Semei we, i emén néúwisin ewe United Church lón Canada. Ina popun, a tiinikemiló me fefinei we ngeni ewe Sanchi school iteiten wiik, wesin ena, kulók 11 áúa fiti semem we le fal. Nge mwirin leolowas, áúa fiti inem we ngeni ewe Leenien Mwiich. Áúa fókkun kúna sókkofesenin ekkena ruu lamalam.

Inei we a kan apwóróusa ngeni chiechian kewe ren fansoun langattam iter Bob me Marion Hutcheson an mineféén lúkú, iwe ra pwal etiwa ewe enlet. Lón 1958 chón Hutcheson ra uwei néúr kewe úlúmén át ngeni ewe mwichelap úkúúkún wanú rán itelapan Divine Will International Assembly lón New York City. Nge ra pwal etiwaei ái úpwe fitiir. Atun úa nesékúriti minne a fis, iei úa mirititi pwe ese mecheres ngeniir ar repwe apachaaeilong lón ar na sái. Nge ena mwichelap, a eú me lein ekkewe mettóch mi kon aúchea lón manawei.

Atun ái teenage, úa nóm lón eú leenien atake, ikewe úa pwapwaiti le foleni ekkewe man. Úa fen ekieki ái úpwe fiti sukul me wiliiti emén tokterin man. Inei we a apwóróusa ngeni emén mwán mi ásimaw lón ewe mwichefel ussun ái na ekiek. Iwe fán kirekiréch, pwiich na a áchchema ngeniei pwe sia nónnóm lón “ekewe ränin lesopolan” me a áiti  ngeniei ifa ussun ái úpwe fiti university ren fite ier epwe kkúú ái riri ngeni Jiowa. (2 Tim. 3:1) Pokiten ena, úa filaatá ái úsapw chúen fiti university.

Úa chúen ekieki iká met úpwe féri mwirin ái sochungio seni high school. Inaamwo iká úa fiti angangen afalafal iteiten weekend, nge úse pwapwaiti ena angang me úse fen ekieki pwe úpwe tongeni emén pioneer. Pwal lón ena atun, semei we, esap emén chón lúkú me ái we uncle ra peseei ái úpwe angang full-time lón eú kompenien insurance mi iteféúló lón Toronto. A watte wisen ái we uncle lón ena kompeni, ina popun úa etiwa ena angang.

Lón Toronto, pokiten úa kan akkangang over time me chiechi ngeni ekkewe chón lúkún a weires ngeniei ái úpwe fiti mwiich me ló afalafal iteitan. Me akkomwan, úa nóm ren semen semei we, esap emén chón lúkú, nge lupwen a máló, úa need ái úpwe kút leeniei.

Ekkewe chón Hutcheson, ekkewe ra uweiei ngeni ewe mwichelap lón 1958, ra ussun chék sam me in ngeniei. Ra etiwaei le nóm rer lón imwer we me álisiei le apéchékkúlaló ái riri ngeni Jiowa. Lón 1960, ngang me néúr we át itan John áúa papatais. John a poputá le pioneer, ena a apéchékkúlaei le alapaaló ái angangen afalafal. Pwiich kewe lón ewe mwichefel ra kúna ái feffeitá me ló, ló, ló, úa kewis ái úpwe chónemmwen ngeni ewe mwiich sia eita ngeni iei Manawach me Ach Angangen Afalafal Mwiich.

Lón 1966, áúa pwúpwúlú me Randi Berge, emén pioneer mi tinikken me a fókkun mochen álillis ikewe a wor osupwangen chón afalafal ie. Ewe chónemmwen mi wisen sáifetál a fókkun áfánnikem, me pesekem le álillis lón eú mwichefel lón Orillia, Ontario. Iwe, mwittir chék áúa mwékút ngeni ikena.

Lupwen áúa wareiti Orillia, úa fiti Randi le regular pioneer. Pokiten Randi a fókkun mwasangasang iwe úa pwal mwasangasang! Lupwen úa poputá le fókkun achocho pwe úpwe emén pioneer mi lipwákéch, úa poputá le meefi pwapwaan ái áiti ngeni aramas masouen ewe Paipel, me mwirin úa kúna pwe ra mirititi ewe enlet lón. A ifa me  feiéchún ái álisi eú pean pwúpwúlú lón Orillia, ra ekkesiwili manawer me wiliiti néún Jiowa chón angang.

Atun úa ló Toronto, úa chuuri Arnold MacNamara, emén me lein chónemmweni ewe angang lón Bethel. A eisiniei iká ngang me pwúlúwei we áúa mochen áúpwe special pioneer. Úa mwittir apasa: “Ewer! Áúa tongeni ló ese lifilifil ia chilóón chék Quebec!” Úa fen tipetipeló ren meefien ekkewe chón Canada mi eáni fósun Merika ussun ena leeni kinikinin lón Canada itan Quebec, ikewe ra kan eáni fósun France. Lón ena atun aramas ra ú ngeni ewe mwú me ra mochen pwe ena leeni Quebec epwe imu seni mwúún Canada.

Arnold a erá, “Lón ei atun, ewe keangen ofesilap a kan chék tiinaaló special pioneer lón Quebec.” Mwittir chék úa tipeeú ngeni pwe áúpwe ló. Úa fen silei pwe Randi a ekiekin álillis ikena ie. Mwirin, úa mirititi pwe úa fen féri eú kefil mi fókkun múrinné lón manawem!

Áúa fiti ewe class ám áúpwe káé fósun France úkúúkún nimu wiik. Mwirin ngang me Randi, me eú pean pwúpwúlú áúa ló Rimouski, 336 mwail étiwááfengin Montreal. Áúse mwo kon sile fósun France, a pwá ena atun úa álleani ekkóch pwóróus esilesil lón mwiich. Úa erá pwe lón ach mwichelap epwele fis, epwe wor chómmóng “ostrich” (och sókkun machchang) repwe fiti, nge itá úpwe erá chómmóng “chón Austria” (chón ewe fénú Austria) repwe fiti.

Lón Rimouski, fémén Chón Kraist fefin lipich iir pioneer mi tinikken ra fitikem pwal pwiich me fefinach Huberdeaus fengen me néúr kewe rúúemén fépwúl. Ra rentini eú imw a wor fisu ruumw lón me meinisin ekkewe pioneer ra pwal álillis lón ewe méén rent. Áúa eita ngeni ena imw White House pún mi pwech ewe kengkangan me a wor ekkewe úr mi pwech. A kan wor lefilen 12 me 14 aramas ra nónnóm lón. Pokiten ngang me Randi ám special pioneer, áúa kan ló afalafal lesossor, mwirin leolowas me lepwin, iwe áúa kilisou pún iteitan a kan wor chienem ra fitikem le afalafal pwal mwo nge lón fansoun patapat lepwin.

Áúa chiechiéchfengen me ekkena pioneer mi túppwél. Iir ra ussun chék ám famili. Fán ekkóch ám meinisin áúa mómmóót ppen eú ekkei are a wor ránin áúpwe kukfengen me mwéngéfengen. Emén me lein pwiich kewe i chón ettik, ina popun pwinin Ammól áúa kan kélfengen me pwérúk.

Chómmóng chón Rimouski ra sani le káé ewe Paipel! Lón chék nimu ier, áúa pwapwa le kúna chómmóng néúm kewe chón káé ra papatais me chóchóón chón ewe mwichefel a lapóló wóón ina epwe 35.

Lón Quebec, áúa fiti ewe sukul mi fókkun múrinné fán iten chón afalafal. Áúa kúna ifa ussun Jiowa a álisikem lón ewe angangen afalafal me lón pekin áion. Pwal och, áúa poputá le tongei ekkewe aramas mi eáni fósun France, áúa aúcheani ar fós me ar ééreni. Ena mettóch a álisikem le pwal aúcheani éérenien pwal ekkewe ekkóch fénú.—2 Kor. 6:13.

Iwe mwirin, áúse pwal ekieki nge ewe keangen ofesilap a tingorekem ám áúpwe mwékút ngeni Tracadie, eú leeni étiwen New Brunswick. A ekis áweires ena pokiten úa kerán sainei eché lease ám áúpwe rentini eú imw, úa pwal angang part-time le sense lón eú sukul. Pwal och, ekkóch néúm kewe chón káé ra kerán wiliiti chón afalafal.  Áúa pwal nóm lukanapen kaúún ám we Leenien Mwiich.

Unusen ewe weekend áúa ióteki ussun ena mettóch me áúa ló Tracadie, eú leeni mi sókkóló seni Rimouski. Nge áúa ekieki pwe pokiten Jiowa a mochen ám áúpwe ló ikena, iwe áúa filaatá le ló. Áúa sótuni Jiowa me kúna an pwákini ekkewe mettóch a eppetikem le mwékút. (Mal. 3:10) Pokiten án Randi tipemecheres le pennúkú pwisin mochenin, an chék pwappwapwa me péchékkúlen an riri ngeni Jiowa, iwe a ámecheresi ám mwékút.

Lón ám we mineféén mwichefel, emén chék a wiseni ewe wis mwán mi ásimaw, itan Robert Ross. I emén pioneer fengen me pwúlúwan we Linda, me ra filaatá le nómwotiw ikena mwirin án néúr we mwánichi uputiw. Ra fókkun apéchékkúlakem, pún pwal mwo nge atun ra túmúnú néúr na kúkkún át, nge ra awasélaéchúkem me ra tinikken lón ewe angangen afalafal.

Mwirin ám pioneer ruu ier lón Tracadie, áúa máirú atun áúa ketiw le fiti ewe angangen sáifetál. Áúa chuuri ekkewe mwichefel mi eáni fósun Merika ren úkúúkún fisu ier, mwirin áúa kewis sefál le chuuri ekkewe mwichefel mi eáni fósun France lón Quebec. Néúm we district overseer lón Quebec, itan Léonce Crépeault, a kan apúngaei ren ái kewe afalafal. Nge mwirin a kan eisiniei, “Itá epwe ifa ussun án óm kewe afalafal repwe fókkun álilliséch?” a An áfánniei a álisiei le émúrinnéló napanapen ái asukul pwe epwe mecheres me fataffatéch án aramas repwe weweiti.

Eú me lein wisei kewe úa fókkun chechchemeni ina ewe atun úa angang lón ewe Pekin Amwéngé lón 1978 “Victorious Faith” International Convention lón Montreal. Áúa ekieki epwe wor 80,000 chón fiti, me a minefé ewe kkótun kaworen mwéngé. Meinisin minefé, pisek, menu me napanapen ám áúpwe ammólnatá ewe mwéngé. A wor 20 watteen leenien apatapat, nge fán ekkóch rese manaw. Me mwen poputáán ewe áeúin rán, a lamot áúpwe ammólnatá ewe stadium, nge áúa kerán tolong lukenipwin pokiten a fis och urumwot. Me a lamot áúpwe poputá le onnei ekkewe oven me mwen tétáán ewe akkar pwe áúpwe féri mwéngéén lesossor. Áúa pekkus nge úa káé chómmóng seni án chienei kewe chón angang, iir mi angang weires, ásimaw me ar chék pwappwapwa. Tori iei áúa chúen chiechiéch. A ifa me apwapwaan ái fiti ei mwichelap mi fókkun lamot lón Quebec, ikewe a  fis ngeni pwiich kewe watteen riáfféúmwáál lefilen ekkewe ier 1940 me 1950!

Úa káé chómmóng mettóch seni chienei kewe souemmwen atun ekkewe watteen mwichelap lón Montreal. Lón eú ier, David Splane, iei a chóni ewe Mwichen Soupwúngúpwúng, a wiseni ewe wis chón akkóta mwichelap. Nge lón pwal eú mwichelap atun úa wiseni ena wis chón akkót, David a fókkun álilliséch ngeniei.

Lón 2011, ngang me Randi áúa fen fiti ewe angangen sáifetál úkúúkún 36 ier, nge úa ketiw ái úpwe senseen ewe Sukul fán iten Ekkewe Mwán mi Ásimaw. Atun ekkena ruu ier úa sense, a pwal ekis áweires pwe áúa sáifetál me nóm lón sókkopaten imw, nge inaamwo iká a ina ussun nge a mmen apwapwa. Iteiten lesópwólóón eú me eú wiik, ekkewe mwán mi ásimaw ra fókkun kilisou pún ra kúna úkúúkún án ewe Mwichen Soupwúngúpwúng ekieki ussur me ar riri ngeni Jiowa.

Mwirin, úa pwal senseen ewe Sukulen Chón Afalafala ewe Mwú. Ekkewe chón sukul ra fókkun meefi mélúlú me aúrek pokiten a kon busy ewe schedule. Áwewe chék ra sukul arapakkan fisu awa iteiten rán, mwirin ra féri ar kewe lesen úlúngát awa iteiten lepwin, me ra pwal féri rúáánú are nimu kinikin iteiten wiik. Ngang me pwal ewe emén sense áúa ereniir pwe ra chék tongeni féri ekkena ren án Jiowa álillis. Úa fókkun chechchemeni máirúún ekkewe chón sukul atun ra kúna pwe ren ar lúkúlúk wóón Jiowa, ra tongeni féri chómmóng lap seni met ra ekieki pwe ra tufich ngeni.

Án inei we áfánniéchú ekkewe ekkóch a álisi néún kewe chón káé ar repwe feffeitá me a pwal mwo nge álisi semei we an epwe ekkesiwili an ekiek ussun ewe enlet. Nge úlúngát rán mwirin málóón, áúa máirú ren án semei we fiti eú afalafal lón ewe Leenien Mwiich, me a sópweeló le fiffiti ekkewe mwiich lón 26 ier. Inaamwo iká semei we ese papatais, nge ekkewe mwán mi ásimaw ra ereniei pwe i ewe ákkáeménún a kan soun wareiti ewe leenien mwiich iteiten wiik.

Inei we a pwal eú leenien áppirú mi múrinné ngeniei me fefinei kewe. Fefinei kewe úlúmén me pwúlúwer kewe ra angang ngeni Jiowa fán túppwél. Emén a angang lón ewe keangen ofesilap Portugal, nge pwal ewe emén lón ewe keangen ofesilap Haiti.

Iei ngang me Randi áúa special pioneer lón Hamilton, Ontario. Atun áúa fiti ewe angangen sáifetál, áúa pwapwaiti ám fiti ekkewe ekkóch le chuuri néúr kewe return visit me chón káé. Nge iei áúa pwapwa le kúna án néúm kewe pwisin chón káé feffeitá lón pekin ngún. Atun áúa chiechi ngeni pwiich kewe lón ám we mineféén mwichefel, áúa meefi péchékkúl le kúna án Jiowa álisiir lón fansoun éch me fansoun weires.

Atun áúa nesékúriti minne a fis lón manawem, áúa fókkun aúcheani án chómmóng pwiich kewe áfánnikem. Iwe, áúa pwal achocho le pwáári ám enletin chúngú ekkewe ekkóch me álisiir le angang ngeni Jiowa lón úkúúkún ar tufich. (2 Kor. 7:6, 7) Áwewe chék, a wor eú famili, ewe fin pwúpwúlú me néúr kewe át me nengngin iir pioneer. Úa eisini ewe mwán pwúpwúlú iká a fen ekiekin pioneer. A erá pwe a wisen álisi ekkena úlúmén pioneer lón an we famili. Nge úa pwal eisini: “Ka tongeni álisiir lap seni Jiowa?” Úa pesei an epwe pwal pwapwaiti ewe angangen pioneer ussun chék an we famili. Iwe wonu maram mwirin, a pioneer.

Ngang me Randi áúa sópweeló le “asilefeili . . . ngeni ekewe täppin aramas” ussun án Jiowa “föför mi amwarar” me áúa áneán pwe amwo repwe tongeni kúna pwapwaan ar repwe angang ngeni ussun chék ám.—Kölf. 71:17, 18.