Ra wewe ngeni chókkewe mi nóm lón láng mi wor wiser lón katalóón Jerusalem me epwe pwal wor wiser lón katalóón án Satan ei fénúfan mi ngaw lón Armaketon. Iei eú siwil lón ach weweiti ena lángipwi. Pwata a lamot ei siwil?

Me mwen ewe ier 607 mwen Kraist, Jiowa a ngeni Isikiel eú lángipwi usun met epwe fis lón Jerusalem me mwen an epwe taló. Lón ena lángipwi, Isikiel a kúna chómmóng mettóch mi ngaw mi fiffis ikena ie. Mwirin, a pwal kúna wonomén mwán mi uwou ar “pisekin ninni.” A pwal wor emén mwán mi fitiir mi “üföüf echö üf mi pwechepwech” me a uwei “eu pisekin mak.” (Is. 8:6-12; 9:2, 3) Kot a ereni ena mwán an epwe feiló lón unusen ewe telinimw me “asisila won chamwen chokewe mi letipeta o kechü ren ekewe föför mi anioput ra fis lon.” Mwirin, a pwal ereni ekkewe wonomén mwán mi uwou ar pisekin ninni ar repwe nieló meinisin chókkewe ese esissil wóón chamwer. (Is. 9:4-7) Met sia tongeni káé seni ei lángipwi, me ié ewe mwán mi uwei ewe pisekin mak a wewe ngeni?

Isikiel a kúna ena lángipwi lón ewe ier 612 mwen Kraist. Ena lángipwi eú oesini, nge a akkomw pwénúetá nimu ier mwirin ena, lupwen Jiowa a mut ngeni ekkewe soufiun Papilon ar repwe ataieló Jerusalem. Ren an féri ena, a néúnéú chón Papilon ar repwe ngeni néún kewe aramas mi álleasolap chappen ar féffér. (Jer. 25:9, 15-18) Nge ifa usun ekkewe chón Jus mi pwúng, iir kewe rese tipeeú ngeni meinisin ekkewe mettóch mi ngaw mi fiffis lón ena telinimw? Jiowa a túmúnú pwe chókkana repwe ngaseló.

Lón ewe lángipwi, Isikiel ese fiti ewe angangen esissil are angangen ataieló ewe telinimw. Ekkewe chónláng iir ra wisen emmweni ewe angangen ataieló Jerusalem. Ina minne, ena oesini a áiti ngenikich minne a fis lón láng. Jiowa a ereni néún kewe chónláng ar repwe akkóta angangen ninniilóón ekkewe mi ngaw me repwe túmúnú ekkewe mi pwúng ar repwe kúna manaw. *

Ei oesini epwe pwénútásefál lón mwachkkan. Me akkomwan, sia kan apasa pwe ewe mwán mi uwei ewe pisekin mak a wewe ngeni ekkewe mi kepit mi chúen manaw wóón fénúfan. Sia pwal apasa pwe aramas ra angei esissilleer fán iten amanaw lupwen ra aúselinga me etiwa ewe kapas allim sia afalafala. Iwe nge, kukkuto chék, a ffatoló ngenikich pwe mi lamot sipwe siwili ifa usun sipwe áweweei ei oesini. Sia fen káé seni Mateus 25:31-33 pwe Jesus i ewe epwe apwúngú aramas. I epwe féri ena lón mwachkkan atun ewe riáfféú mi lapalap. Lón ena fansoun, chókkewe a pwúngúló pwe iir siip repwe kúna manaw, nge chókkewe a pwúngúló pwe iir siike repwe ninniiló.

Iwe, met sia káé seni kúnaen Isikiel ei lángipwi? Ikkeei nimu lesen sia káé seni.

1. Me mwen katalóón Jerusalem, Isikiel a éúréúra ekkewe aramas ren minne epwele fis ngeni ena telinimw, usun chék met Jeremaia me Aisea ra pwal féri. Iir ra usun chón mmas. Ikenái, Jiowa a áeá eú kúkkún mwichen aramas mi kepit le asukula néún kewe aramas me éúréúra ekkewe ekkóch me mwen poputáán ewe riáfféú mi lapalap. Nge meinisin néún Kraist kewe “chon angang” ra pwal féri ena angangen éúréúr.​—Mat. 24:45-47.

2. Isikiel ese esissilla chókkewe repwe kúna manaw. A pwal ina usun ren néún Jiowa kewe aramas lón ei fansoun. Ra chék afalafal ngeni aramas me éúréúrer usun minne epwele fis lón mwachkkan.  Ren álillisin ekkewe chónláng, ewe angangen afalafal a fis wóón unusen fénúfan.​—Pwär. 14:6.

3. Chókkewe mi kúna manaw lón fansoun Isikiel we ese wor eú wesewesen esissil mi mak wóón chamwer. Chókkewe repwe kúna manaw lón mwachkkan esap pwal wor eú wesewesen esissil wóón chamwer. Met a lamot emén epwe féri pwe epwe kúna manaw atun ewe riáfféú mi lapalap? Lupwen a rongorong ewe éúréúr, a lamot epwe káé an epwe áppirú Kraist, fangóló manawan ngeni Kot, me álisi pwiin Kraist kewe le afalafalafeili ewe kapas allim. (Mat. 25:35-40) Iwe, atun ewe riáfféú mi lapalap, i epwe angei an esissil, weween epwe filitá pwe epwe kúna manaw.

4. Ewe mwán mi uwei ewe pisekin mak, a wewe ngeni Jesus. Atun ewe riáfféú mi lapalap, Jesus epwe esissilla chón ewe mwich mi fókkun chóchó lupwen epwe apwúngaló pwe iir siip. Iwe, repwe tongeni kúna manaw wóón ei fénúfan tori feilfeiló chék.​—Mat. 25:34, 46. *

5. Ikenái, ekkewe wonomén mwán mi uwei ar pisekin ninni ra wewe ngeni ewe mwichen soufiu lón láng fiti mékúrer we Jesus. Ekiseló chék repwe ataieló ekkewe mwúún fénúfan me asopwaló meinisin féfféringaw.​—Is. 10:2, 6, 7; Pwär. 19:11-21.

Ekkewe lesen sia káé seni ei lángipwi ra anúkúnúkú ngenikich pwe Jiowa esap pwal nieló aramas mi pwúng atun an nieló ekkewe mi ngaw. (2 Pet. 2:9; 3:9) Ekkena lesen ra pwal áchema ngenikich pwe a fókkun lamot ewe angangen afalafal lón ei fansoun. A mmen lamot án aramas meinisin repwe rongorong ewe kapasen éúréúr me mwen ewe sópwólóón!​—Mat. 24:14.