Haykanush, emén chón afalafal esaamwo papatais mi nónnóm Armenia, a kúna eú passport arapakkan ngeni imwan we. Lón ena passport a wor ekkóch debit card me watteen moni. Neminna a apwóróusa ngeni pwúlúwan we minne a kúna, átena pwal emén chón afalafal esaamwo papatais.

A wor án ekkena pwúpwúlú watteen osukosuk lón pekin moni me a wor ar liwinimmang. Nge ra filatá ar repwe ló kútta ewe address wóón ewe passport me eliwini ewe moni. Ewe mwán mi turuseni ena passport a fókkun ingeló, pwal chón an we famili. Haykanush me pwúlúwan we ra áweweei pwe ar wenechar a pop seni met ra kákkáé lón Paipel. Iwe, ra alamota ena fansoun le fós usun Chón Pwáraatá Jiowa me anéúnéú ngeni ena famili ekkóch puk.

Ena famili a mochen liffang ngeni Haykanush och moni, nge neminna ese etiwa. Lón ewe rán mwirin ena, pwúlúwen ewe mwán we a ló ren Haykanush me pwúlúwan we, me a mochen pwáraatá an kilisou ren an fókkun pesei Haykanush an epwe etiwa ewe ring a uwei mi wor taimon wóón.

Chómmóng aramas ra pwal tongeni máirú usun ena famili ren wenecharen Haykanush me pwúlúwan we. Nge Jiowa mi máirú? Met meefian ren wenecharen chókkana? Mi wor lamoten ar na wenechar?

Pélúwen ekkena kapas eis ese weires. Pwata? Pún néún Kot kewe chón angang ra silei pwe ar ákkáppirú napanapen Jiowa kewe ina met a kon aúchea me ren lap seni féún taimon, kolt, are pwal ekkóch mettóchun aion. Ewer, met mi aúchea me ren Jiowa a sókko seni met mi aúchea me ren ekiekin lape ngeni aramas. (Ais. 55:8, 9) Me néún Jiowa kewe chón angang ra meefi pwe ar achocho le áppirú napanapan kewe a fókkun watte aúchean.

Sia tongeni kúna pwúngún ena seni met Paipel a apasa usun “tipachem” me “wewekai.” Än Salomon Fos 3:13-15, a apasa: “A feiöch ewe aramas mi küna tipachem, a feiöch ewe aramas mi wewekai, pun ewe feiöch a angei seni tipachem a mürina seni ewe feiöch a angei seni silifer, nge ewe win tipachem a atoto a aüchea seni kolt. Tipachem a aüchea seni fau aüchea, nge esap wor och ka fokun efich epwe tongeni nönnö ngeni.” A ffat pwe Jiowa a kon aúcheani ekkena esin napanap lap seni mettóchun aion meinisin.

Nge, ifa usun wenechar?

Jiowa, i emén mi wenechar. I pwisin “esap chofona.” (Tit. 1:2) A pwal emmweni aposel Paulus le mak ngeni ekkewe Chón Kraist chón Ipru lón an we fansoun usun lamoten wenechar, a erá: “Oupwe sopwela le iotek fän item. Sia silei, pwe mwelien letipem a limelimöch, pun sia fokun mochen föri mine a pwüng fansoun meinisin.”​—Ipru 13:18.

Jesus Kraist a isetiw leenien áppirú fán iten wenechar. Áwewe chék, lón eú atun ewe souasor mi lap itan Kaifas a ereni: “Kopwe pwon fän akapel iten ewe Kot mi manau o ürenikem ika en ewe Kraist, Nöün Kot.” Jesus a wenechar le pwáraatá pwe i ewe Messaia. A kapas enlet inaamwo ika a silei pwe ewe mwichen soukapwúng a tongeni tipi ngeni pwe a turunufaseei Kot me apwúngaló an epwe ninniiló.​—Mat. 26:63-67.

Nge ifa usun kich? Sipwe chúen wenechar pwal mwo lón ekkewe atun sia tongeni kúna feiéch ren ach sise unusen pwári eú pwóróus are ren ach ekis siwili eú pwóróus?

A tongeni weires ach sipwe wenechar lón ekkeei ránin lesópwólóón atun chómmóng aramas ra “ekieki chök püsin ir,” me “efich moni.”  (2 Tim. 3:2) Ika a ppiitá osukosuk watte ren moni are weires kútten angang, chómmóng aramas rese chúen meefi ngawen ar repwe solá, chúri, are féri ekkóch angangen tunosolá. Ena sókkun ekiek a fen chéúfetál, ina popun chómmóng aramas ra meefi pwe rese tongeni feiéch ika repwe wenechar iteitan. Pwal mwo ekkóch Chón Kraist ra féri kefil mi ngaw ren ar féri angangen solá pokiten ar “tipemong won moni.” Iwe a péút seniir itéchúr me lón ewe mwichefel.​—1 Tim. 3:8; Tit. 1:7.

Iwe nge, lap ngeni Chón Kraist ra áppirú Jesus. Ra mirititi pwe ar eáni ekkewe napanap Kot a eáni a fókkun lamot lap seni mettóchun aion are feiéch meinisin. Ina ewe popun ekkewe sáráfé Chón Kraist rese chúri lón sukul pwe epwe múrinné ar grade. (SalF. 20:23) Esap fansoun meinisin emén epwe liffang ngenikich usun met mi fis ngeni Haykanush pokiten ach wenechar. Nge ach wenechar ina met mi pwúng me ren Kot, me a atoto kinamween mwelien letipach, ewe mettóch mi kkóló aúchean.

Minne a fis ngeni Gagik a pwáraatá ena. A apasa: “Me mwen ai usaamwo emén Chón Kraist, ua angang lón eú watteen kompeni nge ewe minne ká an a kan chék féri pwe esap ménatiw unusen an takises ren an chék repotei kúkkún kinikinin manawen ewe kompeni. Pokiten ngang emén chón emmweni angangen lón ewe kompeni, iwe ena minne ká an a mochen upwe féri ‘etipeeú’ ngeni ewe chón ioni takises, ren ai upwe ngeni liffangen emichimich pwe epwe chék tunaló án ewe kompeni angangen solá. Pokiten ena, iwe ua silleló pwe ngang emén mi solá. Lupwen ua káé ewe enlet, use chúen tipeeú ngeni ai upwe féri ena, inaamwo ika a watte peioffui. Iwe, ua suuki pwisin eú ai business. Nge seni chék lepoputáán, ua rechisterini me ménatiw unusen ai takises.”​—2 Kor. 8:21.

Gagik a erá: “Peioffui a kúkkúnútiw wóón esopw seni peioffui me mwan, iwe ese mecheres ai upwe awora tufichin ai famili. Iwe nge, a watteeló ai pwapwa iei. Ua eáni eú mwelien letip mi limeliméch mwen mesen Jiowa. Ua isetiw leenien áppirú mi múrinné ngeni nei kewe rúúemén át, me ua tufichin wiseni ekkóch wis lón ewe mwichefel. Iei ua silleló pwe ngang emén mwán mi wenechar me ren ekkewe chón ioni takises me chókkewe aua féri ám business fengen.”

Jiowa a tongei chókkewe mi apwapwaai i ren ar áppirú napanapan kewe mi amwarar, kapachelong wenechar. (Tit. 2:10) Me lupwen sia féri ena, i a pwonei pwe epwe álisikich. Fán an emmwen, King Tafit a makkeei: “Seni me lom, lupwen ngang üa eman alüal, tori iei üa chinlap, üsap küna mwo eman chon pwüng epwe sachawun, ika nöün kana repwe tütüngorfetal ener mongö.”​—Kölf. 37:25.

Pwóróusen ewe fefin mi tuppwél itan Rut a pwáraatá pwúngún ena mettóch. Rut a tuppwél le fitipachei Naomi, inen pwúlúwan we, ese likitaló lón an chinnap. Rut a mwékút ngeni Israel, ikewe ia a tongeni fel ngeni ewe Kot mi enlet me ie. (Rut 1:16, 17) I a wenechar me angang weires le fiti ewe kókkótun rus lón ekkewe tánipi, ewe mi kkótóló lón ewe Allúk fán iten chón osupwang. Jiowa ese likitaló Rut me Naomi, usun chék an ese pwal likitaló Tafit. (Rut 2:2-18) Jiowa ese chék efeiéchú Rut lón pekin aion, nge a pwal efeiéchú ren an filatá an epwe chón lón ewe tettelin familien King Tafit me pwal mwo nge ewe Messaia mi pwonetiw!​—Rut 4:13-17; Mat. 1:5, 16.

A tongeni fókkun weires án ekkóch néún Jiowa chón angang repwe awora tufichin manawer iteiten rán. Iir rese tunosolá le sótun kútta alemecheresin an epwe wor néúr moni, nge ra fen angang weires me tinikken. Ren ar féri ena,  ra pwáraatá pwe napanapen Kot kewe mi amwarar, kapachelong wenechar, ikkena met a kon aúchea me rer lap seni mettóchun aion meinisin.​—SalF. 12:24; Ef. 4:28.

Chón Kraist wóón unusen fénúfan ra usun chék Rut ren ar pwáraatá ar lúkúlúk pwe Jiowa a tufichin álisiir. Ra unusen lúkúlúk wóón ewe Emén mi eáni ei pwon: “Ngang üsap fokun likituk, üsap pwal tümwününgau ngonuk.” (Ipru 13:5) Jiowa a pwáraatá fán chómmóng pwe i epwe álisi chókkewe mi wenechar fansoun meinisin. I a kan akkapwénúetá an we pwon pwe epwe awora ngeni néún kewe chón angang minne ra osupwangan.​—Mat. 6:33.

Pwúngún, aramas ra aúcheani féún taimon me pwal ekkóch mettóchun aion. Nge kich sia tongeni lúkúlúk pwe Semach we lón láng a fókkun aúcheani ach wenechar me pwal ach pwáraatá ekkewe ekkóch napanap mi múrinné lap seni faú aúchea meinisin!