REN fite fite ier, ekkewe chón Israel ra kan awora moni pwe repwe álisatá ewe fel mi enlet. Nge seni fansoun Jesus we, ekkewe chón Jus ra kan ménatiw chómmóng sókkun takises mi áweiresi manawer.

Meinisin ekkewe chón Jus mi mwukóló repwe ménatiw takises úkúkún esopw shekel (ruu drachma, ina epwe úkúkún peioffun ruu ránin angang) fán iten kálisitáán ewe imwenfel mangaku nge mwirin ewe imwenfel. Lón fansoun Jesus we, ra néúnéú ena monien takises fán iten kaworen ekkewe asor me túmúnún ewe imwenfel, aúwen Herotes. Ekkóch chón Jus ra eisini Petrus usun met Jesus a ekieki wóón ena mettóch, iwe Jesus a erá pwe ese wor ngawen ar repwe ménatiw takises. Nge ren enletin, Jesus a ereni Petrus an epwe angei eféú féún moni pwe méén ar takises.​—Mat. 17:24-27.

Néún Kot kewe aramas lóóm ra pwal awora ewe leengol seni masouen ar atake are ar moni tolong. (Lif. 27:30-32; Num. 18:26-28) Ekkewe néúwisin lamalam ra péchéú ngeni ekkewe aramas ar repwe awora leengol seni eú me eú masouen ar kewe atake pwal mwo nge seni ekkewe nofitin mwéngé “iter mint, dill me kumin.” Jesus ese apasa pwe mi mwáál án aramas awora leengol, nge a apasa pwe napanapen án ekkewe senseen allúk me ekkewe Farisi apwénúetá ewe allúk usun leengol, a likótuputup.​—Mat. 23:23.

Nge lón ena atun a lamot án ekkewe chón Jus repwe ménatiw chómmóng sókkun takises ngeni ekkewe chón Rom iir mi nemeniir. Áwewe chék, a lamot án ekkewe soufénú repwe ménatiw takises wóón moni are pisek. Usun itá úkúkún ena takises repwe ménatiw epwe seni 20 ngeni 25 persent uwaan masouen ar atake. A pwal wor ewe takisesin pépéén mékúr fán iten emén me emén chón Jus. Ina ewe takises ekkewe Farisi ra eisini Jesus usun. A áiti ngenikich itá epwe ifa ach ekiek usun kamétiwen takises ren an apasa: “Oupwe ngeni Sisar mine än Sisar, nge oupwe ngeni Kot mine än Kot.”​—Mat. 22:15-22.

A pwal wor ewe sókkun takises wóón ekkewe pisek mi tolong are towu seni eú fénú. Ra angei ekkena takises me wóón ekkewe kiá, piriis, keangen al, are lón ekkewe leenien tolong ngeni ekkewe sóópw are market.

Ekkewe aramas mi nóm fán nemenien Rom ra fókkun weires ren ewe takises. Iei alon Tacitus, ewe souuruwo lón Rom lemwúún King Tiperius atun Jesus a nóm wóón fénúfan, “Ekkewe chón Siria me Jutea ra tingormaú kekisilóón takises pún ra fókkun weires ren.”

A fen lapóló áweiresin takises ren napanapen ioian. Eménnewe mi tongeni mééni ena wis wóón watteen moni lap seni meinisin, epwe ló ngeni ena wis. Epwe kamé néún chón angang le ioifetál takises, nge iir meinisin repwe angei winner seni ena angang. Usun a pwal wor néún Sakios ekkena sókkun chón ioi takises. (Luk. 19:1, 2) Ina popun, ekkewe aramas ra songeiti me oputa ekkena chón ioi takises seniir.