1. Met a asokkaaló aramas seni man?

JIOWA a ngeni aramas och mettóch mi kkóló aúchean, ina ewe mwelien letip. Ina eú mettóch a asokkaaló aramas seni man. Pwata sia silei pwe a wor ren Atam me Efa mwelien letip? Pún mwirin ar álleasolapa Kot, ra op seni. Ena a pwári pwe mwelien letiper a efisi ar mengiringir.

2. Pwata mwelien letipach a usun eú kampas? (Ppii ewe sasing lepoputáán ei lesen.)

² Mwelien letipach ina eú mettóch a tongeni ámmeef ngenikich minne mi pwúng me mwáál me a tongeni emmwenikich lón manawach. Emén aramas ese mirit mwelien letipan a usun chék efóch sip mi ta néún kampas. Ásepwál me éút ra tongeni erikaló. Nge eú kampas mi pwúng angangan epwe álisi ewe kaptin an esap rik seni ia we epwe sáiló ie. Pwal ina chék usun, ika sia emiritiéchú mwelien letipach, a tongeni emmweniéchúkich.

3. Met a tongeni fis ika sise emiritiéchú mwelien letipach?

 ³ Ika sise emiritiéchú mwelien letipach, esap tongeni éúréúrakich seni met mi mwáál. (1 Tim. 4:1, 2) A pwal mwo nge tongeni ámmeef ngenikich pwe minne mi ‘ngau a mürina.’ (Ais. 5:20) Jesus a ereni néún kewe chón káé: “Epwe war ewe fansoun lupwen chokewe mi nikemi repwe ekieki, pwe ar föför eu angang ngeni Kot.” (Joh. 16:2) Ina ekiekin chókkewe mi nieló ewe chón káé itan Stefanus. (Föf. 6:8, 12; 7:54-60) Seni chék me lóóm, chómmóng aramas mi itá achocho lón ar lamalam ra nieló aramas me pwal féri ekkóch mettóch mi fókkun ngaw nge ra erá pwe fán iten Kot. Nge ren enletin, minne ra féri a atai án Kot kewe allúk. (Eks. 20:13) A ffat pwe mwelien letiper ese emmweniéchúúr!

4. Met sipwe féri pwe ete ngawóló angangen mwelien letipach?

⁴ Iwe, met sipwe féri pwe ete ngawóló angangen mwelien letipach? Allúk me kapasen emmwen seni Paipel “ra aüchea fän iten afalafala ewe kapas mi let, ra amiritikich, ra apwüngükich o aiti ngenikich usun ach sipwe manau fän pwüng.” (2 Tim. 3:16) A lamot sipwe káéfichi ewe Paipel iteitan, ekilonei minne a erá, me apwénúetá lón manawach. Ach féri ena epwe álisikich le akkalapaaló ach eáni án Jiowa ekiek. Iwe, mwelien letipach epwe emmweniéchúkich. Sipwele pwóróus wóón ifa usun sia tongeni emiriti mwelien letipach me ren án Jiowa kewe allúk me kapasen emmwen.

5, 6. Ifa usun án Kot kewe allúk ra álisikich?

⁵ Ika sia mochen pwe án Kot kewe allúk repwe álisikich, ese naf ach chék álleaniir are silei masouer. A lamot pwe sipwe aúcheaniir me súfélitiir. Paipel a erenikich: “Oupwe oput mine a ngau o efich mine a pwüng.” (Am. 5:15) Nge ifa usun sipwe féri ena? Mi lamot sipwe káé le eáni ekiekin Jiowa. Áwewe chék, anchangei pwe kese tongeni annut, iwe noum tokter a erá pwe kopwe mwéngé met mi vitamin, kopwe exercise, me kopwe pwal féri ekkóch siwil lón manawom. Lupwen ka apwénúetá, ka sópwéch! Epwe met meefiom ren án ena tokter kapasen fén?

⁶ Pwal ina chék usun, ewe Chón Férikichetá a ngenikich allúk pwe epwe ámúrinnééló manawach me túmúnúkich seni sópwongawen tipis. Áwewe chék, Paipel a erá pwe sisap chofona, chúri, solá, féri féfférún lisowumwáál, mwánesól, me féri angangen roong. (Álleani Än Salomon Fos 6:16-19; Pwär. 21:8) Lupwen sia kúna sópwéchún ach álleasochisi Jiowa, epwe lapóló ach tong ngeni me ach aúcheani an kewe allúk.

7. Ifa usun pwóróusen chókkewe lón Paipel ra álisikich?

⁷ Ese lamot sipwe akkomw atai án Kot  allúk me kúna sópwongawan ren ach sipwe káé met mi pwúng me mwáál. Sia tongeni chék káé seni mwáállin chón lóóm, ekkewe pwóróuseer mi makketiw lón Paipel. Än Salomon Fos 1:5 a erá: “Ekewe chon tipachem repwe rongorong” pwe repwe “fefeitä lon ar sile.” Ena fén a pop seni Kot me a múrinné seni meinisin! Áwewe chék, ekieki úkúkún riáfféún Tafit mwirin an álleasolapa Jiowa ren an tipisin lisowumwáál ngeni Patsipa. (2 Sam. 12:7-14) Lupwen ka álleani ena pwóróus, pwisin eisinuk: ‘Ifa usun Tafit epwe itá ttiiseni ekkena osukosuk? Nge ika ua pwal kúna sóssótun lisowumwáál, met upwe féri? Upwe usun Tafit are usun Josef?’ (Ken. 39:11-15) Ika sia ekiekifichi úkúkún watteen pwúnúngawen tipis, epwe lallapóló ach “oput mine a ngau.”

8, 9. (a) Met mwelien letipach a álisikich le féri? (b) Ifa usun án Jiowa kewe kapasen emmwen ra tongeni álisi mwelien letipach?

⁸ Sia fókkun atowauakicheló seni ekkewe mettóch Kot a oput. Nge ika ese wor eú allúk lón Paipel a tongeni affata met itá sipwe féri, iwe sipwe ifa? Ifa usun sipwe silei met Kot a mochen sipwe féri? Ika sia fen emiriti mwelien letipach me ren ewe Paipel, iwe, epwe múrinné ach kefil.

⁹ Pokiten Jiowa a tongekich, a ngenikich kapasen emmwen mi tongeni emmweni mwelien letipach. Iei alon: “Ngang ewe Samol mi Lapalap om we Kot. Üa aiti  ngonuk mine kopwe feiöch ren, üa pwal emweni ngonuk ewe al kopwe fetal won.” (Ais. 48:17, 18) Lupwen sia ekilonei kapasen emmwen me mut ngeniir ar repwe achchúngúkich, sia tongeni apwúngú me áwena mwelien letipach. Iwe ena, a álisikich le féri kefil mi múrinné.

10. Ifa usun kapasen emmwen ra álisikich, me ifa usun Jesus a áeá lón an asukul?

¹⁰ Kapasen emmwen ra álisikich le féri kefil mi múrinné. Lupwen sia silei eú kapasen emmwen, a álisikich le weweiti ekiekin Jiowa me pwata a ngenikich ekkóch allúk. Jesus a áeá kapasen emmwen an epwe áiti ngeni néún kewe chón káé pwe mi wor sópwósópwólóón met sia eáni féffér me ekiek. Áwewe chék, a affata pwe án emén song a tongeni emmwen ngeni féfférún akkachofesá, me ekiek mi limengaw a tongeni emmwen ngeni lisowu lúkún pwúpwúlú. (Mat. 5:21, 22, 27, 28) Lupwen sia mut ngeni án Jiowa kewe kapasen emmwen ar repwe emmwenikich, epwe mirit mwelien letipach me ach kewe kefil repwe elingaaló Kot.​—1 Kor. 10:31.

11. Ifa usun a tongeni sókkóló mwelien letipen emén seni pwal emén?

¹¹ Ikaamwo Chón Kraist ra emiriti mwelien letiper me ren ewe Paipel, iir mi tongeni chék pwal sókkofesen wóón met ra apwúngaló. A usun án emén epwe filatá ika epwe ún sakaw ika esap. Ewe Paipel ese apasa pwe mi mwáál án emén epwe ún sakaw, nge a éúréúrakich ach sisap únnúmmóng sakaw me pwal sakawoló. (SalF. 20:1; 1 Tim. 3:8) Weween pwe ika emén Chón Kraist ese únnúmmóng sakaw, iwe esap pwal ekieki met me lúkún an na kefil? Aapw. Ikaamwo mwelien letipan a mut ngeni an epwe ún sakaw, a chúen lamot epwe pwal ekieki usun mwelien letipen ekkewe ekkóch.

12. Ifa usun Rom 14:21 a tongeni álisikich le súféliti mwelien letipen ekkewe ekkóch?

¹² Paulus a pwári pwe a lamot sipwe ekieki usun mwelien letipen ekkewe ekkóch lupwen a makkeei ei: “Esap mürina om kopwe ochoch fituk ika ün wain ika föri och sokun föför mine epwe afisätä än pwiüm we epwe chepetek ren.” (Rom 14:21) Iwe, inaamwo ika mi wor ach pwúúng ach sipwe ún sakaw, nge itá sipwe tipemecheres le pennúkúóló ach na pwúúng ika sia silei pwe ach ún epwe aosukosuka mwelien letipen chienach Chón Kraist. Neman a wor emén Chón Kraist mi peen sakaw me mwen an papatais nge iei a apwúngaló pwe esap fókkun mwo nge únúmi och sakaw. Sise mochen féri met epwe tongeni efisi an epwe liwiniti féfférún na me lóóm. (1 Kor. 6:9, 10) Ika sia etiwa ena Chón Kraist ngeni imwach, itá sipwe echchimwa an epwe ún sakaw inaamwo ika a erá esap ún? Aapw!

13. Ifa usun Timoty a súféliti mwelien letipen ekkewe ekkóch ren an epwe álisiir le etiwa ewe kapas allim?

¹³ Lealúwélún Timoty we, a tipeeú ngeni  an epwe sirkumsais inaamwo ika mi ámmetek. A silei pwe an sirkumsais a lamot me ren ekkewe chón Jus, iir kewe epwe afalafal ngeniir. Timoty a usun chék Paulus ren an ese mochen aosukosuka aramas. (Föf. 16:3; 1 Kor. 9:19-23) Ka pwal tipemecheres le pennúkúóló met ren óm kopwe álisi aramas?

14, 15. (a) Ifa usun sia ásimawóló? (b) Ifa féfférún Chón Kraist mi ásimaw ngeni ekkewe ekkóch?

¹⁴ Oukich meinisin sia mochen ló seni “ekkewe kaeon le popun usun Kraist, o sipwe fefeilo ngeni asimau.” (Ipru 6:1, Testament Mi Fö) Sanne sipwe ásimaw pokiten chék sia Chón Kraist ren fite fite ier. Ren ach sipwe ásimawóló a lamot angang weires. A lamot sipwe akkalapaaló ach sile me wewe. Ina minne sipwe álleani Paipel iteiten rán. (Kölf. 1:1-3) Atun óm féri ena, epwe lapóló óm weweiti án Kot kewe allúk me kapasen emmwen.

¹⁵ Ifa ewe allúk mi lamot seni meinisin ngeni Chón Kraist? Ina ewe allúkún tong. Jesus a ereni néún kewe chón káé: “Are oupwe echenifengenikemi, aramas meinisin repwe silei, pwe ämi nei chon kaiö.” (Joh. 13:35) Tong a pwal iteni “ewe alluk mi murinno” me a “apwönüetä ekewe Allük meinisin.” (Jas. 2:8, TF; Rom 13:10) Sap eú minen ámáirú lamoten tong, pún ewe Paipel a erá pwe “Kot chen.” (1 Joh. 4:8) Án Kot tong a lap seni chék och memmeef. A ánnetatá an tong ren an féffér. Johannes a makkeei: “Kot a pwäri an echenikich ren an tinato Nöün Aleman lon fanüfan, pwe kich sipwe manau ren.” (1 Joh. 4:9) Lupwen sia pwári ach tong ngeni Jiowa, Jesus, pwiich kewe, me ekkewe ekkóch, sia ánnetatá pwe kich Chón Kraist mi ásimaw.​—Mat. 22:37-39.

16. Atun ach feffeitá ngeni ásimaw, pwata a lallapóló ach aúcheani kapasen emmwen?

 ¹⁶ Atun ach feffeitá ngeni ásimaw, a lallapóló ach aúcheani kapasen emmwen. Allúk ra kan weneiti eú chék sókkun mettóch, nge kapasen emmwen ra kan weneiti sókkopaten mettóch. Áwewe chék, emén semirit ese kan weweiti efeiengawen chiechi ngeni aramas mi ngaw, iwe seman kewe me inan ra féri allúk pwe epwe túmúnú i. (1 Kor. 15:33) Nge atun an a feffeitá ngeni ásimaw, a káé le ekiek wóón kapasen emmwen seni Paipel. Ekkena kapasen emmwen repwe álisi an epwe kefiléch chiechian. (Álleani 1 Korint 13:11; 14:20.) Lapólóón ach anganga ach tufichin ekieki án Paipel kapasen emmwen, pwal ina lapólóón án mwelien letipach emmweniéchúkich me ach weweiti met Kot a mochen sipwe féri lón eú me eú atun.

17. Pwata sia tongeni erá pwe a wor rech meinisin minne mi lamot ren ach sipwe tongeni féri kefil mi múrinné?

¹⁷ A wor rech meinisin minne mi lamot ach sipwe féri kefil mi apwapwaai Jiowa. Lón Paipel, a wor allúk me kapasen emmwen mi álisikich le “fokun tufich o lipwäköch ngeni sokun angang mürina meinisin.” (2 Tim. 3:16, 17) Iwe, sipwe kútta lón Paipel ekkewe kapasen emmwen repwe áiti ngenikich “met letipen ach Samol.” (Ef. 5:17) A kawor minen álillis ren choweán Watch Tower Publications Index, Research Guide for Jehovah’s Witnesses, Watchtower Library, Watchtower ONLINE LIBRARY, me ewe app JW Library. Lupwen sia alamota ekkeei minen álillis, epwe échúló ach pwisin káé me ach famili káé.

18. Met a kan fis lupwen sia apwénúetá án Jiowa kewe allúk me kapasen emmwen?

¹⁸ Sia fókkun feiéch lupwen sia apwénúetá án Jiowa kewe allúk me kapasen emmwen! Kölfel 119:97-100 a erá: “Üa fokun aücheani om allük, üa ekinlonei fansoun meinisin. Om allük a atipachemaei pwe üa tipachem lap seni chon oputaei, pun a nonom rei fansoun meinisin. A wor ai sile lap seni än nei kewe sense sile, pun üa ekinlonei om kewe allük. Üa mirit lap seni ekewe reikewe, pun üa aleasochisi om kewe öüröür.” Lupwen sia awora fansoun le ekilonei án Kot kewe allúk me kapasen emmwen, epwe lapóló ach tipachem me wewe. Me lupwen sia emiriti mwelien letipach me ren an kewe allúk me kapasen emmwen, sipwe “eäni tipen mwän lon manauach,” me sipwe “tori ükükün ewe unusöchün Kraist.”​—Ef. 4:13.