1. Met meefien Jiowa atun emén néún siip mi mwálecheló a liwinsefál?

SIA fen káé lón ewe lesen mwen ei pwe Jiowa a aléllééi pwisin i ngeni emén chón masen siip mi múrinné mi túmúnúéchú emén me emén néún kewe siip. Me a kúttafetálei meinisin chókkewe mi mwálecheló. Jiowa a ereni ekkewe chón Israel mi sú seni: “Oupwe liwinto rei, pwe ngang üpwe liwin ngenikemi.” Sia silei pwe a chúen ina usun meefian pokiten a erá: “Üsap tongeni siwil.” (Mal. 3:6, 7) Jesus a erá pwe Jiowa me ekkewe chónláng ra fókkun pwapwa atun pwal mwo nge emén chón angang ngeni Jiowa mi mwálecheló a liwinsefál.​—Luk. 15:10, 32.

2. Met sipwe káé lón ei lesen?

² Sipwe pwóróus usun úlúngát án Jesus kewe kapas áwewe mi áiti ngenikich ekkewe lesen mi aúchea ren ifa usun sipwe álisi chókkewe mi mwálech seni Jiowa. Sipwe káé ekkóch napanap mi lamot sipwe eáni ren ach sipwe álisiir le liwiniti Jiowa. Sipwe pwal káé pwe sipwe fókkun pwapwa atun sia angang weires le álisi chókkana mi apwangapwang.

3-4. Lón Lukas 15:8-10, pwata ewe fefin a kúttafichi néún we féún moni silifer mi péút seni?

³ A lamot ach sipwe angang weires le kútta chókkewe mi mochen liwiniti Jiowa. Jesus a eáni eú kapas áwewe usun emén fefin mi péút seni eféú féún moni silifer mi aúchea. Ewe kinikin mi lamot lón ena kapas áwewe, ina án ewe fefin angang weires le kúttafetálei ena féún moni.​—Álleani Lukas 15:8-10.

 ⁴ Jesus a áweweei meefien ewe fefin lupwen a kúna néún we féún moni silifer mi aúchea a péút seni. Lón fansoun Jesus we, lupwen emén fin Israel a pwúpwúlú, fán ekkóch inan we epwe liffang ngeni engol féún moni silifer. Eli ena eféú féún moni, ina eféú me lein ekkewe engol féún moni silifer inan we a liffang ngeni. Tittipen ewe fefin pwe a turu seni me lón imwan we. Iwe, a ettina eú lamp me kúttafetálei nge ese kúna. Ese tinééch néún we lamp ren an epwe kúna ena féúkúkkúnún moni silifer. Iwe a pirumweiéchú unusen lón imwan we, iwe a kúna néún we féún moni mi aúchea pwe a meriweriwewu me fán ttinen néún we lamp. A ifa me ngasetiwan! A kérfengenni chiechian kewe me chón órun pwe epwe ereniir.

5. Pwata a tongeni weires ach sipwe kútta chókkewe mi mwálech seni ewe mwichefel?

⁵ Sia káé seni án Jesus na kapas áwewe pwe lupwen a péút senikich och mettóch, mi lamot ach sipwe angang weires le kúttafetálei. Pwal ina chék usun, eli mi pwal lamot ach sipwe angang weires le kúttafetálei chókkewe mi fen mwálech seni ewe mwichefel. Neman a fen fitu fitu ier ar úkútiw le fiffiti mwich me akkafalafal. Neman ra pwal mwo nge mwékút ngeni eú leeni, nge pwiich kewe ikena rese sissileer. Nge sia fókkun lúkú pwe iei ekkóch me lein chókkana mi patapateló ra enletin mochen liwiniti Jiowa. Ra mochen fitisefáli pwiir kewe Chón Kraist mi enlet le angang ngeni Jiowa, nge a lamot sipwe álisiir.

6. Ifa usun meinisin chón ewe mwichefel ra tongeni álillis le kútta chókkewe mi mwálecheló?

⁶ Ié a tongeni álillis le kútta chókkewe mi mwálecheló? Meinisin ekkewe chón afalafal lón ewe mwichefel, kapachelong ekkewe mwán mi ásimaw, pioneer, me chókkewe mi wor mi mwálecheló lón ar famili. A wor chiechiom are aramasom mi mwálecheló? Ka fen sereni emén mi mwálecheló atun ka afalafal imw me imw are ikewe aramas ra soun nóm ie? Áwewe ngeni eménna pwe ika a mochen án emén epwe chuuri, iwe kopwe pwapwa le ngeni ekkewe mwán mi ásimaw an address are nampaan néún phone.

7. Met sia káé seni alon emén mwán mi ásimaw itan Thomas?

⁷ Ákkáeúin ekkewe mwán mi ásimaw repwe wisen kútta chókkewe mi mwálecheló nge ra mochen liwiniti Jiowa. Ifa usun repwe féri ena? Nengeni meefien emén mwán mi ásimaw itan Thomas * mi nóm lón Spein. A fen álisi lap seni 40 Chón Pwáraatá le liwiniti ewe mwichefel. Iei alon: “Akkomw, ua eisini fitemén pwiich kewe ika ra silei ia ekkewe mi mwálecheló ra nóm ie. Are ua eisini ekkewe chón afalafal ika ra chechchemeni emén ese chúen fiffiti mwich. Lape ngeni chón ewe mwichefel ra fókkun pwapwa le álillis pún ra tongeni álisatá kútten chókkewe mi mwálecheló. Mwirin, lupwen ua chuuri ekkewe mi mwálecheló, ua eisiniir usun néúr kewe me pwal ekkóch aramaser kewe. Ekkóch me leir ra piin ukkuwei néúr kewe ngeni ekkewe mwich, me neman iir chón afalafal me lóóm. Sia pwal tongeni álisiir le liwiniti Jiowa.”

8. Lón ewe kapas áwewe usun ewe nau mi mwálecheló lón Lukas 15:17-24, ifa féfférún ewe sam ngeni néún we mi aier?

⁸ Ikkefa ekkewe napanap mi lamot sipwe eáni ika sipwe álisi chókkewe mi mochen liwiniti Jiowa? Nengeni ekkóch lesen sia tongeni káé seni án Jesus we kapas áwewe usun ewe nau mi lúkúmach mi sú seni imwan we. (Álleani Lukas 15:17-24.) Jesus a áweweei pwe ena nau a kerán mirititi pwe a fen fókkun kefilingaw, iwe a filatá le liwiniti imwan we.  Seman we a ssá ngeni néún na me a foropacheeló, me a alúkúlúkú ngeni pwe a tongei. Mwelien letipen ewe nau a osukosuka me a meefi pwe ese chúen fich ngeni an epwe iteni néún. Ena sam a fókkun tongei néún na mi ereni meefian. Iwe, ena sam a féri ekkóch mettóch pwe epwe pwári ngeni pwe a etiwasefálieto pwe i néún mi áchengicheng, nge esap emén chón angang. Ren án ena sam epwe pwári an tongei néún na, a akkóta eú kametip, me a aúféúfa ngeni néún na mi aier úf mi múrinné.

9. Ikkefa ekkewe napanap mi lamot sipwe eáni ren ach sipwe álisi chókkewe mi mwálecheló le liwiniti Jiowa? (Ppii ewe pwóór “ Usun Ach Álisi Chókkewe mi Mochen Liwinsefál.”)

⁹ Lón ena kapas áwewe, Jiowa a usun chék ena sam. A tongei pwiich kewe mi mwálecheló me a mochen ar repwe liwiniti. Sia tongeni álisiir le liwinsefál ren ach áppirú Jiowa. A lamot sipwe mosonottam, weweiti meefier me tongeer ren ach sipwe féri ena. Pwata a lamot ach sipwe eáni ekkena úlúngát napanap, me ifa usun sipwe féri ena?

10. Pwata a lamot ach sipwe mosonottam le álisi emén le ririéchsefál ngeni Jiowa?

¹⁰ A lamot ach sipwe mosonottam le álisi emén le liwiniti Jiowa, pwe saminne epwe mwittir fis. Chómmóng chókkewe mi piin mwálecheló ra erá pwe ekkewe mwán mi ásimaw me ekkóch chón ewe mwichefel ra chuuriir fán chómmóng me mwen ar poputá le angangsefál ngeni Jiowa. Iei met emén Chón Kraist fefin itan Nancy seni Asia a makkeei: “Emén chiechiei lón ewe mwichefel a fókkun watte an álillis ngeniei. A tongeei usun nge ngang pwiin watte. A áchemaato ekkewe fansoun aua pwapwafengen. A aúseling ngeni meefiei fán mosonottam me ese pireir le fénéúei.  I enletin chiechiei, me a chék mómmólnetá le álisiei fansoun meinisin.”

11. Pwata a lamot ach sipwe weweiti meefien emén mi kinás letipan?

¹¹ Ach weweiti meefien emén a usun eú sáfei mi iman, a tongeni echikara kinásen letip. Ekkóch chókkewe mi mwálecheló, ra chúen akkamwéchú ar song ren fite ier ngeni emén chón lón ewe mwichefel mi asongeer. Iwe pokiten ena, rese mochen liwiniti Jiowa. Neman ekkóch ra ekieki pwe emén chón lón ewe mwichefel a féfférmwáál ngeniir. Eli a lamot án emén epwe aúseling me weweiti meefier. (Jas. 1:19) Iei alon Maria emén mi piin mwálecheló, “A lamot ngeniei án emén epwe aúseling meefiei, oururuei, fénéúei me álisiei.”

12. Ifa usun án Jiowa tong a usun chék efóch sáál?

¹² Ewe Paipel a áweweei pwe án Jiowa tong fán iten néún kewe aramas a usun chék efóch sáál. Ifa usun? Ekieki ei kapas áwewe: Anchangei pwe kopwele mwalum lón eú mataw mi fókkun lóóló, nge emén a monei ngonuk eú life jacket. Ese mwáál kopwe kilisou ren an álillis pwe kopwe tongeni pias. Nge ese chék naf ewe life jacket ren óm kopwe manaw. Ewe sáát a fókkun patekkich, iwe kosap tongeni manaw ika kese tiketá wóón ewe mwoota. A lamot emén epwe monei ngonuk efóch sáál me efikoto ngeni ewe mwoota. Iei met Jiowa a apasa usun ekkewe chón Israel mi mwálecheló: “Ua emmweniireto ren ewe selin tong.” (Os. 11:4, NW) A pwal ina usun meefien Jiowa lón ei fansoun ngeni chókkewe rese chúen angang ngeni, me ra kokotiw fán ar kewe osukosuk me aúrek. A mochen ar repwe silei pwe a tongeer me a mochen emmweniireto ngeni I. Me Jiowa a tongeni néúnéú en le álisi chókkana le meefi pwe a tongeer.

13. Ifa usun pwóróusen Pablo a pwári pwe ach tong a tongeni álisi ekkewe ekkóch le liwiniti Jiowa?

 ¹³ A lamot ach sipwe alúkúlúkú ngeni chókkewe mi mwálecheló pwe Jiowa a tongeer me sia pwal tongeer. Pablo ewe mi mak pwóróusan lón ewe lesen mwen ei, a mwálecheló lap seni 30 ier. Iei alon: “Lón eú sossoran, atun ua ló seni imwei, emén Chón Kraist fefin chinnap mi kirekiréch a chuuriei me fós ngeniei fán tong. Ua kechiw usun emén semirit. Ua ereni pwe usun nge Jiowa a fen tiinaato an epwe fós ngeniei. Me ikena ie ua filatá le liwiniti Jiowa.”

14. Me ren ewe kapas áwewe lón Lukas 15:4, 5, met ewe chón masen siip a féri mwirin an kúna ewe siip mi mworukoló?

¹⁴ A lamot ach sipwe sópweló le ákkálisi me akkapéchékkúla ekkewe mi mwálecheló. Neman metekin letiper a mmen watte me esap mwittir mó, usun chék ewe nau mi mwálecheló lón án Jesus we kapas áwewe. Me pokiten ra fen mwálecheló lón án Satan ei ótót, iwe ese mwáál a apwangapwang ar riri ngeni Jiowa. Iwe mi lamot ach sipwe apéchékkúla ar lúkú Jiowa. Lón ewe kapas áwewe usun ewe siip mi mwálecheló, Jesus a áweweei án ewe chón masen siip ekietá ewe siip wóón afaran me uwealó ngeni ewe pwiin siip. Ewe chón masen siip a fen áeá an fansoun me péchékkúl le kúttafetálei ewe siip mi mworukoló. Nge a mirititi pwe a lamot an epwe pwiki ewe siip me uwei ngeni ekkewe pwiin siip pokiten ese wor an péchékkúl le pwisin liwinsefál.​—Álleani Lukas 15:4, 5.

15. Ifa usun sipwe tongeni álisi chókkewe mi apwangapwang lón pekin ngún iir mi mochen liwiniti Jiowa? (Ppii ewe pwóór “ Eú Puk mi Fókkun Álilliséch.”)

¹⁵ Eli a lamot ach sipwe áeá watteen fansoun me péchékkúl le álisi chókkewe mi mwálecheló le likiitú fán ar kewe osukosuk mi eppeti ar repwe angangsefál ngeni Jiowa. Ren álillisin  án Jiowa we ngún mi fel, an we Kapas, me ekkewe puk mi kawor me ren ewe mwichefel, sia tongeni álisiir le ririéchsefál ngeni Jiowa. (Rom 15:1) Ifa usun sia tongeni féri ena? Iei alon emén mwán mi ásimaw mi sipeéch, “Mi lamot epwe fis eú káéén Paipel ngeni lape ngeni ekkewe mi mwálecheló iir mi filatá le angangsefál ngeni Jiowa.” * Ina popun, ika emén mwán mi ásimaw a tingoreok le káé ngeni emén mi mwálecheló, pwata kese etiwa ena tingor? Ena mwán mi ásimaw a pwal apasa, “Mi lamot pwe ewe chón afalafal mi káé ngeni ena mi patapateló, epwe emén chiechi mi múrinné pwe ena mi patapateló epwe núkúnúkéch ren me esap pireir le fós ngeni.”

16. Pwata sia silei pwe ekkewe chónláng repwe álisikich?

¹⁶ A wor chómmóng pwóróus mi pwári pwe ekkewe chónláng ra álisikich le kúna ekkewe mi mwálecheló mi mochen liwiniti Jiowa. (Pwär. 14:6) Áwewe chék, Silvio seni Ecuador a tingormaú ngeni Jiowa an epwe tiinaaló emén an epwe álisi le liwiniti ewe mwichefel. Lepwolen an ikkiótek nge rúúemén mwán mi ásimaw ra wareiti imwan we. Atun ar na chuuri, ra pwapwa le poputá le awora ewe álillis mi lamot ngeni.

17. Epwe ifa meefiach lupwen sia álisi chókkewe mi apwangapwang lón pekin lúkú?

¹⁷ Sipwe kúna watteen pwapwa lupwen sia álisi chókkewe mi apwangapwang lón pekin lúkú le liwiniti Jiowa. Nengeni alon Salvador, emén pioneer mi achocho le álisi ekkewe mi mwálecheló: “Fán ekkóch use tongeni pouni ai kechiw ren ai pwapwa. Ua fókkun pwapwa le ekieki pwe Jiowa a seláni emén néún kewe siip mi áchengicheng seni án Satan ei ótót, me feiéchúi ren ám angangfengen me Jiowa lón ena angang.”​—Föf. 20:35.

18. Ika ka fen úkútiw le angang ngeni Jiowa, met ka tongeni lúkúlúkú?

¹⁸ Ika ka fen úkútiw le angang ngeni Jiowa, ka tongeni lúkúlúk pwe a chúen tongeok. A mochen óm kopwe liwin. Mi lamot kopwe achocho. Jiowa a usun chék ewe sam lón án Jesus we kapas áwewe, mi chék ésúkúsúkú óm kopwe liwin, me epwe pwapwa le etiwoksefál.