1. Pwata fán ekkóch eli néún Jiowa kewe chón angang ra meefi tipitipingaw?

LAPE NGENIKICH sia meefi tipitipingaw fán ekkóch. Me ren ekkóch, a mwittir móróló ena esin memmeef, nge ekkóch, a nómottam. Sia pwal tongeni meefi tipitipingaw pwal mwo nge ika mi fen chómmóng aramas rech. A weires ngeni ekkóch ar repwe chiechi ngeni chón lón ewe mwichefel ra kerán mwékút ngeni. Ekkóch ra meefi tipitipingaw atun ra ló seni ar famili iir mi kon pacheéchfengen. Ekkóch ra fókkun pwosiiti emén attongeer mi má seniir. Me ekkóch Chón Kraist, nge ákkáeúin chókkewe iir mi kerán káé ewe enlet, ra tipitipingaw atun chón ar famili me chiechier kewe chón lúkún ra ú ngeniir me oputer.

2. Ikkefa ekkewe kapas eis sipwe pélúweniir?

² Jiowa a silei me weweiti mettóch meinisin usuch. A silei meefiach atun sia tipitipingaw, me a mochen álisikich le pworacho ngeni ekkena memmeef. Ifa usun Jiowa epwe álisikich? Met sia tongeni pwisin féri atun sia tipitipingaw? Me ifa usun sia tongeni álisi ekkewe ekkóch lón ewe mwichefel iir mi meefi tipitipingaw? Sipwe pwóróus wóón pélúwen ekkena kapas eis.

3. Ifa usun Jiowa a pwári pwe a chúngú Elias?

³ Jiowa a mochen pwe meinisin chókkewe mi fel ngeni repwe pwapwa. A kkan ngeni emén me emén kich me a silei atun sia meefi letipechou are letipengaw. (Kölf. 145:18, 19) Áwewe chék, ekieki ifa usun Jiowa a chúngú meefien ewe soufós Elias me ifa usun a álisi. Ena mwán mi tuppwél a manaw lón ekkewe fansoun mi áweires lón uruwoon Israel. Ekkewe aramas  mi wor maner lón Israel rese tongei Jiowa, ra eriáfféwú chókkewe mi fel ngeni, nge ákkáeúin ra mochen nieló Elias. (1 King 19:1, 2) Me eli a kon lapóló án Elias letipechou atun a ekieki pwe i chék lusun soufós a chúen akkangang ngeni Jiowa. (1 King 19:10) Iwe, Kot a mwittir féri met ren an epwe álisi Elias. A tiinaaló emén chónláng pwe epwe anúkúnúkú néún na soufós pwe esap chék i, nge a chúen chómmóng ekkewe chón Israel iir mi niwokkusiti!​—1 King 19:5, 18.

4. Ifa usun Markus 10:29, 30 a pwári úkúkún án Jiowa chúngú chókkewe mi lúkúsékúrú álillisin chón ar kewe famili are chiechier kewe?

⁴ Jiowa a silei pwe atun sia filatá le angang ngeni, a lamot án ekkóch me leich sipwe pennúkúóló chómmóng mettóch. Eú me lein ekkewe mettóch eli sia lúkúsékúrú, ina álillisin chón ach kewe famili me chiechiach kewe rese angang ngeni Jiowa. Eli ewe aposel Petrus a lólilen ina pwata iwe a eisini Jesus: “Äm aia likitala meinisin o tapwela mürum. Iwe, met liwin aipwe angei?” (Mat. 19:27) Jesus a alúkúlúkú néún kewe chón káé fán tong pwe epwe wor eú ar famili mi watte lón pekin ngún. (Álleani Markus 10:29, 30.) Me Jiowa, Semach we lón Láng a pwonei pwe epwe álisi chókkewe mi mochen angang ngeni. (Kölf. 9:10) Sipwe káé ekkóch mettóch mi álilliséch ka tongeni féri pwe kopwe angei án Jiowa álillis lón óm fiffiu ngeni ewe memmeefin tipitipingaw.

5. Pwata a múrinné óm kopwe ekieki usun án Jiowa ákkálisuk?

⁵ Ekieki usun án Jiowa ákkálisuk. (Kölf. 55:22) Ena mettóch epwe álisuk le meefi pwe esap úchék en áláemén, nge a wor chienom. Iei alon Carol, * emén Chón Kraist fefin mi lipich nge i chék me lón an we famili a fiti ewe enlet: “Atun ua ekieki usun án Jiowa álisiei le likiitú fán weires, a álisiei le meefi pwe use áláemén, nge a wor chienei. Me a alúkúlúkúei pwe Jiowa epwe chék ákkálisiei.”

6. Ifa usun 1 Petrus 5:9, 10 a apéchékkúla chókkewe iir mi fiffiu ngeni ewe memmeefin tipitipingaw?

⁶ Ekieki usun án Jiowa ákkálisi pwiich  kewe iir meefi tipitipingaw. (Álleani 1 Petrus 5:9, 10.) Iei alon Hiroshi emén Chón Kraist mwán i chék Chón Pwáraatá lón an we famili ren fite fite ier: “A mecheres ach sipwe kúna pwe lón ewe mwichefel, a wor án emén me emén osukosuk. Sia silei pwe kich meinisin sia féri úkúkún ach tufich le angang ngeni Jiowa. Ena mettóch a apéchékkúlakem me chókkewe ese wor chón ám famili mi fitikem lón ewe enlet.”

7. Ifa usun iótek a álisuk?

⁷ Ikkiótek, ákkálleani ewe Paipel, me fiffiti mwich. A lamot óm kopwe ereni Jiowa enletin meefiom. (1 Pet. 5:7) Atun emén fépwúl Chón Kraist itan Massiel a filatá le angang ngeni Jiowa, a meefi tipitipingaw pokiten chón an famili rese pwal fiti le angang ngeni Jiowa. Iei alon: “Ai enletin ikkiótek ngeni Jiowa, ina eú me lein ekkewe mettóch mi fókkun aúchea mi álisiei le likiitú fán ai memmeefin tipitipingaw. Jiowa a usun wesewesen Semei, me ua iótek ngeni fán fite iteiten rán me ereni meefiei.”

8. Ifa usun óm ákkálleani án Kot we Kapas me ekkekilonei a álisuk?

⁸ Ákkálleani án Kot we Kapas me ekkekilonei ekkewe pwóróus mi pwári án Jiowa tongeok. Iei alon Bianca emén Chón Kraist fefin mi likiitú fán án chón an famili ekkepiita: “A fókkun álilliséch ngeniei ai ákkálleani me ekkekilonei ekkewe pwóróus lón Paipel, me pwóróusen manawen néún Jiowa kewe chón angang iir mi pwal kúna ewe esin osukosuk ua kúna.” Ekkóch Chón Kraist ra akkamwéchú ekkewe wokisin mi oururuur, áwewe chék ren Kölfel 27:10 me Aisea 41:10. Ekkóch ra aúseling ekkewe pwóróus mi record atun ra ammólnatá ekkewe mwich, are atun ra álleani ar álleaan Paipel. Ra erá pwe a álisiir ar resap kon meefi tipitipingaw.

9. Ifa usun óm fiffiti ekkewe mwich a álilliséch ngonuk?

⁹ Achocho le fiffiti ekkewe mwich. Ewe mwich epwe apéchékkúlok me kopwe pwal tongeni sissileeló chón ewe mwichefel. (Ipru 10:24, 25) Iei alon Massiel ewe a fen mak pwóróusan me mwan: “Inaamwo ika ua fókkun nisássáw, nge ua filatá le fiti meinisin ekkewe mwich me uwawu meefiei. Ena mettóch a álisiei le meefi pwe ua kapachelong lón ewe mwichefel.”

10. Pwata a lamot ach sipwe chiechiéch ngeni pwiich kewe lón ewe mwichefel?

¹⁰ Chiechiéch ngeni ekkewe Chón Kraist mi tuppwél. Chiechi ngeni chókkewe lón ewe mwichefel ka tongeni káé seniir inaamwo ika ra watte sonuk, are kúkkún sonuk, are iir chón ekis. Ewe Paipel a áchema ngenikich pwe tipachem “a nom ren ekewe chinlap.”  (Hiop 12:12) Ekkewe mi mwukóló ra pwal tongeni káé chómmóng mettóch seni ekkewe iir mi kúkkún seniir lón ewe mwichefel. Tafit a fókkun kúkkún seni Jonatan, nge ena mettóch ese eppetiir ar repwe chiechiéchfengen. (1 Sam. 18:1) Tafit me Jonatan ra álillisfengen le angang ngeni Jiowa inaamwo ika ra kúna chómmóng osukosuk. (1 Sam. 23:16-18) Iei alon Irina emén Chón Kraist fefin i chék Chón Pwáraatá lón an we famili iei: “Pwiich kewe lón ewe mwichefel, ra tongeni wiliti chón ach famili lón pekin ngún, me Jiowa a tongeni néúnéú iir le ámmeef ngenikich pwe sise áláeménúló.”

11. Met a lamot ach sipwe féri pwe ach riri ngeni chiechiach kewe epwe péchékkúl?

¹¹ A tongeni áweires óm kopwe kút chiechiom, ákkáeúin ika ka nisássáw. Iei alon Ratna emén Chón Kraist fefin mi nisássáw mi káé ewe enlet inaamwo ika a kúna koput seni aramas: “Ua mirititi pwe a lamot ngeniei álillisin pwii kewe lón ewe mwichefel.” A tongeni áweires óm ereni pwal emén usun meefiom, nge atun ka féri ena, ena emén a tongeni wiliti chiechiom mi pacheéch ngonuk. Chiechiom kewe ra mochen apéchékkúlok me álisuk, nge a lamot óm kopwe ereniir ifa usun repwe álisuk.

12. Ifa usun ewe angangen afalafal a tongeni álisikich le kúnékún chiechiach?

¹² Eú alen óm kopwe kúnékún chiechiom, ina ren óm fiti chiechiom kewe Chón Kraist lón ewe angangen afalafal. Iei alon Carol ewe mi mak pwóróusan akkomw: “Ua kúnékún chómmóng chiechiei ren ai fiffiti ekkewe Chón Kraist fefin lón ewe angangen afalafal, me pwal lón ekkóch angang fán iten Jiowa. Jiowa a fen álisiei lón ekkeei ier ren álillisin chiechiei kana.” A múrinné ach sipwe kan chiechi ngeni ekkewe Chón Kraist mi tuppwél. Jiowa a áeá ena esin chiechi le apéchékkúlok atun ka meefi letipengaw, áwewe chék atun ka meefi tipitipingaw.​—SalF. 17:17.

13. Ifa wisach kich meinisin lón ewe mwichefel?

¹³ A wor wisach kich meinisin le álisatá kinamween ewe mwichefel me pwári pwe sia tongei meinisin, pwe esap wor ié epwe meefi pwe a chék áláemén. (Joh. 13:35) Minne sia féri me apasa a tongeni fókkun apéchékkúla ekkewe ekkóch! Iei alon emén Chón Kraist fefin: “Atun ua káé ewe enlet, chón ewe mwichefel ra wiliti chón ai famili, ika esap pwúlún ar álillis, usap tongeni wiliti emén Chón Pwáraatá Jiowa.” Met ka tongeni féri le álisi chókkewe chón ar famili rese fitiir lón ewe enlet pwe repwe meefi pwe chón ewe mwichefel ra tongeer?

14. Met ka tongeni féri pwe kopwe chiechiéch ngeni ekkewe minefé?

¹⁴ Achocho le chiechiéch ngeni ekkewe minefé. Sia tongeni poputá ren ach etiwaéchú ekkewe mineféto ngeni ewe mwichefel. (Rom 15:7) Nge ese chék naf ach sipwe etiwaéchúúr me kapong ngeniir. Sia mochen pwe ekis me ekis sipwe alapaaló ach chiechiéch ngeniir. Ina popun kopwe kirekiréch me pwári pwe ka enletin chúngú ekkewe mineféto. Achocho le weweiti ekkewe osukosuk ra kúkkúna, nge túmúnú pwe kete eáni ekkewe kapas eis mi ássáwer. Eli a weires ngeni ekkóch ar repwe pwári meefier, ina popun kosap echchimwer le fós. Nge fán kirekiréch, kopwe eáni ekkewe kapas eis epwe efisi ar repwe uwawu meefier me mosonottam le aúseling ngeni met ra pélúwen ngeni. Áwewe chék, ka tongeni eisiniir ika ifa usun ra káé ewe enlet.

15. Ifa usun ekkewe Chón Kraist mi ásimaw ra tongeni álisi ekkewe ekkóch lón ewe mwichefel?

 ¹⁵ A tongeni lapóló án meinisin chón ewe mwichefel lúkú, ika ekkewe Chón Kraist mi péchékkúl ar lúkú, nge ákkáeúin ekkewe mwán mi ásimaw, ra pwári pwe ra tongeer. Iei alon Melissa inan we mi ámááraatá lón ewe enlet: “Ua fókkun kilisou ren ekkewe Chón Kraist mwán iir mi usun sam ngeniei, ra awora ar fansoun ngeniei me áfánniei. Iteiten a lamot ai upwe uwawu meefiei ngeni emén, a wor ié epwe aúseling ngeniei.” Mauricio, emén alúwél Chón Kraist, a meefi letipengaw me tipitipingawóló me mwirin án ewe mi wisen káé ngeni a patapateló. A erá: “Ekkewe mwán mi ásimaw ra pwári pwe ra chúngúei me ra fókkun álisiei, ra kan fóffós ngeniei. Ra fitiei lón ewe angangen afalafal me apwóróusa ngeniei met ra aúcheani seni ar pwisin káé, me aua pwal mwo nge kunoufengen.” Melissa me Mauricio ra feffeitá me angang ngeni Jiowa full-time.

16-17. Met sia pwal tongeni féri le álisi ekkewe ekkóch?

¹⁶ Awora álillis mi fich. (Kal. 6:10) Iei alon Leo emén misineri lón eú fénú mi towau seni an we famili: “Fán chómmóng eú chék féfférún kirekiréch lón fansoun fich, ina chék met a lamot ngonuk. Ua chemeni ewe atun ua ákseten wóón wáái we. Atun ua tikeri imwei we ua fókkun aúrek, nge eú pean pwúpwúlú ra etiwaei ám aupwe ekis mwéngéfengen ren imwer we. Use chemeni met ewe aua áni, nge ua chemeni ar kirekiréch le aúselingaei, iwe mwirin ua kinamwe!”

¹⁷ Kich meinisin sia kan sani le nóm ren ekkewe ekkóch Chón Pwáraatá me pwóróusfengen wóón ekkewe afalafal sia fen róng, áwewe chék seni ach kewe mwichelap. Iwe nge Carol ewe mi mak pwóróusan akkomw, a apasa: “Ua fókkun tipitipingaw, nge ákkáeúin atun ekkewe mwichelap.” Pwata? A erá: “Inaamwo ika ua nóm lein fitepúkú are pwal mwo nge fitengeréú pwiich kewe, nge ua fókkun tipitipingaw atun ua kúna pwe ra mómmóótfengen me chón ar kewe famili.” A weires ngeni ekkóch ar repwe fiti ar we ewin mwichelap mwirin málóón pwúlúwer kewe. En mi silei emén mi kúna ekkena esin weires? Ka tongeni etiwa an epwe fitikemi me óm we famili ngeni pwal eú mwichelap.

18. Ifa usun sia tongeni apwénúetá 2 Korint 6:11-13 atun sia etiwa ekkewe ekkóch?

 ¹⁸ Awora fansoun fengen. Achocho le apachaalong pwal ekkóch pwiich kewe lón óm kewe kukkunou, nge ákkáeúin chókkewe eli iir mi meefi pwe ese wor chiener. Sia mochen ‘fokun suki letipach,’ nge ákkáeúin ngeni ekkena sókkun aramas. (Álleani 2 Korint 6:11-13.) Iei alon Melissa ewe mi mak pwóróusan akkomw: “Aua kan fókkun pwapwa atun pwiich kewe ra kan etiwakem lón imwer kewe pwe aupwe kukkunoufengen me chón ar kewe famili, are fitiir le sái.” Mi wor emén lón óm we mwichefel ka tongeni etiwa?

19. Eli ineet a kon álilliséch ngeni chiechiach kewe Chón Kraist ach sipwe chiechi ngeniir?

¹⁹ A wor ekkóch atun eli chienach kewe Chón Kraist repwe fókkun pwapwa ika sia chiechi ngeniir. Eli a weires ngeni ekkóch ar repwe nóm ren aramaser kewe chón lúkún atun ekkewe ráninipin. Eli a áweires ngeni ekkóch atun a tori ekkóch rán, áwewe chék ren ewe rán emén attongeer a máló lón. Atun sia chiechi ngeni pwiich kewe iir mi kúna ekkena esin weires, sia pwári pwe sia ‘wesewesen chüngür.’​—Fil. 2:20.

20. Ifa usun alon Jesus kewe lón Mateus 12:48-50, a tongeni álisikich atun sia meefi tipitipingaw?

²⁰ A wor chómmóng popun án emén Chón Kraist epwe tongeni meefi pwe a chék áláemén fán ekkóch. Nge sisap fókkun ménúki pwe Jiowa a unusen weweiti ekkena sókkun memmeef. A awora ngenikich met mi lamot, nge fán chómmóng ren álillisin chienach kewe Chón Kraist. (Álleani Mateus 12:48-50.) Sia pwári ngeni Jiowa pwe sia kilisou ren ewe mwichefel atun sia féri úkúkún ach tufich le álisi pwiich kewe. Ese lifilifil met sia meefi fán ekkóch, nge sise fókkun áláeménúló pokiten Jiowa a chék nónnóm rech!