1. Ifa án Jiowa kapasen alúkúlúk ngeni chókkewe mi enletin aier?

 INAAMWO IKA Jiowa i Chón Férikichetá, néúch Souallúk, me néúch Soukapwúng, nge i pwal Semach mi tong lón láng. (Kölf. 100:3; Ais. 33:22) Atun sia tipis ngeni Jiowa me sia enletin aier, i ese chék tufichin omusaaló tipisich, nge a pwal fókkun mochen omusaaló tipisich. (Kölf. 86:5) Jiowa a alúkúlúkúkich ren alon ewe soufós Aisea ei: “Ngang üpwe limetikemi pwe oupwe limöch usun pwechepwechen sno.”​—Ais. 1:18.

2. Met a lamot ach sipwe féri ika sia mochen kinamwefengen me ekkewe ekkóch?

² Pokiten sise unuséch, oukich meinisin sia kan féri are apasa met mi asonga ekkewe ekkóch. (Jas. 3:2) Nge esap weween pwe sise chúen tongeni chiechiéch ngeni pwiich kewe. Kich mi tongeni, ika sia káé le omusaaló tipis. (SalF. 17:9; 19:11; Mat. 18:21, 22) Atun emén a eletipengawakich lón an kapas are féffér, Jiowa a mochen ach sipwe omusaaló tipisin. (Kol. 3:13) A wor popun mi pwúng ach sipwe féri ena. Ren enletin, Jiowa a tipemecheres me “a müttir le amusala tipis.”​—Ais. 55:7.

3. Met sipwele káé lón ei lesen?

³ Lón ei lesen, sipwele káé ifa usun aramas ra tongeni áppirú án Jiowa omusaaló tipis. Ikkefa ekkewe sókkun tipis a  lamot ach sipwe esile ngeni ekkewe mwán mi ásimaw? Pwata Jiowa a pesekich ach sipwe omusaaló tipisin ekkewe ekkóch? Me, met sia tongeni káé seni ekkóch chienach Chón Kraist mi kúna watteen riáfféú pokiten tipisin ekkewe ekkóch?

4. (a) Met a lamot emén néún Jiowa chón angang epwe féri atun a féri eú tipis mi chou? (b) Ifa wisen ekkewe mwán mi ásimaw atun ra chufengen me ewe mi féri tipis?

⁴ A lamot ach sipwe esile ngeni ekkewe mwán mi ásimaw ika emén a féri eú tipis mi chou. Ekkena sókkun tipis ra mak lón 1 Korint 6:9, 10. Ekkewe tipis mi chou ra fókkun ngaw me ú ngeni án Kot allúk. Ika emén Chón Kraist a féri ena esin tipis, iwe a lamot an epwe iótek ngeni Jiowa Kot me fós ngeni ekkewe mwán mi ásimaw lón an we mwichefel. (Kölf. 32:5; Jas. 5:14) Ifa wisen ekkewe mwán mi ásimaw? Jiowa chék a tufichin unusen omusaaló tipis me ren ewe méén kepich. * Iwe nge, Jiowa a ewisa ngeni ekkewe mwán mi ásimaw ar repwe wisen etittina me ren álillisin ewe Paipel ika emén mi féri tipis a tongeni nónnóm lón ewe mwichefel. (1 Kor. 5:12) Ren ar repwe féri ena, ra achocho le kútta pélúwen ekkeei kapas eis: Itá turun tipen ewe emén an epwe féri ei tipis? A sótun aopa tipisin seni ekkewe ekkóch? A kan féfféri ei tipis ren fansoun langattam? Nge iei met a kon aúchea seni meinisin, itá a wor met mi ánneta pwe a enletin aier? A wor pisekin ánnet pwe Jiowa a omusaaló tipisin?​—Föf. 3:19.

5. Met sókkun feiéch a pop seni án ekkewe mwán mi ásimaw angang?

⁵ Atun ekkewe mwán mi ásimaw me emén mi féri eú tipis mi chou ra chufengen, ra achocho le etipeeúfengeni ar kefil me met a fen kapwúngúló me láng. (Mat. 18:18) Ifa usun ena kókkót a álisi chón ewe mwichefel? A túmúnú chón ewe mwichefel pwe ewe mi tipis ese mochen aier esap nónnóm leir me angawaló néún Jiowa kana chón angang mi aúchea. (1 Kor. 5:6, 7, 11-13; Tit. 3:10, 11) A pwal tongeni álisi ewe mi tipis an epwe aier me kúna feiéch seni án Jiowa omusaaló tipisin. (Luk. 5:32) Ekkewe mwán mi ásimaw ra ióteki emén mi aier me tingorei Jiowa an epwe álisi le apéchékkúlasefáli an riri ngeni.​—Jas. 5:15.

6. Ika emén a katowu, mi tufich án Jiowa epwe omusaaló tipisin? Áweweei.

⁶ Ifa usun ika emén ese mochen aier atun ekkewe mwán mi ásimaw ra chuuri? Ika ina, epwe katowu seni ewe mwichefel. Ika a atai allúkún eú mwú, ekkewe mwán mi ásimaw resap eppeti seni an epwe angei chappen an tipis. Jiowa a mut ngeni allúkún mwú ar repwe apwúngú ese lifilifil ié mi atai allúk, inaamwo ika a aier are ese aier. (Rom 13:4) Nge ika mwirin och fansoun, eménna a mirititi pwe minne a féri a fókkun ngaw me a siwililó an ekiek me féffér, iwe Jiowa a mochen omusaaló tipisin. (Luk. 15:17-24) A pwal tongeni omusaaló tipisin inaamwo ika a fókkun chou.​—2 Kron. 33:9, 12, 13; 1 Tim. 1:15.

7. Ifa usun sia tongeni omusaaló tipisin emén mi tipis ngenikich?

⁷ A ifa me ngaselóóch ren ach silei pwe esap wisach ach sipwe filatá ika Jiowa epwe omusaaló tipisin emén are esap! Iwe nge, a chúen wor met sipwe filatá. Met ena? Lón ekkóch atun, eli emén epwe tipis ngenikich, nge mwirin epwe omusomus me mochen ach sipwe omusaaló tipisin. Lón pwal ekkóch atun, eli esap mochen. Ikaamwo ina, nge sia tongeni filatá le omusaaló tipisin  me sipwe achocho ach sisap song ren. Ren enletin, a tongeni weires, me eli a lamot fansoun me ach sipwe achocho le féri minne mi pwúng, ákkáeúin ika a fókkun ekinása letipach. Iei alon The Watchtower minen September 15, 1994: “Atun ka omusaaló tipisin emén, esap weween pwe ka tipeeú ngeni an tipis. Emén Chón Kraist mi omusaaló tipisin emén, a lúkú ngeni Jiowa ewe osukosuk. I ewe Soukapwúng mi lapalap me a unusen pwúng, me epwe apwúngaló an kapwúng lón ewe fansoun mi fich.” Pwata Jiowa a pesengenikich ach sipwe omusaaló tipis me likit ngeni an epwe wisen eáni apwúng fán pwúng?

8. Ifa usun ach omusaaló tipisin ekkewe ekkóch a pwári pwe sia aúcheani án Jiowa úméúméch?

⁸ Atun sia omusaaló tipisin ekkewe ekkóch, sia pwári pwe sia aúcheani án Jiowa úméúméch. Lón eú án Jesus kapas áwewe, a aléllééi Jiowa ngeni emén masta mi ereni néún we chón angang an esap chúen omusa an we watteen liwinimmang ese tongeni pwisin omusa. Nge, ena chón angang ese úméúméch ngeni chienan we chón angang mi pwal liwinimmang ngeni, nge ese kon watte an we liwinimmang usun watteen an we. (Mat. 18:23-35) Met Jesus a mochen ach sipwe káé seni ena? Ika sia enletin aúcheani án Jiowa úméúméch mi fókkun lapalap fán itach, itá sipwe pwal omusaaló tipisin ekkewe ekkóch. (Kölf. 103:9) Iei alon The Watchtower fite ier a ló: “Inaamwo ika sia fen omusaaló tipisin ekkewe ekkóch fán chómmóng, nge ese fókkun tongeni akkarap ngeni úkúkún án Jiowa omusaaló tipisich me an pwári úméúméch ren án Kraist we asor.”

9. Ié kewe Jiowa a pwári úméúméch ngeniir? (Mateus 6:14, 15)

⁹ Ika sia omusaaló tipisin ekkewe ekkóch, Jiowa epwe pwal omusaaló tipisich. Jiowa a úméúméch ngeni chókkewe mi úméúméch ngeni aramas. (Mat. 5:7; Jas. 2:13) Jesus a affata ena atun a áiti ngeni néún kewe chón káé ifa usun repwe iótek. (Álleani Mateus 6:14, 15.) Minne Jiowa a ereni néún we chón angang Hiop, a áiti ngenikich eú lesen mi léllé ngeni ena. A kinás letipen ena mwán mi tuppwél ren met Elifas, Piltat, me Sofar ra ereni. Jiowa a ereni Hiop an epwe ióteki ekkena mwán. Mwirin án Hiop féri ena, Jiowa a efeiéchú.​—Hiop 42:8-10.

10. Pwata a mmen efeiengaw ach amwéchú ach song? (Efisos 4:31, 32)

¹⁰ Sia eriáfféwú pwisinkich ika sia amwéchú ach song ren emén. Ach akkamwéchú ach song ren emén, a achowukichetiw, me Jiowa a mochen ach sipwe meefi ewe kinamwe mi pop seni ach likitaló ach song. (Álleani Efisos 4:31, 32.) A pesengenikich ach sipwe “ükütiu seni song o likitala lingeringer.” (Kölf. 37:8) Ena kapasen emmwen epwe álilliséch ngenikich ika sia apwénúetá. Ach amwéchú ach song, a tongeni angealó péchékkúlen inisich me angawaló ekiekich. (SalF. 14:30) Ach amwéchú ach song, a usun ach ún poison. Iwe, atun sia amwéchú ach song, sia efeiengawa pwisinkich. Nge atun sia omusaaló tipisin ekkewe ekkóch, sia pwisin atoto ngenikich feiéch. (SalF. 11:17) Epwe kinamwe ekiekich me letipach, me sipwe tongeni sópwósópwóló lón ach angang ngeni Jiowa.

11. Met Paipel a apasa usun án emén eliwini ngeni emén liwinin an tipis ngeni? (Rom 12:19-21)

¹¹ Jiowa chék ewe chón liwini ngeni emén liwinin an féffér. Jiowa ese mut ngenikich  ach sipwe eliwini ngeni emén liwinin an tipis ngenikich. (Álleani Rom 12:19-21.) Pokiten a aúkúk sileach me sise unuséch, iwe sise usun Kot, sise tufichin eáni apwúng fán pwúng. (Ipru 4:13) Me fán ekkóch, minne sia meefi a tongeni emmweningawakich me áweiresikich le féri minne mi pwúng. Fán án Jiowa emmwen, iei met James a apasa: “Än aramas song esap apwönüetä ewe pwüng Kot a mochen.” (Jas. 1:20) Sia fókkun lúkúlúk pwe ekiseló chék Jiowa epwe féri minne mi pwúng me epwe féri an kapwúng fán pwúng.

12. Ifa usun sia tongeni pwári ach lúkúlúk wóón án Jiowa féfférún pwúng?

¹² Ach omusaaló tipisin ekkewe ekkóch a pwári pwe sia lúkúlúk wóón án Jiowa féfférún pwúng. Atun sia lúkú ngeni Jiowa an epwe wisen apwúngú och mettóch fán wenechar, sia pwári ach lúkúlúk pwe epwe amóeló minne mi ngaw meinisin mi popu seni tipis. Lón an we ótót séfé sisap chúen fókkun “chechemeni ekewe mettochun lom o ekieki usun” ekkewe mettóch mi ngaw mi fis lón manawach. (Ais. 65:17) Nge atun sia fókkun song ren emén, itá epwe tufich ach sipwe likitaló ach song me ewe metek sia meefi lón letipach? Sipwe ppii ifa usun ekkóch ra tufichin féri ena.

13-14. Met ka káé usun omusaaló tipis seni pwóróusen Tony me José?

¹³ Chómmóng pwiich kewe ra filatá le omusaaló tipisin chókkewe mi wesewesen ámeteki letiper. Met sókkun feiéch a toriir pokiten ar féri ena?

¹⁴ Fite fite ier me mwen án emén mwán itan Tony * seni Philippines wiliti emén Chón Pwáraatá Jiowa, a silei pwe emén mwán itan José a nieló emén me lein pwiin kewe watte. Lón ena atun, Tony, i emén mi akkachofesá me nisossong, me a mochen liwini ngeni José minne a féri. José a ares me kalapus. Ló, ló, ló, atun a musowu, Tony a pwonei pwe epwe chék kútta me nieló. A pwal mwo nge mééni efóch néún pistor. Nge Tony a poputá le káé Paipel ren Chón Pwáraatá Jiowa. A erá, “Atun ua kákkáé, ua silei pwe a lamot ai upwe siwili féfférúi, kapachelong ai upwe  likitaló ai song.” Ló, ló, ló, Tony a papatais, nge mwirin och fansoun a wiliti emén mwán mi ásimaw. Anchangei úkúkún pwapwaan Tony atun a silei pwe José a pwal wiliti emén néún Jiowa chón angang mi papatais! Atun ra chufengen, ra turufengen fán tong, me Tony a ereni José pwe a fen omusaaló tipisin. Tony a erá pwe an omusaaló tipisin, a atoto an watteen pwapwa me ese tongeni áweweei ena esin memmeef a meefi. Ewer, Jiowa a efeiéchú án Tony tipemecheres le omusaaló tipisin José.

15-16. Met ka káé usun omusaaló tipis seni pwóróusen Peter me Sue?

¹⁵ Lón 1985, Peter me Sue ra fiti eú mwich lón eú Leenien Mwich nge a púng eféú pakutang. Emén mwán a sooni ena pakutang lón ena Leenien Mwich! A watte feiengawen Sue, me tori iei a weires an epwe kúna mwan me rong fós, me ese pwal chúen tongeni fáreni mettóch. * Fán chómmóng, Peter me Sue ra kan ekieki, ‘Met sókkun aramas epwe féri ei sókkun mettóch mi ekirikiringaw?’ Mwirin fite ier, ewe mi sooni ena pakutang, esap i emén Chón Pwáraatá Jiowa, a ares me a pwúngúló pwe epwe kalapus lón ánein manawan. Lupwen emén a eisini Peter me Sue ika ra omusaaló tipisin ena mwán, iei met ra erá: “Jiowa a asukulakem ám ausap amwéchú ám song ren emén me oputa pwe a tongeni angawaló péchékkúlen inisim, ekiekim, me meefiem. Ina popun, mwirin chék fisin ewe feiengaw, aua tingorei Jiowa an epwe álisikem pwe aupwe omusaaló tipisin ena emén me sópweló le chék manaw fán kinamwe.”

¹⁶ Mi mecheres ar repwe omusaaló tipisin ena mwán? Ese. Iei met ra pwal erá: “Fán ekkóch, atun Sue a meefi riáfféú ren feiengawan we, a pwal ppiitá sefál ám song. Nge aua chék likitaló, iwe ám song a mwittir wesiló. Ren enletin, seni wenecharen letipem, aua erá pwe ika ewe mi soso pakutang epwe wiliti emén chienach lón eú ekkeei rán, aupwe fókkun etiwaéchú. Minne a fis ngenikem a áiti ngenikem pwe án Paipel kewe kapasen  emmwen ra tongeni angasakicheló lón chómmóng napanap! Aua pwal kúna oururun letipem ren ám silei pwe ekiseló chék Jiowa epwe ataweei meinisin ám keei osukosuk.”

17. Met ka káé usun omusaaló tipis seni pwóróusen Myra?

¹⁷ Myra a káé ewe Paipel mwirin an a fen pwúpwúlú me néúni rúúemén át. Pwúlúwan we ese mochen káé ewe Paipel. Ló, ló, ló, átena a sikengeni pwal emén fefin me a sú seni an na famili. Myra a erá: “Atun pwúlúwei we a ló senikem me néúm kewe rúúemén semirit, ua meefi ekkewe esin memmeef chómmóng ra kan meefi atun emén iir mi fókkun tongei a sú seniir. Áwewe chék, ua nipuchopuch, lúkúlúkúmmang, letipechou, niamam, tipi ngeniei minne a fis, me nisossong.” Inaamwo ika ra wes, nge a chúen meefi riáfféún án pwúlúwan na péútaaló. Myra a pwal erá: “Ua meefi ekkena esin memmeef ren fite maram, me ua mirititi pwe ra angawaló ai riri ngeni Jiowa me ekkewe ekkóch.” Iei, Myra a likitaló an song me ese chúen áneánei an epwe fis mettóch mi ngaw ngeni pwúlúwan na me lóóm, me a áneán pwe eú rán epwe ririéch ngeni Jiowa. Iei, Myra a nefótófót wóón manawan lón mwachkkan. A chék áláemén le álisi néún kewe rúúemén ar repwe angang ngeni Jiowa. Lón ei fansoun, Myra fengen me néún kewe me ar kewe famili, ra pwapwa lón ar angang ngeni Jiowa.

18. Met sia tongeni lúkúlúkú án Jiowa, ewe Soukapwúng mi Lapalap, epwe féri?

¹⁸ A ifa me ngaselóóch ren ach silei pwe esap wisach ach sipwe filatá met sókkun kapwúng emén epwe angei! Pokiten Jiowa i néúch Soukapwúng mi Lapalap, i epwe wisen féri ena angang mi lamot. (Rom 14:10-12) Sia fókkun lúkú pwe an kapwúng epwe lóngólóng wóón an allúk mi unuséch usun minne mi pwúng me mwáál. (Ken. 18:25; 1 King 8:32) Esap fókkun tongeni féri minne ese pwúng!

19. Met án Jiowa kapwúng mi unuséch epwe atoto?

¹⁹ Sia ésúkúsúkú ewe fansoun atun Jiowa epwe unusen amóeló meinisin minne mi ngaw mi pop seni án aramas féfféringaw me tipis. Lón ena fansoun, epwe unusen mwóóló senikich feiengawen inisich me kinásen letipach. (Kölf. 72:12-14; Pwär. 21:3, 4) Sisap fókkun chúen chechchemeniir. Atun sia witiwiti warotoon ena fansoun mi amwarar, a ifa me kilisouch ren án Jiowa atufichikich le áppirú lón an omusaaló tipisin aramas.