KICH meinisin sia lúkú pwe Jiowa a ekkemmweni néún kewe aramas me a akkawora ngeniir minne mi lamot pwe repwe tongeni ririéch ngeni lón ekkeei “ränin lesopolan.” (2 Tim. 3:1) Nge mi lamot ngenikich meinisin ach sipwe álleasochisi Jiowa. Sia tongeni aléllééi nónnómuch ngeni ekkewe chón Israel lón ewe fénúpéén. Mi lamot ar repwe mwékút atun ra rong ttikin ewe rappwa.

Jiowa a ereni Moses an epwe féri ruuofóch rappwa seni silifer mi nechenech ngeni ama pwe epwe néúnéú le “körifengeni ekewe aramasen Israel, pwal lupwen repwe atomwala imwer.” (Num. 10:2) Án ekkewe souasor ettiki ekkewe rappwa a sóssókkopat napanapen ttikin ren an epwe esilei ngeni aramas met mi lamot repwe féri. (Num. 10:3-8) Lón ei fansoun, néún Kot kewe aramas ra pwal angei emmwen lón sókkopaten napanap. Lón ei lesen sipwe pwóróus wóón úlúngát alen ach angei kapasen emmwen me sipwe alélléér ngeni ttikin ekkewe rappwa lón fansoun ekkewe chón Israel lóóm. Ikkeei ekkena úlúngát mettóch: Atun néún Kot kewe aramas lón ei fansoun ra ketiw ngeni ekkewe mwichelap, atun ekkewe mwán mi ásimaw ra angei káit, me atun a siwil kókkótun ekkewe mwichefel.

Lupwen Jiowa a mochen án “ekewe aramasen Israel meinisin” repwe mwicheto leasamalapen étiwen ewe imwenfel mangaku, ekkewe souasor repwe ettiki iir me ruuofóch ekkewe rappwa. (Num. 10:3) Meinisin ekkewe einang iir mi nóm pwelin únúkkún ewe imwenfel mangaku mi kinikinitiw lón rúáánú kinikin, ra rong ena kékké. Ekkewe einang mi kkan ngeni ppen asamalapen ewe imwenfel, ese mwáál repwe war mwirin chék fitu minich. Nge ekkewe ekkóch mi nóm towau, repwe ekis mmangoto me eli epwe lamot ar repwe achocho le tiketo. Ese lifilifil ika ra kkan are towau, nge Jiowa a mochen pwe iir meinisin repwe mwicheto me rong an kapasen emmwen.

Lón ei fansoun, sise kan mwichfengen lón eú imwenfel mangaku, nge sia ketiw le mwichfengen me néún Kot kewe aramas. Áwewe chék ren ekkewe mwichelap lón summer me pwal ekkewe ekkóch mwich mi kkóló aúchear, ikewe sia kan angei ekkewe pwóróus me emmwen mi lamot. Wóón unusen fénúfan, néún Jiowa kewe aramas ra pwapwaiti eú chék sókkun asukul. Ina popun chókkewe mi etiwa ena etiwetiw ngeni ekkena mwich, ra chóni eú mwichemmongún aramas mi pwapwa. Eli a lamot ngeni ekkóch ar repwe sáittam lap seni ekkewe ekkóch. Iwe nge, meinisin chókkewe mi etiwa ena etiwetiw, ra meefi pwe mi wor lamoten ar achocho.

Nge ifa usun ren chókkewe iir mi nóm lón ekkewe leeni mi towau seni ekkena sókkun mwichelap? Sia kilisou ren álillisin pekin computer pwe chómmóng chókkana ra tongeni feiéch seni ewe chék esin asukul me pwal mwo nge meefi pwe iir ra  kapachelong lón ena mwichelap. Áwewe chék, atun emén tupun ewe ofesilap a etto chuuri ewe keangen ofes lón Benin, ra fichi ena prokram ngeni pwiich kewe lón Arlit, Niger, eú sóópw lón eú fénúpéén ikewe ra kan ttu pwúl ie. Rúwe me emén pwiich kewe me pwal chókkewe mi sani le aúseling ra mwichfengen. Inaamwo ika ra towau, nge ra meefi pwe ra kapachelong lein ekkewe 44,131 mi fiti ewe mwichelap. Iei met emén Chón Kraist mwán a makkeei: “Kilisou seni alóllóólun letipem ren ámi fichi ngenikem ena mwich. Oua pwári ngenikem sefál úkúkún ámi tongekem.”

Atun ekkewe souasor lón Israel ra ettiki chék efóch rappwa, iwe “ekewe souemwen, ekewe mwänirelan ekewe ainangen Israel,” iir chék repwe mwicheto ren ewe imw mangaku. (Num. 10:4) Me ikena ie, ra tongeni angei pwóróus me káit seni Moses. Ena mettóch epwe álisiir le apwénúetá wiser lón en me an einang. Ika en emén me lein ekkena souemmwen, itá kosap féri úkúkún óm tufich le nóm lón ena mwich me kúna feiéch seni?

Lón ei fansoun, ekkewe mwán mi ásimaw lón ekkewe mwichefel esap iir “souemwen” are rese nemeni néún Kot mwichen siip mi nóm fán túmúnúer. (1 Pet. 5:1-3) Nge ra fókkun achocho le túmúnú ewe mwichen siip. Ina minne ra tipemecheres le etiwa ewe etiwetiw ngeni pwal eú sókkun káit, áwewe chék ren ewe Sukul fán iten Mwán mi Ásimaw me Chónálillisin Mwichefel. Atun ena sukul, ekkewe mwán mi ásimaw ra káé ifa usun repwe lipwákéchúló le túmúnú kókkótun me mettóchun ewe mwichefel. Iwe pokiten ena sukul, ekkewe mwán mi ásimaw me chón ewe mwichefel ra tongeni ririéch ngeni Jiowa. Inaamwo ika kese fiti eú me lein ekkena sukul, nge ka tongeni chúen kúna feiéch seni pokiten chókkewe ra fen fiti ra apwénúetá minne ra káé pwe repwe álisi chón ewe mwichefel.

Fán ekkóch ekkewe souasor lón Israel ra ettiki ewe ttikin esilesil mi ttikimwoch. Ena esilesil a pwári pwe Jiowa a mochen pwe meinisin ekkewe chón Israel repwe mwékút. (Num. 10:5, 6) Lupwen ekkena chón Israel ra amwékútú imwer kewe tento, a fókkun kókkótéch nge a pwal ina eú angang weires. Fán ekkóch, neman ekkóch chón Israel rese kon lien mochen mwékút ngeni pwal eú leeni. Pwata?

Eli ekkóch ra meefi pwe ena ttikin esilesil ar repwe mwékút, a mmen ttikipaat me a kon weiweitá. “Lon ekoch fansoun ewe kuchu a chök üla seni lekuniol tori lesosor.” Nge fán ekkóch ra nóm “ruu rän ika eu maram ika eu ier” me mwen ar repwe mwékútsefál. (Num. 9:21, 22) Me fán fite ra mwékút? Numperis sópwun 33 a erá pwe ra nóm lón lap seni 40 leeni.

Eli ekkóch ra kúna pwe eú leeni a chúló. Iwe repwe meefi kinamwe ikena lón “ewe fanüapö mi watte o eniwokus.” (Tut. 1:19) Ina popun eli repwe tongeni ekieki pwe ika repwe mwékút, iwe repwe fen ló lón pwal eú leeni ese kon kinamwe.

Atun ekkewe einang ra poputá le mwékút, eli a weires ngeni ekkóch ar repwe witi ar fansoun le mwékút. Iir meinisin ra rong ewe ttikin esilesil mi ttikimwoch, nge saminne iir meinisin repwe chék ló seni ena leeni fán eú chék. Ewe ttikin esilesil mi ttikimwoch, a esissillatá pwe ekkewe einang mi nóm étiw, weween Juta, Isakar, me Sepulon repwe ló. (Num. 2:3-7; 10:5, 6) Mwirin ar ló, iwe ekkewe souasor repwe ettikisefál ena esilesil mi ttikimwoch pwe esissillen án ekkewe úlúngát einang mi nóm éér repwele mwékút. Iwe ekkena souasor repwe sópweló ena esin esilesil tori án meinisin ekkewe chón Israel repwe ló.

Neman a fen fis ngonuk pwe a weires óm kopwe etiwa ekkóch siwil lón án Jiowa we mwicheich. Eli ka meefi pwe a kon chómmóng siwil. Are eli ka fen sani eú kókkót me kese mochen an epwe siwil. Ese lifilifil popun, nge eli ka kúna pwe a weires óm kopwe mosonottam le eérenaaló ewe siwil. Inaamwo ika a ina usun, nge ika sia achocho le álleasochis, iwe sipwe mirititi pwe ena siwil a échitikich, me Jiowa a pwapwa rech.

Lón fansoun Moses we, Jiowa a emmwenawu fite million mwán, fefin, me semirit seni ewe fénúpéén. Ika Jiowa ese túmúnúúr me emmweniir, resap tongeni kúna manaw. Lón ei fansoun, Jiowa a emmwenikich lón ekkeei ránin lesópwólóón mi efeiengaw. A álisikich le ririéch ngeni me apéchékkúla ach lúkú! Ina minne sia mochen féri úkúkún ach tufich le álleasochis usun ekkewe chón Israel mi tuppwél me álleasochis ngeni ttikin ekkewe rappwa!