1. (a) Ifa ewe ápilúkúlúk Jiowa a fang ngenikich? (b) Met weween ach “apilükülükü” Jiowa? (Ppii ewe “Áweween Kapas.”)

 JIOWA a fen fang ngeni meinisin chókkewe mi tongei i eú ápilúkúlúk mi amwarar. Ekiseló chék epwe aúkatiw samau, riáfféú, me máló. (Pwär. 21:3, 4) Epwe álisi ekkewe mi “tipetekison,” iir kewe mi ápilúkúlúkú an epwe ewilaaló ei fénúfan ngeni eú paratis. (Kölf. 37:9-11) Me epwe atufichi án emén me emén kich sipwe eáni eú riri ngeni i mi fókkun múrinné seni ach riri ngeni lón ei fansoun. A ifa me amwararen ena ápilúkúlúk! Nge pwata sia lúkú pwe Jiowa epwe apwénúetá an kewe pwon? Pún fansoun meinisin a kan apwénúetá met a erá pwe epwe féri. Ina minne a wor popun mi pwúng ach sipwe “apilükülükü” i. * (Kölf. 27:14) Sia pwári ena ren ach pwapwa me mosonottam le witiwiti án Kot epwe apwénúetá an kewe pwon.​—Ais. 55:10, 11.

2. Met Jiowa a fen féfféri?

² Jiowa a fen pwári pwe a kan akkapwénúetá an kewe pwon. Áwewe chék ren met ei a mak lón ewe puken Pwärätä. Jiowa a pwonei pwe lón ach keei fansoun, epwe ionifengeni aramas seni mwú, einang, me sókkun kapas meinisin pwe repwe angang ngeni fán tipeeú. Lón ei fansoun, ena mwichen aramas mi kkóló aúchean ra iteni “mwich mi fokun chocho.” (Pwär. 7:9, 10) Inaamwo ika chón lón ena kúmi iir  mwán, fefin, me semirit seni sókkopaten fénú, nge iir eú famili mi kinamwefengen. (Kölf. 133:1; Joh. 10:16) Chón ena mwich mi fókkun chóchó, pwal iir chón afalafal mi fókkun tinikken. Ra chék mómmólnetá le fós usun ar we ápilúkúlúk fán iten eú fénúfan mi múrinné ngeni chókkewe mi mochen aúseling. (Mat. 28:19, 20; Pwär. 14:6, 7; 22:17) Ika en emén me lein chón ena mwich mi fókkun chóchó, iwe ese mwáál ka fókkun aúcheani ewe ápilúkúlúk usun ekkewe mettóch mi múrinné repwele fis.

3. Met Satan a achocho le féri?

³ Ewe Tefil ese mochen óm kopwe eáni eú ápilúkúlúk fán iten mwachkkan. A mochen óm kopwe lúkú pwe Jiowa ese tongeok me esap apwénúetá an kewe pwon. Ika Satan a tongeni atai ach ápilúkúlúk, iwe sisap chúen pwora me eli sipwe pwal mwo nge úkútiw le angang ngeni Jiowa. Iei sipwele káé usun án ewe Tefil achocho le atai án Hiop ápilúkúlúk me aúkatiw lón an angang ngeni Jiowa.

4. Met sipwele káé lón ei lesen? (Hiop 1:9-12)

⁴ Sipwele káé lón ei lesen ifa usun Satan a achocho le eriáni Hiop an epwe úkútiw lón an tuppwél ngeni Jiowa. (Álleani Hiop 1:9-12.) Sipwe pwal ppii met sia tongeni káé seni Hiop me pwata a lamot ach sipwe chemeni pwe Kot a tongekich me epwe apwénúetá an kewe pwon.

5-6. Ikkefa ekkewe mettóch mi weiweitá ra fis ngeni Hiop?

⁵ Hiop a fókkun nónnóméch. I a fókkun ririéch ngeni Jiowa. A watte an we famili me ra pwapwa, ra pwal fókkun wéúéch. (Hiop 1:1-5) Nge lón chék eú rán, lape ngeni meinisin met mi nóm ren Hiop, a móróseni. Akkomw, néún kewe man ra máló. (Hiop 1:13-17) Mwirin, meinisin néún kewe ra pwal máló. Anchangei mwo úkúkún eriáfféún ena. Sam me in ra fókkun chúúpwúl atun emén me lein néúr kewe a máló. Iwe anchangei úkúkún rúkéén, letipetaan, me chúúpwúlún Hiop me pwúlúwan we atun ra silei pwe meinisin néúr kewe engol ra máló. Esap pwata iwe Hiop a kamwei úfan fán letipeta me chapoló leppwúl!​—Hiop 1:18-20.

⁶ Mwirin, Satan a ásemmweni Hiop ren eú semmwen mi fókkun ámmetek me ássáw. (Hiop 2:6-8; 7:5) Me mwen ena, aramas lón leenian we ra fókkun ésúfélú. Ra kan etto ren me angei éúréúrer seni. (Hiop 31:18) Nge iei rese chúen mochen etto ren. Pwiin kewe, chiechian kewe, me pwal mwo nge pwisin néún kewe chón angang, ra oputa!​—Hiop 19:13, 14, 16.

7. (a) Met Hiop a lúkú pwe ina ewe popun an kewe riáfféú, nge met ese féri? (b) Eli ifa usun emén Chón Kraist epwe kúna eú sóssót mi léllé ngeni met sia kúna me lón ei sasing?

⁷ Satan a mochen án Hiop epwe lúkú pwe an kúna riáfféú a fis pokiten Jiowa a song ren. Áwewe chék, Satan a áeá eú watteen mélúmél le atai ewe imw meinisin néún Hiop kewe engol ra kametip ie. (Hiop 1:18, 19) A pwal efisi eú ekkei seni láng mi nieló néún kewe man me néún kewe chón angang mi wisen maser. (Hiop 1:16) Pokiten ena mélúmél me ena ekkei ra feitiw seni láng, iwe Hiop a ekieki pwe efisien Jiowa. Ina popun Hiop a lúkú pwe eli a asonga Jiowa. Ikaamwo ina, nge ese amam Seman na lón láng. Hiop a silei pwe Jiowa a fen efeiéchú lón chómmóng mettóch mi múrinné lón ekkewe ier. Ina popun a ekieki pwe ika a etiwa ekkena mettóch mi múrinné, iwe epwe pwal chék etiwa met ese múrinné. Iwe a erá: “Üpwe  mwareiti ewe Samol mi Lapalap.” (Hiop 1:20, 21; 2:10) Inaamwo ika ese chúen wor néún Hiop moni, néún kewe ra máló, me a úri eú semmwen mi áweires, nge a chúen tuttuppwél ngeni Jiowa. Nge Satan ese úkútiw le sótuni.

8. Met Satan a pwal áeá le sótuni Hiop?

⁸ Satan a pwal néúnéú úlúmén mwán mi tipin chiechi ngeni Hiop pwe repwe ámmeef ngeni pwe ese wor aúchean. Ekkena mwán ra erá pwe Hiop a riáfféú pokiten a féri chómmóng mettóch mi ngaw. (Hiop 22:5-9) Ra pwal achocho le efisi an epwe lúkú pwe ese lifilifil úkúkún chómmóngun met mi múrinné a féri, nge Kot ese aúcheani an achocho. (Hiop 4:18; 22:2, 3; 25:4) Ra sótun efisi án Hiop epwe ekieki pwe Kot ese tongei, esap túmúnú, me ese wor aúchean an angang ngeni. Alór kana a tongeni efisi án Hiop epwe meefi ápilúkúlúkúngaw.

9. Met a apworai me apéchékkúla Hiop?

⁹ Anchangei met a fis. Hiop a mómmóót lón falangen ekkei fán watteen an metek. (Hiop 2:8) Chienan kewe ra epin ngeni pwe esap i emén aramas mi múrinné me ese fókkun wor met mi aúchea a féri. A fen chúúpwúl ren málóón néún kewe, nge a fen pwal choutiw ren ekkena ekkóch weires. Me akkomwan, a chék fanafaneló. (Hiop 2:13–3:1) Ika chienan kana ra ekieki pwe an fanafaneló ina esissillen pwe epwele likitaló Jiowa, iwe a fókkun mwáál ar ekiek. Nge mwirin, eli a chimwetá, newenewen ngeniir, me ereniir: “Tori ai máló, usap fangetá ai tuppwél!” (Hiop 27:5, NW) Met a apworai me apéchékkúla Hiop inaamwo ika a nóm lón watteen riáfféú? Ese fókkun úkútiw lón an ápilúkúlúk pwe an we Kot mi tong epwe álisi inaamwo ika a nóm lón watteen weires. A silei pwe inaamwo ika epwe  máló, nge Jiowa epwe amanawatá.​—Hiop 14:13-15.

10. Met sia káé seni pwóróusen Hiop?

¹⁰ Pwóróusen Hiop a áiti ngenikich pwe Satan ese tongeni eriánikich le likitaló Jiowa, me Jiowa a silei mettóch meinisin mi fis ngenikich. Pwóróusen Hiop a pwal tongeni álisikich le weweéchúti met ewe mi aúchea mi kapachelong lón minne a fis. Sipwele pwóróusfengen wóón ekkóch lesen sia tongeni káé seni Hiop.

11. Met sia tongeni lúkúlúkú ika sia sópweló le lúkúlúk wóón Jiowa? (James 4:7)

¹¹ Hiop a pwári pwe ika sia sópweló le lúkúlúk wóón Jiowa, sia tongeni likiitú fán ese lifilifil sóssót me sópwéch lón ach ú ngeni Satan. Iwe, met epwe fis? Ewe Paipel a alúkúlúkú ngenikich pwe ewe Tefil epwe sú senikich.​—Álleani James 4:7.

12. Ifa usun ewe ápilúkúlúkún manawsefál a apéchékkúla Hiop?

¹² A lamot an epwe péchékkúl ach lúkú ewe ápilúkúlúkún manawsefál. Sia fen káé lón ewe lesen mwen ei pwe fán chómmóng, Satan a áeá niwokkusiti máló pwe epwe aúkúkichetiw lón ach tuppwél ngeni Jiowa. Satan a erá pwe Hiop epwe tongeni féri ese lifilifil met, pwal mwo nge úkútiw le angang ngeni Jiowa ren an epwe seláni manawan. A mwáál minne Satan a erá. Pwal mwo nge atun Hiop a ekieki pwe epwele máló, a chék akkamwéchú an tuppwél ngeni Jiowa. An lúkúlúkú múrinnéén Jiowa me péchékkúlen an ápilúkúlúk pwe eú rán Jiowa epwe áwena minne mi mwáál, ina met a elikiitúúi. Hiop a lúkú pwe ikaamwo Jiowa ese áwena minne mi mwáál atun a chúen manaw, nge epwe amanawatá lón mwachkkan. I a wesewesen lúkú ewe ápilúkúlúkún manawsefál. Ika sia pwal wesewesen lúkú ena ápilúkúlúk, iwe pwal mwo nge ach niwokkusiti máló esap atai ach tuppwél.

13. Pwata a lamot ach sipwe sileéchú met ekkewe Satan a áeá le sótuni Hiop?

¹³ A lamot ach sipwe sileéchú met ekkewe Satan a áeá le sótuni Hiop pwe ikkena esin met a pwal áeá ngenikich lón ei fansoun. Iei met Satan a erá: “Eman aramas [esap chék Hiop] epwe fangala meinisin mine a eäni fän iten manauan.” (Hiop 2:4, 5) Usun itá Satan a erá pwe sise enletin tongei Jiowa Kot me sipwe kul seni, ika pwe sia ekieki pwe ina met epwe seláni manawach. Satan a pwal erá pwe Kot ese tongekich me ese áfánni ach achocho le apwapwaai I. Pokiten sia silei met Satan a achocho le féri, iwe sise mochen lúkú an kana minen otuputup.

14. Met ach kewe sóssót ra tongeni pwári usun kich? Apwóróusa eú pwóróus.

¹⁴ A lamot ach sipwe ekieki pwe ekkewe sóssót mi torikich, ina eú alen ach sipwe silefichi pwisinkich. Ekkewe sóssót Hiop a kúna, a álisi le esilla ekkóch an kewe apwangapwang me áwener. Áwewe chék, a kúna pwe a lamot an epwe alapaaló an tipetekison. (Hiop 42:3) Sia pwal tongeni silei chómmóng mettóch usun pwisinkich atun sia kúna sóssót. Emén Chón Kraist mwán itan Nikolay * mi kalapus inaamwo ika a fókkun watte an semmwen, a apasa: “Ai fansoun lón kalapus a álisiei le esilla ekkewe napanap a lamot ai upwe émúrinnéreló.” Atun sia esilla ach kewe apwangapwang, sia tongeni angang wóór le émúrinnéreló.

15. Ié a lamot ach sipwe aúseling ngeni, me pwata?

¹⁵ A lamot ach sipwe aúseling ngeni Jiowa,  nge esap chón oputach kewe. Hiop a aúselingéch ngeni Jiowa atun a fós ngeni. Usun itá iei met Kot a ereni Hiop: ‘Ka kúna fériei kewe mi amwarar? Ua silei mettóch meinisin mi fis ngonuk. Óm ekiek nge use tongeni túmúnuk?’ Iei met Hiop a erá fán tipetekison fiti watteen an kilisou ren múrinnéén Jiowa: “Me mwan üa rong usum ren selingei, nge iei üa nenengenuk ren mesei.” (Hiop 42:5) Atun Hiop a apasa ena, ese mwáál a chúen mómmóót lón falangen ekkei, kuuló inisin ren kilingaw, me a chúen chúúpwúl ren málóón néún kewe. Ikaamwo ina, nge Jiowa a alúkúlúkú ngeni pwe a tongei me pwapwa ren.​—Hiop 42:7, 8.

16. Me ren Aisea 49:15, 16, met a lamot ach sipwe chemeni atun sia kúna sóssót?

¹⁶ Lón ei fansoun, eli aramas ra pwal turunufasekich me féfféringaw ngenikich pwe usun nge ese wor aúcheach. Neman ra achocho le atai itéchúch are itéchún án Jiowa we mwicheich me “apasa sokopaten kapas chofona mi ngau” fán itach. (Mat. 5:11) Sia káé seni pwóróusen Hiop pwe Jiowa a lúkú pwe sipwe tuppwél ngeni atun sia kúna sóssót. Jiowa a tongekich me esap fókkun likitaló chókkewe mi ápilúkúlúkú i. (Álleani Aisea 49:15, 16.) Kosap fókkun rongorong ngeni án ekkewe chón oputa Kot kapasen pweni! Emén Chón Kraist mwán seni Turkey, itan James, iir me an we famili ra kúna watteen sóssót, a erá: “Aua esilla pwe ám aúseling ngeni ekkewe kapas chofona mi iti ngeni néún Kot kewe aramas, a elichippúngúkem. Ina minne, aua nefótófót wóón ám ápilúkúlúkú ewe Mwúún Kot me achocho  lón ám angang ngeni Jiowa. Ina met a álisikem le chék pwappwapwa.” Sipwe aúseling ngeni Jiowa usun chék Hiop! Án ekkewe chón oputakich kapas chofona esap tongeni atai ach ápilúkúlúk.

17. Met ka káé seni pwóróusen ekkewe mwán me fefin mi tuppwél mi mak lón Ipru sópwun 11?

¹⁷ Hiop, i emén me lein néún Jiowa kewe chón angang iir mi pwora me likiitú fán watteen sóssót. Lón néún aposel Paulus we taropwe ngeni ekkewe chón Ipru, a kér ngeni chómmóng me lein chókkana “eu watten mwichen chon pwärätä.” (Ipru 12:1) Iir meinisin ra kúna watteen sóssót, nge lón ánein manawer ra chék tuttuppwél ngeni Jiowa. (Ipru 11:36-40) Itá a solap ar likiitú me angang weires? Ese fókkun solap! Ra chék sópweló ar ápilúkúlúk wóón Jiowa inaamwo ika rese fókkun kúna pwénútáán meinisin án Kot kewe pwon atun ra manaw. Me pokiten ra lúkú pwe Jiowa a pwapwa rer, iwe ra lúkúlúk pwe repwe kúna pwénútáán an kewe pwon. (Ipru 11:4, 5, Testament mi Fö) Pwóróuseer a tongeni apéchékkúlakich ach sipwe sópweló le ápilúkúlúkú Jiowa.

18. Met kopwe tipeppós le féri? (Ipru 11:6)

¹⁸ Lón ei fansoun, sia manaw lón ei ótót mi chék lallapóló ngawan. (2 Tim. 3:13) Ese mwo wes án Satan sótuni néún Kot kewe aramas. Iwe, inaamwo ika epwe wor sóssót epwe torikich, nge amwo sipwe tipeppós le angang ngeni Jiowa me lúkú pwe “sia anomu ach apilükülük won ewe Kot mi manau.” (1 Tim. 4:10) Chemeni pwe minne Kot a féri ngeni Hiop, a ánneta pwe I a “uren kirikiröch me tong.” (Jas. 5:11) Amwo sipwe pwal akkamwéchú ach tuppwél ngeni Jiowa, me lúkú pwe i epwe “ngeni chokewe mi kütta i liwiniir.”​—Álleani Ipru 11:6.