1, 2. Met a lamot emén me emén kich sipwe wesewesen lúkú? (Ppii ewe sasing lepoputáán ei lesen.)

 LÓN ewe lesen mwen ei, sia kúna pwe ewe Tefil a erá pwe ese fich án Jiowa epwe nemeni aramas. A erá pwe Jiowa ese nemenem fán pwúng me aramas repwe fen kon pwapwa ika ra pwisin nemeniir. Mi pwúng met Satan a erá? Anchangei ika aramas repwe tongeni pwisin nemeniir me manaw tori feilfeiló chék. Repwe pwapwa lap seni ar repwe nóm fán nemenien Kot? Nge en, kopwe pwapwa ika kopwe manaw tori feilfeiló chék nge kopwe unusen imuló seni Kot?

² Ese wor emén a tongeni pélúweni ekkena kapas eis fán itom. A lamot emén me emén kich sipwe pwisin ekiekifichiir. Ach féri ena, itá epwe affata ngenikich pwe án Jiowa nemenem a fókkun múrinné seni meinisin me a fich ngeni i ach sipwe unusen peni. Sia tongeni lúkúlúk wóón ena pokiten met sia álleani me lón Paipel. Sipwe ppii met ewe Paipel a apasa usun án Jiowa pwúúng le nemeni unuselapen láng me fénúfan.

3. Pwata a wor án Jiowa pwúúng an epwe nemeni meinisin lón láng me fénúfan?

³ Jiowa, i ewe Sounemenem mi tekia seni meinisin lón unuselapen láng me fénúfan pokiten i ewe Kot mi unusen manaman me ewe Chón Fératá. (1 Kron. 29:11; Föf. 4:24) Lón eú lángipwi usun met a fis lón láng, ekkewe 144,000 mi fiti Kraist le nemenem lón ewe wis king, ra apasa: “Ach Samol me ach Kot, en ka fich ngeni om kopwe angei ling me iteüöch me manaman. Pun ka föri mettoch meinisin, nge ren letipom ra fis o manau.” (Pwär. 4:11) Jiowa a fératá mettóch meinisin, iwe a wor an pwúúng le nemeni meinisin wóón fénúfan me lón láng.

4. Pwata ach tufichin pwisin filatá ese ngenikich ewe pwúúng ach sipwe ú ngeni Kot?

⁴ Ese wor och mettóch Satan a fératá. Iwe ese wor an pwúúng an epwe nemeni unuselapen láng me fénúfan. Satan me ekkewe popun aramas ra pwári ar lamalamtekia lupwen ra ú ngeni án Jiowa nemenem. (Jer. 10:23) Pokiten a wor ar pwúúng le pwisin filatá mettóch, iwe met, a pwal wor ar pwúúng le péútaaló án Jiowa nemenem? Aapw. Ewe tufichin pwisin filatá mi nóm ren aramas a awora ngeniir ar pwúúng le féri kefil wóón mettóch, nge esap ar pwúúng le ú ngeni ewe Chón Fératá, ina i Jiowa. A ffat pwe lupwen emén a ú ngeni Kot a áeámwáálli an tufichin pwisin filatá. Ren kich aramas, mi lamot sipwe nóm fán án Jiowa nemenem me emmwen.

5. Pwata mettóch meinisin Jiowa a apwúngaló a chék pwúng iteitan?

⁵ Ekieki pwal eú popun pwata a wor án Jiowa pwúúng le nemenem. A áeá an nemenem lón ewe napanap mi unusen pwúng. I a erenikich: “Ngang ewe Samol mi Lapalap mi eäni tong ellet, pwüng me wenechar won fanüfan. Pun ikei ekei föför üa pwapwa ren.” (Jer. 9:24) Ese lamot ngeni Jiowa án aramas kewe allúk ren an epwe apwúngaló met mi pwúng, pún fen i a isetiw minne mi pwúng. Ekkewe allúk a ngeni aramas a lóngólóng wóón met mi unusen pwúngiéch me ren. Ewe soumakken kélfel a erá: “Pwüng me apwüng longolongun mumw.” Iwe, meinisin án Jiowa allúk, kapasen emmwen, me mettóch a apwúngaló, iir mi chék pwúng. (Kölf. 89:14; 119:128) Satan a erá pwe Jiowa i emén Sounemenem ese pwúng me wenechar. Nge fen pwisin Satan ese tongeni nemeni ei fénúfan fán pwúng.

6. Ifa eú popun a wor án Jiowa pwúúng le nemenem?

⁶ Pwal eú popun a wor án Jiowa pwúúng le nemenem, pún a nóm ren ewe sókkun sile me tipachem mi lamot fán iten túmúnún unuselapen láng me fénúfan. Sia kúna ena ren an awora ngeni Néún we ewe tufichin echikaraatá ekkewe semmwen ese tongeni pwák ren sou sáfei. (Mat. 4:23, 24; Mark. 5:25-29) Inaamwo ika me rech ekkena mettóch iir eú manaman, nge me ren Jiowa esap ina usun pokiten i mi tufichin féri mettóch meinisin. I mi weweiti mwékútúkútún  lón ewe inis me a tongeni echikara met chék feiengaw are semmwen mi tori. A pwal mwo nge tongeni amanawasefáli ekkewe mi máló me eppeti ekkewe feiengaw watte ar resap fis.

7. Pwata án Jiowa tipachem a tekia seni án meinisin aramasen án Satan ei ótót?

⁷ Ei fénúfan mi nóm fán nemenien Satan ese tongeni atoto kinamwe lefilen aramasen lón eú chék fénú are lefilen fénú me fénú. Jiowa chék a wor ren ewe tipachem epwe aworato kinamwe wóón unusen fénúfan. (Ais. 2:3, 4; 54:13) Meefiach a usun chék meefien ewe aposel Paulus, a erá: “A ifan me watten wöün Kot! A ifan me alololun an tipachem me silelap! Iö a tongeni awewei an apwüng? Iö a tongeni weweiti an kewe föför?”​—Rom 11:33.

8. Met ka meefi usun napanapen án Jiowa nemenem?

⁸ Ewe Paipel a fen affata pwe a wor án Jiowa pwúúng le nemenem. A pwal affata pwata i ewe Sounemenem mi múrinné seni meinisin. Eú popun, pún i a nemenem fán tong. Kich sia meefi ach akkarap ngeni Jiowa lupwen sia ekieki usun an ‘ümöümöch me kirikiröch, an songomang, an pwal wöün tong me allükülük.’ (Eks. 34:6) Kot a pwári an súfélitikich ren an féffér ngenikich. A túmúnúkich lap seni met sia tongeni féri pwe sipwe pwisin túmúnúkich. Ewe Tefil a erá pwe Jiowa a amwéchú seni Néún kewe aramas minne mi múrinné, nge ina eú kapas chofona. Kot a pwal mwo nge fangóló Néún we mi áchengicheng pwe sipwe tongeni eáni ewe ápilúkúlúkún manaw esemuch.​—Álleani Kölfel 84:11; Rom 8:32.

9. Pwata sia silei pwe Kot a tongei emén me emén leich?

⁹ Jiowa a tongei ewe mwicheichen aramas mi fel ngeni. Nge a pwal fókkun tongei iteiten emén me emén aramas. Ekieki met a fis lón fansoun lóóm. Ren ina epwe úlúpúkú ier, Jiowa a néúnéú soukapwúng le emmweni an we mwicheichen aramas me a ewinner lupwen ra maun ngeni chón koputer kewe. Nge lón unusen ena fansoun, Jiowa a pwal chúen áfánni emén me emén aramas. Emén leir, ina i ewe fefin itan Rut. I esap chón Israel, me a pennúkúóló chómmóng mettóch ren an epwe wiliti emén chón fel ngeni Jiowa. A efeiéchú ren an fang ngeni emén pwúlúwan me emén néún át. Nge lap seni ena, néún Rut na a wiliti emén lón ewe tettelin famili ewe Messaia a uputiw seni. Jiowa a pwal waalong pwóróusen Rut lón ewe Paipel, lón eú puk mi iteit seni itan. Ekieki mwo, epwe met meefien Rut lupwen a manawsefál nge a kerán silei usun ekkena mettóch?​—Rut 4:13; Mat. 1:5, 16.

10. Pwata sia tongeni erá pwe Jiowa ese nemenemengaw lón an nemenem?

¹⁰ Jiowa ese nemenemengaw lón an nemenem. Nge chókkewe mi álleasochisi ra fen meefi pwe iir mi ngaseló me ra pwapwa. (2 Kor. 3:17) Iei met Tafit a erá usun Jiowa:  “Iteüöch me manaman ra nonom mwan, pöchökül me pwapwa ra nonom lon imwan mi pin.” (1 Kron. 16:7, 27) Ewe soumakken kélfel itan Etan a makkeei: “Ra feiöch ekewe aramas mi silei ewe kölün mwareituk, ir mi fetal lon saramen won mesom, ai Samol mi Lapalap. Repwe mwareituk iteiten rän o ingeiti om pwüng.”​—Kölf. 89:15, 16.

11. Ifa usun sia tongeni apéchékkúla ach lúkúlúk pwe án Jiowa nemenem a múrinné lap seni meinisin?

¹¹ Ach ekkekilonei án Jiowa kirekiréch epwe apéchékkúlaló ach lúkúlúk pwe an nemenem a múrinné seni meinisin. Meefiach a usun chék meefien ewe soumakken kélfel ei ngeni Kot: “Ai nonom lon imwom lon ükükün eu chök rän a mürina seni ai nonom ekis lon ükükün engeröü rän.” (Kölf. 84:10) Jiowa i ewe Chón Anapanapakich me Chón Férikich, ina popun a fókkun silei met epwe atoto ngenikich pwapwa. Lón án Jiowa kisáseú, a fókkun somwoló minne a fang ngenikich. Mettóch meinisin Jiowa a mochen sipwe féri, epwe échitikich. Ikaamwo sipwe pennúkúóló mettóch, sipwe chék pwapwa ika sia álleasochisi i.​—Álleani Aisea 48:17.

12. Ifa populapen ach sia penaatá án Jiowa nemenem?

¹² Sia káé seni Paipel pwe mwirin án Kraist Nemenem Úkúkún Engeréú Ier, epwe wor ekkóch repwe ú ngeni án Jiowa nemenem. (Pwär. 20:7, 8) Pwata repwe ina usun? Lón ena fansoun, neman ewe Tefil epwe sótun etipetipa aramas ar repwe ekieki chék pwisin iir. Ina met a kan féfféri. Neman epwe sótun etipetipa aramas ar repwe lúkú pwe ese pwal lamot ar repwe álleasochisi Kot ren ar repwe manaw tori feilfeiló chék. Nge ese fókkun tongeni pwúng ena. Nge mi lamot sipwe eisini pwisin kich, ‘Upwe lúkú ena esin kapas mi chofona?’ Ika sia enletin tongei Jiowa me lúkúlúk pwe i mi múrinné me a wor an pwúúng le nemeni unuselapen láng me fénúfan, iwe, ena sókkun kapas chofona epwe fókkun ánioput me rech. Sipwe mochen manaw fán nemenien chék Jiowa, ewe mi nemenem fán tong.

13. Ifa usun sipwe pwáraatá pwe sia penaatá án Kot nemenem?

¹³ Sia fen káé pwe a wor án Jiowa pwúúng le nemenem, me napanapen an nemenem a múrinné seni meinisin. A fókkun fich ngeni Jiowa ach sipwe unusen penaatá an nemenem. Sia penaatá lupwen sia tuppwél ngeni me áppirú i. Ach achocho úkúkún ach tufich le eáni ekkewe féffér Jiowa a eáni, a pwáraatá pwe sia tongei i me peni an nemenem.​—Álleani Efisos 5:1, 2.

14. Ifa usun ekkewe mwán mi ásimaw me mékúren famili ra tongeni áppirú Jiowa?

¹⁴ Sia káé seni Paipel pwe fansoun meinisin Jiowa a áeá an we manaman lón napanap mi fiti tong. Ekkewe mékúren famili me mwán mi ásimaw mi aúcheani án Jiowa nemenem repwe áppirú i me achocho pwe resap nemenemengaw are tichik. Ewe aposel Paulus a fókkun achocho le áppirú Kot me Néún we. (1 Kor. 11:1) I ese ásáwa aramas are echchimwer le féri minne mi pwúng. Nge a fen peseer fán pwetete ar repwe féri minne mi pwúng. (Rom 12:1; Ef. 4:1; Filim. 8-10) Lupwen Paulus a féri ena, a áppirú Jiowa. Lupwen ach féffér ngeni ekkewe ekkóch a pwári tong, sia penaatá án Jiowa nemenem.

15. Ifa usun ach súféliti chókkewe mi wor wiser a pwáraatá ach penaatá án Jiowa nemenem?

¹⁵ Sia pwal penaatá án Jiowa nemenem  ren ach súféliti me álleasochisi chókkewe Jiowa a ewisa ngeniir wiser. Ikaamwo sise unusen weweiti are tipeeú ngeni minne ra apwúngaló, sia chúen álleasochisiir. Esap ina met chón ei fénúfan ra kan féri, nge ina met sia féri lupwen sia etiwa Jiowa pwe i ach Sounemenem. (Ef. 5:22, 23; 6:1-3; Ipru 13:17) Iwe, sia pwapwa, pún Kot a mochen minne mi múrinné seni meinisin fán itach.

16. Ifa usun ekkewe kefil sia féri ra tongeni pwári pwe sia penaatá án Kot nemenem?

¹⁶ Sia pwal tongeni penaatá án Kot nemenem ren ekkewe kefil sia féri. Jiowa ese ngenikich tichikin allúk ren met sipwe féri lón eú me eú fansoun lón manawach. Nge a fen pwári ngenikich an ekiek. Ena mettóch a álisikich le weweiti met sipwe féri. Áwewe chék, Jiowa ese eiteitaatiw menni úf ekkewe Chón Kraist repwe úféúf me resap úféúf. Nge a fen áweweei pwe foutach epwe ésúfél me fich ngeni néún kewe Chón Pwáraatá. (1 Tim. 2:9, 10) A mochen ach sipwe ekieki ifa usun ach kewe kefil a tongeni kkúú ekkewe ekkóch. (1 Kor. 10:31-33) Lupwen sia eáni kefil mi lóngólóng wóón án Jiowa ekiek, sia pwáraatá pwe sia aúcheani me álisatá an nemenem.

17, 18. Ifa usun ekkewe pean pwúpwúlú ra tongeni pwáraatá pwe ra peni án Jiowa nemenem?

¹⁷ Ekieki eú mettóch ekkewe pwúpwúlú Chón Kraist ra tongeni féri le penaatá án Jiowa nemenem. Neman eú pwúpwúlú ra  kúna pwe manawer lón ar pwúpwúlú a áweires nge esap ina met ra ekieki an epwe fis. Neman a pwal mwo nge wor ar osukosuk mi fókkun chou. Ika ina, ar ekieki féfférún Jiowa ngeni ekkewe chón Israel lóóm a tongeni álisiir. Jiowa a erá pwe i a usun pwúlúwen néún kewe aramas. (Ais. 54:5; 62:4) Ekkewe chón Israel ra elichippúngú i fán chómmóng. Ena riri lefiler a usun eú pwúpwúlú mi wor osukosuken lón. Nge Jiowa ese chék mwittir fangetá wóón ekkewe chón Israel. Nge a fen omusaaló ar kewe tipis fán fite me a apwénúetá an kewe pwon ngeniir.​—Álleani Kölfel 106:43-45.

¹⁸ Ekkewe Chón Kraist mi pwúpwúlú mi tongei Jiowa ra achocho le áppirú i. Ikaamwo a wor ar osukosuk lón ar pwúpwúlú, rese ekiekin féri met mi atai án Paipel allúk pwe ina alen ar repwe tongeni áwesi ar ririin pwúpwúlú. Ra silei án Jiowa ekiek usun pwonen pwúpwúlú pwe a mmen fókkun chou me a mochen pwe ekkewe mwán me fefin pwúpwúlú repwe “pach ngeni” en me pwúlúwan. A wor eú chék popun mi mumutá me ren Paipel án emén epwe tongeni mu seni pwúlúwan me pwúpwúlúsefál, ina ewe tipisin lisowumwáál. (Mat. 19:5, 6, 9) Lupwen ekkewe Chón Kraist ra achocho úkúkún ar tongeni pwe ar pwúpwúlú epwe sópwéch, ra álisatá án Jiowa nemenem.

19. Met a lamot sipwe féri lupwen sia mwáálliló?

¹⁹ Kich meinisin sise unuséch, me fán ekkóch sia féri mettóch mi eletipechowu Jiowa. I a silei ena, ina popun a awora án Kraist asorun méén kepich. Iwe, lupwen sia mwáálliló, itá sipwe tingorei Jiowa an epwe omusaaló ach tipis. (1 Joh. 2:1, 2) Sisap chék meefi letipengaw ren met sia mwáálliló wóón, nge sipwe fen achocho le káé lesen seni. Sia mochen akkarap ngeni Jiowa, ewe epwe omusaaló ach tipis me álisikich le chikarsefál me sópweló ach angang ngeni.​—Kölf. 103:3.

20. Pwata sipwe penaatá án Jiowa nemenem iei?

²⁰ Lón ewe ótót sefé, meinisin repwe nóm fán án Jiowa nemenem me repwe káé an kewe al mi pwúng. (Ais. 11:9) Nge pwal mwo iei sia tongeni káé chómmóng mettóch usun án Jiowa ekiek me ifa usun a mochen sipwe ataweei sókkopaten mettóch. Ekiseló chék, esap chúen wor emén epwe ú ngeni án Kot pwúúng le nemenem. Iwe, iei sipwe achocho úkúkún ach tufich le penaatá án Jiowa nemenem ren ach álleasochisi, angang ngeni fán tuppwél, me éttúres le áppirú i lón mettóch meinisin sia féri.