Jiowa ‘A Ekieki Met Kopwe Feiöch Ren’
PWATA ka tongeni lúkúlúk pwe Jiowa a enletin ekieki met kopwe feiéch ren? Eú popun pún Paipel a pwisin apasa ena. Áeúin Petrus 5:7 a apasa: “Oupwe likiti ngeni Kot ämi öürek meinisin, pun i a ekieki met oupwe feiöch ren.” Ikkefa ekkóch pisekin ánnet mi ánnetatá pwe Jiowa Kot a tongeok?
KOT A ATUFICHI ARAMAS LÓN PEKIN AION
Jiowa a isetiw leenien áppirú ren an kirekiréch me kisáseú
Iei eú pisekin ánnet. A nóm ren Kot ekkewe napanap neman ka mochen kúna seni chiechiom. Aramas mi kirekiréchfengen me fangafangéchfengen ra kan wiliti chiechi mi pacheéchfengen. Nge a mecheres ach sipwe esilla pwe Jiowa a kirekiréch me fangafangéch ngeni aramas iteiten rán. Áwewe chék, “i a atötai förian akkar won ekewe aramasangau me aramasöch, nge a apüngatiu üt won chon pwüng me chon pwüngingau.” (Mat. 5:45) Met aúchean ttinen ewe akkar me púngún rán? Ekkena mettóch ra aúchea ren sókkopaten popun, kapachelong án Kot fang ‘ngeni aramas ener o aura leluker ren pwapwa.’ (Föf. 14:17) A ffat pwe Jiowa a féri pwe epwe wor watteen mwéngé wóón ei fénúfan, iwe mwéngé mi múrinné a mmen apwapwakich.
Iwe nge, pwata chómmóng aramas ra echik? Pokiten ekkewe sounemenem ra kan tipemmóng ren ar achocho le alapaaló manamanen ar nemenem me néúr moni lap seni ar álisi aramas. Ekiseló chék Jiowa epwe amóeló tipemmóng ren an siwili ei ótóten mwúún fénúfan ngeni an we Mwú lón láng, nge Néún we epwe wisen King. Lón ena fansoun, esap chúen wor emén epwe echik. Nge pwal mwo iei, Kot a akkawora minne mi lamot ngeni néún kewe aramas mi tuppwél. (Kölf. 37:25) Esap ina eú pisekin ánnet mi ánnetatá an tongei aramas?
JIOWA A FANGAFANGÉCH AN FANSOUN
Jiowa a isetiw leenien áppirú ren an fangafangéch an fansoun
Emén chiechiom mi múrinné a kan awora an fansoun ngonuk. Neman a awora watteen fansoun le fós ngonuk wóón met ámi me rúúemén oua pwapwaiti. Pwal och, emén chiechiom mi múrinné epwe aúseling ngonuk lupwen ka ereni óm osukosuk me minne ka lólileniesini. A ina usun án Jiowa aúseling ngenikich? Ewer! I a etiwa ach kewe iótek. Iwe, Paipel a pesei ngenikich ach sipwe “achocho ngeni iotek,” me pwal mwo nge “iotek fansoun meinisin.”—Rom 12:12, Testament Mi Fö; 1 Tes. 5:17.
Ifa úkúkún ewe fansoun Jiowa epwe tipemecheres le awora ngonuk pwe epwe aúselinga óm kewe iótek? Eú pwóróus lón Paipel a áiti ngenikich pélúwan. Me mwen án Jesus filatá néún kewe aposel, i a “iotek ngeni Kot lon unusen ewe pwin.” (Luk. 6:12) Lón ena iótek, neman Jesus a ekieki iten chómmóng néún kewe chón káé, ekieki napanaper kewe me ar kewe apwangapwang, me tingorei Seman we an epwe álisi le filiretá. Me mwen pwálóón ewe malen rán, Jesus a lúkúlúk pwe a fen filatá chókkewe mi kon fich ngeniir ar repwe wisen aposel. Pokiten Jiowa i ewe Chón Aúseling iótek, i a pwapwa le aúseling ngeni iótek meinisin mi pop seni enletin letipen emén. (Kölf. 65:2) Inaamwo ika emén a iótek ren fite awa usun och mettóch a lólileniesini, nge Jiowa ese pwal osukosuk ren an áeá ena úkúkún fansoun le aúselinga.
KOT A TIPEMECHERES LE OMUSAALÓ TIPIS
Jiowa a isetiw leenien áppirú ren an tipemecheres le omusaaló tipis
A tongeni weires án chiechi repwe omusaaló tipisin emén me emén leir, pwal mwo nge ekkewe mi pacheéchfengen. Fán ekkóch, aramas ra áwesi ar chiechi ngeni emén ra fen chiechi ngeni ren fansoun langattam pokiten me rer a kon weires ar repwe omusaaló tipisiir. Jiowa ese ina usun. Paipel a etiwa meinisin mi letipwenechar ar repwe tingorei an epwe omusaaló tipisiir, pún i “a müttir le amusala tipis.” (Ais. 55:6, 7) Met a amwékútú Kot an epwe kon tipemecheres le omusaaló tipis?
A fókkun watte án Kot tong. Ren watteen an tongei chón fénúfan, a fangóló Néún we, Jesus, pwe epwe seláni aramas seni tipis me ekkewe weires tipis a atoto ngeniir. (Joh. 3:16) Iwe nge, esap chék ina feiéchún ewe méén kepich. Ren án Kraist méén kepich, Kot a unusen omusaaló tipisin chókkewe i a tongeer. Ewe aposel Johannes a makkeei: “Are sia pwärätä ach tipis ngeni Kot, i epwe apwönüetä an pwon o föri mine a pwüng: Epwe amusala ach tipis.” (1 Joh. 1:9) Ren án Jiowa tipemecheresin omusaaló tipis, aramas ra tongeni sópweló le pwapwaiti an chiechi ngeniir. Iwe, ach silei ena a fókkun achchúngú letipach.
A ÁLISUK ATUN KA OSUPWANGEN AN ÁLILLIS
Jiowa a isetiw leenien áppirú ren an awora an álillis atun sia osupwangan
Ren ekkewe chiechi mi enlet, atun emén leir a osupwangen álillis, ewe emén a wisen álisi. Esap ina met Jiowa a pwal féri? An we Kapas a apasa: “Are [emén néún Kot chón angang] epwe tur, esap turuchapala, pun ewe Samol mi Lapalap a kamwöch pöün.” (Kölf. 37:24) A sókkopat alen án Jiowa álisi are “kamwöch pöün” néún chón angang. Sipwe ppii ei pwóróus mi fis lón ewe fénú Saint Croix.
Emén kúkkún nengngin ese mochen kapong ngeni ewe filáik pokiten minne a eáni lúkú. Iwe chienan kewe chón sukul ra kan echchimwa an epwe fitiir. Mwirin an tingor álillis seni Jiowa lón iótek, a filatá an epwe féri mettóch. Lupwen a eáni pwal eú an repot lón an we class, a repot wóón ewe itelap usun kapong ngeni filáik. A néúnéú ewe puk Nei Puken Pwóróusen Paipel le áweweei pwata pwóróusen Satrak, Mesak, me Apetneko a álisi le filatá an esap féri ena. A erá, “Jiowa a túmúnú ekkena úlúmén chón Ipru pún rese fel ngeni ululun.” Mwirin, a ereni chón an we class pwe ra tongeni néúni kapiin ewe puk. Iwe, engol me emén leir ra mochen néúnéú. Ena nengngin a fókkun pwapwa pún a mirititi pwe Jiowa a ngeni ewe péchékkúl me tipachem an epwe tongeni pwáraatá ngeniir ena pwóróus mi tongeni weires áweween.
Ika pwe a wor eú atun ka tipemwaramwareiti án Jiowa tong ngonuk, kopwe ekilonei ekkewe wokisin esin Kölfel 34:17-19; 55:22; me 145:18, 19. Eisini ekkewe Chón Pwáraatá mi fen angang ngeni Jiowa ren fansoun langattam ifa usun a túmúnúúr. Lupwen ka osupwangen án Kot álillis, iótek ngeni i an epwe álisuk. Ika ka féri ekkena mettóch, kopwe mwittir kúna pwe Jiowa ‘a ekieki met kopwe feiöch ren.’