1-2. Met sókkun weires a tori Chón Kraist lón ei fansoun ussun chék Lot?

 LUPWEN sia kúna féfféringawen ekkeei aramas lón ei fansoun, sia meefi ewe esin memmeef Lot a pwal meefi. I a “fokun riaföü ren ekewe föför mi fokun ingau än ekewe aramas mi ngau,” pokiten a silei pwe Semach we lón láng a oput féffér mi ngaw. (2 Pet. 2:7, 8) Án Lot niwokkusiti Kot me tongei i a álisi an epwe túmúnú seni féfférún ekkewe aramas mi ngaw mi nóm wiliorun. Kich sia pwal nóm lein ekkewe aramas rese kon súféliti are rese fen súféliti án Jiowa kewe allúk ussun manaw mi liméch. Ikaamwo ina, nge sia tongeni akkamwéchú liméchún manawach iká sipwe chék tottongei Kot me ámááraatá ach niwokkusiti i.—SalF. 14:2.

² Jiowa a álisikich le féri ena ren an awora ewe kapasen pesepes lón ewe puken Än Salomon Fos. Meinisin Chón Kraist, mwán me fefin, kúkkún me chinnap, ra tongeni kúna enletin feiéch iká repwe káé ena kapasen emmwen mi mak lón ena puk.

3. Me ren Än Salomon Fos 17:3, ifa eú popun mi lamot ach sipwe túmúnú letipach? (Pwal ppii ewe sasing.)

³ Eú popun a mmen lamot ach sipwe túmúnú letipach, pokiten Jiowa a etittina letipach. Weween pwe i a sileifichikich lap seni aramas me a silei iká kich wesewesen met sókkun aramas. (Álleani Än Salomon Fos 17:3.) I epwe tongekich iká sipwe amasoua ekiekich ngeni an kewe kapasen éúréúr mi tongeni emmwenikich ngeni manaw esemuch. (Joh. 4:14) Iká sia féri ena, sipwe kúna túmún seni ekkewe féfféringaw me ekkewe kapas chofona mi pop seni Setan me an ei ótót. (1 Joh. 5:18, 19) Atun sia ririéch ngeni Jiowa, epwe lallapoló ach tongei me súféliti. Pokiten sise mochen ámeteki letipen Semach na, sipwe oput ach sipwe pwal mwo nge ekiekin tipis ngeni. Lupwen sia tipetipeló le féri och mettóch ese pwúng, sipwe pwisin eisinikich,  ‘Pwata úpwe mochen eletipengawa Emén mi fókkun tongeei?’—1 Joh. 4:9, 10.

4. Ifa ussun niwokkusiti Jiowa a túmúnú Marta an esap féri minne mi ngaw?

⁴ Emén Chón Kraist itan Marta lón Croatia mi kúna sóssótun an epwe féri tipisin lisowumwáál, a apasa: “A weires ngeniei ái úpwe eáni ekiek mi fataffatéch me ái úpwe ú ngeni ái mochen féri ewe mettóch mi ngaw. Nge ái niwokkusiti Jiowa a túmúnúei.” b Ifa ussun niwokkusiti Kot a álisi? Marta a erá pwe a ekilonei ekkewe mettóch epwe fis mwirilóón an féri minne mi ngaw. Sia pwal tongeni áppirú met Marta a féri. Ewe mettóch mi kon ngaw epwe fis mwirilóón ach féri minne mi ngaw, ina ach sipwe eletipengawa Jiowa me ach sisap chúen tufichin fel ngeni i tori feilfeiló.—Ken. 6:5, 6.

5. Met ka tongeni káé seni pwóróusen Leo?

⁵ Iká sia niwokkusiti Jiowa, sisap chiechi ngeni chókkewe mi féri ekkewe mettóch mi ngaw. Ina met Leo seni Congo a káé. Rúáánú maram mwirin an papatais, a chiechi ngeni chókkewe mi kan féfféri minne mi ngaw. A ekieki pwe ese wor ngawen ena iká pwe ese fitiir le féri ekkewe mettóch mi ngaw. Nge ló, ló, ló, an chiechi mi ngaw a emmwen ngeni an epwe únnúmmóng sakaw me féri tipisin lisowumwáál. Mwirin ena, a poputá le ekieki met seman kewe me inan iir Chón Kraist ra áiti ngeni, me ewe pwapwa a meefi atun a angang ngeni Jiowa. Met mwirilóón? A poputá le férsefáli ekkewe mettóch mi múrinné. Ekkewe mwán mi ásimaw ra álisi, iwe a liwiniti Jiowa. Iei a angang ngeni Jiowa fán pwapwa lón wisan wisen mwán mi ásimaw me emén special pioneer.

6. Met sipwele pwóróusfengen wóón?

⁶ Iei sipwele pwóróus wóón Än Salomon Fos sópwun 9, ewe mi fós ussun rúúemén fefin,  emén a wewe ngeni tipáchem nge emén a wewe ngeni tiparoch. (Apépé ngeni Rom 5:14; Kalatia 4:24.) Atun ach káé ei pwóróus, kopwe chemeni pwe án Setan ei ótót a ur ren féfférún lisowumwáál me sasingin me kachitoon kapasingaw. (Ef. 4:19) Ina popun a mmen lamot ach sipwe sópweeló le ákkámááraatá ach niwokkusiti Kot me kul seni minne mi ngaw. (SalF. 16:6) Iká sia féri ena, iwe kich meinisin, ese lifilifil iká kich mwán are fefin, sia tongeni kúna álillis seni masouen Än Salomon Fos sópwun 9. Iir me rúúemén ekkena fefin ra etiwa ekkewe mi wewemmang, iir chókkewe “mi tiparoch.” Ussun itá emén me emén iir, a apasa, ‘Kopwe etto lón imwei me mwéngé.’ (SalF. 9:1, 5, 6, 13, 16, 17) Nge a fókkun watte sókkofesenin met a fis ngeni chókkewe mi etiwa eú me eú ekkena kapasen etiwetiw.

7. Me ren Än Salomon Fos 9:13-18, met epwe fis ngeni chókkewe mi etiwa án ewe fefin mi tiparoch etiwetiw? (Pwal ppii ewe sasing.)

⁷ Álleani pwóróusen án ewe fefin mi “tiparoch” we etiwetiw. (Álleani Än Salomon Fos 9:13-18.) Neminna a fókkun pwora le etiwa ekkewe mi wewemmang ar repwe etto lón imwan we me eti le mwéngé. Met epwe fis ngeni chókkana? “Chokewe mi tolong lon imwen neminewe repwe mäla.” Ese mwáál ka chemeni ewe pwal eú kapas áwewe ussun chék ena mi pwal nóm lón Än Salomon Fos. A éúréúrakich ussun “ewe fin lisowu” me “ewe fin ekis.” A erenikich: “Are kopwe feila lon imwan, kopwe fetal ngeni ewe al mi ale ngeni mäla.” (SalF. 2:11-19) Än Salomon Fos 5:3-10 a éúréúrakich ussun pwal emén “fin lisowu,” ewe mi fetál wóón ewe al mi “ale ngeni mäla.”

8. Met sókkun kefil mi lamot sipwe féri?

⁸ A lamot chókkewe mi rong án ewe fefin mi “tiparoch” we etiwetiw, repwe ekieki iká repwe etiwa are resap etiwa. Neman kich sipwe pwal eáni ena esin kefil. Met sipwe féri iká sia kúna sóssótun ach sipwe féri tipisin lisowumwáál, are iká a ppichitá och sasingin me kachitoon kapasingaw wóón néúch phone are TV nge sise fen tepereni?

9-10. Ikkefa ekkóch popun mi lamot ach sipwe túmúnú senikich féfférún lisowumwáál?

⁹ A wor popun mi fókkun aúchea ach sipwe túmúnú senikich féfférún lisowumwáál. Ewe fefin mi “tiparoch,” a ussun “koluk eman a soläni a fokun arar.” Met weween ena “koluk eman a soläni”? Ewe Paipel a apépééi konik mi múrinné ngeni féfférún lisowu lefilen emén mwán me emén fefin iir pwúpwúlú. (SalF. 5:15-18, Paipel mi Pin—Agapé) A mumu ngeni ewe mwán me ewe fefin iir wesewesen pwúpwúlú  ar repwe féri ewe féfférún lisowu lefiler. Iwe nge, ewe “koluk eman a soläni” a fókkun sókkóló. Ena, neman a weneiti féfférún lisowumwáál, mi ú ngeni allúk. Chókkewe mi féri tipisin lisowumwáál, lap ngeni ra féri lemonomon, ussun chék emén chón solá a kan solá lemonomon. Ewe “koluk eman a soläni,” ussun itá “a fokun arar” iká chókkewe mi féri ra ekieki pwe ese wor emén epwe silei met ra féri. Ra pwisin otupuur, pún Jiowa a kúna mettóch meinisin. Iká epwe péút senikich án Jiowa chen, ina och mettóch mi fókkun kipwin are ngaw, weween ese “arar,” are apwapwa. (1 Kor. 6:9, 10) Nge mi pwal wor ekkóch popun mi aúchea ach sipwe túmúnú senikich féfférún lisowumwáál.

¹⁰ Féfférún lisowumwáál a tongeni efisi óm kopwe sáw, meefi pwe ese wor aúcheaóm, pwopwomwáál, me atai óm famili. A ffat pwe a eú alen tipáchem óm kosap etiwa án ewe fefin mi tiparoch we etiwetiw. Me lúkún an péút seni chómmóng aramas mi féri féfférún lisowumwáál ar riri ngeni Jiowa, a pwal toriir ekkewe esin semmwen ra tongeni máló ren. (SalF. 7:23, 26) Än Salomon Fos sópwun 9 wokisin 18 a erá: “Chokewe mi wasöla ren [neminnewe] ra fen nom epin ewe lenien sotup.” Iwe, pwata chómmóng ra etiwa án neminna we etiwetiw mi emmweniir ngeni feiengaw?—SalF. 9:13-18.

11. Pwata a fókkun efeiengaw ach katol sasingin me kachitoon kapasingaw?

¹¹ Sasingin me kachitoon kapasingaw, ina eú minen otuputup mi kon terú mi lamot sipwe túmúnúkich seni. Ekkóch ra ekieki pwe ese wor ngawen ar katol sasingin me kachitoon kapasingaw. Nge ren enletin, sasingin me kachitoon kapasingaw a efeiengawa aramas, efisi ar resap chúen ésúfélúr are ésúúfélú ekkewe ekkóch, me a fókkun weires ar repwe úkútiw le kakkatol. Iká emén a kúna och sasingin kapasingaw, a weires an epwe atowu seni lón ekiekin. Nge ewe a fen kon ngaw, ese ámálóói an mocheniangaw nge e fen apéchékkúlaló. (Kol. 3:5; Jas. 1:14, 15) Ewer, chómmóng chókkewe mi kakkatol sasingin me kachitoon kapasingaw ra turulong lón tipisin lisowumwáál.

12. Ifa ussun sipwe pwáári pwe sia achocho le túmúnúkich seni ekkewe sasing mi tongeni efisi ach sipwe eáni ekiek mi limengaw?

¹² Met a lamot kich Chón Kraist sipwe féri iká a ppichitá sasingin kapasingaw wóón néúch phone are mechá? Mi lamot sipwe mwittir kul seni. Epwe mecheres ach sipwe féri ena iká sia chemeni pwe ach riri ngeni Jiowa, ina ewe mettóch mi fókkun aúchea mi nóm rech. Pwal mwo nge ekkewe esin sasing esap iir sasingin me kachitoon kapasingaw, ra tongeni efisi ach sipwe eáni ekiek mi limengaw. Pwata a lamot ach sipwe túmúnúkich seniir? Pún sise mochen ach sipwe pwal mwo nge ekiekin féri och mettóch mi limengaw. (Mat. 5:28, 29) Emén mwán mi ásimaw lón Thailand itan David a apasa: “Úa eisini pwisin ngang: ‘Inaamwo iká ekkewe sasing esap iir sasingin me kachitoon kapasingaw, nge Jiowa epwe pwapwa iká úpwe kakkatol?’ Ena esin kapas eis a álisiei le féri minne mi pwúng.”

13. Met epwe álisikich le eáni kefil mi múrinné?

¹³ Ach niwokkus le féri och mettóch epwe eletipengawa Jiowa, epwe álisikich le eáni kefil mi múrinné. Niwokkusiti Kot iei poputáán, are lóngólóngun “tipachem.” (SalF. 9:10) Sia kúna ena me lepoputáán Än Salomon Fos sópwun 9, ikewe a apépééi “tipachem” mi enlet ngeni pwal emén fefin.

14. Ikkefa ekkewe etiwetiw mi sókkofesen mi mak lón Än Salomon Fos 9:1-6?

¹⁴ Álleani Än Salomon Fos 9:1-6. Sia álleani me lón ekkena wokisin ussun eú etiwetiw  seni Jiowa, ewe Chón Férikichetá me popun tipáchem meinisin. (SalF. 2:6; Rom 16:27) A eáni eú kapas áwewe ussun eú imw watte mi wor fúfóch úran. Ena kapas áwewe a áiti ngenikich pwe Jiowa i mi fangafangéch me a etiwa meinisin chókkewe mi mochen káé seni i pwe repwe pwal tongeni tipáchem.

15. Met Kot a etiwakich le féri?

¹⁵ Seni ewe kapas áwewe lón Än Salomon Fos sópwun 9 ussun ewe fefin mi wewe ngeni “tipachem,” sia káé pwe Jiowa i emén mi fangafangéch me a fang ngenikich chómmóng mettóch mi múrinné. Ena pwóróus a fósun án ena fefin ammólnatá ochan futuk, nofiti únúman wain, me ammólnatá an we cheepel lón imwan we. (SalF. 9:2) Pwal och, me ren wokisin 4 me 5: “[Tipáchem mi enlet] a apasa ngeni ewe mi tiparoch, ‘Kopwe etto o mongö seni enei mongö.’” Pwata a lamot ach sipwe etiwa án neminna na etiwetiw? Jiowa a mochen án néún kewe aramas repwe tipáchem me túmún. Ese mochen ach sipwe féri och mettóch epwe ámetekikich. Ina popun “a iseni tipächchem mi pwüng fäniten ekkewe mi wenechchar.” (SalF. 2:7, PA) Iká sia enletin niwokkusiti Jiowa, sipwe mochen apwapwaai i. Sia rong an kapasen éúréúr, me sia pwapwa le apwénúetá.—Jas. 1:25.

16. Ifa ussun niwokkusiti Kot a álisi Alain le eáni kefil mi múrinné, me met mwirilóón?

¹⁶ Ekieki ifa ussun niwokkusiti Kot a álisi Alain le eáni kefil mi múrinné. Alain i emén mwán mi ásimaw me pwal emén sense, a apasa, “Chómmóng me lein chienei kewe sense ra ekieki pwe kachitoon kapasingaw ina pwal eú minen asukul ngeniir fán iten féfférún lisowu.” Nge Alain ese tupuló. A erá, “Pokiten úa niwokkusiti Kot, úse fókkun mochen katol ekkena kachito. Úa pwal áweweei ngeni chienei kewe sense ewe popun.” Átena a apwénúetá ewe kapasen éúréúr seni ewe “tipachem” mi enlet an epwe ‘fefeitä lon an sile.’ (SalF. 9:6) Ekkóch chienen Alain kewe sense ra mwaar ren, ina minne iei ra poputá le káé ewe Paipel me fiti ekkewe mwiich.

17-18. Ikkefa ekkewe feiéch a tori chókkewe mi etiwa ewe etiwetiw seni ewe “tipachem” mi enlet, me met ra tongeni ápilúkúlúkú? (Pwal ppii ewe sasing.)

¹⁷ Jiowa a áeá ewe kapas áwewe ussun ekkewe rúúemén fefin pwe epwe áiti ngenikich ifa ussun sipwe kúna pwapwa lón mwachkkan. Chókkewe mi etiwa ewe etiwetiw seni ewe fefin mi wewe ngeni “tiparoch,” ra sótun kútta pwapwaar lón ewe féfférún lisowumwáál. Nge rese mirititi pwe met ra féfféri epwe kkúú met epwe fis ngeniir lón mwachkkan. Féfférúr kana epwe emmweniir ngeni “epin ewe lenien sotup.”—SalF. 9:13, 17, 18.

 ¹⁸ Chókkewe mi etiwa ewe etiwetiw seni ewe fefin mi wewe ngeni “tipachem” mi enlet, epwe fókkun sókkóló met epwe fis ngeniir lón mwachkkan! Lón ei fansoun, néún neminna kewe waséla ra pwapwa pún a wor rer meinisin ekkewe mettóch mi lamot ngeniir pwe repwe chék ririéch ngeni Jiowa. (Ais. 65:13) Jiowa a néúnéú soufós Aisea le makkeei: “Oupwe fokun aüselingaei o föri mine üa ürenikemi. Iwe, epwe wor enemi mongö mi annö, oupwe pwal pwapwaiti uän ewe fanü mi fokun chomong.” (Ais. 55:1, 2) Sia káé ach sipwe tongei met Jiowa a tongei me oput met a oput. (Kölf. 97:10) Sia pwal pwapwa le etiwa ekkewe ekkóch ar repwe pwal kúna álillis seni ewe “tipachem” mi enlet. Ussun itá sia “kökkö me won ewe leni tekia seni meinisin me lon ewe telinimw: ‘Ämi mi wewemang, oupwe feito ikei.’” Ekkewe feiéch mi kawor ngenikich me chókkewe mi etiwa ewe etiwetiw, esap chék fán iten lón ei fansoun. Repwe nómoffóch me repwe álisikich ach sipwe “manau” tori feilfeiló atun sia ‘fefeitä lon ach sile.’—SalF. 9:3, 4, 6.

19. Me ren Än Salomon Afalafal 12:13, 14, met a lamot sipwe tipeppós le féri? (Pwal ppii ewe pwóór “ Ach Niwokkusiti Kot A Álilliséch Ngenikich.”)

¹⁹ Álleani Än Salomon Afalafal 12:13, 14. Amwo ach niwokkusiti Kot epwe túttúmúnú letipach me álisikich le akkamwéchú liméchún manawach me ririéch ngeni lón ekkeei ránin lesópwólóón mi fókkun ngaw. Ach niwokkusiti Kot epwe amwékútúkich le sópweeló ach etiwa chómmóng aramas le kúkkútta ewe “tipachem” mi enlet me káé seni.