1-2. Ié kewe ra tongeni álisi emén chón káé le feffeitá ngeni an epwe papatais?

IEI alon Amy seni Fiji: “Ua fókkun aúcheani met ua kákkáé seni ai káéén Paipel. Ua silei pwe iei ewe enlet. Nge atun chék ua poputá le chiechi ngeni pwiich kewe, a álisiei le siwil me papatais.” Pwóróusen Amy a menlapei ei mettóch mi enlet: Emén chón káé epwe tongeni feffeitá ngeni an epwe papatais atun a angei álillis seni chón ewe mwichefel.

² Emén me emén chón afalafal ra tongeni álillis lón kalapólóón chón ewe mwichefel. (Ef. 4:16) Emén pioneer itan Leilani, mi nóm Vanuatu a erá: “Iei eú mwitún: A lamot álillisin meinisin chón ewe sóópw lón kámáárin emén semirit. Me rei a pwal ina usun lón ewe angangen álisi aramas le wiliti néún Jesus chón káé. Lape ngeni, a lamot álillisin meinisin chón ewe mwichefel le álisi emén le tolong lón ewe enlet.” Ren án emén semirit epwe mámmááritá, a lamot álillis seni seman kewe me inan, aramasan kewe, chiechien chón an famili, me néún kewe sense. Ra féri ena ren ar akkapéchékkúla ewe semirit me áiti ngeni ekkewe lesen mi lamot lón manawan. Pwal ina chék usun, chón ewe mwichefel ra tongeni awora emmwen, kapasen apéchékkúl, me isetiw leenien áppirú mi múrinné ngeni ekkewe chón káé pwe epwe álisiir le feffeitá ngeni ar repwe papatais.​—SalF. 15:22.

3. Met sia káé seni meefien Ana, Dorin, me Leilani?

³ Pwata a lamot án ewe chón afalafal mi wisen káé ngeni ewe chón káé epwe etiwa án ekkewe ekkóch chón afalafal álillis ngeni ewe chón káé? Nengeni met Ana, emén special pioneer  lón Moldova a erá, “A mmen weires ngeni chék emén an epwe awora meinisin met mi lamot ngeni emén chón káé lupwen a poputá le feffeitá.” Dorin, emén special pioneer lón pwal ena fénú a erá, “Fán chómmóng, ekkóch chón afalafal ra apasa och mettóch mi achchúngú letipen ewe chón káé, och mettóch use pwal ekieki.” Leilani a apasa pwal eú popun sipwe pwapwa le etiwa álillis ren an erá, “Lupwen ewe chón káé a meefi án ekkewe ekkóch tong me chúngú, a tongeni álisi le mirititi pwe iir wesewesen néún Jiowa aramas.”​—Joh. 13:35.

4. Met sipwe káé lón ei lesen?

⁴ Iwe nge, eli kopwe ekieki, ‘Ifa usun ai upwe álisi emén chón káé an epwe feffeitá nge esap ngang ewe mi wisen káé ngeni?’ Sipwele káé met sia tongeni féri atun emén a etiwakich le fiti lón an káé ngeni néún we chón káé, me met sia tongeni féri atun emén chón káé a poputá le fiti ekkewe mwich. Sipwe pwal ppii ifa usun ekkewe mwán mi ásimaw ra tongeni álisi ekkewe chón káé le feffeitá ngeni ar repwe papatais.

5. Met wisom ika ka ketiw le fiti emén le káé ngeni néún we chón káé?

⁵ Atun eú káéén Paipel, ewe mi wisen káé ngeni ewe chón káé, fen i wisan an epwe álisi le weweiti án Kot we Kapas. Ika emén chón afalafal a etiwok le fiti le káé ngeni néún we chón káé, iwe kopwe chechchemeni pwe wisom óm kopwe álisi i. (SalAf. 4:9, 10) Nge met ka tongeni féri pwe kopwe álilliséch atun ewe káé?

6. Ifa usun ka tongeni apwénúetá ewe kapasen emmwen lón Än Salomon Fos 20:18 lupwen kopwe fiti emén le káé ngeni néún we chón káé?

⁶ Ammólnatá fán iten ewe káé. Akkomw, ereni ewe chón afalafal an epwe ekis apwóróusa ngonuk pwóróusen néún we chón káé. (Álleani Än Salomon Fos 20:18.) Ka tongeni eisini: “Met ka silei usun noum we chón káé? Ifa ewe lesen oupwe káé? Met ka mochen án noum we chón káé epwe káé seni ei lesen? Mei wor met itá upwe féri are usap féri me apasa atun ewe káé? Ifa usun ua tongeni álisi ewe chón káé an epwe feffeitá?” Pwúngún pwe saminne ewe chón afalafal epwe pwári ekkewe pwóróus mi monomon usun ewe chón káé, nge met a erenuk epwe tongeni álilliséch ngonuk. Emén misineri itan Joy a fós ngeni chókkewe repwe fiti i le káé ngeni néún we chón káé usun ekkena mettóch. A erá: “Ekkena pwóróus a álisi chienei we le mochen álisi ewe chón káé me silei met epwe apasa atun ewe káé.”

7. Pwata a lamot óm kopwe ammólnatá ika kopwe fiti emén le káé ngeni néún we chón káé?

⁷ Ika ka ketiw le fiti emén le káé ngeni néún  we chón káé, epwe éch ika kopwe ammólnatá ewe lesen repwe káé. (Esr. 7:10) Ewe Chón Kraist mwán itan Dorin, mi mak meefian akkomw, a erá: “Ua pwapwa atun chienei we a ammólnatá ewe lesen. Iwe a tongeni álilliséch meefian.” Pwal och, ese mwáál ewe chón káé epwe kúna pwe ámi me rúúemén oua ammólnaéchú ewe lesen, me epwe eú leenien áppirú mi múrinné ngeni. Inaamwo ika kese tongeni unusen ammólnatá ewe lesen, nge kopwe mwaren kútta ekkewe menlapen pwóróus lón ewe lesen.

8. Met kopwe féri pwe óm iótek atun eú káé epwe múrinné?

⁸ Iótek ina eú kinikin mi lamot lón eú káé, ina popun kopwe ekieki me mwan met kopwe apasa ika kopwe wisen iótek. Ika ina, iwe óm we iótek epwe múrinné. (Kölf. 141:2) Hanae seni Japan, a chúen chechchemeni án chienen ewe mi wisen káé ngeni kewe iótek. A erá: “Ua meefi án ena fefin Chón Kraist chiechiéch ngeni Jiowa, me ua mochen usun. Ua pwal meefi tongei atun a apachaalong itei lón an kewe iótek.”

9. Me ren James 1:19, met ka tongeni féri pwe kopwe emén mi álilliséch lón eú káé?

⁹ Álisi ewe mi wisen emmweni ewe káé. Emén special pioneer seni Nigeria itan Omamuyovbi, a erá: “Emén chiechi mi álilliséch a aúselingéch atun ewe káé. A uwawu meefian mi álilliséch, nge ese kon fóspaat, pokiten a weweiti pwe chienan we i epwe wisen emmweni ewe káé.” Iwe ifa usun kopwe silei ineet kopwe fósetá are met kopwe apasa? (SalF. 25:11) Aúselingéch atun ewe mi wisen emmweni ewe káé me ewe chón káé ra fóffós. (Álleani James 1:19.) Iwe kopwe mmólnetá le waalong óm álillis atun mi fich. Pwúngún, mi lamot óm kopwe akkomw ekiek mwen óm kopwe fós. Áwewe chék, kosap mochen fóspaat, fósolong lukanapen án ewe mi wisen emmweni ewe káé áwewe, are poputá le fós usun pwal och sókkun pwóróus. Nge ka tongeni áweweéchú ewe lesen ren óm ekis memmeef, eáni eú kapas áwewe, are eú kapas eis. Fán ekkóch neman ka meefi pwe ese wor met ka tongeni eáni álillis lón ewe lesen. Nge ika ka apúnga me pwári pwe ka áfánni ewe chón káé, iwe kopwe fókkun álisi i le feffeitá.

10. Ifa usun pwóróusom a tongeni álisi emén chón káé?

¹⁰ Apwóróusa ngeniir pwóróusom. Ika mi fich, ka tongeni ekis apwóróusa ngeni ewe chón káé ifa usun ka silei ewe enlet, ifa usun ka pworacho ngeni eú sóssót, are ifa usun ka kúna án Jiowa álisuk lón manawom. (Kölf. 78:4, 7) Pwóróusom kana, eli fen ikkena met a lamot án ewe chón káé epwe rong. A tongeni apéchékkúla an lúkú are álisi an epwe sópweló le feffeitá ngeni an epwe papatais. Me epwe tongeni áiti ngeni ifa usun epwe pworacho ngeni eú sóssót a nóm fán. (1 Pet. 5:9)  Gabriel, mi nóm Brazil me iei i emén pioneer, a chemeni met a álisi atun a chúen kákkáé ewe Paipel. A erá: “Atun ua rong pwóróusen pwiich kewe, ua káé pwe Jiowa a kúkkúna ekkewe sóssót sia nóm faar. Iwe ika chókkana ra tongeni pworacho ngeniir, iwe ua pwal tongeni.”

11-12. Pwata sipwe etiwaéchú emén chón káé mi fiti mwich?

¹¹ Ren án emén chón káé epwe feffeitá ngeni an epwe papatais, a lamot epwe fiffiti ekkewe mwich iteitan me kúna álillis seni. (Ipru 10:24, 25) Ese mwáál, ewe mi wisen káé ngeni a etiwa, nge epwe kerán ina ewin an epwe fiti mwich. Atun a fiti, kich meinisin sia tongeni apéchékkúla an epwe fiffiti ekkewe mwich lón ewe Leenien Mwich. Ifa usun sia tongeni féri ena?

¹² Etiwaéchú ewe chón káé. (Rom 15:7) Ika sia etiwaéchú ewe chón káé, eli epwe mochen sópweló le fiffiti ekkewe mwich lón ewe Leenien Mwich. Kopwe kapong ngeni fán tong me pani ekkewe ekkóch pwe repwe kapong ngeni, nge kosap fen efisi met esap kinamwe ren. Fós ngeni, pokiten neman ewe mi wisen káé ngeni a mmangoto are a chómmóng wisan lón ewe Leenien Mwich. Aúselingéch ngeni met ewe chón káé a apasa, me pwári pwe ka áfánni. Ifa usun óm etiwaéchú ewe chón káé epwe álisi? Nengeni pwóróusen Dmitrii, mi kerán papatais fitu ier a ló me iei a wisen chónálillisin mwichefel. Iei met a chemesefáli atun a kerán fiti eú mwich, a erá: “Emén Chón Kraist mwán a kúnaei ai witiwit lúkún ewe Leenien Mwich me ua niwokkus, me fán kirekiréch a panieilóng lón. Chómmóng ra etto kapong ngeniei. Ua fókkun máirú. Ua fókkun sani ewe mwich me áneánei pwe amwo itá a chék wokkor mwich iteiten rán. Epwe kerán iei ai upwe kúkkúna ena sókkun.”

13. Ifa usun óm féffér múrinné a tongeni álisi emén chón káé?

¹³ Isetiw leenien áppirú mi múrinné. Óm féffér múrinné a tongeni álisi ewe chón káé le lúkú pwe a kúna ewe enlet. (Mat. 5:16) Vitalii, emén pioneer lón Moldova a erá: “Ua kúna napanapen manawen chón ewe mwichefel, ar ekiek, me ar féffér. Ena mettóch a alúkúlúkú ngeniei pwe Chón Pwáraatá Jiowa ina ewe lamalam mi enlet.”

14. Ifa usun óm leenien áppirú mi múrinné a tongeni álisi emén le sópweló le chék feffeitá?

¹⁴ Ren an epwe tongeni fich ngeni emén chón káé an epwe papatais, a lamot epwe apwénúetá minne a kákkáé. Ese kan mecheres ena. Nge, lupwen ewe chón káé a kúna álillisin óm apwénúetá án Paipel kewe kapasen emmwen, iwe eli epwe mochen áppiruk. (1 Kor. 11:1) Ekieki pwóróusen Hanae, ewe sia fen  fós usun. A erá: “Pwiich kewe ra fen féfféri ekkewe mettóch ua kákkáé. Ua káé ifa usun ua tongeni apéchékkúla ekkewe ekkóch me omusaaló tipis me ifa usun ua tongeni pwári tong. Fansoun meinisin ra eáni fós mi múrinné usun ekkewe ekkóch. Ua mochen áppirúúr.”

15. Ifa usun Än Salomon Fos 27:17 a álisikich le kúna lamoten ach sipwe chiechi ngeni emén chón káé atun a sópweló le fiffiti ekkewe mwich?

¹⁵ Chiechi ngeni ewe chón káé. Atun ewe chón káé a sópweló le fiffiti mwich, sópweló le pwári pwe ka áfánni. (Fil. 2:4) Pwata kese kan fós ngeni? Ka tongeni ereni úkúkún pwapwaóm le kúna feffeitáán. Ka tongeni eisini usun an káé, an famili, me an angang. Nge túmúnú pwe kesap eáni ekkewe kapas eis epwe ásáwa. Ámi pwóróusfengen a tongeni eririéchúfengenikemi. Ika ka chiechi ngeni emén chón káé, ka tongeni álisi le feffeitá ngeni an epwe papatais. (Álleani Än Salomon Fos 27:17.) Iei Hanae a regular pioneer. Iei met a chemeni atun a kerán fiti ekkewe mwich, a erá: “Lupwen ua poputá le chiechi ngeni chón ewe mwichefel, ua pwal poputá le mochen fiffiti chék ekkewe mwich, me ua fiti inaamwo ika ua pekkus. Ua pwapwaiti ai chiechi ngeni chiechiei kewe minefé, me ena mettóch a álisiei le úkútiw le chiechi ngeni chienei kewe rese fel ngeni Jiowa. Ua mochen akkarap ngeni Jiowa me pwiich kewe. Ina popun, ua filatá ai upwe papatais.”

16. Met ka pwal tongeni féri le álisi emén chón káé pwe epwe meefi pwapwa me lón ewe mwichefel?

¹⁶ Atun ewe chón káé a sópweló le feffeitá me siwil, kopwe álisi le meefi pwe i chón lón ewe mwichefel. Ka tongeni féri ena ren óm awasélaéchú. (Ipru 13:2) Denis seni Moldova, a chemesefáli ewe atun a chúen emén chón káé, a apasa: “Fán chómmóng, pwiich kewe ra etiwakem me pwúlúwei we pwe aupwe chiechifengen. Ra erenikem ifa usun Jiowa a fen álisiir. Ena mettóch a apéchékkúlakem. Ekkena atun ra álisikem le lúkúlúk pwe aua mochen angang ngeni Jiowa me eú manaw mi amwarar a mmólnetá fán item.” Atun ewe chón káé a wiliti emén chón afalafal esaamwo papatais, ka pwal tongeni etiwa pwe oupwe mwin le afalafal. Diego, emén chón afalafal seni Brazil, a apasa: “Chómmóng pwiich kewe ra etiwaei pwe aupwe mwin le afalafal. Ina ewe atun mi kon múrinné ai upwe sissilefichiir. Atun ua fitiir, ua káé chómmóng, me ua meefi pwe ua ririéchúló ngeni Jiowa me Jesus.”

17. Ifa usun ekkewe mwán mi ásimaw ra tongeni álisi ekkewe chón káé?

¹⁷ Awora fansoun fán iten ekkewe chón káé. Ámi kana mwán mi ásimaw, lupwen oua pwári tong me chúngú ekkewe chón káé, oua tongeni álisiir le feffeitá ngeni ar repwe papatais.  Oua tongeni fóffós ngeniir atun ekkewe mwich? Repwe meefi pwe oua áfánniir ika oua chemeni iter, ákkáeúin atun ra poputá le uwawu meefier lón mwich. Fán ekkóch, oua tongeni akkóta ámi schedule pwe oupwe fiti emén chón afalafal lón an káé ngeni néún we chón káé? Neman oua tongeni álisi ewe chón káé lón ewe esin napanap ouse tepereni. Emén pioneer itan Jackie, seni Nigeria, a erá: “Chómmóng chón káé ra máirú le silei pwe ewe emén mi fitiei le káé ngeniir, i emén mwán mi ásimaw. Emén chón káé a erá: ‘Nei we pastor esap fókkun tongeni féri ena. A chék chuuri ekkewe mi wéúéch me epwe chuuriir ika chék pwe ra mééni!’” Iei ena chón káé a fiffiti mwich.

18. Ifa usun ekkewe mwán mi ásimaw ra tongeni apwénúetá wiser usun met a mak lón Föför 20:28?

¹⁸ Áiti me apéchékkúla ekkewe chón afalafal. Ámi kana mwán mi ásimaw, a watte wisemi le álisi ekkewe chón afalafal ar repwe lipwákéch lón ewe angangen afalafal, kapachelong lón ar káé ngeni aramas. (Álleani Föför 20:28.) Ika emén a pireir le emmweni ewe káé atun ka nóm, kopwe ereni pwe ka tongeni wisen emmweni ewe káé. Jackie, ewe sia fen fós usun, a erá: “Ekkewe mwán mi ásimaw ra kan eisiniei pwóróusen nei kewe chón káé. Atun a weires ngeniei ai upwe emmweni eú káé, ra awora ngeniei emmwen mi álilliséch.” Ekkewe mwán mi ásimaw ra tongeni awora watteen álillis le apéchékkúla me pesei ekkewe chón afalafal ar repwe likiitú. (1 Tes. 5:11) Jackie a pwal apasa: “Ua sani atun ekkewe mwán mi ásimaw ra pese ei me ereniei pwe ra aúcheani ai angang weires. Ekkena sókkun kapas ra ekinamwe ei usun chék eú kapen konik mi pat atun pwichikkar. Ar kewe kapas mi fiti kirekiréch, ra álisiei le meefi pwe ua féréchú wisei ngeni nei kewe chón káé me a alapaaló ai pwapwa.”​—SalF. 25:25.

19. Ifa ewe pwapwa kich meinisin sia tongeni eáni?

¹⁹ Inaamwo ika sise káé ngeni emén lón ei fansoun, nge sia chúen tongeni álisi emén le feffeitá ngeni an epwe papatais. Sia tongeni álisi ewe mi wisen emmweni ewe káé esap ren ach nemenaló ewe káé, nge ren ach kewe memmeef sia fen ammólnaéchúúr. Sia tongeni chiechi ngeni ekkewe chón káé atun ra etto fiti mwich, me sia tongeni isetiw leenien áppirú mi múrinné fán iter. Me ekkewe mwán mi ásimaw ra tongeni apéchékkúla ekkewe chón káé ren ar awora fansoun fán iter me apéchékkúla ekkewe chón afalafal ren ar ákkáitiir me akkapúnger. Sia fókkun pwapwa atun sia tongeni álillis, inaamwo ika ese pwal lap, le álisi emén le tongei me angang ngeni Jiowa!