Semen Rehopoam we, Salomon, a king lón Israel úkúkún 40 ier. (1 King 11:42) Mwirin án semen Rehopoam we a máló, i a sái seni Jerusalem ngeni Sikem pwe epwe king. (2 Kron. 10:1) A itá niwokkus an epwele king? Salomon a silleló ren watteen an tipachem. Iwe, ekiseló chék, Rehopoam epwe ánneta ika i mi tipachem le pwákini eú osukosuk mi weires.

Ekkewe chón Israel ra meefi weires, iwe ra tiinaaló chón tupuniir ren Rehopoam ar repwe ereni minne ra mochen an epwe féri: “Semom we a achouu ngenikem chomong angang. Iei mine kopwe apäna ngenikem ewe angang mi chou, semom we a achouu ngenikem, o amecheresikem, mürin äm aipwe angang ngonuk.”​—2 Kron. 10:3, 4.

A wor eú kefil mi weires Rehopoam epwe féri. Ika epwe féri met ekkewe aramas ra mochen, i me an we famili me chókkewe ra nónnóm ren lón ewe imwen king neman epwe péút seniir ekkóch ekkewe mettóch ra fen eérenaaló mi ekinamwei nónnómur. Iwe nge, ika ese tipeeú ngeni án ekkewe aramas we tingor, iwe, neman repwe ú ngeni i. Met a féri? A akkomw fós ngeni ekkewe mwán chinnap, iir kewe mi fen álisi seman we. Ra ereni pwe epwe aúseling ngeni ekkewe aramas. Nge mwirin, Rehopoam a fós ngeni táppin kewe me a filatá an epwe kirikiringaw ngeni ekkewe aramas. A ereniir: “Semei we a achouu ngenikemi chomong angang, nge ngang üpwe föri pwe epwe chou seni. Semei we a apwüngükemi fän wok, nge ngang üpwe apwüngükemi fän och wichiwich seni silin man mi ken.”​—2 Kron. 10:6-14.

En mi kúna eú lesen fán itach? Ikenái a chómmóng ekkewe chinnap ra nóm rech, iir kewe ra fen angang ngeni Jiowa ren fite fite ier me iir kewe mi tongeni álisikich le kefiliéch. Sipwe tipachem me aúseling ngeniir.​—Hiop 12:12.

Iei Rehopoam a emwichafengeni an we mwichen soufiu pwe repwe maun ngeni ekkewe einang mi ú ngeni. Iwe nge, Jiowa a tiinaaló ewe soufós Semaia an epwe ereniir: “Ousap feila pwe oupwe maun ngeni pwimi kewe chon Israel. Oupwe liwiniti  en me lenian, pun ei mettoch mi fis a feito seniei.”​—1 King 12:21-24. *​—Ppii ewe pwóróus fan.

Mi mecheres ngeni Rehopoam an epwe álleasochis ngeni Jiowa? Epwe met ekiekin ekkewe aramas usun néúr na mineféén king? A fen ereniir pwe i epwe apwúngúúr ren “och wichiwich seni silin man mi ken,” nge iei esap chúen féri och mettóch ngeni ei angangen ú ngeni mi ámáirú! (Apépé ngeni 2 Kronika 13:7.) Iwe nge, ese lifilifil met ekiekin aramas usun ewe king, nge i me an we mwichen soufiu ra “aleasochisi alon ewe Samol mi Lapalap o liwiniti en me lenian.”

Iwe, ifa ewe lesen fán itach? Fansoun meinisin, a eú alen tipachem ach sipwe álleasochisi Kot inaamwo ika aramas repwe esiitakich ach féri ena. Ika sia álleasochisi Kot, i epwe efeiéchúkich fansoun meinisin.​—Tut. 28:2.

Rehopoam mi kúna feiéch seni an álleasochis? Rehopoam a chúen nemeni ekkewe einangen Juta me Peniamin, me a filatá an epwe aúetá mineféén telinimw lón ekkena leeni. A pwal ‘fokun apöchöküla’ ekkewe ekkóch telinimw. (2 Kron. 11:5-12) Nge ewe a kon lamot, a álleasochisi án Jiowa kewe allúk ren och fansoun. Pokiten ekkewe engol einang lón mwúún Israel ra poputá le fel ngeni ululun, iwe chómmóng seni me leir ra sái ngeni Jerusalem pwe repwe álisatá Rehopoam me ewe fel mi enlet. (2 Kron. 11:16, 17) Iwe, pokiten Rehopoam a álleasochisi Jiowa, mwúún we a péchékkúleló.

Lupwen mwúún Rehopoam a péchékkúleló, i a féri och mettóch mi ámáirú. A úkútiw le álleasochisi án Jiowa allúk me poputá le fel ngeni kot chofona! Nge, epwe pwata? Itá a féri ena pokiten etipetipaen inan we, emén chón Amon? (1 King 14:21) Sise silei, nge ekkewe aramas ra áppirú an we leenien áppirú mi ngaw. Ina minne, Jiowa a mut ngeni ewe kingen Isip, Sisak, an epwe liapeni chómmóng telinimw lón mwúún Juta. A fis ei inaamwo ika Rehopoam a fókkun apéchékkúla ekkena telinimw!​—1 King 14:22-24; 2 Kron. 12:1-4.

A lapóló ewe osukosuk atun Sisak me an we mwichen soufiu ra maunei Jerusalem, ikewe ia Rehopoam a nennemenem ie. Iwe, lón ei atun, ewe soufós Semaia a ereni Rehopoam me ekkewe samol ei pwóróus seni Kot: “Ämi oua pöütieila, iei mine üa asechikemiilong lepöün Sisak.” Ifa usun Rehopoam a etiwa ena angangen kapwúng? A fókkun etiwa! Paipel a apasa: “Ekewe samolun Israel me ewe king ra mefi ar tipis o apasa, ‘A pwüng mine ewe Samol mi Lapalap a föri.’” Ina minne, Jiowa a seláni Rehopoam, me Jerusalem ese taló.​—2 Kron. 12:5-7, 12.

Mwirin ena, Rehopoam a sópweló le nemeni unusen mwúún Juta. Me mwen an epwe máló, a fang ngeni néún kewe mwán chómmóng liffang. Neman a mochen anúkúnúkú pwe resap ú ngeni pwiir we Apia, ewe epwe wisen king mwirin i. (2 Kron. 11:21-23) Án Rehopoam féri ena, a pwáraaló pwe a tipachem lap seni me mwán.

Inaamwo ika Rehopoam a féri ekkóch mettóch mi múrinné, nge iei met Paipel a apasa usun an nemenem: “A föri mine a ngau.” Pwata? Pún ese “kütta letipen ewe Samol mi Lapalap ren unusen lelukan.” Ina minne, Jiowa ese pwapwaiti i.​—2 Kron. 12:14.

Iwe, met sia tongeni káé seni pwóróusen Rehopoam? Fán ekkóch i a álleasochisi Kot. Me a féri ekkóch mettóch mi múrinné fán iten néún Jiowa kewe aramas. Nge ese wor an ririéch ngeni Jiowa, me ese kon péchékkúl an mochen apwapwaai i. Ina minne, a úkútiw le féfféri minne mi pwúng me poputá le fel ngeni kot chofona. Eli kopwe ekieki: ‘Lupwen Rehopoam a etiwa án Jiowa apwúng, a wesewesen féri ena pokiten a enletin aier ren met a mwáálliló wóón me mochen apwapwaai Kot? Are pokiten chék met ekkewe ekkóch ra ereni an epwe féri?’ (2 Kron. 11:3, 4; 12:6) Lemuchúlóón manawan a pwal féri minne mi ngaw. I a fókkun sókkóló seni King Tafit, seman we chinnap! Pwúngún, Tafit a kan mwáálliló, nge a enletin aier seni ekkewe tipis mi chou a féri. A pwal tongei Jiowa me ewe fel mi enlet lón unusen ánein manawan.​—1 King 14:8; Kölf. 51:1, 17; 63:1.

 A chómmóng met sia tongeni káé seni ei pwóróus lón Paipel. Sia apúnga aramas atun ra atufichi ar famili me féri minne mi pwúng ngeni ekkewe ekkóch. Nge ren ach sipwe nóm fán án Jiowa chen, mi lamot sipwe fel ngeni lón ewe napanap mi apwapwaai i, me a lamot sipwe ririéch ngeni i.

Ren ach sipwe tikeri ena, a lamot epwe péchékkúl ach tong ngeni Jiowa. Usun ach sópwetá amwúchún eú ekeei pwe epwe sópwósópwóló kúún, sipwe pwal kákkáé án Kot we Kapas iteitan, ekilonei, me ikkiótek fansoun meinisin pwe sipwe akkapéchékkúlaló ach tong ngeni Kot. (Kölf. 1:2; Rom 12:12) Ei tong epwe amwékútúkich le apwapwaai Jiowa lón mettóch meinisin sia féri. Epwe pwal amwékútúkich le enletin aier lupwen sia mwáálliló me tingorei Jiowa an epwe omusakicheló. Iwe, sisap usun Rehopoam, nge sipwe akkamwéchú ach tuppwél lón ewe fel mi enlet.​—Jut. 20, 21.