1-2. Me ren Föför 8:27-31, 35-38, met a amwékútú ewe re Itiopia le papatais?

KA MOCHEN papatais ren óm kopwe emén néún Kraist chón káé? Tong me kilisou a amwékútú chómmóng le féri ena. Áwewe chék ren pwóróusen emén néúwis mi angang ngeni ewe kiwinen Itiopia.

² Ewe re Itiopia a mwittir papatais lupwen a mirititi seni ewe Paipel lamoten an epwe papatais. (Álleani Föför 8:27-31, 35-38.) Met a amwékútú? A ffat pwe a aúcheani ewe Kapasen Kot, pún a álleani ewe puken Aisea lón an sái wóón waan we woken. Lupwen Filip a fós ngeni ena mwán, a aúcheani met Jesus a féri fán itan. Nge pwata ena néúwis a sái ngeni Jerusalem? Pokiten a fen wor an tong ngeni Jiowa. Pwata sia silei? A kerán wes le fel ngeni Jiowa lón Jerusalem. Ese mwáál a fen likitaló án an we famili we lamalam me a chóni ewe chék eú mwú mi angang ngeni ewe Kot mi enlet. An na tong ngeni Jiowa a amwékútú le féri pwal eú mettóch mi lamot, a papatais me wiliti emén néún Kraist chón káé.​—Mat. 28:19.

3. Met a tongeni eppeti emén seni an epwe papatais? (Ppii ewe pwóór itelapan “ Met Masouen Letipom?”)

³ Óm tongei Jiowa a tongeni amwékútuk le papatais. Nge tong a pwal tongeni eppeti sonuk óm kopwe papatais. Ifa usun? Ekieki ekkeei mettóch. Neman ka fókkun tongei chón óm famili me chiechiom kewe rese angang ngeni Jiowa, iwe neman ka lólilen pwe ika kopwe papatais, iwe  repwe oputok. (Mat. 10:37) Are neman ka fókkun sani ekkewe sókkun féffér Kot a oput me neman a weires ngonuk óm kopwe úkú seniir. (Kölf. 97:10) Are neman lón óm mámmááritá ka kan fiti apwapwaan ráninipin mi riri ngeni lamalam chofona. Neman ka pwosiiti ekkena fansoun. Iwe, neman a weires ngonuk óm kopwe likitaló ekkewe eéreni mi eletipengawa Jiowa. (1 Kor. 10:20, 21) Iwe iei ewe kapas eis kopwe pwisin eisinuk: “Met are ié ua kon tongei are aúcheani lap seni meinisin?”

4. Met epwe ákkáeúin amwékútuk le papatais?

⁴ A wor chómmóng mettóch ka tongeni tongei me aúcheani. Áwewe chék, pwal mwo nge me mwen óm kesaamwo káé Paipel ren Chón Pwáraatá Jiowa, neman ka fókkun aúcheani ewe Paipel, me neman ka fókkun tongei Jesus. Iwe iei, ka fen sissilei Chón Pwáraatá Jiowa, iwe neman ka fókkun sani le chiechi ngeniir. Nge óm tongei ekkena mettóch me chókkana, neman esap amwékútuk le fangóló manawom ngeni Jiowa me papatais. Ewe mettóch epwe ákkáeúin amwékútuk le papatais, ina óm tongei Jiowa Kot. Lupwen ka tongei Jiowa lap seni meinisin, kosap mut ngeni emén are och mettóch an epwe eppetuk le angang ngeni. Tong ngeni Jiowa epwe amwékútuk le papatais, me epwe pwal álisuk le tuttuppwél ngeni mwirin óm papatais.

5. Ikkefa ekkewe kapas eis sipwe pwóróus wóór?

⁵ Jesus a erá pwe sipwe tongei Jiowa ren unusen letipach, manawach, ekiekich, me péchékkúlach. (Mark. 12:30) Ifa usun kopwe tongeni ámááraatá ena esin tong me súfél fán iten Jiowa? Ach ekieki án Jiowa tongekich a amwékútúkich le pwal tongei. (1 Joh. 4:19) Met kopwe pwal meefi me féri mwirin óm ámááraatá ena tong fán iten Jiowa? *

6. Me ren Rom 1:20, ifa eú alen óm kopwe tongeni káé usun Jiowa?

⁶ Káé usun Jiowa seni férian kewe. (Álleani Rom 1:20; Pwär. 4:11) Ekilonei tipachemen Kot mi pwá lón napanapen an féri ekkewe irá me man. Kopwe ekis káé usun amwararen fférún inisin aramas. (Kölf. 139:14) Ekieki usun úkúkún péchékkúlen férien Jiowa we akkar. Ren enletin, ewe akkar ina ewe fúú mi kon kan ngenikich me lein ekkewe fite fite billion fúú fán láng. * (Ais. 40:26) Atun óm ekieki ekkena mettóch, epwe lapóló óm súféliti Jiowa. Iwe nge, óm silei pwe Jiowa a tipachem me manaman ina chék eú kinikinin lóngólóngun óm riri ngeni. Ren óm kopwe ámááraatá óm tong mi núkúchar ngeni Jiowa, a lamot kopwe alapaaló óm sissilei i.

7. Met a lamot kopwe lúkúlúkú ren óm kopwe unusen tongei Jiowa?

⁷ Mi lamot kopwe lúkúlúk pwe Jiowa a tongeok wóón wilikapom. Mi weires óm kopwe lúkú pwe ewe Chón Fératá láng me fénúfan a sileok me tongeok? Ika ina, iwe kopwe chemeni pwe Jiowa “esap wesewesen toau seni eman me eman leich.” (Föf. 17:26-28) A “etittina letip meinisin,” me a pwon ngonuk pwe ‘are ka kul ngeni, i epwe etiwok.’ (1 Kron. 28:9) Pwúngún, ewe popun ka kákkáé ewe Paipel iei, pún Jiowa a lukikoto.  (Joh. 6:44) Lapólóón óm aúcheani meinisin minne Jiowa a féri fán itom, epwe pwal ina lapólóón óm tongei.

8. Ifa usun ka tongeni pwári óm kilisou ngeni Jiowa ren an tong?

⁸ Ach fós ngeni Jiowa lón iótek ina eú alen ach sipwe pwári ngeni ach kilisou ren an tong. Óm tongei Kot epwe lapóló lupwen ka ereni usun óm lólilen me kilisou ngeni ren meinisin met a féri fán itom. Me ámi chiechi me Jiowa epwe péchékkúleló atun ka kúna an pélúweni óm kewe iótek. (Kölf. 116:1) Kopwe lúkúlúk pwe a weweituk. Nge, ren óm kopwe arap ngeni, a pwal lamot óm kopwe weweiti pwata a efich, oput, me féri ekkóch mettóch. A pwal lamot óm kopwe silei met a mochen kopwe féri. Ka tongeni chék féri ena ren óm káé an we Kapas, ewe Paipel.

9. Ifa usun ka tongeni pwári pwe ka aúcheani ewe Paipel?

⁹ Alapaaló óm aúcheani án Kot we Kapas, ewe Paipel. Ewe chék Paipel a masou ren ewe enlet usun Jiowa me met a tipeni fán itom. Ka pwári óm aúcheani ewe Paipel ren óm álleani iteiten rán, ammólnatá óm káé, me ren óm apwénúetá minne ka káé. (Kölf. 119:97, 99; Joh. 17:17) A wor óm kókkótun pwisin állea Paipel? Ka kan fiti ena kókkót me nochchei óm kopwe állea Paipel iteiten rán?

10. Pwata ewe Paipel a sókkóló seni puk meinisin?

¹⁰ Eú popun ewe Paipel a sókkóló seni puk meinisin, pún a mak lón pwóróusen Jesus seni met aramas ra pwisin kúna atun a nóm fénúfan. Ina chék ewe puk mi pwúng mi áweweei met Jesus a féri fán itom. Atun óm káé usun met Jesus a apasa me féri, ese mwáál kopwe mochen chiechi ngeni.

11. Ifa usun ka tongeni alapaaló óm tongei Jiowa?

¹¹ Ika ka alapaaló óm tongei Jesus, iwe epwe pwal lapóló óm tongei Jiowa. Pwata? Pokiten Jesus a unusen áppirúfichi napanapen Seman we. (Joh. 14:9) Iwe, lapólóón óm káé usun Jesus, epwe pwal ina lapólóón óm weweiti me aúcheani Jiowa. Ekieki usun án Jesus tongei ekkewe sókkun  aramas ese wor iter, áwewe chék ren ekkewe mi mwelele, semmwen, me ekkewe ese wor maner. Pwal ekieki usun ekkewe éúréúr a ngonuk me ifa usun a émúrinnéló manawom lupwen ka álleasochisi.​—Mat. 5:1-11; 7:24-27.

12. Neman met epwe fis atun ka káé usun Jesus?

¹² Ese mwáál óm tongei Jesus epwe lapóló ika ka ekilonei minne a fen pennúkú fán itom pwe epwe musoló ach kewe tipis. (Mat. 20:28) Lupwen ka weweiti pwe Jesus a tipemecheres le máló fán itom, neman epwe amwékútuk le aier me tingorei Jiowa an epwe omusaaló tipisum. (Föf. 3:19, 20; 1 Joh. 1:9) Atun a lallapóló óm tongei Jesus me Jiowa, kopwe pwal mochen chiechi ngeni chókkewe mi pwal ina usun meefier.

13. Met Jiowa a awora ngonuk?

¹³ Alapaaló óm tongei chókkewe mi tongei Jiowa. Neman chón óm famili me chienom kewe rese angang ngeni Jiowa, resap weweiti pwata ka mochen fangóló manawom ngeni Jiowa. Neman repwe mwo nge ú ngonuk. Jiowa epwe álisuk ren an ngonuk eú famili lón pekin lúkú. Ika ka fitipacheer, kopwe meefi ewe esin tong me álillis mi lamot ngonuk. (Mark. 10:29, 30; Ipru 10:24, 25) Ló, ló, ló, neman chón óm famili repwe pwal fituk le angang ngeni Jiowa me etipeeú manawer ngeni an kewe allúk.​—1 Pet. 2:12.

14. Me ren 1 Johannes 5:3, met ka kúna usun án Jiowa kewe allúk?

¹⁴ Alapaaló óm aúcheani me apwénúetá án Jiowa kewe allúk. Me mwen óm silei Jiowa, neman ka pwisin apwúngaló met mi pwúng me met mi mwáál. Nge iei, ka mirititi pwe án Jiowa kewe allúk ra fen múrinné. (Kölf. 1:1-3; álleani 1 Johannes 5:3.) Ekieki usun án Paipel éúréúr fán iten famili, ekkewe mwán, fefin, me ekkewe nau. (Ef. 5:22–6:4) Atun ka apwénúetá ekkena éúréúr, esele lapóló pwapwaan óm famili? Atun óm álleasochisi án Jiowa emmwen usun kefilin chiechiom, esele múrinnéló féfférum? A lapóló pwapwaóm? (SalF. 13:20; 1 Kor. 15:33) Ese mwáál pélúwen ekkena kapas eis me reom, epwe ewer.

15. Met ka tongeni féri ika a lamot ngonuk álillis ren óm kopwe apwénúetá án Paipel kewe kapasen emmwen?

¹⁵ Neman fán ekkóch kese kon silei ifa usun kopwe apwénúetá ekkewe kapasen emmwen seni Paipel ka kákkáé. Ina popun Jiowa a áeá an we mwicheich le awora ngonuk ekkewe puk mi lóngólóng wóón Paipel repwe álisuk le esilla minne mi pwúng me mwáál. (Ipru 5:13, 14) Lupwen ka álleani me káé ekkena puk, kopwe kúna pwe a tichikitiw ekkewe emmwen mi álilliséch, me ese mwáál kopwe pwal mochen chóni án Jiowa we mwicheich.

16. Ifa usun Jiowa a akkóta néún kewe aramas?

¹⁶ Alapaaló óm aúcheani me peni án Jiowa we mwicheich. Jiowa a akkóta néún kewe aramas ren an ochufengeniir lón ekkewe mwichefel. Néún we Jesus i ewe mékúr. (Ef. 1:22; 5:23) Jesus a filatá eú kúkkún kúmiin mwán mi kepit ar repwe emmweni ewe angang a mochen epwe fis lón ei fansoun. Jesus a eita ngeni ena kúmi “ewe chon angang mi allükülük o tipachem.” Ra fókkun tinikken le féri wiser le amwéngéénuk me túmúnuk lón pekin lúkú. (Mat. 24:45-47) Eú mettóch ewe chón angang mi tuppwél a féri le álisuk, ina an akkóta kefilitáán ekkewe mwán mi ásimaw ar repwe túmúnuk. (Ais. 32:1, 2; Ipru 13:17; 1 Pet. 5:2, 3) Ekkewe  mwán mi ásimaw ra tipemecheres le angang fán itom úkúkún ar tongeni, oururuk, me álisuk le ririéch ngeni Jiowa. Nge eú me lein ekkewe mettóch mi fókkun lamot ra tongeni álisuk wóón, ina ar áiti ngonuk ifa usun kopwe asukula ekkewe ekkóch usun Jiowa.​—Ef. 4:11-13.

17. Me ren Rom 10:10, 13, 14, pwata sia kan fóffós ngeni aramas usun Jiowa?

¹⁷ Álisi ekkewe ekkóch ar repwe tongei Jiowa. Jesus a ereni ekkewe chón tapweló mwirin ar repwe asukula aramas usun Jiowa. (Mat. 28:19, 20) Emén a tongeni álleasochisi ena allúk pokiten a chék meefi pwe ina wisan. Nge atun a lapóló óm tong ngeni Jiowa, kopwe meefieni meefien aposel Petrus me Johannes atun ar erá: “Äm aisap tongeni ükütiu le kapas won met aia püsin küna o rongorong.” (Föf. 4:20) Sia fókkun pwapwa lupwen sia álisi emén le tongei Jiowa. Anchangei pwapwaan ewe chón afalafal Filip lupwen a álisi ewe re Itiopia le silei ewe enlet seni ewe Paipel me papatais! Lupwen ka áppirú Filip me álleasochisi án Jesus allúk óm kopwe afalafal, ka pwáraatá pwe ka mochen wiliti emén Chón Pwáraatá Jiowa. (Álleani Rom 10:10, 13, 14.) Me ikena ie, ese mwáál kopwele eáni ewe kapas eis ewe re Itiopia a eáni: “Met a epeti ai üpwe papatais?”​—Föf. 8:36.

18. Met sipwe pwóróus wóón lón en lesen mwirin ei?

¹⁸ Lupwen ka filatá le papatais, ina ewe mettóch mi kon lamot kopwe féri lón manawom. Nge pokiten a kon watte lamotan, kopwe ekilonei usun weween óm papatais. Met a lamot kopwe silei usun papatais? Met a lamot kopwe féri mwen me mwirin óm papatais? Ekkena kapas eis repwe pélú lón en lesen mwirin ei.