1, 2. (a) Ifa ewe mettóch mi lamot seni meinisin mi weneiti aramasen unusen fénúfan? (b) Pwata ena mettóch a lamot ngenikich?

 CHÓMMÓNG aramas ikenái ra kon alamota ewe mettóch moni lón manawer. Ina met ra kan ekieki usun me lólileniesini. Ra kan áeá ar fansoun le sótun akkalapaló néúr moni are amwéchúlúkú ewe úkúkún moni mi fen nóm rer. Nge ren pwal ekkóch, ewe mettóch mi kon lamot me rer seni meinisin ina ar famili, are fen péchékkúlen inisiir, are ekkewe mettóch ra mochen achocho ngeni lón manawer.

² Nge mi wor eú mettóch a fókkun lamot seni meinisin ekkena. Ina letelóón pwúngún án Jiowa nemenem. A mmen fókkun lamot ach sipwe chék nefotofot wóón ena mettóch. Ika sise túmúnúéch, sia tongeni kon osukosuk ren mwékútúkútún manawach rán me rán are lólileniesini ach kewe weires, iwe sipwe ménúki lamoten ena mettóch. Ach penaatá án Jiowa pwúúng le nemenem epwe álisikich le likiitú ngeni ach kewe osukosuk rán me rán, me sipwe akkarap ngeni Jiowa.

3. Met Satan a eppiietá usun án Kot nemenem?

³ Satan ewe Tefil a efisi tipemwaramwar ika mi wor án Jiowa pwúúng le nemenem. Satan a mochen aramas repwe ekieki pwe Jiowa emén Sounemenem mi ngaw me I a amwéchú senikich ekkewe mettóch mi échitikich. Me ren Satan, aramas repwe fókkun pwapwa ika ra pwisin nemeniir. (Ken. 3:1-5) A pwal ámmeef ngenikich pwe ese wor emén aramas a enletin tuppwél ngeni Kot, me ika emén a kúna watteen weires epwe chék péútaaló Kot, esap chúen an Sounemenem. (Hiop 2:4, 5) Iwe, Jiowa a mut ngeni och fansoun an epwe ffatoló ngeni meinisin pwe epwe chék fókkun áweires manawach ika pwe sise nóm fán án Kot nemenem.

4. Pwata a lamot an epwe leteló pwúngún án Jiowa nemenem?

⁴ Jiowa a fókkun silei pwe ese pwúng ekkena mettóch ewe Tefil a erá. Iwe, pwata a mut ngeni Satan och fansoun an epwe tongeni sótun ánnetatá pwe mi pwúng? Pélúwen ena kapas eis a weneiti meinisin chón nóm lón láng me chón nóm wóón fénúfan. (Álleani Kölfel 83:18.) Atam me Efa ra péútaaló án Jiowa nemenem, me seni ena atun tori iei chómmóng ra pwal ina usun. Ekkóch ra tongeni meefi pwe ewe Tefil mi pwúng ren ar kúna ena. Nge ika esaamwo ffatoló ngeni ekkewe chónláng are aramas pwúngún minne ewe Tefil a eppiietá, iwe esap tongeni wor enletin kinamwe me tipeeú. Nge lupwen a leteló pwúngún án Jiowa nemenem, meinisin repwe manaw fán an nemenem mi amwarar tori feilfeiló chék. Epwe wor kinamwe lón unuselapen láng me fénúfan.​—Ef. 1:9, 10.

5. Ifa usun letelóón pwúngún án Kot nemenem a weneitikich?

⁵ Pwúngún án Kot nemenem epwe leteló, nge án Satan me aramas nemenem epwe unusen sópwongaw me epwe móróló. Kot epwe nemenem ren an áeá ewe Mwúún Messaia, nge an nemenem epwe sópwéch. Ekkewe mi tuppwél repwe ánnetatá pwe aramas ra tongeni akkamwéchú ar tuppwél me unusen penaatá án Kot nemenem. (Ais. 45:23, 24) Kich mi mochen ach sipwe emén me lein chókkana? Ewer! Iwe, mi lamot ach sipwe weweiti úkúkún lamoten an epwe leteló pwúngún án Kot nemenem.

6. Ifa úkúkún lamoten letelóón pwúngún án Jiowa nemenem?

⁶ Letelóón pwúngún án Jiowa nemenem a lamot lap seni ach sipwe kúna pwisin pwapwaach. Nge esap weween pwe ach kúna manaw ese lamot me ren Jiowa are i ese wesewesen chúngúkich. Pwata sia silei ena?

7, 8. Ifa usun sipwe kúna feiéch seni letelóón pwúngún án Kot nemenem?

⁷ Jiowa a fókkun tongei aramas. Kich mi kon aúchea me ren pwe a fangóló pwisin Néún we pwe sipwe tongeni kúna manaw  esemuch. (Joh. 3:16; 1 Joh. 4:9) Ika Jiowa ese apwénúetá an kewe pwon ngenikich, iwe Satan me chienan kewe mi ú ngeni Jiowa repwe pwúng. Satan a erá pwe Jiowa emén chón chofona mi kan amwéchú seni aramas minne mi múrinné me nemeniir fán pwúngúngaw. Chókkewe mi oputa Jiowa ra esiita án Jiowa kewe pwon me erá: “A pwon pwe epwe liwinsefälito. Iwe, met, ia a nom ie? Semelapach kewe ra fen mäla, nge ekewe mettoch meinisin ra ususur we chök seni ewe fansoun Kot a föri fanüfan.” (2 Pet. 3:3, 4) Nge Jiowa epwe apwénúetá minne a eáni pwon. A fen apachaalong an amanawa aramas mi álleasochis ngeni letelóón pwúngún an nemenem. (Álleani Aisea 55:10, 11.) Án Jiowa nemenem a lóngólóng wóón tong. Iwe, sia tongeni lúkúlúk pwe i a tongei me aúcheani néún kewe chón angang mi tuppwél fansoun meinisin.​—Eks. 34:6.

⁸ A ffat pwe a fókkun lamot an epwe leteló án Jiowa pwúúng le nemenem, nge esap weween pwe ach kúna manaw ese lamot me ren. Jiowa a fókkun tongekich. Mi lamot sipwe chechchemeni met mi kon lamot me sipwe tuppwél le peni án Jiowa nemenem.

9. Met Satan a apasa usun Hiop? (Ppii ewe sasing lepoputáán ei lesen.)

⁹ A lamot sipwe eáni ekiek mi pwúng usun án Jiowa pwúúng le nemenem. Sia tongeni kúna ena ren ach álleani ewe puken Hiop, eú me lein ekkewe puk lón Paipel mi akkomw le mak. Lón ena puk, sia kúna pwe Satan a erá pwe ika Hiop a kúna watteen riáfféú, epwe péútaaló Kot. Satan a pwal mwo nge ereni Kot an epwe eriáfféwú Hiop. Jiowa ese tipeeú ngeni ena, nge a mut ngeni Satan an epwe sótuni Hiop, a ereni: “Meinisin mine Hiop a eäni epwe nom fän nemenemom.” (Álleani Hiop 1:7-12.) Ekiseló mwirin ena, a péút seni Hiop néún kewe chón angang me pisekin kewe. Mwirin, a rong pwe a tori néún kewe engol eú feiengaw watte, iwe ra máló. Satan a féri án Hiop epwe ekieki pwe Kot a efisi ekkena mettóch. (Hiop 1:13-19) Mwirin, Satan a esemweni Hiop ren eú semmwen mi fókkun ámmetek me annou. (Hiop 2:7) Nge a pwal lapóló riáfféún lupwen pwisin pwúlúwan we me ekkewe úlúmén mwán mi tipitipin chiechi ngeni ra eáni fós mi eletipechou me eriáfféú ngeni.​—Hiop 2:9; 3:11; 16:2.

10. (a) Ifa usun Hiop a pwáraatá an tuppwél ngeni Kot? (b) Pwata a lamot Kot epwe áwena ekiekin Hiop?

¹⁰ Mi pwúng met Satan a erá? Aapw. Inaamwo ika Hiop a kúna watteen riáfféú, nge i ese fókkun péútaaló Jiowa. (Hiop 27:5, NW) Nge, ren och fansoun, Hiop a ménúki ewe mettóch mi wesewesen lamot me a kon ekieki pwisin i. A chék akkapasa pwe ese wor och mettóch mi ngaw a féri. Hiop a pwal ekieki pwe mi wor an pwúúng an epwe silei ewe popun a kúna riáfféú. (Hiop 7:20; 13:24) Ese mwáál, sia tongeni weweiti meefien Hiop kana. Nge Jiowa a silei pwe ese pwúng ekiekin Hiop, me i a áwena ekiekin. Ifa usun a féri ena?

11, 12. Met Jiowa a álisi Hiop an epwe weweiti, iwe met Hiop a féri?

¹¹ Sia tongeni álleani met Jiowa a ereni Hiop me lón puken Hiop sópwun 38 ngeni 41. Jiowa ese áwewe ngeni Hiop pwata a kúna riáfféú. Nge a fen mochen álisi Hiop an epwe weweiti úkúkún tekian Kot lap seni i. A áiti ngeni Hiop pwe mi wor ekkewe mettóch mi fen kon lamot lap seni pwisin an  kewe osukosuk. (Álleani Hiop 38:18-21.) Minne Jiowa a apasa a álisi Hiop an epwe siwili an ekiek.

¹² A kon péchékkúl án Jiowa kana esin fós ngeni Hiop mwirin án Hiop kúna meinisin ekkena riáfféú? Aapw, me pwisin Hiop ese pwal eáni ena esin ekiek. Hiop a weweiti me aúcheani án Jiowa kapasen fén ngeni. A mwo nge apasa: “Üa püsin atipisiei o ekieksefäl lon pwül me falang.” (Hiop 42:1-6) Ekiseló mwen ena, emén alúwél itan Elihu a pwal álisi Hiop an epwe siwili an ekiek. (Hiop 32:5-10) Mwirin án Hiop aúseling ngeni án Jiowa kapasen fén mi fiti tong me siwili an ekiek, Jiowa a affata ngeni ekkewe ekkóch pwe a pwapwaiti án Hiop tuppwél.​—Hiop 42:7, 8.

13. Ifa usun án Jiowa kewe kapasen fén ra álisi Hiop mwirin wesilóón ekkewe riáfféú mi tori?

¹³ Án Jiowa kewe kapasen fén a chúen álisi Hiop pwal mwo nge mwirin ekkewe riáfféú a tori. Jiowa “a afeiöchü lusun ränin manauen Hiop lap seni me mwan.” Mwirin och fansoun, “a pwal nöüni füman ät me ülüman nengin.” (Hiop 42:12-14) Inaamwo ika Hiop a tongei néún kana, nge ese wor tipemwaramwar pwe a pwosiiti néún kewe ra fen máló. Me ese mwáál ese tongeni ménúki meinisin ekkewe mettóch mi eriáfféú mi fis ngeni i me an we famili. Ikaamwo mwirin och fansoun Hiop a silei ewe popun a tori meinisin ekkena sóssót, nge neman a ekieki ika pwata Kot a mut ngeni an epwe tori ewe úkúkún riáfféú. Ika Hiop a eáni ekkena esin ekiek, a tongeni chechchemeni met Jiowa a ereni. Ena mettóch epwe oururu i me álisi le eáni ewe ekiek mi pwúng.​—Kölf. 94:19.

14. Met sia tongeni káé seni minne a fis ngeni Hiop?

¹⁴ Ach ekilonei minne a fis ngeni Hiop a tongeni álisikich le féri siwil lón ach ekiek me pwal oururukich. Ewe puken Hiop ina eú kinikinin ekkewe mettóch Jiowa a makkeei “fän iten ach sipwe kaiö seni, pwe epwe wor ach apilükülüköch ren ach likitü pwal ren ach küna pöchökülen letipach mi torikich seni ekewe Toropwe mi Pin.” (Rom  15:4) A áiti ngenikich pwe sisap kon ekilapei pwisin ach kewe osukosuk pwe site úkútiw le ekieki letelóón pwúngún án Jiowa nemenem. Sia usun Hiop, sia pwári ach peni án Jiowa nemenem ren ach akkamwéchú ach tuppwél ngeni pwal mwo lupwen sia kúna weires lón manawach.

15. Ika sia tuppwél lupwen a torikich sóssót, met feiéchún?

¹⁵ Minne a fis ngeni Hiop a tongeni oururukich pún a áiti ngenikich pwe an torikich sóssót are riáfféú esap weween pwe Jiowa a song ngenikich. Ach kewe sóssót ra suuki ngenikich ach sipwe tongeni penaatá án Jiowa nemenem. (SalF. 27:11) Lupwen sia likiitú fán tuppwél, sia apwapwaai Jiowa, me a péchékkúleló ach ápilúkúlúk fán iten mwachkkan. (Álleani Rom 5:3-5.) Pwóróusen Hiop a áiti ngenikich pwe Jiowa “a uren kirikiröch me tong.” (Jas. 5:11) Ika sia penaatá án Jiowa nemenem, i epwe efeiéchúkich. Ach silei ena a álisikich le “likitü o mosonotam” fiti pwapwa.​—Kol. 1:11.

16. Pwata mi lamot ach sipwe ákkáchema ngenikich pwe a fókkun lamot letelóón pwúngún án Jiowa nemenem?

¹⁶ Pwúngún pwe a tongeni weires ach sipwe nefótófót wóón letelóón pwúngún án Jiowa nemenem lupwen sia nóm lón osukosuk. Ika sia kon ekilapei ach osukosuk, iwe sia tongeni meefi pwe pwal mwo ekkewe kúkkúnún osukosuk iir mi watte. Iwe a lamot ach sipwe ákkáchema ngenikich usun lamoten ach sipwe penaatá án Kot nemenem ese lifilifil met sókkun weires sia nóm lón.

17. Ifa usun ach achocho lón án Jiowa angang a tongeni álisikich le afóta ekiekich wóón minne mi wesewesen lamot?

¹⁷ Ach akkachocho lón án Jiowa angang a tongeni álisikich le chechchemeni met mi wesewesen lamot. Áwewe chék, emén pwiich itan Renee a stroke, a metekitek inisin iteitan, me a pwal úri kanser. Lupwen a nónnóm pioing, a kan afalafal ngeni ekkewe chón angang, ekkewe pwal ekkóch chón  núing, me chókkewe mi etto chuuri. Fán eú, lupwen Renee a núing ren ruu esopw wiik, a afalafal úkúkún 80 awa. Inaamwo ika Renee a silei pwe epwe máló, nge ese ménúki ewe mettóch mi wesewesen lamot. An penaatá án Jiowa nemenem a atoto ngeni kinamwe.

18. Met sia káé seni minne a fis ngeni Jennifer usun ach peni án Jiowa nemenem?

¹⁸ Sia pwal tongeni penaatá án Jiowa nemenem atun sia likiitú ngeni ekkewe osukosuk ese kon watte, ekkewe sia kúkkúna rán me rán. Emén pwiich itan Jennifer a mwéchúló lón eú kassoro ren úkúkún úlúngát rán ren an witiwiti ewe sepelin epwe fiti le liwiniti leenian. Fán fite, ekkewe sepelin ra cancel, rese tongeni su, me Jennifer a fókkun pekkus me tipitipingaw. A tongeni meefi pwe i mi fókkun attong. Nge ese ina usun, a fen iótek ngeni Jiowa pwe epwe álisi le apwóróusa ewe kapas allim ngeni chókkewe mi pwal witiwit lón ena kassoro. Iwe a afalafal ngeni chómmóng me a anéúnéú chómmóng néúch kewe puk. Jennifer a erá: “Ua meefi pwe Jiowa a efeiéchúei lón ewe fansoun mi weires me a ngeniei ewe úkúkún péchékkúl mi lamot pwe upwe tongeni tupuni itan lón ewe napanap mi múrinné.”

19. Met a esissillatá chón ewe lamalam mi enlet?

¹⁹ Néún Jiowa kewe chék aramas ra enletin weweiti lamoten án Jiowa nemenem. Ina met a esissilleretá pwe iir chón fel mi enlet. Iwe, a lamot emén me emén kich ousipwe sópweló le penaatá án Jiowa nemenem.

20. Met meefien Jiowa ren meinisin ekkewe mettóch ka féri fán iten an nemenem?

²⁰ Jiowa a kúna me aúcheani mettóch meinisin ka féri le penaatá an we nemenem atun óm angang ngeni i fán tuppwél me likiitú fán sóssót. (Kölf. 18:25) Ewe lesen mwirin ei epwe pwal áweweei pwata mi fich ngeni Jiowa óm kopwe penaatá an nemenem me ifa usun ka tongeni unusen féri ena.