1. Met a lamot sipwe féri pwe sipwe kúna manaw lón ránin Jiowa we?

 LUPWEN ewe Paipel a fós ussun “ránin Jiowa,” a weneiti ewe fansoun Jiowa epwe apwúngú chón koputan kewe me amanawa néún kewe aramas. Lón fansoun lóóm, fán ekkóch Jiowa a apwúngú ekkewe ekkóch mwú. (Ais. 13:1, 6; Is. 13:5; Sef. 1:8) Lón ach ei fansoun, “ránin Jiowa” we epwe poputá ren án ekkewe néúwisin mwú maunei Papilon mi Lapalap me epwe muchúló ren ewe maunen Armaketon. Ren ach sipwe kúna manaw lón ena rán, a lamot sipwe mmólnetá iei. Ren enletin, Jises a áiti ngenikich pwe mi lamot ach sipwe “molotä” ngeni ewe riáfféú mi lapalap, weween sipwe chék sópweeló le mómmólnetá.—Mat. 24:21; Luk. 12:40.

2. Ifa ussun 1 Tesalonika a tongeni álisikich?

² Lón néún aposel Paul we áeúin taropwe ngeni ekkewe chón Tesalonika, a fós ussun chómmóng kapas áwewe mi álisi ekkewe Chón Kraist ar repwe sópweeló le mómmólnetá ngeni án Jiowa we ránin kapwúng. Paul a silei pwe ránin Jiowa we esap war lón an we fansoun. (2 Tes. 2:1-3) Iwe nge, a pesei chienan kewe chón lúkú ar repwe mmólnetá ngeni ena rán, ussun itá nge epwele war sorotáán ewe rán, me kich sia pwal tongeni apwénúetá ena kapasen pesepes. Iei sipwele pwóróus wóón an áweweei ekkeei mettóch: (1) ifa ussun ránin Jiowa we epwe war, (2) ié kewe resap kúna manaw lón ena rán, me (3) ifa ussun sia tongeni mmólnetá ngeni pwe sipwe kúna manaw.

3. Ifa ussun ránin Jiowa we epwe war ussun warawaren emén chón solá lepwin? (Pwal ppii ewe sasing.)

³ Epwe ussun “warawaren emén chón solá lepwin.” (1 Tes. 5:2, NW) Iei ewe áeúin me lein ekkewe úlúngát kapas  áwewe mi áweweei warotoon ránin Jiowa we. Ekkewe chón solá ra kan mwittir lón ar féffér, me ra féri ena lepwin atun aramas rese ekieki pwe repwe war. Ránin Jiowa we epwe pwal mwittir fis me epwe ámáirú ngeni chómmóng aramas. Pwal mwo nge kich ekkewe Chón Kraist mi enlet, neman sipwe máirú ren mwittirin minne a fis. Nge sia sókko seni ekkewe aramas mi ngaw, pún sisap feiengaw lón ena fansoun.

4. Ifa ussun ránin Jiowa we a ussun cheuchen fam?

⁴ Epwe “usun cheuchen fam a tori eman fefin.” (1 Tes. 5:3) Emén fefin mi pwopwo ese tongeni silei wesewesen tichikin kulókun an epwe néúnéúló. Iwe nge, ese wor an tipemwaramwar pwe epwe fis. Nge atun a tori an cheuchen fam, epwe mwittir fis, fókkun metek, me esap tongeni amwéchú an metek. Pwal ina ussun kich, sise silei ránin me kulókun poputáán ránin Jiowa we. Iwe nge, sia lúkúlúk pwe epwe fókkun war me an kapwúng wóón aramas mi ngaw epwe mwittir war me resap tongeni sú seni.

5. Ifa ussun ewe riáfféú mi lapalap a ussun únúmweirán?

⁵ Epwe ussun únúmweirán. Án Paul we aúlúngátin kapas áwewe a pwal kapassefál ussun chón solá mi solá lepwin. Nge iei, ussun a alélléfengeni ránin Jiowa we ngeni únúmweirán. (1 Tes. 5:4) Ekkewe chón solá lepwin rese kan áfánni fetálin kulók. Saramelóón ewe mineféén rán a tongeni toriir me pwáraaló met ra féri. Pwal ina ussun ewe riáfféú mi lapalap, epwe pwáraaló chókkewe mi ussun ekkewe chón solá, iir kewe mi nónnóm lón kiroch ren ar féfféri ekkewe mettóch mi eletipengawa Jiowa. Nge kich sise ussur, sia tongeni mmólnetá ren ach ttiisenikich ekkewe esin féffér mi eletipengawa Jiowa me sópweeló le féfféri “sokun föför mürina, föförün pwüng me let.” (Ef. 5:8-12) Mwirin Paul a pwal eáni ruu kapas  áwewe mi ririfengen le áweweei ussun chókkewe resap kúna manaw.

6. Met weween án lape ngeni aramas méúr? (1 Tesalonika 5:6, 7)

⁶ “Chokewe mi möür.” (Álleani 1 Tesalonika 5:6, 7.) Paul a alélléfengeni chókkewe resap kúna manaw lón ránin Jiowa we ngeni ekkewe aramas mi méúr. Rese silei met a fiffis únúkkúr are feilóón ewe kulók. Ina popun, rese silei ineet a fis ekkewe mettóch mi aúchea me rese silei met repwe féri. Lape ngeni aramas lón ei fansoun, ra méúr lón pekin ngún. (Rom 11:8) Rese lúkú ekkewe esissil mi pwáári pwe sia nóm lón “ekewe ränin lesopolan,” me rese lúkú pwe ekiseló chék ewe riáfféú mi lapalap epwele fis. Atun a fis watteen siwil lón ei ótót, ekkóch chókkewe mi méúr lón pekin lúkú ra neló, weween ra sani le rongorong pwóróusen ewe Mwúún Kot. Iwe nge, chómmóng me leir ra annutsefál, rese fen sópweeló ar nenneló. Pwal mwo nge ekkóch chókkewe mi lúkú ewe ránin kapwúng, ra ekieki pwe ena rán a chúen towaw. (2 Pet. 3:3, 4) Iwe nge, sia mirititi pwe án Paipel pesei ngenikich ach sipwe nenneló, a fen kon lapóló aúchean rán me rán.

7. Ifa ussun chókkewe Kot epwele nireló ra ussun aramas mi sakaw?

⁷ “Chokewe mi puch.” Aposel Paul a aléllééi chókkewe Kot epwe nireló ngeni ekkewe aramas mi puch are sakaw. Ekkewe mi sakaw, ra mmang le mirititi met a fiffis únúkkúr, me ra eáni kefil mi ngaw. Pwal ina ussun ekkewe aramas mi ngaw, rese apwénúetá án Kot kapasen éúréúr. Ra filaatá le eáni eú manaw mi emmweniir ngeni kitetter. Nge ekkewe Chón Kraist ra angei éúréúrer le mammasa, me eáni ekiek mi fataffatéch. (1 Tes. 5:6) Emén soukáé ussun Paipel a erá pwe emén mi fataffatéch ekiekin, “a chék kikkinamwe ekiekin me ese mwittir rúké ren met mi fis. A tongeni eáni ekiek mi fataffatéch pwe epwe eáni kefil mi pwúng.” Pwata a lamot ach sipwe chék kikkinamwe me núkúchar? A lamot ena pwe site angolong lón mwékútúkútún politics are mwékútúkútún ei fénúfan. Epwe lapóló án aramas etipetipakich lón ekkena mettóch atun a kakkanoto ránin Jiowa we. Iwe nge, ese pwal lamot ach sipwe aúreki met sipwe féri. Án Kot we ngún mi fel a tongeni álisikich le eáni ekiek mi kinamwe me eáni kefil mi múrinné.—Luk. 12:11, 12.

8. Ifa ussun 1 Tesalonika 5:8 a áweweei ekkewe napanap repwe álisikich le nenneló me mammasa? (Pwal ppii ewe sasing.)

⁸ Sipwe úféúf ewe “chechen leupw” me imweimw ewe “akau.” Paul a aléllékich ngeni ekkewe soufiu mi mmólnetá me úféúf úfer úféúfen maun. (Álleani 1 Tesalonika 5:8.) Aramas ra kan menei án emén soufiu epwe kan mmólnetá an epwe maun ineet chék a fis maun. Pwal ina ussun kich. Sia achocho le mmólnetá ngeni ránin Jiowa we ren ach úféúfolong ach we chechchen leupw itan lúkú me tong, me imweimw ewe akkaw itan ápilúkúlúk. Ekkena napanap ra tongeni fókkun álisikich.

9. Ifa ussun ach lúkú a túmúnúkich?

⁹ Eú chechchen leupw, a túmúnú féún ngasangasen emén soufiu. Lúkú me tong ra túmúnú letipach. Repwe álisikich ach sipwe sópweeló le akkangang ngeni Jiowa me tapweló mwirin Jises. Lúkú a alúkúlúkúkich pwe Jiowa epwe efeiéchúkich ren ach kútta i seni unusen letipach. (Ipru 11:6) Epwe álisikich le akkamwéchú ach túppwél ngeni Jises, ach we Souemmwen, inaamwo iká sia lillikiitú fán weires. Ach káé pwóróusen chókkewe mi akkamwéchú ar túppwél lón ei fansoun inaamwo iká ra kúna riáfféúmwáál are weires le atufichi manawer a tongeni apéchékkúla ach lúkú pwe sipwe tongeni  likiitú fán weires. Sia pwal tongeni ttiisenikich efeiengawen tongei moni me pisek iká sipwe áppirú chókkewe mi ámecheresaaló nónnómun manawer pwe repwe akkomwa angangen án Kot we Mwú. b

10. Ifa ussun ach tongei Kot me aramas a álisikich le likiitú?

¹⁰ A pwal lamot ewe napanap tong ren ach sipwe nenneló lón pekin ngún me mammasa. (Mat. 22:37-39) Ach tongei Kot a álisikich le likiitú le afalafal ese lifilifil met sókkun osukosuk eli sipwe kúna. (2 Tim. 1:7, 8) Pokiten sia tongei chókkewe rese angang ngeni Jiowa, sia sópweeló le afalafal me achocho le áweséchú ach kewe territory, me pwal mwo nge afalafal wóón phone me mak taropwe. Sise fangetá lón ach ápilúkúlúk pwe eú rán aramas repwe tongeni siwil me poputá le féri minne mi pwúng.—Is. 18:27, 28.

11. Ifa ussun ach tongei chienach kewe Chón Kraist a álisikich? (1 Tesalonika 5:11)

¹¹ Sia pwal tongei chienach kewe Chón Kraist. Sia pwáári ena esin tong ren ach ‘apöchökülafengenikich o alilisfengen lefilach.’ (Álleani 1 Tesalonika 5:11.) Sia ussun ekkewe soufiu mi álillisfengen lón maun, sia akkapéchékkúlafengenikich. Ewer, emén soufiu eli epwe ákseten le efeiengawa emén chienan soufiu lón eú maun, nge saminne epwe tongeni féri ena seni turun tipan. Pwal ina ussun kich, sise fókkun mochen ámeteki chienach kewe Chón Kraist seni turun tipach are liwini ngeniir met ra féri ngenikich. (1 Tes. 5:13, 15) Sia pwal pwáári ach tong ren ach súféliti ekkewe mwán mi wisen ekkemmweni ewe mwichefel. (1 Tes. 5:12) Atun Paul a makkeei néún we taropwe ngeni ewe mwichefelin Tesalonika, a kerán kis seni eú ier an wor ena mwichefel. Ese mwáál, ekkewe mwán mi wisen emmwen resaamwo kon lipwákéch me eli ra kan mwáálliló. Nge a chúen lamot ar repwe ésúfélúr. Pokiten a chék akkarapoto ewe riáfféú mi lapalap, eli epwe fen kon lamot ach sipwe alapaaló ach lúkúlúk wóón án ekkewe mwán mi ásimaw kapasen emmwen lap seni lón ei fansoun. Ese mwáál sisap chúen tufichin angei emmwen seni ewe ofesilap me ewe  keangen ofesilap. Ina popun, iei ewe atun mi lamot sipwe káé ach sipwe tongei me súféliti ekkewe mwán mi ásimaw lón ach mwichefel. Ese lifilifil met epwe fis, sipwe mammasafichi me sisap nefótófót wóón apwangapwanger, nge sipwe fen nefótófót wóón ewe pwóróus mi enlet pwe Jiowa a néúnéú Jises le ekkemmweni ekkena mwán mi túppwél.

12. Ifa ussun ach ápilúkúlúk a túmúnú ekiekich?

¹² Imwen emén soufiu akkaw a kan túmúnú mékúran, iwe pwal ina ussun ren ach we ápilúkúlúkún kúna amanaw, a túmúnú ach ekiek. Pokiten a núkúchar ach ápilúkúlúk, iwe sia mirititi pwe a chék lamotongaw mettóchun ei fénúfan. (Fil. 3:8) Ach ápilúkúlúk a ekinamwekich me anúkúcharakich. Ina met a álisi Wallace me Laurinda, iir mi álillis lón Afrika. Lón chék úkúúkún úlúngát wiik, a má seniir inen emén me leir me pwal semen emén me leir. Rese tongeni liwiniti leenier me kúna chón ar famili pokiten ewe COVID-19 pandemic. Wallace a makkeei: “Ewe ápilúkúlúkún manawsefál a álisiei le ekieki poputáán manawer lón ewe fénúfan séfé, nge esap sáingoon manawer lón ei ótót. Ei ápilúkúlúk a ekinamweei atun úa meefi letipechou are letipeta.”

13. Met sia tongeni féri pwe sipwe angei ewe ngún mi fel?

¹³ “Ousap kunuela ewe Ngünmifel.” (1 Tes. 5:19) Paul a apasa pwe ewe ngún mi fel a akkangang wóóch. Lupwen sise eppeti angangan, sipwe fókkun tinikken me mwasangasang le féri minne mi pwúng me a wor ach péchékkúl le féri án Jiowa angang. (Rom 12:11) Met sia tongeni féri pwe sipwe angei ewe ngún mi fel? Sia tongeni tingor lón iótek, káé án Kot we Kapas, me fitipachei án Kot we mwicheich mi nóm fán emmwenien an we ngún mi fel. Ach féri ena epwe álisikich le ámááraatá “ekewe uän Ngün.”—Kal. 5:22, 23.

14. Met a lamot sipwe túmúnúkich seni pwe epwe sópwósópwoló ach akkangei án Kot we ngún mi fel? (Pwal ppii ewe sasing.)

¹⁴ Mwirin án Kot fang ngenikich an we ngún mi fel, a lamot sipwe túmúnú pwe ‘sisap kunuela.’ Kot a fang an we ngún mi fel ngeni chék chókkewe mi túmúnú an epwe chék lilliméch ekiekiir me féfférúr. Iká sia ekkekieki ekkewe  mettóch mi limengaw me féffériir, i esap sópweeló le fang ngenikich an we ngún mi fel. (1 Tes. 4:7, 8) Ren an epwe sópwósópwoló ach akkangei án Kot we ngún mi fel, a lamot sisap pwal “turunufasei ekewe kapasen osuni.” (1 Tes. 5:20) Ekkena “osuni,” ra wewe ngeni ekkewe pwóróus mi pop seni án Kot we ngún mi fel, kapachelong ekkewe pwóróus mi weneiti ránin Jiowa we me atapwalapwalen ach ei fansoun. Sise ekieki pwe ránin Jiowa we, are ewe Armaketon esap fis atun ach chúen manaw. Nge sia fen pwáári ach lúkú pwe epwele war ekiseló chék. Sia tongeni féri ena ren ach tinikken iteiten rán le féri ekkewe “angang mi fich ngeni Kot” me túmúnú pwe epwe chék lilliméch ach féffér.—2 Pet. 3:11, 12.

15. Ifa ussun sipwe túmúnúkich pwe sisap tupuló ren ekkewe pwóróus mi chofona mi pop seni ekkewe timon? (1 Tesalonika 5:21)

¹⁵ Lón ekkan rán mwach, ekkewe chón ú ngeni Kot repwe eáni ei esilesil: “Mettoch meinisin a kinamwe o nükünüköch!” (1 Tes. 5:3) Ei fénúfan epwe ur ren ekkewe pwóróus mi pop seni ekkewe timon, me chómmóng aramas repwe tupuló rer. (Pwär. 16:13, 14) Nge ifa ussun kich? Sisap tongeni tupuló iká sia etittina are sótuni mettóch meinisin. (Álleani 1 Tesalonika 5:21.) Ewe kapasen Krik fán iten etittina are ‘sotuni,’ a áweweei napanapen án aramas sótuni are cheki ekkewe mettóch mi aúchea, áwewe chék ren kolt me silifer, pwe repwe silei iká iir wesewesan. Ina minne, a lamot sipwe etittina are sótuni ekkewe mettóch sia rong are álleani pwe sipwe silei iká iir mi enlet. Ina met a lamot ngeni ekkewe chón Tesalonika, me epwe fen kon lapóló lamotan ngenikich atun sia akkarap ngeni warotoon ewe riáfféú mi lapalap. Sipwe áeá ach tufichin ekiek le aléllééi met sia rong me álleani ngeni met ewe Paipel me án Jiowa we mwicheich ra apasa, lap seni ach sipwe chék lúkúoló meinisin met aramas ra apasa. Iká sia féri ena, sisap tupuló ren ekkewe pwóróus mi chofona mi pop seni ekkewe timon.—SalF. 14:15; 1 Tim. 4:1.

16. Ifa ach we ápilúkúlúk mi alúkúlúk, me met sia tipeppós le féri?

¹⁶ Sia silei pwe néún Jiowa aramas repwe kúna manaw atun ewe riáfféú mi lapalap. Nge, emén me emén kich sise silei met epwe fis lesor. (Jas. 4:14) Iwe nge, ese lifilifil iká sipwe manawewu seni ewe riáfféú mi lapalap are máló me mwen an epwe fis, sipwe kúna manaw esemuch iká sipwe akkamwéchú ach túppwél. Ekkewe mi kepit repwe fiti Kraist lón láng, nge ekkewe ekkóch siip repwe kúna manaw lón paratis wóón fénúfan. Amwo kich meinisin sipwe nefótófót wóón ach we ápilúkúlúk mi amwarar me sópweeló le mmólnetá ngeni ránin Jiowa we!