1. Eli met sókkun memmeef ekkóch néún Jiowa kewe chón angang mi túppwél ra fiffiu ngeni?

 A IFA me pwapwaach le silei pwe Jiowa a tongei meinisin néún kewe aramas! Ewe Paipel a erá: “Ewe Samol mi Lapalap a pwapwaäsini nöün aramas.” (Kölf. 149:4) Iwe nge, a wor atun ekkóch repwe fókkun lichippúng me ekieki, ‘Jiowa mi fen pwapwa rei?’ A pwal wor fitemén lón ewe Paipel iir mi túppwél ngeni Jiowa nge ra fiffiu ngeni ena esin memmeef.—1 Sam. 1:​6-10; Hiop 29:​2, 4; Kölf. 51:11.

2. Ié kewe Jiowa a pwapwa rer?

² Ewe Paipel a affata pwe Jiowa a tongeni pwapwa ren chókkewe rese unuséch. Ifa ussun? A lamot sipwe anganga ach lúkú lón Jises Kraist me papatais. (Jon 3:16) Ach féri ena, sia pwáári ngeni ekkewe ekkóch pwe sia áier seni ach kewe tipis me sia pwon ngeni Kot pwe sipwe féri letipan. (Féf. 2:38; 3:19) Jiowa a fókkun pwapwa rech atun sia féri ekkena mettóch pwe sipwe tongeni chiechiéch ngeni. Iká sia achocho úkúúkún ach tufich le apwénúetá ach pwon le angang ngeni, iwe Jiowa epwe pwapwa rech me sipwe chiechian.—Kölf. 25:14.

3. Ikkefa ekkewe úlúngát kapas eis sipwele pwóróusfengen wóór?

³ Iwe nge, eli pwata ekkóch ra meefi pwe Jiowa ese pwapwa rer? Ifa ussun Jiowa a pwáári pwe a pwapwa rech? Me ifa ussun emén Chón Kraist a tongeni silei pwe Jiowa a pwapwa ren?

 PWATA EKKÓCH RA MEEFI PWE JIOWA ESE PWAPWA RER?

4-5. Inaamwo iká sia meefi pwe ese wor aúcheach, nge met sia tongeni lúkúlúkú?

⁴ Seni me lekúkkúnúch chómmóng leich sia kan fiffiu ngeni ewe memmeef pwe ese wor aúcheach. (Kölf. 88:15) Emén Chón Kraist mwán itan Adrián a erá: “Seni me lóóm úa meefi pwe ese wor aúcheai. Lekúkkúni úa chemeni ekkewe atun úa kan ikkióteki pwe chón ái we famili repwe nónnóm lón ewe Paratis, inaamwo iká úa fókkun lúkú pwe úsapw nóm ikena.” Iei met Tony, a mááritá lón eú famili ese angang ngeni Jiowa, a erá: “Esap fán eú án semei kewe me inei ereniei pwe ra tongeei are ra pwapwa rei. Iwe úa meefi pwe úse tongeni apwapwaar.”

⁵ Atun sia kan weires ren ewe memmeef pwe ese wor aúcheach, iwe sipwe chemeni pwe Jiowa a pwisin panikicheto ren. (Jon 6:44) A kúna napanapach kewe mi múrinné, eli sise pwisin kúna, me a silei masouen letipach. (1 Sam. 16:7; 2 Kron. 6:30) Ina minne, sia tongeni lúkú atun a erá pwe kich mi aúchea.—1 Jon 3:​19, 20.

6. Met meefien aposel Paul ussun an kewe tipis me lóóm?

⁶ Me mwen ach káé ewe enlet, eli ekkóch me leich sia féfféri ekkewe sókkun mettóch sia chúen fókkun niamam ren. (1 Pit. 4:3) Chókkewe mi fen angang ngeni Jiowa fán túppwél eli ra chúen fiffiu ngeni ar kewe apwangapwang. Nge en, ka kan meefi pwe Jiowa esap tongeni omusaaló óm kewe tipis? Iká ewer, eli epwe oururuk óm silei pwe a pwal wor ekkóch néún Jiowa kewe chón angang mi túppwél ra pwal weires ren ekkena esin memmeef. Áwewe chék, ewe aposel Paul a fókkun letipengaw atun a ekieki ussun an kewe apwangapwang. (Rom 7:24) Pwúngún pwe Paul a áier seni an kewe tipis me papatais. Iwe nge, a chúen pwisin apasa pwe i a “kisifóchófóch me lein ekkewe aposel” me emén “mi fókkun watte tipisin.”—1 Kor. 15:9; 1 Tim. 1:15.

7. Met sipwe chechchemeni ussun ach kewe tipis me lóóm?

⁷ Semach we lón láng a pwonei pwe epwe omusaaló ach tipis iká sia áier. (Kölf. 86:5) Iwe iká sia enletin niamamesini ach kewe tipis, sia tongeni lúkú pwe mi enlet met a erá me epwe omusakicheló.—Kol. 2:13.

8-9. Ifa ussun sipwe pworacho ngeni ewe memmeef pwe sise tongeni apwapwaai Jiowa?

⁸ Oukich meinisin sia mochen angang ngeni Jiowa úkúúkún ach tongeni. Iwe nge, eli pokiten apwangapwangen chinnap are samaw, sise tufichin féri meinisin met sia mochen lón ach angang ngeni Jiowa. Iwe nge eli sia meefi pwe sise tongeni enletin apwapwaai Jiowa iwe sisap ketiw me ren. Emén Chón Kraist fefin itan Amanda a erá: “Úa meefi pwe a lamot úpwe fang ngeni Jiowa met mi kon lap seni úkúúkún minne úa tufich ngeni. Iwe lupwen úa sópwongaw, úa fókkun lichippúng me úa pwal meefi pwe ina meefien Jiowa.”

⁹ Ifa ussun sipwe pworacho ngeni ewe memmeef pwe sise tongeni apwapwaai Jiowa? Chemeni pwe Jiowa ese tichik ngenikich. Ese kútta senikich ach sipwe féri minne mi lap seni met sia tongeni féri. Iká sia achocho úkúúkún ach tufich, iwe a aúcheani met sia féri fán itan. Pwal och, ekilonei pwóróusen chókkewe mi angang ngeni Jiowa ren unusen letiper. Áwewe chék ren Paul. Ren fite ier a angang weires fán iten Jiowa, a sái fitengéréú mwail me poputááni chómmóng mwichefel. Iwe nge, atun a siwil nónnómun manawan, a aúkúk met a tongeni féri lón ewe angangen afalafal. Itá a wewe ngeni pwe Jiowa ese chúen pwapwa ren? Aapw. A  achocho le féri met a tongeni féri, me Jiowa a efeiéchú. (Féf. 28:​30, 31) Pwal ina chék ussun ren kich, minne sia fang ngeni Jiowa a pwal tongeni siwil fán ekkóch. Nge ewe popun sia angang ngeni, fen ina met mi aúchea me ren. Iwe iei sipwele káé ifa ussun Jiowa a pwáári pwe a pwapwa rech.

IFA USSUN JIOWA A PWÁÁRI PWE A PWAPWA RECH?

10. Ifa ussun sia tongeni rong án Jiowa erenikich pwe a pwapwa rech? (Jon 16:27)

¹⁰ A fang ngenikich ewe Paipel. Jiowa a kútta alen an epwe pwáári ngeni néún kewe aramas pwe a tongeer me a pwapwa rer. A mak lón ewe Paipel ekkewe ruu atun Jiowa a ereni Jises pwe i néún we mi áchengicheng, me a pwapwa ren. (Mat. 3:17; 17:5) Ka mochen rong án Jiowa erenuk pwe a pwapwa reom? Jiowa ese kan fósetiw seni láng, nge a fós ngenikich seni an we Kapas. Atun sia álleani alon Jises kewe mi pwáári tong ngeni néún kewe chón káé, ussun itá nge sia rong án Jiowa erenikich ekkena. (Álleani Jon 16:27.) Jises a áppirúfichi napanapen Seman we. Ina minne, atun sia álleani ussun án Jises pwáári pwe a tongei chókkewe mi tapweló mwirin nge rese unuséch, sia tongeni anchangei pwe Jiowa a erenikich ekkena kapas.—Jon 15:​9, 15.

11. Atun sia kúna sóssót itá a wewe ngeni pwe Jiowa ese chúen pwapwa rech? (Jemes 1:12)

¹¹ A awora minne mi lamot ngenikich. Jiowa a mochen álisikich, áwewe chék ren an awora osupwangach lón pekin áion. Fán ekkóch eli Jiowa epwe mut ngenikich ach sipwe kúna sóssót, ussun chék met a fis ngeni Jop. (Hiop 1:​8-11) Atun a torikich sóssót, saminne a wewe ngeni pwe Jiowa ese chúen pwapwa rech. Iwe nge, a fen atufichi ach sipwe pwáári úkúúkún ach tongei me lúkúlúk wóón. (Álleani Jemes 1:12.) Me lepwolen ach kewe sóssót, sipwe kúna úkúúkún an tongekich me an álisikich le likiitú.

12. Met sia káé seni pwóróusen Dmitrii?

¹² Ekieki met a fis ngeni emén Chón Kraist mwán lón Asia itan Dmitrii. A towu seni an angang me ese mwo kúnékún an angang ren fite maram. Iwe a filaatá le alapaaló an fiti ewe angangen afalafal me lúkúlúk wóón Jiowa. Fite maram mwirin, esaamwo kúnékún an angang. Mwirin a úri eú semmwen mi chou me ese chúen tongeni pwáátá. A poputá  le meefi pwe pokiten ese chúen tongeni apwénúetá wisan wisen sam me mwán pwúpwúlú, iwe ese chúen wor aúchean me Jiowa esap pwapwa ren. Iwe lón eú pwinin, néún we nengngin a print eché taropwe mi mak lón ewe wokisin Aisea 30:15: ‘Oupwe küna pöchökül ren ämi mosonotam me ämi lükülük.’ Iwe a uweato ren seman we me ereni, “Papa, atun ka lichippúng, kopwe chemeni ei wokisin.” Dmitrii a mirititi pwe ren án Jiowa álillis a naféch enen me pisekin chón an we famili me a núkúnúkéch imwer. A pwal erá, “A lamot úpwe mosonottam me sópweeló le lúkúlúk wóón ái we Kot.” Iká ka pwal kúna ena esin sóssót, ka tongeni lúkúlúk pwe Jiowa a tongeek me epwe sópweeló le álisuk le likiitú.

13. Ié kewe Jiowa a néúnéú an epwe pwáári pwe a pwapwa rech, me ifa ussun?

¹³ A fang ngenikich chienach kewe Chón Kraist. Jiowa a pwáári an pwapwa rech ren an néúnéú pwiich kewe. Áwewe chék, eli epwe amwékútú ekkóch ar repwe apéchékkúlakich lón ewe fansoun mi lamot ngenikich. A fis ena ngeni emén Chón Kraist fefin seni Asia atun a nóm lón watteen weires. A towu seni an angang me a fókkun semmwen. Mwirin pwúlúwan we a féri eú tipis mi chou me ese chúen wiseni ewe wis mwán mi ásimaw. A erá: “Úse silei pwata a fiffis ngeniei ekkeei mettóch. Úa ekieki iká úa féri och mettóch mi mwáál iwe Jiowa ese chúen pwapwa rei.” Chienach na a tingormaw ngeni Jiowa an epwe pwáári ngeni iká a chúen pwapwa ren. Iwe met Jiowa a féri? A erá, “Ekkewe mwán mi ásimaw ra fós ngeniei me alúkúlúkú ngeniei pwe Jiowa a tongeei.” Ekiseló mwirin a pwal tingorei Jiowa an álillis. A erá, “Lón ena chék ránin, a toriei eché taropwe seni fitemén lón ewe mwichefel. Atun úa álleani ar kana kapas mi apéchékkúl, úa meefi pwe  Jiowa a pélúweni ái we tingor.” Ewer, fán chómmóng Jiowa a pwáári pwe a pwapwa rech ren an néúnéú ekkewe ekkóch le apéchékkúlakich.—Kölf. 10:17.

14. Ifa pwal eú alen án Jiowa pwáári pwe a pwapwa rech?

¹⁴ Jiowa a pwal pwáári pwe a pwapwa rech ren an néúnéú pwiich kewe le awora kapasen éúréúr atun a lamot ngenikich. Áwewe chék, lón fansoun ekkewe aposel, Jiowa a néúnéú aposel Paul le makkeei 14 taropwe ngeni chienan kewe Chón Kraist. Paul a awora kapasen fén fán tong nge mi pwal tuwenewen. Pwata Jiowa a emmweni Paul an epwe awora ekkena kapasen emmwen? Jiowa i emén Sam mi múrinné, me a emiriti néún kewe a “pwapwaiti.” (SalF. 3:​11, 12) Iwe iká a torikich kapasen fén seni ewe Paipel, ina pisekin ánnet pwe Jiowa a pwapwa rech, nge ese wewe ngeni pwe a song rech. (Ipru 12:6) Ikkefa pwal ekkóch pisekin ánnet pwe Jiowa a pwapwa rech?

PWAL EKKÓCH PISEKIN ÁNNET MI PWÁÁRI PWE JIOWA A PWAPWA RECH

15. Ié kewe Jiowa a fang ngeniir an we ngún mi fel, me pwata ena a alúkúlúkúkich?

¹⁵ Jiowa a fang an ngún mi fel ngeni chókkewe chék a pwapwa rer. (Mat. 12:18) Sia tongeni eisini pwisinkich, ‘Úa kan pwáppwári ekkóch uwaan án Kot we ngún mi fel?’ Úa kan mosonottam ngeni ekkewe ekkóch iei lap seni ewe atun úa kerán silei ussun Jiowa? Ren enletin, lapólóón óm káé le pwáári uwaan án Kot we ngún mi fel, pwal ina lapólóón óm kúna pwe Jiowa a pwapwa reom!—Ppii ewe pwóór “ Uwaan ewe Ngún mi Fel . . .”

16. Ié kewe Jiowa a néúnéú le afalafala ewe pwóróus allim, me met meefiom ren ena? (1 Tesalonika 2:4)

¹⁶ Jiowa a ewisa ngeni chókkewe a pwapwa rer ar repwe afalafala ewe pwóróus allim. (Álleani 1 Tesalonika 2:4.) Ppii ifa ussun emén fefin Chón Kraist itan Jocelyn a kúna feiéchún an afalafala ewe pwóróus allim. Eú rán atun a pwáátá a meefi letipechou. A erá, “Úa meefi apwangapwang me úa meefi pwe ese wor lamotei. Nge úa pioneer me ina ái we ránin afalafal. Iwe úa iótek me úa ló afalafal.” Lón ena chék sossorun Jocelyn a chuuri emén fefin itan Mary, me a mochen káé ewe Paipel. Fitu maram mwirin Mary a erá pwe a fen tittingor án Kot álillis lón ewe atun Jocelyn a fichifich wóón asaman we. Met Jocelyn a káé seni ei pwóróus? A erá, “Úa meefi pwe ussun nge Jiowa a ereniei, ‘Úa pwapwa  reom.’” Pwúngún, esap meinisin repwe etiwa ach afalafal ngeniir. Nge sia tongeni lúkúlúk pwe Jiowa a pwapwa atun sia achocho úkúúkún ach tufich le afalafala ewe pwóróus allim ngeni ekkewe ekkóch.

17. Met ka káé seni minne Vicky a apasa ussun ewe méén kepich? (Kölfel 5:12)

¹⁷ Chókkewe chék Jiowa a pwapwa rer, ra kúna feiéchún ewe méén kepich. (1 Tim. 2:​5, 6) Nge ifa ussun iká sia chúen meefi pwe Jiowa ese pwapwa rech, inaamwo iká sia lúkú ewe méén kepich me papatais? Chemeni pwe esap fansoun meinisin sia tongeni lúkú minne sia meefi, nge sia tongeni unusen lúkú Jiowa. Me ren, chókkewe mi lúkú ewe méén kepich iir aramas mi pwúng me a pwonei pwe epwe efeiéchúúr. (Álleani Kölfel 5:12; Rom 3:26) Án Vicky ekilon wóón ewe méén kepich a álisi. Eú rán atun a ekilonei ewe méén kepich, a mirititi ei: “Ren fansoun langattam Jiowa a mosonottam ngeniei. . . . Nge, ussun itá úa ereni: ‘Kese tongeni tongei emén ussun chék ngang. Án Noum na asor ese tongeni pwélúoló ái kewe tipis.’” Pokiten a ekilonei ewe liffangen méén kepich, iwe a poputá le meefi tongan me ren Jiowa. Sia pwal tongeni meefi án Jiowa tongekich me silei pwe a pwapwa rech atun sia ekilonei ewe méén kepich.

18. Met sia tongeni lúkúlúkú iká sia sópweeló le tongei Semach we lón láng?

¹⁸ Ikáámwo sia achocho le apwénúetá minne sia káé lón ei lesen, nge eli epwe wor atun sipwe lichippúng me meefi iká Jiowa a pwapwa rech. Iká a fis ena, chemeni pwe a pwapwa ren “chókkewe mi sópweeló le tongei I.” (Jem. 1:12) Ina popun, sópweeló le ririéchúló ngeni Jiowa me kútta ekkewe atun a pwáári pwe a pwapwa reom. Me chechchemeni pwe i “ese towaw seni emén me emén leich.”—Féf. 17:27.