UA CHECHCHEMENI fite fite ier lóóm, lón eú sossoran mi patapat lón Brookings, South Dakota, U.S.A. Ua tongeni meefi pwe ekiseló epwele poputá winter, ewe fansoun mi fókkun patekkich. Ngang me eú kúkkún kúmiin aramas aua nónnóm lón eú watteen imwen iseis lón eú leenien atake mi fókkun patapat me ám meinisin aua chechchech. Aua útá ppen eú wakkatteen leenien konik mi ur ren konik, nge ewe konik mi patapat! Upwe apwóróusa ngonuk ekis pwóróusen manawei pwe kopwe weweiti pwata aua nónnóm ikena ie.

Ngang ua uputiw lón March 7, 1936. A wor fémén néún semei kewe me inei, nge ngang ewe kúkkúnúfóch. Aua nónnóm lón eú kúkkún leenien atake me fol man lón étiwen South Dakota. Ena angangen atake me fol man ina eú angang mi lamot lón manawem, nge esap ina ewe mi kon lamot seni meinisin. Semei kewe me inei ra papatais usun Chón Pwáraatá Jiowa lón ewe ier 1934. Ra fen fangóló manawer ngeni Jiowa, ina popun ar apwénúetá letipen Jiowa, ina ewe mettóch mi fókkun lamot ngeniir lap seni meinisin. Semei we Clarence, i a wisen company servant (iei a iteni chón akkót lón ewe kúmiin mwán mi ásimaw) lón ám we kúkkún mwichefel lón Conde, South Dakota, nge mwirin och fansoun pwiin we itan Alfred a wii.

Iteitan, ám famili aua kan fiti ekkewe mwich me ló afalafal imw me imw pwe aupwe áiti ngeni aramas ewe ápilúkúlúk mi amwarar lón Paipel fán iten mwachkkan. Án semei kewe me inei leenien áppirú me ar emiritikem a álisikem le tongei Jiowa. Ngang me fefinei we, Dorothy, aua wiliti chón afalafal lupwen a wonu ierim. Lón 1943, ua fiti ewe Sukulen Angangen Chón Kraist, ewe a kerán poputá lón ena ier.

 A mmen watte lamoten ekkewe mwichelap lón manawem. Ua chechchemeni ewe mwichelap lón 1949 a fis lón Sioux Falls, South Dakota. Pwiich Grant Suiter a eáni ewe afalafal itelapan “Sia Arap Ngeni ewe Sópwólóón Lap Seni Met Ka Ekieki!” A menlapei pwe mi lamot meinisin Chón Kraist mi fen fangóló manawer ngeni Kot ar repwe áeá manawer le afalafala ewe kapas allim usun Mwúún Kot. Mwirin ena, ua fangóló manawei ngeni Jiowa. Iwe, ua papatais lón ewe mwichelap mi fis lón November 12, 1949, lón Brookings. Ina ewe popun ua nónnóm lón ewe watteen imwen iseis lón eú leenien atake mi fókkun patapat, ewe ua apwóróusa me lepoputáán. Ám fémén aua witiwit pwe aupwe papatais lón ewe watteen leenien konik mi ffér seni mechá.

Ua filatá ai upwe achocho pwe upwe pioneer. Iwe, ua poputá lón January 1, 1952 lupwen a 15 ieri. Ewe Paipel a apasa: “Eman mi chiechi ngeni aramas mi tipachem epwe tipachemela.” Mi wor chómmóng mi tipachem lón ai famili mi álisiei lón ai filatá ai upwe pioneer. (SalF. 13:20) Fán chómmóng ua fiti uncle Julius le afalafal, i a 60 ierin. Inaamwo ika a kon watte ierin seniei, nge aua pwapwa le mwin lón ewe angangen afalafal. Ua káé seni chómmóng mettóch me minne a silei lón manawan. Ekiseló mwirin, Dorothy a pwal pioneer.

Lekúkkúni, semei kewe me inei ra kan etiwa chómmóng chónemmwen mi wisen sáifetál me pwúlúwer kewe pwe repwe nónnóm rem. Eú pwúpwúlú iter Jesse me Lynn Cantwell ra fókkun álisiei. Ra tongeei me apéchékkúlaei. Lupwen ra chuuri ekkewe mwichefel mi kkan ngenikem, fán ekkóch ra etiwaei ai upwe fitiir le afalafal. Ua fókkun pwapwaiti ám fansoun angangfengen! Ua mochen upwe awatteeló ai angang ngeni Kot usun chék iir me ua mochen pioneer.

Mwirin Bud Miller a wisen néúm chónemmwen mi wisen sáifetál. Lupwen iir me pwúlúwan we Joan ra chuuri ám mwichefel, a 18 ieri. Lón ena atun a lamot upwe chuuri eú kúmiin aramas mi wisen apwúngaló ié kewe repwe fiti ewe mwichen soufiu. Ra mochen upwe féri ekkóch angang ua meefi pwe mi ú ngeni án Jesus we allúk ach sisap angolong lón politics. Nge ua mochen upwe afalafala ewe kapas allim usun Mwúún Kot. (Joh. 15:19) Iwe, ua tingorer ar repwe apwúngaló pwe  ngang upwe nóm lón tettelin emén chón afalafal seni lamalam.

Ua fókkun pwapwa lupwen Pwiich Miller a ereniei pwe epwe fitiei le ló chuuri ena kúmi. I emén ese kan nisássáw me ese niwokkusiti aramas. A pwal silefichi ewe Paipel. An fitiei a fókkun apworaei! Iwe mwirilóón ena mwich, lón ewe summer lón ewe ier 1954, ena kúmi a etiwa ai we tingor. Iei a suuk ngeniei ai upwe alapaaló ai angang ngeni Jiowa.

Ekiseló mwirin ena, ua ketiw pwe upwe angang lón Bethel, lón ewe leeni ra kan eita ngeni lón ena atun Watchtower Farm, lón Staten Island, New York. Ua angang ikena ie ina epwe úkúkún úlúngát ier. A mmen apwapwa ai nónnóm ikena pokiten ua chuuri me angangfengen me chómmóng pwiich kewe mi tipachem.

Mi wor lón ena leenien atake lón Staten Island eú radio station itan WBBR. Chón Pwáraatá Jiowa ra anganga ena radio station seni 1924 ngeni 1957. Mi chék wor 15 ngeni 20 chón Bethel ra angang lón ena leenien atake. Lape ngenikem ám chék alúwél me ause kon sipeéch le angang. Nge emén pwiich chinnap mi kepit itan Eldon Woodworth, i chienem le angang. I usun semem me a áiti ngenikem chómmóng mettóch. Fán ekkóch lupwen a wor osukosuk lefilem, Pwiich Woodworth a kan apasa, “A mmen amwarar minne ewe Samol a féfféri inaamwo ika a nénnéúnéú aramas rese unuséch.”

Pwiich Frederick W. Franz a pwal nóm rem me a álisikem meinisin. I emén mi tipachem me fókkun silefichi ewe Paipel. A áfánni emén me emén leim. Iten néúm kuk Harry Peterson. A mecheres ngenikem ám aupwe néúnéú ena last name Peterson lap seni an we wesewesan Papargyropoulos. Pwal i emén mi kepit me a fókkun sani ewe angangen afalafal. Pwiich Peterson a apwénúetáéchú an angang lón Bethel nge a pwal achocho lón angangen afalafal. A kan anéúnéú fitepúkú puk iteiten maram. A pwal silefichi ewe Paipel me pélúweni chómmóng ám kapas eis.

Lón ena leenien atake, aua ammólnatá ekkewe féún irá me ekkewe iasai me waalong lón tiin. Aua kan féri ina epwe 45,000 tiinnen féún irá me iasai  iteiten ier fán iten unusen chón Bethel. Ua angang ren Etta Huth, emén pwiich fefin mi fókkun tipachem. A féri ekkewe recipe fán iten ám ammólnatá ekkewe féún irá me iasai. Pwiich kewe fefin mi nóm arap ngeni ewe leenien atake ra kan etto angang rem. Etta a kan álillis lón akkóten ar angang. Inaamwo ika Etta a silei chómmóng mettóch usun ei angang, nge iteitan a súféliti ekkewe chón emmwen lón ewe leenien atake. A isetiw eú leenien áppirú mi múrinné fán item meinisin.

Angela Romano, emén lein pwiich kewe fépwúl mi kan etto álillis lón ewe leenien atake. Etta a álisi lupwen a tolong lón ewe enlet. Ám me Angie aua pwúpwúlú lón April 1958, me aua fen pwapwaiti ám angang ngeni Jiowa lón úkúkún 58 ier. Lón ekkena ier, án Angie tuppwél ngeni Jiowa a apéchékkúla ám ririin pwúpwúlú. I emén mi tipachem me ua tongeni enletin lúkúlúk wóón, ese lifilifil met sókkun weires aua nónnóm lón.

Lupwen pwiich kewe ra améméló ewe WBBR lón Staten Island lón 1957, ren och fansoun ua angang lón Brooklyn Bethel. Mwirin, aua pwúpwúlú me Angie, iwe ua ló seni Bethel. Lón úkúkún úlúngát ier, aua pioneer lón Staten Island. Ren ekkóch fansoun, ua mwo nge angang ngeni ekkewe mineféén owner mi eáni ewe radio station, nge a iteni WPOW.

Ám me Angie aua ámecheresaaló nónnómun manawem pwe aupwe tongeni ló ngeni ia chék mi wor osupwangen álillis ie. Iwe, lón 1961 aua etiwa ewe etiwetiw ám aupwe wisen special pioneer lón Falls City, Nebraska. Nge ekiseló mwirin ám tori ena leeni, aua ketiw ám aupwe ló South Lansing, New York, pwe aupwe fiti ewe Kingdom Ministry School úkúkún eú maram. Aua pwapwaiti ewe káit aua angei, me tittipem pwe mwirin ewe sukul aupwe liwiniti Nebraska. Ina minne, aua fókkun máirú lupwen aua angei pwal eú mineféén wis. Aupwe ló misineri lón ewe fénú Cambodia! Lón ena fénú mi ling lón Étiwéérún Asia, aua kúna, rongorong, me neni mettóch minefé ngenikem. Aua wesewesen mochen esile ngeni aramas ewe kapas allim usun ewe Mwúún Kot.

Nge mwirin, a fis ekkesiwil lón mwúún Cambodia, iwe aua ló South Vietnam. Mwirin ruu ier, ua fókkun semmwen, iwe mi elichippúng pwe a lamot ám aupwe liwiniti Merika. A lamot ngeniei och fansoun pwe upwe péchékkúlsefál. Iwe lupwen ua péchékkúl, aua poputá le pioneer sefál.

Lón March 1965, aua poputá le féri ewe angangen sáifetál me chuuri mwichefel. Lón úkúkún 33 ier, ngang me Angie aua pwapwa le féri ei angangen sáifetál me álillis lón ekkewe mwichelap. Ua pwapwaiti ei angang, pún me rei mi fókkun apwapwa ewe fansoun mwichelap. Ren fite ier aua chuuri ekkewe mwichefel lón ewe telinimw New York me ekkewe mi kkan ngeni, me chómmóng ekkewe mwichelap ra fis lón Yankee Stadium.

Lón manawem, ám me Angie aua angei chómmóng wis minefé me mi weires. Lón 1995, ua ketiw ai upwe wisen sense fán iten ewe Ministerial  Training School. Úlúngát ier mwirin, aua ketiw pwe aupwe nóm lón Bethel. Mwirin 40 ier, ua pwapwa le nónnómsefál lón Bethel, ikewe ua poputááni ai special full-time service ie. Ren och fansoun, ua angang lón ewe Pekin Túmúnú Angangen Afalafal me ua pwal wisen sense lón chómmóng ekkewe sukul. Lón 2007, ewe Mwichen Soupwúngúpwúng a fératá ewe Theocratic Schools Department (Pekin Sukul) pwe epwe túmúnú meinisin ekkewe sukul mi fis lón Bethel. Iwe ren fite ier, ngang ua wisen chónemmwen lón.

Lón ekkewe ier kukkuto chék a fis chómmóng siwil lón ekkewe sukul lón Bethel. Ewe Sukul fán iten Ekkewe Mwán mi Ásimaw a poputá lón 2008. Me mwirin ruu ier, lap seni 12,000 mwán mi ásimaw ra fiti ena sukul lón Patterson me Brooklyn Bethel. Iei ena sukul a fiffis lón pwal chómmóng leeni. Lón 2010 ewe sukul Ministerial Training School a siwil itan ngeni Sukulen Paipel fán Iten Ekkewe Mwán mi Lipich. Pwal och, eú mineféén sukul a poputá itan Sukulen Paipel fán Iten Chón Kraist mi Pwúpwúlú.

Lón September 2014, ra ochufengeni ekkena ruu sukul me a iteni Sukulen Chón Afalafala ewe Mwú. Pwiich kewe mi pwúpwúlú me pwiich kewe mwán me fefin mi lipich ra tongeni fiti ena sukul. Chómmóng pwiich kewe lón sókkopaten fénú ra pwapwa le rongorong pwe ena sukul epwe fis lón pwisin fénúer. A mmen apwapwa ach silei pwe mi pwal suuk ngeni chómmóng ar repwe fiti ekkena sukul. Ua fókkun kilisou ren ai chuuri chómmóng ra fen féri ekkesiwil lón manawer pwe repwe tongeni fiti ekkeei sukul.

Lón ai nesékúriti manawei me mwen ai we papatais lón ewe leenien atake mi patapat tori lón ei fansoun, ua kilisou ngeni Jiowa ren ekkewe aramas mi tipachem ua chuuriir. Ra álisiei le silefichi Jiowa me ámúrinnééló ai angang ngeni. Ekkóch leir mi kúkkún ieriir seniei nge ekkóch ra watte seniei. Me chómmóng leir mi sókkóló eérenien fénúer seni ai eéreni. Nge ua kúna lón minne ra eáni ekiek me ar féffér pwe ra fókkun tongei Jiowa. Ua fókkun kilisou pwe a wor chómmóng chiechiei lein néún Jiowa kewe aramas, iir mi tipachem me ua tongeni káé seniir.