1. Pwata Jesus a tingorei Jiowa an epwe túmúnú néún kewe chón káé?

LÓN ewe sáingoon pwinin manawen Jesus wóón fénúfan, a ekieki ekkewe weires néún kewe chón káé ra tongeni kúna. Pokiten a tongeer, a tingorei Seman we an epwe “tümwünüür seni ewe Eman mi Ngau.” (Joh. 17:14, 15) Jesus a silei pwe mwirin an liwintá láng, Satan ewe Tefil epwe sópweló le maun ngeni chókkewe mi mochen angang ngeni Jiowa. A ffat pwe a lamot ngeni néún Jiowa kewe aramas an túmún.

2. Pwata sia tongeni lúkú pwe Jiowa epwe pélúweni ach kewe iótek?

² Jiowa a pélúweni án Jesus iótek pokiten a tongei Néún na. Ika sia achocho úkúkún ach tufich le apwapwaai Jiowa, epwe pwal tongekich, me epwe aúseling ngeni ach kewe iótekin álillis me túmún. Jiowa i emén Sam mi tong, epwe sópweló le túmúnú néún kewe. Ika ese féri ena, epwe itengaw.

3. Pwata a lamot ngenikich án Jiowa túmún lón ei fansoun?

³ A ákkáeúin lamot ngenikich án Jiowa túmún lón ei fansoun. Satan a fen kóturutiw seni láng, “a fokun lingeringer.” (Pwär. 12:12) A fen etipetipa ekkóch chón eriáfféúkich le ekieki pwe minne ra féri ina “eu angang ngeni Kot.” (Joh. 16:2) Ekkewe ekkóch rese lúkú Kot, ra eriáfféúkich pokiten sia sókko seni chón fénúfan. Ese lifilifil popun án aramas eriáfféúkich, nge sisap niwokkus. Pwata? Pokiten án Kot we Kapas a erá: “Ach Samol a allükülük, i epwe apöchökülakemi o tümwünükemi seni ewe mi ngau.” (2 Tes. 3:3) Ifa usun Jiowa a túmúnúkich? Sipwe pwóróus usun ruu mettóch a awora ngenikich.

4. Me ren Efisos 6:13-17, met Jiowa a awora ngenikich pwe epwe túmúnúkich?

⁴ Jiowa a awora ngenikich ekkewe pisekin maun mi tongeni túmúnúkich seni án Satan maunekich. (Álleani Efisos 6:13-17.) Ekkena pisekin maun lón pekin ngún, ra péchékkúl me álilliséch! Nge a chék tongeni túmúnúkich ika sia áeálóng eú me eú ekkena pisekin maun, me sisap pwilitatiw. Met eú me eú ekkena pisekin maun ra liosuetá? Sipwele etittinafichi.

5. Met ewe penit itan enlet a liosuetá, me pwata a lamot ach sipwe ákkáeá?

⁵ Ewe penit, itan enlet a liosuetá ewe pwóróus mi enlet seni án Kot we Kapas, ewe Paipel. Pwata a lamot sipwe ákkáeá ena penit? Pokiten Satan i “semen chon chofona.” (Joh. 8:44) Ren fitengeréú ier a kakkapas chofona me otupu “unusen chon fanüfan”! (Pwär. 12:9) Nge ekkewe pwóróus mi enlet lón ewe Paipel a túmúnúkich pwe sisap tupuló. Ifa usun sipwe áeá ena penit, itan enlet? Ren ach kákkáé ewe enlet usun Jiowa, feffel ngeni “lon ngun o enlet,” me ren ach féri minne mi pwúng fansoun meinisin.​—Joh. 4:24, Testament mi Fö; Ef. 4:25; Ipru 13:18.

6. Met ewe chechchen leupw itan pwúng a liosuetá, me pwata a lamot ach sipwe éúféúfa ngenikich?

⁶ Ewe chechchen leupw itan pwúng a liosuetá án Jiowa kewe allúk mi pwúng. Pwata a lamot ach sipwe éúféúfa ngenikich ewe chechchen leupw? Ewe chechchen leupw a túmúnú féún ngasangasen emén soufiu pwe ete feiengaw, pwal ina chék usun, ewe chechchen leupw itan pwúng a túmúnú letipach, are met ewe sókkun aramas kich me lón, seni otuputupun ei fénúfan mi ngaw. (SalF. 4:23) Jiowa a mochen ach sipwe tongei me angang ngeni ren unusen letipach. (Mat. 22:36, 37) Ina popun Satan a sótun etipefeseni letipach ren an etipetipakich le tongei mettóchun ei fénúfan, Jiowa a oput. (Jas. 4:4; 1 Joh. 2:15, 16) Me ika Satan ese sópwéch le etipetipakich, iwe epwe eriáfféúkich pwe sipwe féri met epwe áletipechowu Jiowa.

7. Ifa usun sia éúféúfa ngenikich ewe chechchen leupw itan pwúng?

⁷ Sia éúféúfa ngenikich ewe chechchen leupw itan pwúng ren ach apwénúetá án Jiowa kewe allúk usun minne mi pwúng me mwáál, me ren ach etipeeú manawach ngeni ekkena allúk. (Kölf. 97:10) Neman ekkóch ra meefi pwe án Jiowa kewe allúk ra kon tichik. Nge ika sia úkútiw le apwénúetá án Paipel kewe kapasen emmwen lón manawach, sipwe usun emén soufiu mi pwilit seni an we chechchen leupw lepwolen eú maun pokiten a ekieki pwe a kon chou. A ifa me tiparochen an féri ena! Me ren chókkewe mi tongei Jiowa, an kewe allúk “resap weires,” nge fen ina amanawer.​—1 Joh. 5:3.

8. Met weween ach sipwe ipweipwelóng ewe sussun mmólnetá ngeni aronga ewe kapas allim?

⁸ Paulus a pwal pese ngenikich ach sipwe ipweipwelóng ewe sussun mmólnetá ngeni aronga pwóróus allimen kinamwe. Weween, a lamot ach sipwe mmólnetá iteitan le afalafala ewe pwóróus allim. Atun sia afalafal ngeni ekkewe ekkóch usun ewe pwóróus seni ewe Paipel, a péchékkúleló pwisin ach lúkú. A mmen apéchékkúl ngenikich ach kúna ifa usun néún Jiowa kewe aramas wóón unusen fénúfan ra kúkkútta alen ar repwe esilefeili ewe pwóróus allim, áwewe chék lón ar kewe leenien angang, sukul, leenien business, me atun ra afalafal imw me imw, atun ra shopping, chuuri aramaser kewe esap iir chón lúkú, atun ra fóffós ngeni aramas ra sileer, me pwal mwo nge atun ra mwenilong lón imwer ren ekis fansoun. Ika sia úkútiw le afalafal pokiten sia niwokkus, iwe epwe usun án emén  soufiu pwilitawu néún suus atun ewe maun, epwe mecheres epwe feiengaw pechen. Iwe, epwe weires ngeni an epwe fiu ngeni chón oputan kewe, me esap tongeni álleasochisi allúkún néún we meilap.

9. Pwata a lamot ach sipwe ukkuwei ewe eppetin maun mi watte itan lúkú?

⁹ Ewe eppetin maun mi watte itan lúkú a liosuetá ach lúkú Jiowa. Sia lúkú pwe epwe apwénúetá an kewe pwon meinisin. Ena lúkú epwe álisikich le “kunu ngeni ekewe föün esefich mi pulopulen ekkei seni ewe Eman mi Ngau.” Pwata a lamot ach sipwe ukkuwei ena eppetin maun mi watte? Pokiten a túmúnúkich pwe site tipetipeló ren án chón rikiló kewe afalafal chofona are letipengaw atun aramas ra esiita ach lúkú. Ika ese wor ach lúkú, esap wor ach péchékkúl le ú ngeni aramas atun ra sótun etipetipakich le atai án Jiowa kewe allúk. Nge iteiten sia úppós fán iten ach lúkú lón ach leenien angang me sukul, sia ukkuwei ach eppetin maun. (1 Pet. 3:15) Iteitan sia pépéén senikich eú angang mi watte peioffun epwe pinei ach fel ngeni Jiowa, sia ukkuwei ach we eppetin maun. (Ipru 13:5, 6) Me iteiten sia akkangang ngeni Jiowa fán koput, ach we eppetin maun a túmúnúkich.​—1 Tes. 2:2.

10. Met weween ewe akkaw itan ápilúkúlúkún amanaw, me pwata a lamot ach sipwe ikkimweimw?

 ¹⁰ Ewe akkaw itan ápilúkúlúkún amanaw, ina ewe ápilúkúlúk Jiowa a ngenikich, ewe ápilúkúlúk pwe epwe selánikich seni máló me epwe efeiéchú meinisin chókkewe mi féri letipan. (1 Tes. 5:8; 1 Tim. 4:10; Tit. 1:1, 2) Usun chék án eú akkaw túmúnú chamwen emén soufiu, pwal ina usun án ewe ápilúkúlúkún amanaw túmúnú ach ekiek. Ifa usun? Ena ápilúkúlúk a álisikich le nefótófót wóón án Kot kewe pwon me a álisikich ach sisap kokotiw fán ach kewe osukosuk. Ifa usun sipwe imweimw ena akkaw? Sia féri ena ren ach ekketipeeú ach ekiek ngeni án Kot ekiek. Áwewe chék, sia alónga ach ápilúkúlúk wóón Kot, nge esap wóón wéún fénúfan repwe móróló.​—Kölf. 26:2; 104:34; 1 Tim. 6:17.

11. Met weween ewe ketilas ngún mi fel, me pwata a lamot ach sipwe nénnéúnéú?

¹¹ Ewe ketilas ngún mi fel, ina án Kot we Kapas, ewe Paipel. A wor manamanen ena ketilas le atai sókkopaten minen otuputup meinisin me a angasaaló aramas seni fétekin afalafal chofona me féffér mi efeiengaw. (2 Kor. 10:4, 5; 2 Tim. 3:16, 17; Ipru 4:12) Sia káé le néúnéúfichi ena ketilas ren ach féri ach pwisin káé me seni ewe káit sia angei seni án Kot we mwicheich. (2 Tim. 2:15) Me lúkún ekkewe pisekin maun, Jiowa a pwal ngenikich eú sókkun alen an túmúnúkich. Met ena?

12. Met a pwal lamot ngenikich, me pwata?

¹² Emén soufiu mi sipeéch, a silei pwe ese tongeni sópwéch le fiu ngeni eú watteen mwichen soufiu wóón pwisin an, nge a lamot álillisin chienan kewe soufiu. Pwal ina chék usun, sise tongeni sópwéch wóón pwisin ach le ú ngeni Satan me chienan kewe, nge a lamot ngenikich álillisin pwiich kewe. Jiowa a awora ngenikich ‘chienach kewe souläng’ wóón unusen fénúfan, iir mi tongeni álisikich.​—1 Pet. 2:17.

13. Me ren Ipru 10:24, 25, ikkefa ekkewe álillis sia angei seni ach fiffiti ekkewe mwich?

¹³ Ach fiffiti ach kewe mwich ina eú alen ach angei álillis. (Álleani Ipru 10:24, 25.) Fán ekkóch kich meinisin sia letipechou. Nge ach kewe mwich ra tongeni apéchékkúlakich. Sia péchékkúletá ren án pwiich kewe memmeef seni letiper. Ekkewe afalafal mi lóngólóng wóón Paipel me ekkewe pwoomw ra apéchékkúlakich le sópweló lón ach angang ngeni Jiowa. Me ach pwóróusfengen me pwiich kewe mwen me mwirin ekkewe mwich ra apéchékkúlakich. (1 Tes. 5:14) Pwal och, ach kewe mwich ra suuki ngenikich alen ach sipwe meefi ewe pwapwa mi pop seni ach álisi ekkewe ekkóch. (Föf. 20:35; Rom 1:11, 12) Ach kewe mwich ra álisikich lón pwal ekkóch mettóch. Ra álisikich pwe sipwe lipwákéch lón ewe angangen afalafal me asukula aramas. Áwewe chék, sia káé ifa usun sipwe néúnéúfichi ekkewe minen álillis lón ewe Pwórun Asukul. Ina popun, kopwe ammólnaéchúetá ekkewe mwich. Aúselingéch atun ekkewe mwich. Sárin ekkewe mwich apwénúetá minne ka káé. Ren óm féri ena, kopwe wiliti “eman nöün Kraist Jesus sounfiu mi allükülük.”​—2 Tim. 2:3.

14. Ifa ewe álillis mi pwal kawor ngenikich?

¹⁴ A pwal wor rech álillisin ekkewe fite fite million chónláng mi manaman. Ekieki met emén chék chónláng a tongeni féri! (Ais. 37:36) Iwe ekieki met eú mwichen chónláng mi manaman ra tongeni féri. Ese wor emén aramas are chónláng mi ngaw a tongeni okkufu néún Jiowa mwichen soufiu mi manaman. Jiowa a unusen manaman lap seni meinisin. Ina popun ika a nóm rech, sipwe péchékkúl  lap seni chón oputakich, ese lifilifil chóchóór. (Souk. 6:16) A ifa me pwúngún ena! Kopwe chemeni ena mettóch atun ka niwokkus ren met chienom chón angang, chienom chón sukul, are aramasom ra apasa are féri. Chemeni pwe esap chék en lón ena maun. Ka fiti án Jiowa emmwen.

15. Me ren Aisea 54:15, 17, met popun ese wor emén a tongeni aúkatiw án néún Jiowa kewe aramas angangen afalafal?

¹⁵ A wor chómmóng popun án chón ei fénúfan mi nóm fán nemenien Satan oputakich. Sise fókkun angolong lón politics me sise fiti maun. Sia esilei iten Kot we, sia afalafala pwe Mwúún Kot chék epwe atoto kinamwe, me sia álleasochisi án Kot kewe allúk mi pwúng. Sia ánnetatá ngeni aramas pwe ewe sounemenemen ei fénúfan i emén mi fókkun kirikiringaw, kapas chofona, me nieló aramas. (Joh. 8:44) Me sia esilei pwe ekiseló chék án Satan ei ótót epwe kataló. Nge Satan me chienan kewe resap fókkun aúkatiw ach angangen afalafal. Nge sipwe sópweló le mwareiti Jiowa úkúkún ach tongeni! Inaamwo ika Satan a manaman, nge ese tufichin pinei touren pwóróusen ewe Mwú ngeni aramas wóón unusen fénúfan. A chék tufich ena pokiten a nóm rech án Jiowa túmún.​—Álleani Aisea 54:15, 17.

16. Ifa usun Jiowa epwe amanawa néún kewe aramas atun ewe riáfféú mi lapalap?

¹⁶ Met epwe fis ekiseló chék? Atun ewe riáfféú mi lapalap, Jiowa epwe amanawakich lón ruu napanap mi amwarar. Áeúin, epwe amanawa néún kewe chón angang mi tuppwél atun epwe efisi án ekkewe kingen fénúfan ataieló Papilon mi Lapalap, ewe mwicheichen lamalam chofona. (Pwär. 17:16-18; 18:2, 4) Oruuan, epwe amanawa néún kewe aramas atun epwe ataieló lusun án Satan ei ótót atun ewe Armaketon.​—Pwär. 7:9, 10; 16:14, 16.

17. Ifa usun ach akkamwéchú ach ririéch ngeni Jiowa epwe álisikich?

¹⁷ Atun sia akkamwéchú ach ririéch ngeni Jiowa, ese tongeni wor met Satan a tongeni féri pwe sipwe feiengawfóchofóch. Ren enletin, fen i ewe epwe kitetteriló. (Rom 16:20) Ina popun, úféúfolóng meinisin ekkewe pisekin maun, me kosap pwiliti sonuk! Kosap sótun fiu lón ena maun wóón pwisin óm. Álisi chiechiom kewe Chón Kraist. Me álleasochisi án Jiowa kewe emmwen. Ika ka féri ena, ka tongeni lúkúlúk pwe Semom we mi tong lón láng, epwe apéchékkúlok me túmúnuk.​—Ais. 41:10.