Semei kewe me inei ra sú seni Estonia atun ewe Oruuen Maunen Fénúfan me ra mwékút ngeni Germany, ikewe úa uputiw me ie. Mwirin ái uputiw ra pwal mmólnetá le mwékút ngeni Canada. Imwem we akkomw eú chék kúkkún imw, ikewe ekkewe chukó ra pwal nóm ie, nge mi kkan ngeni Ottawa, Canada. Áúa fókkun osupwang, nge a mwaren wor ocháám sokun atun mwéngéén lesossor.

Eú rán, Chón Pwáraatá Jiowa ra állea ngeni inei we Pwärätä 21:3, 4. A fókkun chúng letipan, iwe a poputá le kechiw. Semei kewe me inei ra sópweeló le káé ewe Paipel, me ese kon pwal ttam me mwirin, ra mmólnetá ar repwele papatais.

Inaamwo iká semei kewe me inei rese kon lien weweiti fósun Merika, nge ra fókkun tinikken lón ar angang ngeni Jiowa. Arapakkan iteiten Ammól, semei we a kan uweikem me fefinei we kúkkún, itan Sylvia, lón ewe angangen afalafal, inaamwo iká a angang unusen pwiin lón eú factory lón Sudbury, Ontario, ikewe ra kan eteni ewe mechá itan nickel ie. Me iteiten wiik ám me chón ái we famili áúa kan káé The Watchtower. Mama me Papa ra álisiei le tongei Kot. Iwe, lón ewe 1956 atun a engol ieri, úa fangoló manawei ngeni Jiowa. Atun úa ekieki úkúúkún ar tongei Jiowa, a apéchékkúlaei le sópweeló le akkangang ngeni I.

Mwirin ái sochungio seni high school, úa túmúnúngaw lón ái angang ngeni Jiowa. Úa meefi pwe iká úa wiliiti emén pioneer, iwe esap naf nei senis le féri met úa fókkun mochen, ina ái fiti sepelin me sái ngeni chómmóng fénú. Úa kúnékún ái angang, angangen chón apio lón eú radio station, me úa fókkun sani ái na angang. Úa kan angang lepwin, iwe nge fán chómmóng úa etiwaaló ekkewe mwiich me úa chiechi ngeni chókkewe rese tongei Jiowa. Iwe mwirin, mwelien letipei mi káit me ren ewe Paipel a kerán amwékútúei le ekkesiwil.

Úa mwékút ngeni Oshawa, Ontario. Me ikena ie úa chuuri Ray Norman, fefinan we Lesli, me pwal ekkóch pioneer. Iir meinisin ra fókkun etiwaéchúei. Ái kúna úkúúkún pwapwaar, a amwékútúei le etittinasefáli ekkewe mettóch úa mochen achocho ngeniir. Ra peseei ái úpwe pioneer, me ina met úa féri lón September 1966. Úa pwapwa, me sani manawei. Iwe nge, a wor ekkóch mettóch mi weiweitá repwele siwili manawei.

Atun úa chúen sukul high school, úa apply fán iten angangen Bethel lón Toronto, Canada. Mwirin,  atun úa pioneer, úa ketiw le angang Bethel ren úkúúkún rúáánú ier. Nge úa fókkun sani Lesli, me úa niwokkus iká úpwe etiwa ena etiwetiw, iwe úsapw tongeni kúnasefáli. Mwirin ái ikkiótek ussun, úa filaatá le angang Bethel nge úa letipechou le sú seni Lesli.

Úa angang lón ewe leenien sóópw lón Bethel me mwirin úa emén seketeri. Nge lón ena atun, Lesli a wiliiti emén special pioneer lón Gatineau, Quebec. Fán chómmóng, úa kan ekieki iká ifa ussun Lesli, me iká mi pwúng met úa filaatá. Mwirin a fis eú mettóch mi fókkun apwapwa me ámáirú ngeniei. Mongeen Lesli we itan Ray, a ketiw ngeni Bethel. Áúa nómfengen lón eú ruumw! Ina met a efisi ái úpwe fóffóssefál ngeni Lesli. Áúa pwúpwúlú lón February 27, 1971, ina sáingoon ránin ekkewe rúáánú ier úa angang lón Bethel.

A kewis ngenikem me Lesli ám áúpwe álillis lón ewe mwichefel mi eáni fósun France lón Quebec. Mwirin fitu ier, úa máirú pwe úa ketiw le wiseni wisen emén chónemmwen mi wisen sáifetál atun a 28 ieri. Úa meefi pwe úa chúen kúkkún me lipwákingaw, nge minne Jeremaia 1:7, 8 a apasa, a apéchékkúlaei. Iwe nge, a kan weires ngeni Lesli an epwe méúr pokiten a fis ngeni fitu ákseten wóón tarakú. Ina popun áúa ekieki pwe epwe fókkun weires ám áúpwe féri angangen sáifetál. Iwe nge, Lesli a erá: “Iká Jiowa a etiwakich le féri eú mettóch, iwe pwata sise sótuni?” Áúa etiwa ena wis me áúa pwapwa le wiseni ren úkúúkún 17 ier.

A chómmóng ái angang lón wisei wisen chónemmwen mi wisen sáifetál me ese kon naf ái fansoun ngeni Lesli. A lamot úpwe káé pwal eú lesen. Lón eú sossorun Sárinfál, emén a wareiti imwem we. Úse kúna iká ién, nge a chék wor eú pasikit mi masou féún irá, cheese, pilawa, eú rumeen wain, kap kilaas, me eché taropwe ese ffat iká me ren ié. A apasa: “Uwei pwúlúwom we oune ló piknik.” A mmen rániéch lón ena rán. Iwe nge úa ereni Lesli pwe áúse tongeni ló pwe a wor ái afalafal úpwe ammólnatá. A weweiti nge a pwal ekis tipengaw. Iwe atun úa mómmóót ren ái we cheepel, mwelien letipei a poputá le aosukosukaei. Iwe a cheme ngeniei Efisos 5:25, 28. Me rei, ena wokisin a ámmeef ngeniei pwe Jiowa a áchchema ngeniei ái úpwe chúngú meefien pwúlúwei we. Mwirin ái iótek, úa ereni Lesli, “Sa ló.” Iwe a fókkun pwapwa. Áúa ssá ngeni eú leeni mi ling kkan ngeni eú chénúpupu, oneti eché kieki, me áúa fókkun pwapwa atun áúa kunoufengen. Me a pwal chúen fisiéch ái ammólnatá ái kewe afalafal.

A apwapwa me chómmóng wisem kewe lón ám angangen sáifetál seni British Columbia ngeni Newfoundland. Iwe iei úa sáifetál ussun met úa áneánei lealúwéli ái úpwe féri. Úa ekieki ussun ewe Sukulen Gilead nge úse mochen misineri lón eú fénúen ekis. Ussun itá ekkewe misineri iir aramas mi kon aúchea, me úa meefi pwe úse fich ngeni ena wis. Pwal eú, úa niwokkus iká áúpwe titiiló ngeni eú fénúen Afrika mi wor semmwen me maun ie. Úa chék pwapwa le nóm ikewe úa nóm ie.

Lón ewe 1992 a suuk ngeni Chón Pwáraatá Jiowa ar repwe afalafalsefál lón ekkóch ekkewe fénú mi piin nóm lón kinikinin Soviet Union. Iwe ekkewe mwán mi ásimaw ra eisinikem iká áúa mochen mwékút ngeni Estonia pwe áúpwe misineri. Áúa fókkun máirú, nge áúa iótek ussun. Áúa pwal ekiekisefáli, ‘Iká Jiowa a etiwakich le féri eú mettóch, pwata sise sótun féri?’ Áúa etiwa ena wis, me úa ngaseló pwe áúse ló Afrika.

Mwittir chék áúa poputá le káé fósun Estonia. Mwirin fitu maram ám nóm lón ena leeni, a kewis ngenikem ám áúpwe fiti angangen sáifetál. Áúpwe chuuri ina epwe 46 mwichefel me kúmi lón ekkewe úlúngát fénúen lón Baltic me pwal Kaliningrad, Russia. Weween áúpwe pwal achocho le ekis káé fósun Latvia, Lithuania, me Russia. A weires, nge ám achocho a achchúngú pwiich kewe, me ra álisikem. Lón ewe 1999, a wor eú keangen ofesilap lón Estonia me a kewis ngeniei ái úpwe fiti ewe Kúmiin Chón Túmúnú Keangen Ofesilap, ám me Toomas Edur, Lembit Reile, me Tommi Kauko.

Áúa sissileeló chómmóng Chón Pwáraatá iir mi késú seni fénúer we ngeni Siberia. Inaamwo iká a fókkun áweires manawer lón kalapus, me ra káimu seni ar famili, nge rese fókkun song. Ra chék sópweeló lón ar pwapwa me tinikken le afalafal. Ena mettóch a álisikem le kúna pwe sia tongeni likiitú me pwapwa fán weiresin nónnómuch.

Áúa angang weires ren fitu fitu ier, me ese naf ám fansoun asésé, iwe Lesli a poputá le meefi mélúlú mi kon ssenúk. Áúse mwittir esilla pwe a fis ena pokiten a úri eú semmwen itan fibromyalgia mi efisi an epwe meefi ssenúkún mélúlú. Iwe, áúa pwóróusfengen wóón ám áúpwele liwiniti Canada. Atun áúa ketiw le fiti ewe sukul lón Patterson, New York, ewe Sukul fán Iten Ekkewe Chón Túmúnú Keangen Ofesilap, úa tipemwaramwar iká áúpwe tongeni fiti. Iwe nge mwirin ám fókkun ikkiótek ussun, áúa etiwa ena etiwetiw. Jiowa a efeiéchú ám kefil. Atun áúa fiti ena sukul, epwe kerán ina poputáán án Lesli angei álillisin an we semmwen. Iwe pokiten ena, áúa tufichin sópweeló ám angang.

Lón eú kuniolun, lón ewe 2008 me lón Estonia, emén a kériei seni ewe ofesilap lón New York me eis iká áúa mochen etiwa eú wis lón Congo. Úa fókkun máirú, ákkáeúin pokiten a lamot ái úpwe esile ngeniir pélúwan lón chék ewe rán mwirin. Akkomwan, úse pwal ereni Lesli pwe úa silei pwe ina esap méúr lón ena pwinin. Nge fen ngang ewe úse méúr pwe úa chék ikkiótek ngeni Jiowa ussun ái lólilen le ló Afrika.

Sorotáán ewe rán atun úa ereni Lesli, áúa erá: “Jiowa a etiwakich ach sipwe ló Afrika. Ifa ussun sipwe silei iká sise tongeni féri me sani iká sise lóóm sótuni?” Iwe mwirin ám nóm Estonia ren úkúúkún 16 ier, áúa sái ngeni Kinshasa, Congo. A mmen ling me ekinamwe lúkún ewe keangen ofesilap. Eú me lein ekkewe mettóch Lesli a akkomw pacheetá lón ruumwem we, ina eché card a kan chék ikkisoni seni ewe atun áúa ló seni  Canada. A mak lón ena card, “Pwapwa ese lifilifil ia ka nóm ie.” Mwirin ám chuuri pwiich kewe, káé ngeni aramas, me meefi apwapwaan ewe angangen misineri, a lapóló ám pwapwa lón ám angang ngeni Jiowa. Mwirin och fansoun, áúa feiéch le ló ngeni ina epwe pwal 13 fénúen Afrika. Ám sáifetál a atufichikem le káé chómmóng sókkopaten mettóch me kúna ekkewe napanap mi múrinné seni ekkewe ekkóch. Úse chúen aúrek ren ám nóm Afrika, me áúa kilisou ngeni Jiowa ren an tiinikemito áúpwe álillis ikeei.

Lón Congo, aramas ra amwéngéénikem sókkopaten mwéngé, tipei nge áúsapw sani. Nge atun áúa kúna án pwiich kewe sani le mwéngé ekkena esin mwéngé, áúa pwal sótuni, me áúa pwapwa ren ám sótuni.

Áúa sái ngeni éétiwen ewe fénú pwe áúpwe tongeni apéchékkúla chienem kewe me uwei ngeniir álillis lón pekin aion. Lón ekkena sóópw, a wor chómmóng kúmiin aramas mi efisatá osukosuk me eriáfféwú ekkewe fefin me semirit. Lape ngeni pwiich kewe ra fókkun osupwang. Iwe nge, a chúng letipem ren úkúúkún péchékkúlen ar lúkú ewe ápilúkúlúkún manawsefál, ar tongei Jiowa, me ar túppwél ngeni ewe mwicheich. Ar leenien áppirú a efisi ám áúpwe etittina pwata áúa angang ngeni Jiowa me ra álisikem le apéchékkúla ám lúkú i. A ta seni ekkóch pwiich kewe imwer me uwaan ar kewe atake. Úa káé pwe a tongeni mwittir péút senikich minne mi wor rech, nge ach riri ngeni Jiowa, ina ewe mettóch mi fókkun aúchea seni meinisin. Inaamwo iká a tori pwiich kewe watteen weires, nge rese kon pwal fóffós ussun. Féfférúr a apéchékkúlakem le pworacho ngeni ám kewe osukosuk me apwangapwang.

A fis ngenikem pwal eú mettóch mi ámáirú. A kewis ngenikem ám áúpwe mwékút ngeni ewe keangen ofes lón Hong Kong. Áúse fókkun ekieki pwe áúpwe nóm lón Asia! Nge áúa etiwa ena wis pokiten áúa silei pwe Jiowa a álisikem fán tong lón meinisin ekkewe wis áúa wiseni. Lón ewe 2013, a cháicháiwu me lemesem atun áúa ló seni chienem kewe mi áchengicheng me ewe fénú mi ling Afrika, me áúse silei met epwe fis lón kan rán mwem.

 A mmen watte siwil a fis ngenikem atun áúa nóm Hong Kong pokiten a mmen tarangarang aramas lón ena telinimw seni ekis meinisin. A mmen weires ngenikem ám áúpwe káé fósun Cantonese. Iwe nge, pwiich kewe ra fókkun etiwaéchúkem, me áúa fókkun sani mwéngéén ena leeni. A mwittir feffeitá ewe angang, nge a fókkun mémmóngoló méén fénú. Ina popun, ewe Mwichen Soupwúngúpwúng, a pwáári mirit le améméló lap ngeni ekkewe fénú, fénúen ewe mwicheich. Ekiseló mwirin, lón ewe 2015, áúa kewis le álillis lón South Korea, me áúa chúen álillis ikena tori iei. A lamot ngenikem ám áúpwe káé pwal eú fós mi weires ngenikem, me inaamwo iká áúse kon angéch lón fósun Korea, nge pwiich kewe ra apéchékkúlakem ren ar erenikem pwe áúa feffeitá lón ám sile fósun fénúer we.

Ese kan mecheres ngenikem ám áúpwe chiechi ngeni chókkewe áúa kerán chuuriir, nge áúa kúna pwe iká áúa akkomw mwékút le awasélaéchú ekkewe ekkóch, iwe áúa tongeni mwittir sissileer. Áúa kúna pwe a chómmóng met pwiich kewe ra lélléfengen wóón, me Jiowa a férikich ren ewe tufich mi amwarar ach sipwe ririéch ngeni chómmóng aramas me pwal tongeer.—2 Kor. 6:11.

Áúa mirititi aúchean ach sipwe eáni án Jiowa ekiek ussun aramas me kútta ekkewe pisekin ánnet pwe Jiowa a tongekich me a ekkemmwenikich. Atun áúa meefi lichippúng are tipemwaramwar iká chón ewe mwichefel ra sanikem, áúa álleasefáli ekkewe taropwe mi apéchékkúl pwiich kewe ra makke ngenikem. Áúa fókkun meefi án Jiowa pélúweni ám kewe iótek, an alúkúlúkúkem, me apéchékkúlakem.

Lón ekkewe fitu ier ra ló, ám me Lesli áúa káé úkúúkún aúchean ám áúpwe awora fansounfengen, inaamwo iká áúa fókkun busy. Áúa pwal mirititi aúchean ám áúpwe takir atun áúa kan mwáálliló, ákkáeúin atun áúa káé eú mineféén fós. Me iteiten lekuniol áúa kútta met mi apwapwa áúa tongeni kilisou ngeni Jiowa ren.

Ren enletin, úa meefi pwe úse fókkun tongeni wiliiti emén misineri are mwékút ngeni pwal eú fénú. Nge, úa pwisin meefi apwapwaan ái káé pwe mettóch meinisin a tufich ren án Jiowa álillis. A cheme ngeniei alon ewe soufós Jeremaia ei: “SAMOL, ka otupu ei.” (Jer. 20:7, Kapasen God) Ewer, Jiowa a fang ngenikem chómmóng mettóch mi apwapwa áúse tepereni, ekkewe feiéch mi fókkun amwarar, me a pwal mwo nge pwénúetá ái mochen le sáifetál. Áúa sái ngeni chómmóng fénú úse fókkun lúkú me lealúwéli pwe úpwe toriir, áwewe chék ren ái sái ngeni chómmóng me lein ekkewe keangen ofesilap wóón unusen fénúfan. Lón meinisin wisem kewe, úa fókkun aúcheani álilliséchún Lesli me an tipemecheres.

Áúa kan achocho le chemeni pwe áúa féri mettóch meinisin pokiten áúa tongei Jiowa. Ekkewe mettóch mi múrinné sia pwapwa le féri lón ei fansoun, a áiti ngenikich úkúúkún amwararen manawach tori feilfeiló atun Kot epwe ‘suki poun o ngeni ekewe mönümanau meinisin mine repwe menemenöch ren.’—Kölf. 145:16.