1. Met a péút seni Atam me Efa, iwe met mwirilóón?

ITÁ ién ka meefi pwe epwe wisen apwúngaló minne mi éch me minne mi ngaw? Lupwen Atam me Efa ra ocheei féún ewe iráán silei éch me ngaw, ra affata pwe rese lúkúlúk wóón Jiowa me an kewe allúk. Ra filatá le pwisin apwúngaló met mi éch me ngaw. (Ken. 3:22) Nge nengeni met a péút seniir. A péút seniir ar ririéch ngeni Jiowa. A pwal péútúló ar ápilúkúlúkún kúna manaw esemuch, me néúr kewe ra pwal álemwiri tipis me máló. (Rom 5:12) Minne Atam me Efa ra filatá a atolonger lón riáfféú.

2-3. (a) Met ewe iunok re Itiopia a féri lupwen Filip a afalafal ngeni? (b) Ikkefa ekkewe feiéch a torikich lupwen sia papatais, iwe ikkefa ekkewe kapas eis sipwe pwóróus wóór?

² Ekieki sókkofesenin met Atam me Efa ra féri me met ewe iunok re Itiopia a féri lupwen Filip a afalafal ngeni. Ewe iunok a fókkun aúcheani met Jiowa me Jesus ra féri fán ásengesin, ina popun a mwittir filatá le papatais. (Föf. 8:34-38) Lupwen sia fangóló manawach ngeni Kot me papatais, sia usun ewe iunok le affata meefiach ngeni Jiowa. Sia pwáraatá ach kilisou ren met Jiowa me Jesus ra féri fán itach. Sia pwal pwári pwe sia lúkúlúk wóón Jiowa me mirititi pwe itá i epwe wisen apwúngaló met mi éch me met mi ngaw.

³ Ekieki usun ekkewe feiéch a torikich lupwen sia angang ngeni Jiowa! Eú me leir, ina ach ápilúkúlúkún eáni meinisin met ekkewe a péút seni Atam me Efa, kapachelong ewe ápilúkúlúkún manaw esemuch. Pokiten sia lúkú Jesus Kraist, Jiowa a omusaaló ach kewe tipis me a ngenikich eú mwelien  letip mi limeliméch. (Mat. 20:28; Föf. 10:43) Sia pwal chóni án Jiowa we famili, familien néún kewe chón angang, iir mi eáni ewe ápilúkúlúk mi amwarar fán iten mwachkkan. (Joh. 10:14-16; Rom 8:20, 21) Nge inaamwo ika a fókkun ffat ekkewe feiéch sipwe eáni nge ekkóch mi fen silei Jiowa ra pireir le féri met ewe iunok re Itiopia a féri. Met a tongeni eppeti ar repwe papatais? Me ifa usun ra tongeni pworacho ngeni ekkena minen eppet?

4-5. Ikkefa ekkewe weires ewe alúwél itan Avery me ewe fépwúl itan Hannah ra kúna?

⁴ Lúkúlúkúmmang. Semen me inen Avery kewe iir Chón Pwáraatá Jiowa. Seman we a mmen itéch pokiten i emén sam mi tong me i emén mwán mi ásimaw mi fókkun lipwákéch. Nge, Avery a pireir le papatais. Pwata? A erá: “Ua meefi pwe use tongeni usun itéchún semei we.” Avery a lúkúlúkúmmang ika epwe tongeni apwénúetá ekkewe wis neman epwe eáni. A erá: “Ua lólilen ika repwe ewisa ngeniei ai upwe iótek mwen chómmóng aramas, eáni afalafal, are emmweni ewe mwichen afalafal.”

⁵ Hannah, 18 ierin, a pwal fókkun lúkúlúkúmmang. A mááritá fán túmúnúen seman kewe me inan, iir chón angang ngeni Jiowa. Inaamwo ika a ina usun nónnómun Hannah, nge a tipemwaramwar ika epwe tongeni apwénúetá án Jiowa kewe allúk. Pwata? Hannah a eáni ewe memmeef pwe i emén ese wor aúchean. Fán ekkóch, a fókkun letipechou ina popun a kan pwisin ekinása are efeiengawa inisin, iwe fen alapaaló chék an osukosuk. A erá: “Use pwár ngeni emén met ua féri, pwal mwo nge ngeni semei kewe me inei. Ua ekieki pwe Jiowa esap fókkun tongeni tongeei pokiten met ua kan féri ngeni inisi.”

6. Met a eppeti Vanessa an epwe papatais?

⁶ Etipetipaen chiechi. Iei alon Vanessa 22 ierin: “Ua fókkun chiechiéch ngeni emén ua sissilei ren arapakkan engol ier.” Iwe nge, chienen Vanessa na ese álisi lón an achocho ngeni papatais. Vanessa a letipechou ren ena, me a apasa: “A mmen weires ai upwe kúnékún chiechiei, me ua lólilen pwe ika use chúen chiechi ngeni chiechiei na, iwe esap chúen wor ié upwe chiechiéch ngeni.”

7. Met emén fépwúl itan Makayla a niwokkus ren, me pwata?

⁷ Niwokkusun ttur lón tipis. A nimu ierin Makayla lupwen mongean we a katowu. Lón an mámmááritá a kúna ifa usun minne mongean we a féri mi fókkun eletipechowu seman kewe me inan. A erá: “Ua lólilen ika  upwe papatais, iwe upwe katowu ika upwe féri eú tipis, me alapaaló letipechoun semei kewe me inei.”

8. Met emén alúwél itan Miles a niwokkus ren?

⁸ Niwokkusun kúna koput. Semen Miles we me pwúlúwen seman na we, iir chón angang ngeni Jiowa, nge wesetáán inen Miles we ese angang ngeni Jiowa. Miles a erá: “Ua nóm ren inei we ren úkúkún 18 ier, me ua niwokkus le ereni pwe ua mochen papatais. Ua fen kúna met a féri lupwen semei we a wiliti emén Chón Pwáraatá. Iwe ua niwokkus ika epwe aosukosukaei.”

9. Ese mwáál met epwe fis lupwen ka silei úkúkún án Jiowa mosonottam me tong?

⁹ Atam me Efa ra filatá ar resap angang ngeni Jiowa pokiten rese ámááraatá ewe tong mi núkúchar fán itan. Inaamwo ika a ina usun, nge Jiowa a chúen mut ngeniir ar repwe manaw ren fitu fansoun pwe repwe tongeni oupwatiw néúr kewe me pwisin filatá ifa usun repwe ámááriiretá. Iwe mwirilóón án Atam me Efa filatá le imu seni Jiowa, a ffatoló me mwirin pwe ra fókkun miritingaw. Néúr we mwánichi a nieló pwiin we ese wor tipisin, me mwirin och fansoun, féfférún akkachofesá me án aramas ekieki chék pwisin iir a nemeniireló. (Ken. 4:8; 6:11-13) Iwe nge, Jiowa a awora ewe alen ngaseló fán iten meinisin mwirimwirin Atam me Efa kewe, iir kewe mi mochen angang ngeni. (Joh. 6:38-40, 57, 58) Atun a lapóló óm silei úkúkún án Jiowa mosonottam me tong, iwe ese mwáál óm tong ngeni epwe pwal lapóló. Kopwe mochen filatá le fangóló manawom ngeni Jiowa, me oput met Atam me Efa ra féri.

10. Pwata óm ekilonei Kölfel 19:7 a tongeni álisuk le angang ngeni Jiowa?

¹⁰ Sópweló le kákkáé usun Jiowa. Lapólóón óm káé usun Jiowa, pwal ina péchékkúlelóón óm lúkúlúk pwe kopwe sópwéch lón óm angang ngeni. Iei alon Avery, ewe sia pwóróus usun me mwan: “Ai lúkúlúk a lapóló ren ai ákkálleani me ekilonei ewe pwon lón Kölfel 19:7.” (Álleani.) Lupwen Avery a kúna usun án Jiowa apwénúetá ena pwon, a  péchékkúleló an tong ngeni. Tong ese chék apéchékkúlaló ach lúkúlúk, nge a pwal álisikich le nefótófót wóón Jiowa me met a mochen. Iei alon Hannah, ewe sia pwóróus usun akkomw: “Seni ai pwisin álleani ewe Paipel me pwisin káé, ua poputá le mirititi pwe lupwen ua efeiengawa pwisin inisi, ua pwal ámeteki letipen Jiowa.” (1 Pet. 5:7) Hannah a wiliti emén “chon föri kapasen Kot.” (Jas. 1:22) Iwe met mwirilóón? A erá: “Lupwen ua kúna feiéchún ai álleasochisi Jiowa, a péchékkúleló ai tongei. Iei, ua fókkun lúkúlúk pwe Jiowa epwe emmweniei fansoun meinisin lupwen ua osupwangen álillis.” Hannah a pworacho ngeni an mochen efeiengawa pwisin inisin. A fangóló manawan ngeni Jiowa me papatais.

11. Met Vanessa a féri pwe epwe tongeni kúnékún chiechian mi múrinné, me met sia tongeni káé seni ena?

¹¹ Filiéch chiechiom. Vanessa, ewe sia pwóróus usun me mwan, mwirin och fansoun a mirititi pwe chiechian we i eú minen eppet lón an mochen angang ngeni Jiowa. Ina minne, a filatá an esap chúen chiechi ngeni. Nge Vanessa a pwal achocho le kút minefé chiechian me lón ewe mwichefel. A erá pwe án Noa me an we famili leenien áppirú, a álisi. A apasa: “Aramas rese tongei Jiowa ra pwennifeillir, nge ra pwisin chiechiéchfengen lefiler.” Mwirin án Vanessa papatais, a pioneer. Iwe iei alon iei: “Ai féri ekkena mettóch a álisiei le kúnékún chiechiei esap chék lón pwisin ai we mwichefel, nge pwal lón ekkewe ekkóch mwichefel.” Ka pwal tongeni kúnékún chiechiom mi múrinné ren óm achocho úkúkún óm tufich lón ewe angang Jiowa a ewisa ngenikich le féri.​—Mat. 24:14.

12. Met sókkun niwokkus Atam me Efa rese eáni, iwe met mwirilóón?

¹² Eáni ekiek mi pwúng usun ewe mettóch niwokkus. Mi wor ekkóch sókkun niwokkus mi éch ach sipwe eáni. Áwewe chék, a lamot ach sipwe niwokkus ach sisap eletipengawa Jiowa. (Kölf. 111:10) Ika Atam me Efa ra eáni ena sókkun niwokkus, iwe itá resap ú ngeni Jiowa. Nge ra fen ú ngeni. Mwirin ar féri ena, a neló meser pwe ra mirititi pwe iir chón tipis. Repwe fen chék atoto ngeni  mwirimwirin kewe tipis me máló. Pokiten ra tongeni kúna, are weweiti met a fis, iwe ra sáwásini ar seneló me ra pwélú inisiir.​—Ken. 3:7, 21.

13-14. (a) Pwata ese pwal lamot ach sipwe fókkun niwokkusiti máló me ren 1 Petrus 3:21? (b) Ikkefa ekkewe popun sia tongei Jiowa?

¹³ Mi lamot an epwe wor rech ewe niwokkus ach sisap eletipengawa Jiowa, nge esap weween pwe sipwe fókkun niwokkus ren ach sipwe máló. Jiowa a atufichi ach sipwe kúna manaw esemuch. Ika sia féri tipis, nge sia enletin aier, iwe Jiowa epwe omusakicheló. Epwe omusakich pokiten ach lúkú án Néún we asorun méén kepich. Sia fókkun tongeni pwáraatá ach lúkú ren ach fangóló manawach ngeni Kot me papatais.​—Álleani 1 Petrus 3:21.

¹⁴ A wor chómmóng popun ach sipwe tongei Jiowa. Ese chék awora ngenikich ekkewe chómmóngun mettóch mi múrinné sia pwapwaiti iteiten rán, nge a pwal áiti ngenikich ewe enlet usun I me minne a tipeni. (Joh. 8:31, 32) A pwal awora ngenikich ewe mwichefelin Chón Kraist pwe epwe emmwenikich me álisikich. A álisikich le likiitú fán ach kewe osukosuk, me ngenikich ewe ápilúkúlúkún kúna manaw esemuch lón mwachkkan. (Kölf. 68:19; Pwär. 21:3, 4) Lupwen sia ekilonei úkúkún met Jiowa a fen féri fán itach ren an pwári an tongekich, a amwékútúkich ach sipwe pwal tongei. Iwe, lupwen sia tongei Jiowa, sia silei ifa usun sipwe eáni ewe ekiek mi pwúng usun niwokkus. Sia niwokkus le ámeteki letipen ewe Emén sia fókkun tongei.

15. Ifa usun Makayla a pworacho ngeni an niwokkusun ttur lón tipis?

¹⁵ Makayla, ewe sia pwóróus usun me mwan, a pworacho ngeni an niwokkusun ttur lón tipis lupwen a weweiti úkúkún án Jiowa tipemecheres le omusaaló tipis. A erá: “Ua mirititi pwe kich meinisin sise unuséch me sia kan mwáálliló. Nge ua pwal weweiti pwe Jiowa a tongekich me epwe omusakich pokiten ewe méén kepich.” An tong ngeni Jiowa a amwékútú le fangóló manawan me papatais.

16. Ifa usun Miles a kúna álillis le pworacho ngeni an niwokkusun kúna koput?

¹⁶ Miles, ewe a niwokkus ika inan we epwe oput an mochen papatais, a kútta álillis seni emén chónemmwen mi wisen sáifetál. Iei alon usun pwiich na: “A pwal mááritá lón ewe sókkun famili inan we esap emén chón ngang ngeni Jiowa. A álisiei le ekieki ifa usun upwe áwewe ngeni inei we pwe ai papatais ina pwisin filiei, nge saminne semei we a echchimwaei.” Inen Miles we ese sani met a filatá. Nge ló, ló, ló, a lamot ngeni Miles an epwele mwékút seni imwen inan na we, nge a chúen kamwéchúnnúk wóón minne a fen filatá. A erá: “Ai kákkáé féfférún Jiowa kewe mi múrinné fán itei, a achchúngú letipei. Lupwen ua ekilonei usun án Jesus asorun méén kepich,  ua mirititi úkúkún án Jiowa tongeei. Ena mettóch a amwékútúei le fangóló manawei ngeni Jiowa me papatais.”

17. Met a suuk ngenikich meinisin?

¹⁷ Lupwen Efa a ocheei féún ewe irá lón Eten, a ú ngeni Seman we. Lupwen Atam a fiti, a pwári pwe a aúcheangawa meinisin ekkewe mettóch mi múrinné Jiowa a féri fán itan. A suuk ngenikich meinisin ach sipwe pwáraatá pwe sise fókkun tipeeú ngeni met Atam me Efa ra féri. Ren ach papatais, sia pwári ngeni Jiowa pwe sia lúkú pwe sia nóm fán nemenian lón an apwúngaló met mi éch me met mi ngaw fán itach. Sia ánnetatá pwe sia tongei me lúkúlúk wóón Semach na.

18. Ifa usun kopwe sópwéch lón óm angang ngeni Jiowa?

¹⁸ Mwirin ach papatais, mi lamot sipwe sópweló le féri met Jiowa a mochen, nge esap fen pwisin mochenich. Fite million néún Kot kewe chón angang ra féri ena iteiten ier. Ka pwal tongeni áppirúúr ika kopwe sópweló le alapaaló óm weweiti án Kot we Kapas ewe Paipel, chiechi ngeni pwiium kewe Chón Kraist iteitan, me tinikken le afalafal ngeni aramas usun Semom we mi tong. (Ipru 10:24, 25) Lupwen ka féri kefil, aúseling ngeni emmwenien Jiowa seni an we Kapas me an we mwicheich. (Ais. 30:21) Iwe, mettóch meinisin kopwe féri epwe sópwéch.​—SalF. 16:3, 20.

19. Met kopwe kan ekkekieki usun, me pwata?

¹⁹ Lupwen ka kan ekkekieki úkúkún ekkewe feiéch ka angei seni án Jiowa emmwen, epwe péchékkúleló óm tongei I me an kewe allúk. Iwe, esap wor met Satan epwe tongeni eáni etipetip ngonuk ren an epwe erikukoló seni Jiowa. Anchangei manawom engeréú ier seni ikenái. Kopwe nesékúrú óm filatá le papatais pwe ina ewe kefil ka féri mi múrinné seni meinisin!