Ren ach sipwe apwapwaai Jiowa, a lamot epwe wor ach lúkú. Nge ewe Paipel a apasa pwe “esap aramas meinisin iir chón lúkú.” (2 Tes. 3:2) Atun ewe aposel Paul a apasa ena, a fósun ekkewe mi “aramasangaw,” iir kewe mi eriáfféwúmwááli. Nge minne a apasa ussun lúkú a pwal weneiti ekkewe ekkóch aramas. Ekkóch aramas ra filaatá le tunaaló ekkewe pisekin ánnet mi affata pwe mi wor emén Kot mi féraatá mettóch meinisin. (Rom 1:20) Ekkóch eli repwe erá pwe ra lúkú Kot. Nge ese naf ena esin lúkú.

A lamot sipwe fókkun lúkú pwe mi wor emén Kot itan Jiowa, me i “ewe chón liiwini” ngeni chókkewe iir mi enletin lúkú i liwiniir. (Ipru 11:6) Lúkú ina eú kinikinin uwaan an we ngún mi fel. Ren ach sipwe tongeni angei ena ngún mi fel, a lamot sipwe tingorei Jiowa an epwe fang ngenikich. (Luk 11:​9, 10, 13) Pwal eú alen ach sipwe tongeni angei ena ngún mi fel, ina ach ákkálleani án Kot we Kapas, ewe mi mak fán emmwenien an we ngún mi fel. Mwirin, sia tongeni ekieki met sia álleani me achocho le apwénúetá met sia káé. Ach féri ena, sia mut ngeni án Jiowa we ngún mi fel an epwe álisikich le manaweni manawach mi pwáári pwe sia eáni ewe lúkú mi apwapwaai i.