1. Met ka káé atun ka kerán poputá le káé ewe Paipel?

 KA CHEMENI ewe atun ka kerán poputá le káé ewe Paipel? Eli ka máirú atun ka kerán silei pwe mi wor iten Kot. Neman ka meefi kinamwe atun ka silei pwe Kot ese eriáfféwú aramas lón ekkein ell. Me eli ka fókkun pwapwa ren ewe ápilúkúlúk óm kopwe kúnasefáli attongeom kewe mi fen máló me oupwe nónnómfengen lón eú paratis wóón fénúfan.

2. Me lúkún óm kákkáé ewe enlet lón Paipel, pwal met ka feffeitá lón? (Efisos 5:1, 2)

² Lapólóón óm kákkáé ewe Paipel, epwe pwal ina péchékkúlelóón óm tongei Jiowa. Ena tong a amwékútuk le apwénúetá met ka káé. Ka féri ekkewe kefil mi múrinné mi lóngólóng wóón án Paipel kewe kapasen emmwen. Ka émúrinnéló féfférum me napanapom pokiten ka mochen apwapwaai Kot. Ussun chék án emén semirit áppirú seman kewe me inan mi tongei, en ka pwal áppirú Semom we lón láng.—Álleani Efisos 5:1, 2.

3. Ikkefa ekkewe kapas eis sia tongeni pwisin eisinikich?

³ Sipwe pwisin eisinikich ekkeei kapas eis: ‘Ái tongei Jiowa iei a péchékkúleló lap seni ewe atun úa kerán wiliiti emén Chón Kraist? Seni ewe atun úa papatais, úa alapaaló ái áppirú Jiowa ákkáeúin lón ái pwáári tong ngeni chienei kewe chón lúkú?’ Iká a patapateló ewe tong ka eáni me lepoputáán, kosap lichippúng. A pwal fis ena ngeni ekkewe popun Chón Kraist. Jises ese fangetá wóór, me i esap pwal fangetá wóóch. (Pwär. 2:4, 7) A silei pwe sia tongeni káé ach sipwe meefisefálli ewe tong sia meefi ewe atun sia kerán káé ewe Paipel.

4. Met sipwele káé lón ei lesen?

 ⁴ Sipwe káé me lón ei lesen ifa ussun sia tongeni sópweeló le apéchékkúla ach tongei Jiowa me ekkewe ekkóch. Mwirin, sipwe pwal káé ussun ekkóch feiéch epwe torikich me chienach kewe lupwen sia apéchékkúla ach tong.

5-6. Met sókkun weires Paul a kúna lón an angangen afalafal, nge met a amwékútú an epwe sópweeló le angang ngeni Jiowa?

⁵ Ewe aposel Paul a pwapwa le angang ngeni Jiowa, nge esap fansoun meinisin a mecheres ngeni le féri ena. Paul a kan soun sái towaw, nge lón an we fansoun ese kan mecheres ewe mettóch sái. Fán ekkóch, atun an sái a “nom lon feiengauen puun chanpupu” me “feiengau seni chon achomau” are chón solá. A pwal wor ekkóch atun ekkewe chón oputa ra pwal mwo nge awata. (2 Kor. 11:23-27) Me esap fansoun meinisin chienen Paul kewe chón lúkú ra aúcheani met ekkewe a féri fán iter.—2 Kor. 10:10; Fil. 4:15.

⁶ Met a álisi Paul an epwe sópweeló an angang ngeni Jiowa? Paul a káé chómmóng mettóch ussun napanapen Jiowa kewe seni lón ekkewe Taropwe mi Pin me seni met a pwisin fis ngeni lón manawan. Iwe, a fókkun lúkúlúk pwe Jiowa Kot a tongei. (Rom 8:38, 39; Ef. 2:4, 5) A pwal fókkun tongei Jiowa. Paul a pwáári an tongei Jiowa ren an “angang me sópweeló le angang ngeni ekkewe chón pin.”—Ipru 6:10, NW.

7. Ifa eú alen ach sipwe apéchékkúlaló ach tongei Jiowa?

⁷ A tongeni lapóló ach tongei Kot iká sipwe káéfichi an we Kapas. Atun óm állea Paipel, achocho le ekieki met eú me eú ekkewe wokisin ra pwáári ussun Jiowa. Pwisin eisinuk: ‘Ifa ussun ei pwóróus a pwáári pwe Jiowa a tongeei? Met úa káé seni mi affata ngeniei popun úpwe tongei Jiowa?’

8. Ifa ussun iótek a tongeni álisikich le apéchékkúlaló ach tongei Kot?

⁸ Pwal eú alen ach sipwe apéchékkúlaló ach tong ngeni Jiowa, ina ach ikkiótek ngeni iteiten rán me ereni met masouen letipach. (Kölf. 25:4, 5) Iwe, Jiowa epwe pélúweni ach kewe iótek. (1 Joh. 3:21, 22) Khanh, emén Chón Kraist fefin lón Asia, a erá: “Lepoputáán, úa tongei Jiowa pokiten met úa káé ussun i. Nge atun a pélúweni ái kewe iótek, a lapóló ái tong ngeni. Ina met a amwékútúei ái úpwe féri ekkewe mettóch mi apwapwaai i.” b

9. Ifa ussun Timoty a pwáári pwe a apéchékkúlaló an tongei chienan kewe Chón Kraist?

⁹ Fitu ier mwirin án Paul wiliiti emén Chón Kraist, a chuuri emén alúwél mi múrinné itan Timoty. Timoty a mmen tongei Jiowa, me a pwal tongei aramas. Paul a ereni ekkewe chón Filipai: “I [Timoty] chök ewe eman aia wewefengen lon äm ekiek, i a pwal wesewesen chüngükemi.” (Fil. 2:20) Paul ese fós ussun tufichin Timoty le akkóta mettóch are tufichin le eáni afalafal, nge a kúna pwe Timoty a fókkun tongei chienan kewe Chón Kraist. Ese mwáál chón ekkewe mwichefel Timoty epwe chuuriir ra fókkun mwétéresiiti ar repwe kúna i.—1 Kor. 4:17.

10. Ifa ussun Anna me pwúlúwan we ra pwáári ewe tong ra meefi fán iten chiener kewe Chón Kraist?

¹⁰ Kich sia pwal kúkkútta ifa ussun sipwe álisi chienach kewe Chón Kraist. (Ipru 13:16) Iei pwóróusen Anna, ewe sia fen káé ussun me lón ewe lesen akkomw. Mwirin fisin eú watteen mélúmél, iir me pwúlúwan we ra ló  ren imwen eú familien Chón Pwáraatá me ra kúna pwe osun imwen ena famili we a ta ren ewe mélúmél. Ina minne, ese wor pisekin ena famili mi liméch. Anna a apasa: “Áúa uwei pisekiir kewe, sópwuniir, áineer, me énnúr, mwirin áúa eliwinaló rer. Me rem, ese pwal weires met áúa féri, nge pokiten áúa féri ena, áúa chiechiéchfengen tori ikenái.” Án Anna me pwúlúwan we tongei chiener kewe Chón Kraist, a amwékútúúr le álisiir.—1 Joh. 3:17, 18.

11. (a) Met ekkewe ekkóch ra kan meefi atun sia pwáár ngeniir ach tongeer? (b) Me ren Än Salomon Fos 19:17, met meefien Jiowa atun sia pwáári tong?

¹¹ Lupwen sia pwáári tong me kirekiréch ngeni ekkewe ekkóch, lap ngeni ra kúna pwe sia achocho le áppirú féfférún me ekiekin Jiowa. Me neman ra aúcheani ach kirekiréch nge sise tepereni. Khanh, ewe fefin sia fen fós ussun, a fókkun chechchemeni chókkewe ra álisi. Iei alon: “Úa fókkun kilisou ngeni meinisin chienei kewe fefin mi áchengicheng mi uweiei le fiti afalafal. Ra kan etto angei ei, etiwaei ái úpwe fitiir le mwéngé, me eniwiliei ngeni leimw fán núkúnúkéch. Iei úa mirititi pwe ina eú angang ese mecheres, me ra pwapwa le féri ena.” Ewer, esap meinisin repwe kilisou ngenikich ren met sia féri fán iter. Iei met Khanh a apasa ussun chókkewe mi álisi: “Úa áneán pwe amwo úa tongeni liiwini ngeniir met ekkewe ra féri fán itei, nge úse silei ia iir meinisin ra nónnóm ia iei. Iwe nge, Jiowa a silei, me úa iótek pwe epwe wisen liiwini ngeniir fán itei.” Mi pwúng met Khanh a ekieki. Jiowa a kúna meinisin met sia féri fán kirekiréch ngeni ekkewe ekkóch, pwal mwo nge ekkewe mettóch mi fókkun kisikis. Me ren, ussun ina eú asor mi aúchea me eú liwinimmang epwe omusa.—Álleani Än Salomon Fos 19:17.

12. Ifa ussun ekkewe Chón Kraist mwán ra tongeni pwáári ar tongei chón ewe mwichefel? (Pwal ppii ekkewe sasing.)

 ¹² Iká en emén Chón Kraist mwán, ifa ussun ka tongeni pwáári tong ngeni ekkewe ekkóch me féri ekkewe mettóch epwe álisiir? Emén alúwél itan Jordan a eisini emén mwán mi ásimaw ifa ussun a tongeni alapaaló an álillis lón ewe mwichefel. Ena mwán mi ásimaw a apúnga ren an feffeitá me a pwal ereni ekkóch kapasen pesepes ren ifa ussun epwe alapaaló an álillis. Áwewe chék, a pesei Jordan an epwe warekkái ngeni ewe Leenien Mwiich me kapong ngeni chón mwiich, uwawu meefian lón ekkewe mwiich, fiffiti an we kúmiin afalafal le afalafal, me kútta alen an epwe álisi ekkewe ekkóch. Lupwen Jordan a féri ena, a káé mineféén mettóch me a pwal péchékkúleló an tongei chienan kewe chón lúkú. Jordan a káé pwe atun emén Chón Kraist mwán a wiliiti chónálillisin mwichefel, esap ina poputáán an epwe álisi ekkewe ekkóch, nge fen ina sópwósópwólóón an álisiir.—1 Tim. 3:8-10, 13.

13. Ifa ussun tong a amwékútú Christian an epwe wisenisefáli ewe wis mwán mi ásimaw?

¹³ Nge ifa ussun iká ka fen piin emén chónálillisin mwichefel are emén mwán mi ásimaw? Jiowa a chemeni ewe angang ka féri lóóm me ewe tong mi amwékútuk le féri ena. (1 Kor. 15:58) A pwal kúna ewe tong ka sópweeló le pwáppwári. Emén Chón Kraist itan Christian a letipengaw atun a katowu seni ewe wis mwán mi ásimaw. Nge iei met a apasa: “Úa filaatá ái úpwe féri meinisin met úa tongeni féri le angang ngeni Jiowa, ese lifilifil iká mi wor wisei are ese wor.” Ló, ló, ló, Christian a wisenisefáli ewe wis mwán mi ásimaw. Iei met a apasa: “Úa ekis pireir le  wisenisefáli ewe wis. Nge úa ekieki pwe iká Jiowa a mochen ái úpwe wisenisefáli ewe wis mwán mi ásimaw, iwe úpwe etiwa pokiten ái tongei I me ái tongei chienei kewe Chón Kraist.”

14. Met ka káé seni meefien Elena?

¹⁴ Néún Jiowa kewe aramas ra pwal pwáári ar tong ngeni chón órur kewe. (Mat. 22:37-39) Áwewe chék, emén Chón Kraist itan Elena lón Georgia, a apasa: “Lepoputáán, ái tongei Jiowa ina chék met a amwékútúei ái úpwe afalafal. Nge atun a péchékkúleló ái tongei Semei we lón láng, a pwal péchékkúleló ái tongei aramas. Úa achocho le anchangei menni osukosuk ra kúkkúna me met sókkun pwóróus repwe sani le fós ussun. Lapólóón ái ekieki ussur lón ena esin napanap, pwal ina lapólóón ái mochen álisiir.”—Rom 10:13-15.

15-16. Ussun met a pwá me lón ekkeei sasing, met feiéchún án emén pwáári tong ngeni ekkewe ekkóch?

¹⁵ Atun sia pwáári tong ngeni chienach kewe Chón Kraist, esap chék iir ra kúna feiéch seni. Mwirin poputáán ewe COVID-19 pandemic, emén Chón Kraist itan Paolo me pwúlúwan we ra álisi chómmóng fefin chinnap le káé ifa ussun repwe néúnéú néúr kewe device pwe repwe tongeni afalafal. Emén Chón Kraist fefin mi weires ngeni an epwe néúnéú néún we device, iei a kerán sile. A tongeni néúnéú le etiwa aramasan kewe ngeni ewe Áchechchem. Wone me leir ra fiti online!  Neminna me aramasan kana ra kúna feiéch seni án Paolo me pwúlúwan we achocho le álillis. Mwirin och fansoun, ena fefin a mak ngeni Paolo me erá: “Kilisou ren óm áitikem ekkewe chinnap. Úsapw fókkun ménúki án Jiowa tongekem me óm angang weires le álisikem.”

¹⁶ Ekkewe pwóróus ussun ena, ra áiti ngeni Paolo eú lesen mi fókkun aúchea. A áchchema ngeni pwe an tong a kon aúchea lap seni an sile are tufichin. A apasa: “Úa fen piin emén chónemmwen mi wisen sáifetál. Ikenái, úa mirititi pwe inaamwo iká chienach kewe Chón Kraist eli ra ménúkaaló ái kewe afalafal, nge ra chúen chemeni ekkewe mettóch úa féri fán iter.”

17. Lupwen sia pwáári tong, ié epwe pwal kúna feiéch?

¹⁷ Lupwen sia pwáári ngeni ekkewe ekkóch ach tongeer, kich sia pwal pwisin kúna feiéch lón ewe napanap sise fen ekieki. Jonathan, emén mi nónnóm New Zealand, a kúna pwúngún ena. Lón eú kuniolun Ammól mi fókkun pwichikkar, a kúna emén pioneer mi afalafal lepekin ewe al. Jonathan a filaatá an epwe fiti ena pioneer iteiten lekuniolun Ammól. Lón ena atun ese fen ekieki úkúúkún ewe feiéch epwe pwisin kúna ren an féfférún kirekiréch. Jonathan a apasa: “Lón ena atun, úse kon sani ewe angangen afalafal, nge atun úa aúseling ngeni napanapen án ewe pioneer asukul me kúna uwaéchún an angang, úa poputá le sani ewe angangen afalafal. Ena pioneer a pwal wiliiti emén chiechiei me a álisiei ái úpwe feffeitá lón pekin lúkú, pwapwaiti ewe angangen afalafal, me ririéch ngeni Jiowa.”

18. Met Jiowa a mochen ach sipwe féri?

¹⁸ Jiowa a mochen pwe kich meinisin sipwe apéchékkúlaló ach tongei i me ekkewe ekkóch. Sia fen káé pwe sia tongeni apéchékkúlaló ach tongei Jiowa ren ach ákkálleani an we Kapas, ekilonei met sia álleani, me fóffós ngeni iteitan lón iótek. A tongeni péchékkúleló ach tongei chienach kewe Chón Kraist ren ach álisiir lón met mi lamot ngeniir. Atun a péchékkúleló ach tong, sipwe chiechiéch ngeni Jiowa me pwiich kewe Chón Kraist. Me sipwe pwapwaiti ena esin chiechi tori feilfeiló!