1. Met sókkun sóssót néún Jiowa kewe aramas ra likiitú faar?

KA RIÁFFÉÚ fán eú sóssót mi áweires? Eli emén lón ewe mwichefel a ámetekuk. (Jas. 3:2) Are eli chienom chón angang are chón sukul ra esiitok pokiten ka angang ngeni Jiowa. (1 Pet. 4:3, 4) Are eli chón óm famili ra pineuk seni óm fiffiti ekkewe mwich are fóffós ngeni ekkewe ekkóch usun óm lúkú. (Mat. 10:35, 36) Ika a kon áweires ewe sóssót, iwe eli kopwe chék mochen fangetá. Nge ka tongeni lúkúlúk pwe ese lifilifil sóssót kopwe kúna, nge Jiowa epwe fang ngonuk ewe tipachem me ewe péchékkúl pwe kopwe tongeni likiitú ngeni.

2. Me ren Rom 15:4, ifa usun ach álleani án Kot we Kapas a tongeni álisikich?

² Jiowa a apachaalong lón an we Kapas pwóróusen án ekkewe aramas rese unuséch likiitú fán sóssót mi áweires. Met popun a apacheerelong? Pwe sipwe tongeni káé seniir. Ina met Jiowa a amwékútú ewe aposel Paulus an epwe makkeei. (Álleani Rom 15:4.) Ach álleani ekkena pwóróus, a tongeni atoto ach ápilúkúlúk me péchékkúlen letipach. Iwe nge, ren ach sipwe kúna álilliséchún, ese naf ach sipwe chék álleani ewe Paipel. A lamot ach sipwe mut ngeni ewe Paipel an epwe siwili napanapen ach ekiek me epwe achchúngú letipach. Met sia tongeni féri ika sia kúkkútta emmwen wóón ifa usun sipwe likiitú fán och weires? Sia tongeni féri ekkeei rúáánú mettóch: (1) Iótek, (2) Kachitoni, (3) Ekilon, me (4) Apwénúetá. Sipwe pwóróus wóón ifa usun sipwe féri eú me eú ekkena mettóch. * Mwirin, sipwe áeá ena esin napanapen káé lupwen sipwe  káé usun ekkewe mettóch mi fis ngeni King Tafit me aposel Paulus.

3. Me mwen óm kopwe poputá le álleani ewe Paipel, met kopwe féri, me pwata?

³ (1) Iótek. Me mwen óm kopwe poputá le álleani ewe Paipel, tingorei Jiowa an epwe álisuk le kúna ifa usun ka tongeni kúna álillis seni minne ka álleani. Áwewe chék, ika ka kútta kapasen emmwen wóón ifa usun kopwe likiitú fán eú osukosuk, tingorei Jiowa an epwe álisuk le kúna ekkewe kapasen emmwen lón an we Kapas epwe tongeni álisuk le filatá met kopwe féri.​—Fil. 4:6, 7; Jas. 1:5.

4. Met epwe álisuk le kúna pwe eú pwóróus seni Paipel a wesewesen fis?

⁴ (2) Kachitoni. Jiowa a fang ngenikich ewe tufich mi amwarar le kachitoni lón ekiekich eú pwóróus. Kopwe anchangei met ewe a fiffis me anchangei pwe itá kan en ewe minne pwóróusan ewe ka álleani usun. Óm féri ena, epwe álisuk le kúna pwe ena pwóróus seni Paipel, a wesewesen fis. Sótun anchangei ekkewe mettóch ena emén a kúna me eli met ekkewe a meefi.

5. Met weween ekilon, me ifa usun kopwe féri ena?

⁵ (3) Ekilon. Ekilon a wewe ngeni óm ekiekiéchú minne ka álleani me ekieki ifa usun a weneituk. A álisuk le eririfengeni ekkewe pwóróus me wewefichiti minne ka álleani. Óm álleani ewe Paipel nge ese fiti ekilon, a chék usun óm nengeni ekkewe kisáchen mangak wóón eú cheepel nge kese teifengeni. Ekilon a usun óm teifengeni ekkena kisáchen mangak pwe kopwe kúna unusen eché úf. Ka tongeni eis ekkeei esin kapas eis me pwisin pélúweniir pwe epwe álisuk le ekilon: ‘Met ewe emén ka álleani pwóróusan a féri pwe epwe pwákini an we osukosuk? Ifa usun Jiowa a álisi? Ifa usun upwe tongeni áeá ekkewe lesen ua káé pwe epwe álisiei le likiitú fán ekkewe weires ua kúna?’

6. Pwata a lamot ach sipwe apwénúetá met sia káé?

⁶ (4) Apwénúetá. Jesus a erá pwe ika sise apwénúetá minne sia káé, sia usun emén mwán mi kaú imwan wóón ppi. A angang weires, nge a chék asolapaaló an achocho. Pwata? Pokiten atun eú mélúmél me eú puun konik a puuti imwan we, iwe epwe turuló. (Mat. 7:24-27) Pwal ina chék usun ika sia iótek, kachitoni, me ekilon, nge sise apwénúetá minne sia káé, iwe sia chék asolapaaló ach achocho. Iwe atun a fis ngenikich sóssót are riáfféúmwáál, esap péchékkúl ach lúkú. Nge atun sia káé me apwénúetá minne sia káé, sia eáni ekkewe kefil mi múrinné, lapóló kinamweech, me péchékkúleló ach lúkú. (Ais. 48:17, 18) Sipwe ppii met sia tongeni káé seni met a fis lón manawen King Tafit ren ach áeá ekkena rúáánú napanapen káé sia kerán fós usur.

7. Ifa ewe pwóróus lón Paipel sipwele pwóróus wóón iei?

⁷ A fen wor emén chienom are chón óm famili a ámetekuk? Ika ewer, iwe kopwe kúna álillis seni óm káé pwóróusen néún King Tafit we, itan Apsalom, ewe mi afangemá seman na me sótun etiiaaló wóón an nemenem.​—2 Sam. 15:5-14, 31; 18:6-14.

8. Met ka tongeni féri ren óm kopwe angei án Jiowa álillis?

⁸ (1) Iótek. Atun ka ekieki ena pwóróus, ereni Jiowa meefiom usun án emén féfféringaw ngonuk. (Kölf. 6:6-9) Affata ngeni Jiowa tichikin meefiom. Mwirin tingorei an epwe álisuk le kúna ekkewe kapasen emmwen repwe tongeni álisuk le likiitú fán ena weires.

9. Met a fis lefilen Tafit me Apsalom?

⁹ (2) Kachitoni. Ekieki usun met ekkewe a fis lón ena pwóróus, me anchangei meefien King Tafit usun. Néún Tafit we, Apsalom a fen achocho ren fitu ier le etipetipa ekkewe  aramas ar repwe efich i. (2 Sam. 15:7) Atun Apsalom a meefi pwe a tori ewe fansoun fich, a tinaló ekkewe spai nemenen Israel pwe epwe ammólnatá ekkewe aramas ar repwe etiwa i pwe epwe néúr king. A pwal mwo nge etipetipa Ahitofel emén me lein chiechien Tafit kewe me néún we souéúréúr an epwe fiti i lón an féfférún ú ngeni. Apsalom a esilei pwe i ewe king, me a sótun eliapa me nieló Tafit, eli lón an choutiw lón an samau lón ena atun. (Kölf. 41:1-9) Tafit a silei usun ena rawangaw me a sú seni Jerusalem. Ló, ló, ló, néún Apsalom mwichen soufiu ra maunfengen me néún Tafit kewe. Iwe ena mwichen soufiu mi rawangaw a kkuf, me néún Tafit we Apsalom, a ninniiló.

10. Itá met Tafit a tongeni féri?

¹⁰ Mwirin, kachitoni met Tafit a tongeni féri atun a fiffis ekkena mettóch. A tongei Apsalom me lúkúlúkú Ahitofel. Nge iir me rúúemén, ra afangemá i. Ra unusen ámeteki me pwal mwo nge sótun nieló. Tafit a tongeni lúkúlúkúmmang ngeni chienan kewe pwal ekkóch me ekiek pwe ra pwal fitaaló Apsalom. A pwal tongeni ekieki chék pwisin i me sótun sú chék wóón an seni ena fénú. Are a tongeni chék fangetá fán watteen an letipechou. Nge Tafit ese féri ekkena mettóch. Nge a fen pworacho ngeni sóssótun kewe mi áweires. Pwata a tufichin féri ena?

11. Met Tafit a féri lón an nóm lón ewe osukosuk watte?

¹¹ (3) Ekilon. Ikkefa ekkewe kapasen emmwen ka tongeni káé seni ena pwóróus? Pélúweni ei kapas eis, “Met Tafit a féri pwe epwe álisi pwisin i?” Tafit ese niwokkus me ese atapwalapwal le eáni ekkewe kefil ese pwúng. Ese pwal kon lólilen pwe iwe ese chúen silei met epwe féri. Nge a fen tingorei Jiowa an álillis. A pwal tingorei chiechian kewe ar álillis. Me a mwittir apwénúetá met a fen apwúngaló an epwe féri. Inaamwo ika a fókkun metek letipen Tafit, nge a chúen lúkúlúkú ekkewe ekkóch me ese mut ngeni song an epwe nemenaló letipan. A sópweló le lúkúlúk wóón Jiowa me chiechian kewe.

12. Met Jiowa a féri pwe epwe álisi Tafit?

¹² Ifa usun Jiowa a álisi Tafit? Atun ka research, kopwe kúna pwe Jiowa a fang ngeni Tafit ewe péchékkúl mi lamot ngeni pwe epwe tongeni likiitú fán ena sóssót. (Kölf. 3:1-8; ekkewe kapas mwan) Jiowa a efeiéchú án Tafit kewe kefil. Me a álisi chienen Tafit kewe mi tuppwél lón ar maun pwe repwe túmúnú néúr na king.

13. Ifa usun kopwe tongeni áppirú Tafit ika emén a fókkun ámetekuk? (Mateus 18:15-17)

¹³ (4) Apwénúetá. Pwisin eisinuk, ‘Ifa usun upwe tongeni áppirú Tafit?’ Mwittir mwékút le ataweei ewe osukosuk. Ka tongeni tichikin apwénúetá án Jesus ei kapasen emmwen mi mak lón Mateus sópwun 18 alóngólóng wóón minne a fis are apwénúetá ewe kapasen emmwen lón. (Álleani Mateus 18:15-17.) Nge kosap atapwalapwal le filatá met kopwe féri atun en mi song. Kopwe iótek ngeni Jiowa an epwe fang ngonuk kinamween letip me ewe tipachem pwe kopwe silei met kopwe féri. Kosap úkútiw le lúkúlúkú chiechiom kewe. Nge kopwe fen tipemecheres le etiwa ar álillis. (SalF. 17:17) Nge lap seni meinisin, álleasochisi án Jiowa kapasen emmwen ngonuk lón an we Kapas.​—SalF. 3:5, 6.

14. Eli ineet 2 Timoty 1:12-16; 4:6-11, 17-22 a tongeni apéchékkúlok?

¹⁴ Chón óm famili ra áweiresuk pokiten ka angang ngeni Jiowa? Are ka nóm lón eú fénú mi fókkun aúkúk are pinepin án néún Jiowa kewe angang ie? Ika ewer, iwe eli kopwe péchékkúletá ren óm álleani 2 Timoty 1:12-16  me 4:6-11, 17-22. * Paulus a makkeei ekkena wokisin atun a nóm lón kalapus.

15. Met ka tongeni tingorei Jiowa?

¹⁵ (1) Iótek. Me mwen óm kopwe álleani ekkena wokisin, kopwe ereni Jiowa óm osukosuk me met ka meefi usun. Kopwe tichiki ngeni. Mwirin tingorei Jiowa an epwe álisuk le esilla ekkewe kapasen emmwen seni pwóróusen án Paulus kewe osukosuk repwe álisuk le silei met kopwe féri.

16. Met a fis ngeni Paulus?

¹⁶ (2) Kachitoni. Kachitoni pwe itá kan en Paulus. A kalapus Rom me a féfé ngeni sein. A fen piin kalapus, nge iei a silei pwe epwele ninniiló. Ekkóch me lein chienan kewe ra fen likitaló, me a apwangapwangoló.​—2 Tim. 1:15.

17. Itá met Paulus a tongeni féri?

¹⁷ Paulus a tongeni nefótófót wóón manawan me lóóm, me ekieki pwe ika ese wiliti emén Chón Kraist mi tinikken, iwe iei nge ese kalapus. A tongeni song ren ekkewe mwán lón ekkewe fénúen Asia iir mi likitaló, me eli a tongeni úkútiw le lúkúlúkú chienan kewe pwal ekkóch. Nge Paulus ese féri ekkena mettóch. Pwata a fókkun lúkú pwe chiechian kewe repwe chúen tuppwél ngeni me Jiowa epwe efeiéchú?

18. Met Paulus a féri fán weiresin nónnómun?

¹⁸ (3) Ekilon. Pélúweni ei kapas eis, “Ifa usun Paulus a pwisin álisi?” Pwal mwo nge atun Paulus a silei pwe ekiseló chék epwele máló, nge ese ménúki met ewe mi kon aúchea, ina an elingaaló Jiowa. A chék sópweló le ekieki ifa usun a tongeni apéchékkúla ekkewe ekkóch. A lúkúlúk wóón Jiowa ren an ikkiótek ngeni iteitan. (2 Tim. 1:3) Ese kon nefótófót wóón chókkewe mi likitaló, nge a fen pwáraawu an enletin kilisou ren álillisin chienan kewe mi tuppwél. Pwal eú, Paulus a chék sópweló le káé án Kot Kapas. (2 Tim. 3:16, 17; 4:13) Lap seni meinisin, a fókkun lúkú pwe Jiowa me Jesus ra tongei. Rese likitaló, me repwe efeiéchú ren an tuppwél lón an angang.

19. Ifa usun Jiowa a álisi Paulus?

¹⁹ Jiowa a fen éúréúra Paulus pwe a lamot an epwe likiitú fán riáfféúmwáál pokiten i emén Chón Kraist. (Föf. 21:11-13) Ifa usun Jiowa a álisi Paulus? A pélúweni an kewe iótek me mwirin och fansoun a apéchékkúla. (2 Tim. 4:17) Jiowa a ereni pwe epwe angei ewe liiwin a fen angang weires pwe epwe angei. Jiowa a pwal amwékútú chienen Paulus kewe mi tuppwél ar repwe awora álillis mi álilliséch ngeni.

20. Ifa usun sipwe tongeni áppirú ewe lúkú Paulus a pwári lón Rom 8:38, 39?

²⁰ (4) Apwénúetá. Pwisin eisinuk, ‘Ifa usun upwe tongeni áppirú Paulus?’ Sia silei pwe sipwe kúna riáfféúmwáál pokiten ach lúkú, usun chék Paulus. (Mark. 10:29, 30) Ren ach sipwe chék akkamwéchú ach tuppwél ngeni Jiowa atun sóssót, a lamot ach sipwe lúkúlúk wóón Jiowa lón iótek me kákkáé an we Kapas iteitan. Me a pwal lamot ach sipwe chechchemeni iteitan pwe eú me lein ekkewe mettóch mi aúchea seni meinisin sia tongeni féri, ina ach elingaaló Jiowa. Sia tongeni lúkúlúk pwe Jiowa esap fókkun likitikicheló me ese wor met emén a tongeni féri pwe epwe atai án Jiowa tongekich.​—Álleani Rom 8:38, 39; Ipru 13:5, 6.

21. Met a álisi Aya me Hector le pworacho ngeni ekkewe weires ra kúna?

²¹ Sia tongeni péchékkúletá seni pwóróusen ekkewe ekkóch lón Paipel, ese lifilifil nónnómuch.  Áwewe chék, Aya, emén pioneer lón Japan, a erá pwe pwóróusen Sona a álisi le pworacho ngeni an niwokkus le afalafal ikewe chómmóng aramas ra nóm ie. Hector, emén alúwél seni Indonesia, seman kewe me inan rese angang ngeni Jiowa, a erá pwe pwóróusen Rut a álisi le mochen káé usun Jiowa me angang ngeni.

22. Ifa usun kopwe tongeni kúna watte álillis seni ekkewe sipaiin pwóróus lón Paipel are ekkewe lesen “Áppirú Ar Lúkú”?

²² Ia ka tongeni kúna me ie pwóróusen ekkewe ekkóch lón Paipel epwe apéchékkúlok? Néúch kewe video me ekkewe sipaiin pwóróus lón Paipel me ekkewe lesen “Áppirú Ar Lúkú” repwe álisikich le kachitoni ekkewe pwóróus lón Paipel. * Me mwen óm kopwe katol, aúseling, are álleani ekkena pwóróus án Jiowa we mwicheich a angang weires wóór, kopwe tingorei Jiowa an epwe álisuk le kúna ekkewe lesen ka tongeni apwénúretá. Anchangei pwe itá kan en ewe minne ká pwóróusan ewe ka káé usun. Ekilonei met néún Jiowa kana mi tuppwél ra féri me ifa usun a álisiir le pworacho ngeni ar kewe weires. Mwirin apwénúetá ekkewe lesen lón pwisin manawom. Kilisou ngeni Jiowa ren ewe álillis a fen fang ngonuk. Me pwári pwe ka aúcheani ewe álillis ren óm kútta alen óm kopwe pwal apéchékkúla me álisi ekkewe ekkóch.

23. Me ren Aisea 41:10, 13, met Jiowa a pwonei pwe epwe féri fán itach?

²³ Manawach lón ei ótót mi nóm fán nemenien Satan, a tongeni áweires, me fán ekkóch sise silei met sipwe féri. (2 Tim. 3:1) Nge sisap aúrek are niwokkus. Jiowa a silei ach kewe weires. Atun sia turutiw, a pwonei ngenikich pwe epwe amwéchúkich wóón péúfichin mi péchékkúl. (Álleani Aisea 41:10, 13.) Sia fókkun lúkú pwe Jiowa epwe álisikich, me ewe Paipel epwe awora ngenikich ewe péchékkúl mi lamot pwe sipwe pworacho ngeni ese lifilifil weires.