffós ngeni chókkewe rese sissileer online, poputá le kammwet ngeniir, nge mwirin ra mirititi pwe ena emén ra fóffós ngeni, a fen otupuur. Pwal och, ekkewe aramas mi tunosolá ra fférútá ar account pwe repwe otupu chókkewe mi tupukkái me solá seniir néúr moni. Fán ekkóch, ekkena mi tunosolá ra tipin erá pwe iir Chón Pwáraatá Jiowa.

Pwal iei eú efeiengawen ekkena website. Ekkóch ekkena website ra áeá ekkewe prokram wóón computer le appélúwafengenni rúúemén aramas. Iwe nge, ese wor eú pisekin ánnet mi pwári pwe a sópwéch ekkena sókkun prokram. Iwe, esap eú alen tipachem óm kopwe lúkú ekkena prokram férien aramas lón kefilin eú mettóch mi aúchea ren ié kopwe pwúlúweni. Ekkena prokram rese fókkun alúkúlúk, usun alúkúlúkún án Paipel kewe kapasen emmwen.​—SalF. 1:7; 3:5-7.

Iei eú kapasen emmwen lón Än Salomon Fos 14:15: “Eman mi wewemang a lükü mettoch meinisin, nge eman mi mirit a nenengeni ia epwe feila ie.” Me mwen óm kopwe filatá ika ié epwe pélúwéch ngonuk, a lamot óm kopwe sileéchú  ena emén. Nge óm úchék fóffós ngeni online, a áweiresi óm kopwe sissileéchú. Inaamwo ika ka álleani pwóróusan wóón an we profile, me oua alapa ámi fóffósfengen online, nge saminne kopwe sileéchú ena emén ren ena. Tittipen ekkóch pwe ra fen kúna ar we féúnen tong enlet, nge ra máirú atun ra kúnafengeniir lón féúféún aramas.

Iei alon ewe soumakken kélfel: “Üsap nom ren aramas mi chofana, üsap pwal chiechi ngeni chon likatuputup.” (Kölf. 26:4) Chómmóng aramas ra ekieki pwe ese wor ngawan ar repwe mwakenetá pwóróuseer wóón ar kewe profile online pwe aramas repwe saniir. Eli ra túkúmaaló napanaper kewe mi ngaw, are esap pwá napanaper kana mi ngaw lón chék ar mak online. Inaamwo ika ekkóch eli ra erá pwe iir Chón Pwáraatá Jiowa, nge itá iir wesewesen Chón Kraist mi papatais? Are iir mi ásimaw lón pekin ngún? Mi wor ar riri ngeni Jiowa? Are mi wor ésúfélúr lón ar kewe mwichefel? Are eli iir leenien áppirú mi ngaw, are pwal mwo chiechi ngaw? (1 Kor. 15:33; 2 Tim. 2:20, 21) A fich ar repwe pwúpwúlúsefál me ren án Paipel kewe kapasen emmwen? A lamot óm kopwe silei pélúwen ekkena kapas eis, nge epwe weires óm kopwe silei pélúwer ika kese fós ngeni ekkóch Chón Pwáraatá Jiowa iir mi kon sissilei ena emén. (SalF. 15:22) Me, emén néún Jiowa chón angang mi tuppwél, esap mwo nge ekiekin ‘riri ngeni’ emén ese lúkú Kot.​—2 Kor. 6:14; 1 Kor. 7:39.

Pokiten a efeiengaw ach áeá ekkena website fán iten kútten pwúlúwach, iwe a pwal wor alen ach sipwe kút me sissilei emén eli sia mochen pwúlúweni. Ia ka tongeni chuuri me ie emén eli oupwe pélúwéchfengen? Lón ekkewe atun mi mumutá emwicheichfengen, Chón Pwáraatá Jiowa ra kan sissilefengeniir atun ra kan fiti ar kewe mwich, mwichelap, me pwal atun ekkóch kukkunoufengen.

Atun ese mumutá án aramas emwicheichfengen, áwewe chék, atun ewe COVID-19 pandemic sia kan néúnéú néúch kewe device le fiti ach kewe mwich wóón Internet. Iwe me ikena ie, sia tongeni sissilei pwal ekkóch Chón Pwáraatá iir mi lipich. Iwe oua tongeni rong ar eáni ar kewe kinikin, me ar uwawu meefier atun ekkewe mwich. (1 Tim. 6:11, 12) Eli oua pwal tongeni fósfengen lón ewe breakout room mwirin ekkewe mwich. Atun ka fiti ekkóch Chón Pwáraatá lón ar kewe kukkunoufengen online, ka tongeni katol napanapen féfférún eménna ka sani ngeni ekkewe ekkóch pwe epwe tongeni pwá ika i met sókkun aramas. (1 Pet. 3:4) Ló, ló, ló, atun oua sissilefengenikemi ka tongeni silei ika a léllé met oua achocho ngeni, me ika oua tongeni pélúwéchfengen.

Atun ekkewe mi lipich ra alónga kútten pwúlúwer wóón án Paipel kewe kapasen emmwen, iwe repwe eáni eú pwúpwúlú mi pwapwa. Usun chék met Än Salomon Fos a apasa: “Eman mi küna eman pwülüan a küna eu mettoch mi mürina o angei ümöümöch me ren ewe Samol mi Lapalap.”​—SalF. 18:22.