Lón 2012, ekkewe sou káéén pisekin chón lóóm ra kúna mékkún kinikinin eú sókkun sepi mi ffér seni pwúl ina epwe minen 3,000 ier a ló. Ekkewe sou káé ra fókkun meseik. Pwata? Esap pokiten ekkewe mékkún kinikinin sepi, nge pokiten met a mak wóór.

Lupwen ekkewe sou káéén pisekin chón lóóm ra apachafengeni ekkewe mékkún sepi, ra tongeni álleani ekkewe makken Kanaan wóón. A erá: “Espaal Pen Peta,” weween “Espaal, néún Peta át.” A kerán iei án ekkewe sou káéén pisekin chón lóóm kúna ei it an mak wóón och pisek minen lóóm lóóm.

Mi pwal wor emén mi iteni Espal mi pwá itan lón Paipel. I emén lein néún King Saul kewe. (1 Kron. 8:33; 9:39) Emén sou tipachem itan Yosef Garfinkel, emén lein chókkewe mi kúna ewe sepi, a mwaar ren án ewe “it Espaal pwá lón fansoun chék King Tafit we me ren Paipel, nge iei a pwal pwá wóón eú mettóch minen ena chék fansoun me lein meinisin ekkewe pisekin lóóm lóóm.” Ekkóch ra ekieki pwe aramas ra néúnéú ena it lón chék ena fansoun. Ena mettóch a pwáraatá pwe minne ekkewe sou káé pisekin chón lóóm ra kúna ra kan álisatá pwúngún enletin Paipel!

Lón Paipel, néún Saul we át itan Espal a pwal iteni Isiposet. (2 Sam. 2:10) Pwata “pal” a siwil ngeni “poset”? Ekkewe sou káé ra áweweei pwe ewe chón makkeei Oruuen Samuel neman ese mochen néúnéú ewe it Espal pún a áchema ngeni chón Israel ewe koten púngún rán itan Paal, ewe chón Kanaan ra kan fel ngeni. Iwe nge, lón ewe Paipel lón Áeúin Kronika, sia chúen tongeni kúna ena it Espal.