1. Me ren Kölfel 18:​46, met Tafit a eita ngeni Jiowa?

 FÁN EKKÓCH eli epwe weiweitá fisin och osukosuk mi tongeni áweiresi manawach are pwal mwo nge unusen ekkesiwili nónnómun manawach. Sia fókkun kilisou pún sia tongeni lúkúlúk wóón Jiowa Kot ren an epwe álisikich. Lón ewe lesen mwen ei, a áchema ngenikich pwe Jiowa i emén Kot mi manaw me a kan mmólnetá fansoun meinisin an epwe álisikich. Atun a álisikich, ena a alúkúlúkú ngenikich pwe Jiowa “a manau.” (Álleani Kölfel 18:46.) Iwe nge, mwirin án Tafit erá pwe Kot a manaw, a apépééi Kot ngeni och mettóch ese manaw. Tafit a eita ngeni Jiowa “ai achau.” Met weween ena?

2. Met sipwe káé lón ei lesen?

² Lón ei lesen, sipwe káé ewe popun pwata Jiowa a aléllééi i ngeni eú achaw me met ena mettóch a áiti ngenikich ussun i. Sipwe pwal káé ifa ussun sia tongeni lúkúlúk wóón i ussun eú achaw fán itach. Mwirin, sipwe ppii ifa ussun sia tongeni áppirú napanapen Jiowa kewe.

JIOWA A USSUN EÚ ACHAW

3. Ifa ussun ewe Paipel a kan néúnéú ewe kapas “achau”? (Ppii ewe sasing wóón péén.)

³ Ewe Paipel a apépééi Jiowa ngeni eú “achau” pwe epwe álisikich le weweiti ekkóch napanapan kewe. Fán chómmóng, lupwen néún Jiowa kewe chón angang ra mwareiti i ren napanapan kewe mi amwarar, ra áweweei i lón Paipel pwe a ussun eú achaw. Ewe áeúin fansoun Paipel a fós ussun Jiowa pwe “I ewe achau,” ina a pwá lón Tuteronomi 32:4. Lón án Hana iótek, a erá pwe “esap pwal wor eu achau usun ach we Kot.” (1 Sam. 2:2) Apakuk a kér ngeni Jiowa, “en äm Achau.” (Ap. 1:12) Ewe chón makkeei Kölfel 73 a kér ngeni Kot, “ewe achaw lón letipei.” (Kölf. 73:​26, NW) Me pwal mwo nge pwisin Jiowa, a apasa pwe  i eú achaw. (Ais. 44:8) Sipwele káé úlúngát napanapen Jiowa kewe me ppii ifa ussun a tongeni wiliiti “ach Achaw.”—Tut. 32:​31, NW.

4. Pwata Jiowa a ussun eú leenien op? (Kölfel 94:22)

⁴ Jiowa i ach leenien op. Jiowa a túmúnúkich atun a torikich osukosuk, ussun chék eú watteen achaw emén a tongeni opolong fan lón fansoun mélúmél. (Álleani Kölfel 94:22.) I a álisikich le túmúnú ach riri ngeni me alúkúlúkú ngenikich pwe ese wor och mettóch mi eriáfféúkich iei epwe tongeni efeiengawakich tori feilfeiló. Me a pwal pwonei pwe lón mwachkkan epwe amóeló meinisin met mi efisi ach aúrek are riáfféú.—Is. 34:​25, 26.

5. Ifa ussun Jiowa a tongeni wiliiti ach Leenien Op?

⁵ Eú alen án Jiowa epwe ach Leenien Op, ina ach iótek ngeni. Atun sia iótek, Jiowa a fang ngenikich an “we kinamwe” mi túmúnú letipach me ekiekich. (Fil. 4:​6, 7) Ekieki pwóróusen Artem, emén Chón Kraist mwán mi kalapus pokiten met a eáni lúkú. Emén chón chosa a kan soun chosani fán chómmóng, kirikiringaw ngeni, me sótun eniwa. Iei met Artem a apasa: “Iteiten án ewe chón chosa chosaniei úa aúrek . . . Fansoun meinisin úa iótek ngeni Jiowa. Úa tingorei kinamween letipei me ái tipáchem.” A pwal erá: “Inaamwo iká úa kúna ei riáfféúmwáál, nge úa chék meefi kinamwe. . . . Ren án Jiowa álillis, ussun itá nge úa útá lúkúsékúrún eú etiip seni faw.”

6. Pwata sia tongeni lúkúlúk wóón Jiowa fansoun meinisin? (Aisea 26:​3, 4)

⁶ Jiowa i emén mi alúkúlúk. Ussun chék eú watteen achaw are chuuk mi chék nómotiw lón leenian, sia silei pwe Jiowa a chék mómmólnetá an epwe álisikich. Sia tongeni lúkúlúk wóón pún i ewe “achau tori feilfeilachök.” (Álleani Aisea 26:​3, 4.) I a chék mammanaw pwe epwe apwénúetá an kewe pwon, aúseling ngeni ach kewe iótek, me ngenikich ewe álillis mi lamot ngenikich. Sia pwal tongeni lúkúlúk wóón Jiowa pokiten i a túppwél ngeni chókkewe mi angang ngeni. (2 Sam. 22:26) Esap fókkun ménúki met sia féri, me fansoun meinisin epwe liiwini ngenikich liwinich.—Ipru 6:10; 11:6.

7. Met epwe fis iká sia lúkúlúk wóón Jiowa? (Pwal ppii ewe sasing.)

⁷ Lupwen sia unusen lúkúlúk wóón Jiowa, i epwe ach Achaw. Sia lúkúlúk pwe atun sia álleasochisi i pwal mwo nge lón fansoun mi áweires, sipwe feiéch. (Ais. 48:​17, 18) Atun sia kúna an álillis, epwe lapóló ach lúkúlúk wóón i. Sia lúkúlúk pwe Jiowa chék a tufichin álisikich le likiitú fán ese lifilifil úkúúkún weiresin ewe osukosuk mi torikich. Lape ngeni lón ekkewe atun ese wor emén sipwe seppiti me tingor álillis seni, sia mirititi pwe sia tongeni lúkúlúk wóón Jiowa. Iei alon Vladimir, “Lón ewe atun úa ares, úa meefi pwe úa fókkun ririéch ngeni Kot.” A pwal erá, “Úa káé ái úpwe alapaaló ái lúkúlúk wóón Jiowa pokiten úa chék ákkáláemén, me i chék a tongeni álisiei le likiitú.”

8. (a) Pwata sia tongeni apasa pwe Jiowa ese siwil? (b) Ifa ussun sia kúna feiéch pokiten Kot i ach Achaw? (Kölfel 62:​6, 7)

⁸ Jiowa ese siwil. Jiowa a ussun chék eú watteen achaw, are chuuk, mi núkúchar me ese siwil. Napanapan kewe me minne a tipeni,  rese fókkun siwil. (Mal. 3:6) Atun Atam me If ra ú ngeni Jiowa, i ese siwili minne a tipeni fán iten aramas. Ussun met ewe aposel Paul a makkeei, Jiowa “ese tongeni amamesini pwisin i.” (2 Tim. 2:13) Ena a wewe ngeni pwe ese lifilifil met a fis are met ekkewe ekkóch ra féri, Jiowa esap fókkun siwili napanapan kewe, minne a tipeni, are an kewe allúk. Pokiten Jiowa ese fókkun siwil, iwe sia lúkúlúk pwe epwe álisikich lón fansoun weires me apwénúetá met a eáni pwon fán iten mwachkkan.—Álleani Kölfel 62:​6, 7.

9. Met ka káé seni pwóróusen Tatyana?

⁹ Iká sia ekilonei napanapen Jiowa kewe me minne a tipeni fán iten fénúfan me aramas, a tongeni álisikich ach sipwe lúkúlúk wóón i pwe epwe ach Achaw. Ach féri ena, a tongeni álisikich ach sipwe chék meefi kinamwe me túppwél ngeni atun a torikich osukosuk. (Kölf. 16:8) Ina met a fis ngeni emén Chón Kraist itan Tatyana, ewe a house arrest pokiten met a eáni lúkú. Iei alon neminna: “Úa fókkun ákkáláemén.” A pwal erá, “A fókkun áweires me lepoputáán. Úa kan meefi letipengaw.” Iwe nge, atun neminna a mirititi pwe minne a fis ngeni a riri ngeni Jiowa me minne a tipeni, iwe a tongeni likiitú me meefi péchékkúlsefál. A erá: “Ái weweiti ewe popun a fis ei, a álisiei le chemeni pwe fán iten Jiowa a iei ussun nónnómui. Ena a álisiei ái úpwe úkútiw le ekieki chék pwisin ngang.”

10. Ifa ussun Jiowa a tongeni ach Achaw lón ei fansoun?

¹⁰ Ekiseló chék, sipwe kúna ewe fansoun mi fókkun áweires, me epwe lamot an epwe watte ach lúkúlúk wóón Jiowa lap seni me lóóm. Iei ewe fansoun sipwe alapaaló ach lúkúlúk pwe epwe awora ngenikich met mi lamot ngenikich pwe sipwe likiitú fán túppwél. Ifa ussun sipwe féri ena? Sipwe álleani ekkewe pwóróus lón Paipel, me pwal pwóróusen néún Jiowa kewe chón angang lón ei fansoun. Ekieki ifa ussun Kot a álisi néún kewe chón angang. Kopwe ekipwichi ekkena pwóróus. Óm féri ena, a tongeni álisuk óm kopwe eáni Jiowa óm Achaw.

ÁPPIRÚ NAPANAPEN JIOWA KEWE

11. Pwata sia mochen áppirú napanapen Jiowa kewe? (Pwal ppii ewe pwóór “ Minne Ekkewe Chón Kraist Át Repwe Achocho Ngeni.”)

¹¹ Sia fen káé ussun napanapen Jiowa kewe mi efisi an epwe ussun eú achaw fán itach. Nge iei sipwele ppii ifa ussun sia tongeni áppirú napanapan kana. Iká sia achocho úkúúkún ach tufich le áppirú napanapan kana, sia tongeni apéchékkúla chienach kewe chón lúkú. Áwewe chék, Jises a eita ngeni Simon ewe it Kefas (weween “Piter”), a wewe ngeni “Eféú Faw.” (Jon 1:42) Ena a áiti ngenikich pwe Piter a tongeni oururu chón ewe mwichefel me apéchékkúla ar lúkú. Ewe Paipel a apépééi ekkewe mwán mi ásimaw lón mwichefel ngeni “nürün eu achau mi watte.” Weween, ra túmúnú chón ewe mwichefel. (Ais. 32:2) Nge kich meinisin sia tongeni apéchékkúla emén me emén kich iká sipwe áppirú napanapen Jiowa kewe.—Efi. 5:1.

12. Ifa ussun sia tongeni álisi ekkewe ekkóch lón fansoun mi áweires?

 ¹² Kopwe eú leenien op. Lupwen a ta seni chienach kewe imwer are ra sú seni imwer pokiten feiengaw watte are maun, sia tongeni eleenier lón imwach. Pokiten a ngangngawoló nónnómun manaw lón ekkeei “ránin lesópwólóón,” epwe fen chómmóngoló alen ach sipwe awora ngeni chienach kewe met ra osupwangan. (2 Tim. 3:1) Sia pwal tongeni awora ngeniir ewe ourur me tong ra osupwangan. Eú alen ach sipwe féri ena, ina ach awasélaéchúúr lón mwiich, me álisaatá ewe tong me kinamwe lón ewe mwichefel. Chómmóng aramas lón ei fansoun, ra kirikiringawfengen. Iwe ena, a tongeni efisi án chienach kewe repwe fókkun aúrek me meefi pwe ese wor tongeer. Ina popun, atun chienach kewe ra fiti mwiich, sia mochen féri met sia tufichin féri pwe repwe meefi pwe sia tongeer, meefi kinamwe, me núkúnúkéch.

13. Ifa ussun ekkewe mwán mi ásimaw ra tongeni eú leenien op fán iten ekkewe ekkóch? (Pwal ppii ewe sasing.)

¹³ Ekkewe mwán mi ásimaw ra tongeni eú leenien op fán iten chón ewe mwichefel mi toriir sókkopaten osukosuk. Atun fisin feiengaw watte me weiweitáán semmwen, ekkewe mwán mi ásimaw ra mwittir akkóta álillis ngeni chiener kewe. Ra pwal awora kapasen emmwen me apéchékkúl seni Paipel. Chienach kewe Chón Kraist repwe meefi kinamwe le tingor álillis seni emén mwán mi ásimaw, iká ra silei pwe i epwe fós ngeniir fán kirekiréch, aúseling ngeniir, me achocho le weweiti meefier. Ekkena napanap epwe álisiir le meefi pwe mi wor tongeer. Iwe, epwele mecheres ngeniir ar repwe apwénúetá ese lifilifil met kapasen emmwen seni Paipel emén mwán mi ásimaw epwe awora ngeniir.—1 Tes. 2:​7, 8, 11.

14. Ifa ussun sipwe pwáári pwe kich mi alúkúlúk?

¹⁴ Kopwe emén mi alúkúlúk. Sia mochen  ekkewe ekkóch repwe lúkúlúk pwe sia tongeni álisiir atun ra osupwangen álillis, ákkáeúin lón fansoun mi áweires. (SalF. 17:17) Met sia tongeni féri pwe ekkewe ekkóch repwe lúkúlúk wóóch? Sia tongeni achocho úkúúkún ach tufich le áppirú Jiowa iteiten rán, áwewe chék ren ach akkapwénúetá ach kewe pwon me ach achocho úkúúkún ach tufich pwe sisap mmang ngeni och mettóch. (Mat. 5:37) Are, iká sia silei pwe emén a osupwangen álillis, sia tongeni álisi. Pwal och, sipwe achocho le féri ekkewe angang lón mwichefel mi kewis ngenikich alóngólóng wóón ekkewe kapasen emmwen mi torikich.

15. Ifa ussun ewe mwichefel a kúna feiéch iká ekkewe mwán mi ásimaw ra alúkúlúk?

¹⁵ Ekkewe mwán mi ásimaw mi alúkúlúk ra eú feiéch ngeni ewe mwichefel. Ifa ussun? Lupwen chón ewe mwichefel ra silei pwe ra tongeni kékkéri ekkewe mwán mi ásimaw atun ra osupwangen ar álillis, epwe kisikisiló ar aúrek. Chón ewe mwichefel ra pwal meefi pwe mi wor tongeer atun ra silei pwe ekkewe mwán mi ásimaw ra mochen álisiir. Chón ewe mwichefel repwe lúkúlúk wóón ekkewe mwán mi ásimaw iká ra alónga ar kapasen éúréúr wóón ewe Paipel me néúch kewe puk férien ewe chón angang mi túppwél nge esap wóón pwisin ar  ekiek. Chón ewe mwichefel ra pwal lúkúlúk wóón emén mwán mi ásimaw ese apwóróusa pwóróuseer me a apwénúetá met a eáni pwon.

16. Lupwen sia féri met Jiowa a apasa pwe mi pwúng, ifa ussun kich me ekkewe ekkóch sia feiéch?

¹⁶ Sipwe féfféri met Jiowa a apasa pwe mi pwúng. Iká sia álleasochisi Jiowa lón mettóch meinisin me féri kefil mi lóngólóng wóón ewe Paipel, iwe sipwe eú leenien áppirú mi múrinné ngeni ekkewe ekkóch. Lupwen sipwe káé án Kot we Kapas me apéchékkúlaló ach lúkú Jiowa, iwe sipwe túppwél ngeni me álleasochisi an kewe allúk. Sipwe esilla ekkewe afalafal mi chofona me ekiek ese tipeeú ngeni ekiekin Jiowa, me sisap tipetipeló rer. (Efi. 4:14; Jem. 1:​6-8) Ach lúkú Jiowa me an kewe pwon, repwe álisikich ach sipwe chék meefi kinamwe atun a torikich pwóróus ese múrinné. (Kölf. 112:​7, 8) Sipwe pwal tufichin álisi chókkewe mi toriir osukosuk.—1 Tes. 3:​2, 3.

17. Met a álisi ekkewe mwán mi ásimaw lón ar álisi ekkewe ekkóch?

¹⁷ Ekkewe mwán mi ásimaw repwe nemeni unusen kinikinin manawer, mirit, kókkótéch, me tipepwetete. Ekkena mwán ra álisi ekkewe ekkóch ar repwe meefi kinamwe me eáni lúkú mi péchékkúl me apéchékkúla ewe mwichefel ren ar “fitipachei ewe pwóróus mi alúkúlúk.” (Tait. 1:9; 1 Tim. 3:​1-3) Án ekkena mwán mi ásimaw leenien áppirú me ar kapasen pesepes, a álisi chón mwichefel ar repwe fiffiti ekkewe mwiich iteitan, fiffiti ewe angangen afalafal, me féri ar pwisin káéén Paipel. Atun a wor án emén chón ewe mwichefel osukosuk mi efisi an epwe aúrek, ekkewe mwán mi ásimaw ra áchchema ngeni an epwe lúkúlúk wóón Jiowa me an kewe pwon.

18. Pwata sia mochen mwareiti Jiowa me mochen alapaaló ach ririéch ngeni? (Pwal ppii ewe pwóór “ Alen Óm Kopwe Ririéch Ngeni Jiowa.”)

¹⁸ Mwirin ach káé ussun napanapen Jiowa kewe mi amwarar, sia tongeni aloni alon King Tafit ei: “Üpwe mwareiti ewe Samol mi Lapalap ai achau.” (Kölf. 144:1) Fansoun meinisin sia tongeni lúkúlúk wóón Jiowa. Pwal mwo nge atun sia chichchinnapeló, sia lúkúlúk pwe epwe sópweeló le álisikich pwe sipwe chék ririéch ngeni. Iwe, sia tongeni apasa: “I ai achau.”—Kölf. 92:​14, 15.