1. Met Jiowa a fen féri fán iten emén me emén kich?

JIOWA a fen panato emén me emén kich ngeni I. (Joh. 6:44) Ekieki met weween ena. Atun Jiowa a etittinafichi fite billion aramas wóón ei fénúfan, a kúna pwe ka letipwenechar me ka tongeni tongei. Jiowa a aúcheani ena. (1 Kron. 28:9) Jiowa a sileok, a weweituk, me tongeok. A ifa me ekinamween ena!

2. Ifa usun Jesus a álisikich le weweiti úkúkún án Jiowa tongei emén me emén kich?

² Jiowa a unusen tongeok me a pwal tongei meinisin pwiium kewe Chón Kraist. Ren ach sipwe weweiti ena, Jesus a aléllééi Jiowa ngeni emén chón masen siip. Ika emén me lein ekkewe ipúkú siip a mwálech seni ewe pwiin siip, met ewe chón masen siip epwe féri? Epwe “likiti ekewe tiwe me tiweman won ekewe chuk pwe epwe feila o kütta ewe eman mi mwalechela.” Atun ewe chón mas epwe kúna ewe siip, saminne epwe song, nge epwe fen pwapwa. Met sia káé seni? Jiowa a aúcheani emén me emén néún kewe siip. Jesus a apasa: “Semei lon läng esap mochen pwe eman lein ekei kükün epwe mwalechela.”​—Mat. 18:12-14.

3. Met sipwe káé lón ei lesen?

³ Sise fókkun mochen eletipengawa emén me lein pwiich kewe. Ifa usun sia tongeni túmúnú pwe site áchepeteki ekkewe ekkóch? Me met sia tongeni féri ika emén a ámetekikich? Sipwe pélúweni ekkena kapas eis lón ei lesen. Nge akkomw, sipwe alapaaló ach silei usun “ekei kükün” Mateus sópwun 18 a fós usur.

4. Ié kewe “ekei kükün”?

⁴ “Ekei kükün,” iir néún Jesus kewe chón káé mi sókkopat en me ieriir. Iir meinisin ra usun “semirit” pokiten ra tipemecheres le káé seni Jesus. (Mat. 18:3) Inaamwo ika a sókkopat nónnómur me eérenier, me a sókkofesen ar ekiek me napanaper, nge iir meinisin ra lúkú Kraist. Iwe Kraist a fókkun tongeer.​—Mat. 18:6; Joh. 1:12.

5. Met meefien Jiowa atun emén a áchepeteki are ámeteki emén me lein néún kewe aramas?

⁵ Meinisin “ekei kükün,” iir mi aúchea me ren Jiowa. Ren ach sipwe weweiti meefian, sipwe ekieki meefiach usun ekkewe kúkkún. Iir mi aúchea me rech. Sia mochen túmúnúúr pokiten ese naf ar péchékkúl, sileer, are ar mirit usun chék ekkewe watte. Sise kan sani le kúna án emén eriáfféwú emén, nge sia fen kon song ika emén a eriáfféwú emén semirit. Pwal ina chék usun, Jiowa a mochen túmúnúkich. A letipengaw pwal mwo nge song atun emén a áchepeteki are ámeteki emén me lein néún kewe.​—Ais. 63:9; Mark. 9:42.

6. Me ren 1 Korint 1:26-29, ifa án chón ei fénúfan ekiek usun néún Jesus kewe chón káé?

⁶ Pwal ifa usun néún Jesus kewe chón káé ra chék usun ekkewe “kükün”? Pwe ié kewe chón ei fénúfan ra ekieki pwe ra aúchea? Esap pwe ekkewe mi pisekisek, iteféúló, me wor maner? Nge lape ngeni néún Jesus kewe chón káé rese ina usun, ina popun aramasen ei fénúfan ra ekieki pwe iir, “kükün” pokiten ese wor aúchear me ra tekisosson. (Álleani 1 Korint 1:26-29.) Nge esap ina án Jiowa ekiek usur.

7. Met Jiowa a mochen ach sipwe meefi usun pwiich kewe?

⁷ Jiowa a tongei meinisin néún kewe chón angang, ese lifilifil ika ra fen akkangang ngeni ren fite fite ier, are iir minefélóng lón ewe enlet. Jiowa a aúcheani meinisin pwiich kewe, iwe itá úrúrún sipwe pwal aúcheaniir. Sia mochen “tongei unusen ewe mwicheichen pwipwi,” nge esap chék ekkóch me leir. (1 Pet. 2:17, NW) A lamot ach sipwe tipemecheres le féri úkúkún ach tufich le túmúnúúr me chúngúúr. Ika sia silei pwe sia fen ámeteki are asonga emén, itá úrúrún sisap chék tunaló me ekieki pwe itá ewe emén epwe wisen omusakicheló are fen likitaló. Eli ikkefa popun án ekkóch song? Eli pokiten lón ar mámmááritá, ekkóch ra meefi pwe ese wor aúchear me ren aramas. Ekkóch, iir minefélóng lón ewe enlet, iwe resaamwo káé pwe a lamot ar repwe omusaaló tipisin ekkewe ekkóch atun ra mwáálliló. Ese lifilifil popun sia song are popun án ekkewe ekkóch song, nge a lamot ach sipwe kinamwefengensefál, nge a pwal lamot án ewe mi áchichchin are nisossong epwe mirititi pwe a lamot an esap kon ina usun. Iwe i epwe pwapwa me ririéch ngeni pwiin kewe.

8. Ifa ewe ekiek mi chéú mi etipetipa néún Jesus kewe chón káé?

⁸ Pwata Jesus a fós usun “ekei kükün”? Néún kewe chón káé ra fen eisini: “Iö epwe lap seni meinisin lon Mwün Läng?” (Mat. 18:1) Chómmóng chón Jus ra mochen án ekkóch repwe ekieki pwe iir mi fókkun aúchea. Iei alon emén soukáé: “Ésúfél me iteféúló, ina met a kon aúchea lón manawen aramas.”

9. Met a lamot án néún Jesus kewe chón káé repwe féri?

⁹ Jesus a silei pwe chómmóng chón Jus ra alamota ar repwe múrinné lap seni ekkewe  ekkóch. Ina popun a lamot ngeni néún kewe chón káé ar repwe urusawu ena esin ekiek seni lón letiper. A ereniir: “Ewe mi lap leimi epwe usun chök ewe mi kis, nge ewe eman mi nemenem epwe usun chök eman chon angang.” (Luk. 22:26) Sia usun “ewe mi kis,” atun sise ‘ekieki pwe sia mürina seni ekewe ekoch.’ (Fil. 2:3) Lapólóón ach ámááraatá ena napanap, ina kisilóón ach áchepeteki ekkewe ekkóch.

10. Ifa án Paulus we kapasen fén a lamot ach sipwe apwénúetá?

¹⁰ A nóm ren meinisin pwiich kewe eú napanap ra múrinné senikich wóón. A mecheres ach sipwe kúna ena ika sia nefótófót wóón napanaper kewe mi múrinné. A lamot ach sipwe lechúni án aposel Paulus ei kapasen fén ngeni ekkewe chón Korint: “Iö a seikuketä pwe kopwe lap seni ekewe ekoch? Ifa usun, Kot esap fang ngonuk mettoch meinisin mine ka eäni? Pwota ka aingaing won met mi wor reöm usun itä nge esap minen lifang?” (1 Kor. 4:7) Sise fókkun mochen án aramas repwe eingakichetá are ekieki pwe sia múrinné lap seni ekkewe ekkóch. Áwewe chék, a lamot án ekkewe Chón Kraist mwán mi lipwákéch le eáni afalafal, are ekkewe Chón Kraist fefin mi angéch le poputááni chómmóng chón káé, repwe kan mwareiti Jiowa ren met ra tufichin féri.

11. Ifa ewe lesen sia káé seni án Jesus we kapas áwewe usun ewe king me néún we chón angang?

¹¹ Mwirin án Jesus éúréúra néún kewe chón káé ar resap áchepeteki ekkewe ekkóch, a eáni eú kapas áwewe usun emén king me néún we chón angang. Ena king a omusa án néún we chón angang watteen liwinimmang ese tongeni muse ngeni. Nge mwirin, ena chón angang ese mochen omusa án chienan we chón angang liwinimmang mi fókkun kúkkún seni an we. Iwe ewe king a oturalong ena chón angang mi kichingaw lón imwen kalapus. Ifa ewe lesen? Jesus a erá: “Iei usun mine Semei lon läng epwe föri ngeni eman me eman leimi, are ousap amusala tipisin pwimi seni lon letipemi.”​—Mat. 18:21-35.

12. Ifa usun ach sise mochen omusaaló tipis a tongeni áweiresi ekkewe ekkóch?

¹² Minne ewe chón angang a féri, ese chék áweiresi pwisin i, nge a pwal áweiresi ekkewe ekkóch. Áeúin, a kirikiringaw ngeni chienan we chón angang ren an “aturalong lon imwen fötek tori an epwe awesi an we liwinimang.” Oruuan, a áweiresi chienan kewe ekkóch chón angang iir mi kúna minne a féri. “Lupwen chiechian kewe chon angang ra küna met a fis, ra fokun weires ren.” Pwal ina chék usun, minne sia féri a tongeni áweiresi ekkewe ekkóch. Met a tongeni fis ika sise mochen omusaaló emén mi féfféringaw ngenikich? Áeúin, sia eletipengawa ika sise mochen omusaaló tipisin, ika éménúngaw seni, me sise pwári pwe sia tongei. Oruuan, sia áweiresi ekkóch lón ewe mwichefel atun ra esilla pwe sise kinamwefengen me eménna.

13. Met ka káé seni pwóróusen emén pioneer?

¹³ Atun sia omusaaló tipisin pwiich kewe, sia meefi kinamwe me ekkewe ekkóch ra pwal kinamwe. Ina met a fis ngeni emén pioneer sipwe kér ngeni Crystal. A letipengaw ren emén Chón Kraist fefin lón ewe mwichefel. Iei met Crystal a erá: “Fán ekkóch a fókkun péchékkúl an kapas, usun itá nge efóch saar a pwereniei. Use pwal mwo nge mochen fiti lón ewe angangen afalafal. Ua poputá le tinikkopuló me ese chúen wor ai pwapwa.” Crystal a meefi pwe a wor popun an epwe song, nge ese mochen akkamwéchú an song  ren ena Chón Kraist fefin are nefótófót wóón pwisin i me an kewe memmeef. Nge a tipetekison le apwénúetá án Paipel kapasen emmwen lón ei lesen itelapan “Omusalo Tipis Seni Lon Letipom” lón Ewe Leenien Mas minen March 1, 2000. A omusaaló tipisin pwiin na. Crystal a erá: “Iei ua weweiti pwe kich meinisin sia achocho le siwil, me Jiowa a chék mmólnetá le omusakicheló iteiten rán. Ua meefi kinamwe me pwapwasefál.”

14. Me ren Mateus 18:21, 22, eli ifa án aposel Petrus osukosuk, me met sia káé seni minne Jesus a pélúwen ngeni?

¹⁴ Sia silei pwe a lamot ach sipwe omusaaló tipis pwe ina met mi pwúng ach sipwe féri. Nge a tongeni weires ach sipwe féri ena. Fán ekkóch, eli aposel Petrus a pwal meefi ena. (Álleani Mateus 18:21, 22.) Met a tongeni álisikich? Áeúin, kopwe ekilonei ifa usun Jiowa a fen omusakoló. (Mat. 18:32, 33) Ese fich ngenikich án Jiowa omusaaló tipisich, nge a chék kirekiréch ngenikich. (Kölf. 103:8-10) Iwe itá úrúrún, “sipwe pwal echenifengenikich lefilach.” Ina popun, ese wor ach kefil, ika sipwe omusaaló tipis are sisap, nge fen ina wisach ngeni pwiich kewe ach sipwe omusaaló tipisiir. (1 Joh. 4:11) Oruuan, sipwe ekieki met mwirilóón ach omusaaló tipis. Sia tongeni álisi ewe emén mi tipis ngenikich, álisatá tipeeúin ewe mwichefel, túmúnú ach ririéch ngeni Jiowa, me a ekinamwekich. (2 Kor. 2:7; Kol. 3:14) Sáingolóón, iótek ngeni ewe Emén mi allúkú ngenikich ach sipwe omusaaló tipis. Kosap mut ngeni Satan an epwe atai ámi ririéch me chienom kewe Chón Kraist. (Ef. 4:26, 27) A lamot ngenikich án Jiowa álillis an epwe wor kinamwe lón ewe mwichefel.

15. Met Kolose 3:13 a apasa pwe a lamot kopwe féri ika féfférún emén chienom Chón Kraist a aosukosukok?

¹⁵ Nge ifa usun ika féfférún emén chienom Chón Kraist a fókkun aosukosukok? Met  kopwe féri? Achocho úkúkún óm tufich le efisi kinamwe. Seppiti Jiowa lón iótek. Tingorei an epwe álisi ewe emén mi asongok me álisuk le kúna napanapan kewe mi múrinné a tongei ren. (Luk. 6:28) Ika kese tongeni ménúkaaló minne pwiium we a féri, ekieki ika ifa usun kopwe fós ngeni. A éch ika ka kan ekieki pwe esap turun tipan an epwe eletipengawók. (Mat. 5:23, 24; 1 Kor. 13:7) Lupwen ka fós ngeni, ekieki pwe saminne a mochen ámetekuk. Nge ifa usun ika ese mochen awora kinamwe? “Oupwe songomangfengen.” Sópweló chék le kinamwe ngeni pwiium we. (Álleani Kolose 3:13.) Nge lap seni meinisin, kosap amwéchú óm song ren, pún a tongeni atai óm ririéch ngeni Jiowa. Kosap fókkun mut ngeni och mettóch an epwe áchepetekuk. Ika ka féri ena, ka ánnetatá pwe ka tongei Jiowa lap seni meinisin.​—Kölf. 119:165.

16. Ifa wisen emén me emén kich?

¹⁶ Sia aúcheani wisach le angang ngeni Jiowa fán tipeeú usun “eu chök mwichen sip me eman chon mas.” (Joh. 10:16) Iei alon ewe puk Organized to Do Jehovah’s Will, pekin taropwe 165: “A lamot óm kopwe féri wisom le álisatá ewe tipeeú pokiten ka kúna álillis seni ena tipeeú. . . . Achocho le eáni án Jiowa ekiek usun pwiich kewe.” Me ren Jiowa, kich meinisin “ekei kükün,” mi aúchea. A pwal ina usun óm ekiek usun pwiium kewe Chón Kraist? Jiowa a kúna me aúcheani mettóch meinisin ka féri le álisiir me chúngúúr.—Mat. 10:42.

17. Met sipwe tipeppós le féri?

¹⁷ Sia tongei pwiich kewe Chón Kraist, ina popun ‘sisap föri och met pwich epwe chepetek ren ika turutiu lon tipis.’ (Rom 14:13) Sisap ekieki pwe sia múrinné lap seni pwiich kewe, me sia mochen omusereló seni enletin letipach. Amwo sisap mut ngeni pwisinkich ach sipwe chepetek ren ekkewe ekkóch. Nge sipwe fen “fokun achocho ngeni mine epwe afisätä kinamwe o alilisfengen le apöchökülafengenikich lefilach.”​—Rom 14:19.