1-2. Met a lamot emén epwe féri me mwen an epwe papatais?

 LÓN ekkewe nimu ier a ló, lap seni eú million aramas ra papatais me wiliiti Chón Pwáraatá Jiowa. Chómmóng me lein chókkana ra káé ewe enlet ‘seni chék leménúkolur’ ussun chék Timoty, ewe chón káé lón fansoun ekkewe aposel. (2 Tim. 3:​14, 15) Ekkóch ra káé ussun Jiowa atun ra watte, nge ekkóch atun ra fen chinnap. Lón ekkewe ier, emén fefin mi káé ewe Paipel ren Chón Pwáraatá Jiowa, a papatais lón an 97 ierin!

² Iká en emén chón káé are iká en emén mi mámmááritá ren semom me inom iir Chón Pwáraatá, en mi ekieki óm kopwe papatais? A fókkun múrinné met ka ekieki! Nge me mwen óm kopwe papatais, a lamot kopwe akkomw fangoló manawom ngeni Jiowa. Ei lesen epwe áweweei met weween óm kopwe fangoló manawom ngeni Kot. Epwe pwal álisuk le silei pwata ese wor popun óm kopwe tipemwárámwár le fangoló manawom me papatais atun ka mmólnetá ngeni.

MET WEWEEN ÁN EMÉN FANGOLÓ MANAWAN?

3. Eiteita ekkóch chókkewe lón Paipel mi káimuuló fán iten Jiowa.

³ Lón ewe Paipel, emén mi fangoló manawan ngeni Jiowa, a káimuuló fán iten eú popun mi aúchea. Ekkewe chón Israel, iir eú mwú mi fen káimuuló fán iten Jiowa. Nge ekkóch chón ena mwú, ra káimuuló fán iten Jiowa ren och popun mi kkóló aúchean. Áwewe chék, Aaron a mwárámwár efóch esissil mi pin, efóch kolt mi chépéép mi nóm wóón etenmesen imwan we akkaw. Ena kolt mi chépéép a pwáári pwe a kefilitá an epwe eáni eú angang mi kkóló aúchean, epwe emén néún chón Israel souasor mi lapalap. (Lif. 8:9) Ekkewe Nasir ra pwal fangoló manawer ngeni Jiowa lón eú napanap mi kkóló aúchean.  Ewe kapas “Nasir,” ewe mi feito seni ewe kapasen Ipru nazirʹ, a wewe ngeni “Emén mi Káimuuló,” are “Emén mi Kefilitá fán Iten Eú Angang mi Aúchea.” Ekkewe Nasir ra tichikin fiti ekkewe allúk mi kawor fán iter lón ewe Allúkún Moses.—Num. 6:​2-8.

4. (a) Lupwen ka fangoló manawom ngeni Jiowa, met ka fókkun aúcheani lón manawom? (b) Met weween óm ‘kopwe pennúkú pwisin en’? (Pwal ppii ewe sasing.)

⁴ Lupwen ka fangoló manawom ngeni Jiowa, ka filaatá óm kopwe wiliiti emén néún Jises Kraist chón káé me óm féri letipen Kot, ina och mettóch mi fókkun aúchea lón manawom. Met a pwal lamot kopwe féri? Jises a apasa: “Iká emén a mochen tapwoto mwiri, epwe pennúkú pwisin i.” (Mat. 16:24) Ewe kapasen Krik mi afféú ngeni “epwe pennúkú pwisin i” a pwal tongeni wewe ngeni, “ese chúen manaw fán itan pwisin.” Pokiten en emén néún Jiowa chón angang mi fen fangoló manawom ngeni, a lamot óm kopwe péén sonuk meinisin mettóch ese apwapwaai letipan. (2 Kor. 5:​14, 15) A kapachelong óm kopwe péén sonuk “ekkewe angangen futuk,” áwewe chék ren lisowumwáál. (Kal. 5:​19-21; 1 Kor. 6:18) Óm fiti ekkena allúk epwe áweiresi manawom? Esap áweiresi manawom iká pwe ka tongei Jiowa me lúkúlúk pwe an kewe allúk ra échituk. (Kölf. 119:97; Ais. 48:​17, 18) Iei met emén Chón Kraist mwán itan Nicholas a apasa, “Ka tongeni ekieki pwe án Jiowa kewe allúk ra ussun mecháán eú ttitin kalapus mi eppetuk óm kopwe féri met ka mochen féri are ussun mecháán ttitin emén laion mi túmúnuk seni feiengaw.”

5. (a) Ifa ussun kopwe fangoló manawom ngeni Jiowa? (b) Met sókkofesenin óm fangoló manawom me óm papatais? (Pwal ppii ewe sasing.)

⁵ Ifa ussun kopwe fangoló manawom ngeni Jiowa? Kopwe pwon ngeni lón iótek pwe kopwe fel ngeni i chék me akkomwa letipan lón manawom. Ewer, ka pwon ngeni pwe kopwe  sópweeló le tongei i “ren unusen letipom me ren unusen manawom me ren unusen ekiekum me ren unusen péchékkúlom.” (Mark 12:30) Óm eáni pwonen fangoló manawom, a chék fis lefilemi me Jiowa. Nge papatais, a kan pwá ngeni aramas, a áiti ngeniir pwe ka fen fangoló manawom. Óm fangoló manawom, ina eú pwon mi pin. Ka achocho ngeni óm kopwe apwénúetá óm na pwon, me ina met Jiowa a pwal mochen óm kopwe féri.—SalAf. 5:​4, 5.

PWATA KOPWE FANGOLÓ MANAWOM NGENI JIOWA?

6. Met a amwékútú emén an epwe fangoló manawan ngeni Jiowa?

⁶ Ewe ákkáeúin popun óm kopwe fangoló manawom ngeni Jiowa, ina óm tongei. Óm tong ngeni ese lóngólóng wóón óm chék memmeef. A péchékkúleló óm tongei Jiowa pokiten ka kákkáé “ewe sile mi enlet” ussun i me minne a tipeni. (Kol. 1:9) Óm káé ewe Paipel a alúkúlúkú ngonuk pwe (1) Jiowa i wesewesen emén, (2) ewe Paipel ina an we Kapas, me (3) a áeá an we mwicheich le apwénúetá letipan.

7. Me mwen ach fangoló manawach ngeni Kot, met a lamot sipwe kan féfféri?

⁷ Chókkewe mi fangoló manawer ngeni Jiowa repwe silei ekkewe popun afalafal mi nóm lón an we Kapas me repwe álleasochisi an kewe allúk. Ra achocho úkúúkún ar tongeni le áiti ngeni ekkewe ekkóch met ra káé. (Mat. 28:​19, 20) A péchékkúleló ar tongei Jiowa, me ra fókkun mochen fel ngeni i chék. Ka pwal ina ussun? Iká ka tongei Jiowa seni unusen letipom, kesap fangoló manawom me papatais pokiten chék kopwe apwapwaai letipen ewe mi káé ngonuk are semom kewe me  inom, are pokiten ina met meinisin chienom kewe ra féri.

8. Ifa ussun kilisou epwe álisuk le filaatá óm kopwe fangoló manawom ngeni Jiowa? (Kölfel 116:​12-14)

⁸ Atun ka ekieki ussun meinisin ekkewe mettóch Jiowa a féri fán itom, kopwe meefi kilisou ngeni me mochen fangoló manawom ngeni. (Álleani Kölfel 116:​12-14.) A fich án ewe Paipel eita ngeni Jiowa ewe Chón Liffangoto “meinisin sókkun liffang mi múrinné me meinisin sókkun liffang mi unuséch.” (Jem. 1:17) Nge ewe mi kon lap me lein ekkena liffang, ina án Néún we Jises, fangoló manawan. Ekieki ifa úkúúkún amwararen ena liffang! Ewe méén kepich a atufichi óm kopwe eáni eú riri ngeni Jiowa mi péchékkúl. Me i a fang ngonuk ewe ápilúkúlúkún manaw esemuch. (1 Jon 4:​9, 10, 19) Óm fangoló manawom ngeni Jiowa, ina eú alen óm pwáári enletin óm kilisou ren an pwáári ngonuk ewe esin tong lón ena esin napanap mi kkóló aúchean, fitifengen me meinisin ekkewe pwal ekkóch feiéch a fang ngonuk. (Tut. 16:17; 2 Kor. 5:15) Ewe lesen 46 nampa 4, lón ewe puk Eáni Manaw mi Pwapwa! ikewe a pwal nóm ewe video itelapan Presenting Your Gifts to God úlúngát minich ttaman, a menlapei ena esin kilisou.

KA MMÓLNETÁ LE FANGOLÓ MANAWOM ME PAPATAIS?

9. Pwata a lamot án emén esap fangoló manawan iká ese feito seni letipan?

⁹ Eli ka meefi pwe kese mwo mmólnetá le fangoló manawom me papatais. Eli a chúen lamot óm kopwe féri ekkóch siwil lón manawom pwe kopwe tongeni álleasochisi án Jiowa kewe allúk, are eli a chúen lamot och fansoun pwe kopwe apéchékkúlaló óm lúkú. (Kol. 2:​6, 7) Esap meinisin chón káé Paipel, a taitap ar feffeitá lón ar tongei Jiowa, me esap meinisin kúkkún me sáráfé mi mmólnetá le fangoló manawer me papatais, a chék taitap ieriir. Achocho le weweiti met ekkewe mi lamot kopwe féri siwil wóór, mwirin féri ekkewe mettóch ka tufichin fériir, me kosap apépéék ngeni ekkewe ekkóch.—Kal. 6:​4, 5.

10. Met ka tongeni féri iká ka mirititi pwe kesaamwo mmólnetá le fangoló manawom me papatais? (Pwal ppii ewe pwóór “ Fán Iten Chókkewe Semer me Iner Iir Chón Pwáraatá Jiowa.”)

¹⁰ Ikáámwo ka mirititi pwe kesaamwo mmólnetá le fangoló manawom ngeni Jiowa, sópweeló le achocho ngeni ena. Tingorei Jiowa an epwe álisuk le féri ekkewe siwil mi lamot kopwe féri lón manawom. (Fil. 2:13; 3:16) Ka tongeni lúkúlúk pwe i a rongorong ngeni óm kewe iótek me epwe álisuk.—1 Jon 5:14.

POPUN ÁN EKKÓCH TIPEMWÁRÁMWÁR

11. Ifa ussun Jiowa epwe álisikich le akkamwéchú ach túppwél ngeni?

¹¹ Ekkóch mi fen mmólnetá le fangoló manawer me papatais ra chúen tipemwárámwár. Eli ra ekieki, ‘Ifa ussun iká mwirin ái papatais úa féri eú tipis mi chou me katowu?’ Iká ka pwal aúreki ena, kopwe lúkúlúk pwe Jiowa epwe fang ngonuk meinisin met mi lamot ngonuk pwe kopwe “tongeni manaweni ewe manaw mi fich ngeni [I] me unusen apwapwaai i.” (Kol. 1:10) Epwe pwal fang ngonuk óm péchékkúl le féri minne mi pwúng. A fen álisi chómmóng aramas ar repwe féri minne mi pwúng. (1 Kor. 10:13) Ina eú popun chókúkkún chék chókkewe ra katowu seni mwichefel. Jiowa a álisi néún kewe aramas ar repwe akkamwéchú ar túppwél ngeni.

12. Ifa ussun sia tongeni ttii senikich tipis mi chou?

¹² Aramas meinisin ra kúkkúna sóssótun ar repwe féri mettóch ese pwúng. (Jem. 1:14) Iwe nge, pwisin filiom met kopwe féri  atun ka kúna sóssót. Ren enletin, pwisin en ewe ka tongeni nemeni ifa ussun kopwe áeá manawom. Nge ekkóch aramas ra apasa pwe sise tongeni nemeni met sia meefi are met sia féri, nge mi mwáál alor na. Ka tongeni nemeni óm mocheniangaw. Ina minne, inaamwo iká ka kúna sóssót, nge ka tongeni filaatá óm kosap féri minne mi ngaw. A wor met ka tongeni féri pwe kosap féri tipis. Áwewe chék, ikkiótek ngeni Jiowa iteiten rán, féfféri óm káéén Paipel, fiffiti ekkewe mwiich, me akkafalafal ngeni ekkewe ekkóch. Óm féri ekkena mettóch iteitan, epwe apéchékkúlok óm kopwe akkamwéchú óm túppwél ngeni Jiowa. Kosap pwal ménúkaaló pwe Jiowa epwe álisuk le féri ena.—Kal. 5:16.

13. Ifa ewe leenien áppirú mi múrinné Josef a isettiw fán itach?

¹³ Epwe mecheres ngonuk óm kopwe akkamwéchú óm túppwél ngeni Jiowa iká ka fen filaatá me mwan met kopwe féri iká ka nóm lón sóssót. Ewe Paipel a fen áiti ngenikich pwóróusen chómmóng aramas mi féri ena inaamwo iká iir pwal aramas rese unuséch. Áwewe chék, fán fite pwúlúwen Potifar we a kan sótuni Josef. Nge, Josef a fen silei met i epwe féri. Ewe Paipel a apasa pwe “Josef esap tipeeu ngeni,” me iei met a erá: “Ifa usun, üpwe föri och föför mi fokun ngau o tipis ngeni Kot?” (Ken. 39:​8-10) A ffat pwe Josef a fen silei met i epwe féri pwal mwo nge me mwen án neminna epwe sótuni i. An féri ena, a ámecheresi an epwe féri minne mi pwúng atun a kúna sóssót.

14. Ifa ussun sia tongeni káé le péén senikich sóssót?

¹⁴ Ifa ussun ka tongeni áppirú Josef le féri minne mi pwúng atun kopwe kúna sóssót? Ka tongeni filaatá iei met kopwe féri iká a toruk sóssót. Kopwe mwittir péén sonuk ekkewe mettóch Jiowa a oput, me kosap mwo nge ekieki ussur. (Kölf. 97:10; 119:165) Iká ka féri ena, iwe kesap féri tipis pún ka fen apwúngaló met kopwe féri.

15. Ifa ussun emén a tongeni pwáári pwe a “enletin kúkkútta” Jiowa? (Ipru 11:6)

¹⁵ Eli ka silei pwe ka fen kúna ewe enlet me ka mochen kopwe angang ngeni Jiowa ren unusen letipom, nge ka chúen meefi pwe kesaamwo mmólnetá le fangoló manawom me papatais. Ka tongeni féri met King Tafit a féri. Ka tongeni tingormaw ngeni Jiowa me erá: “Ai Kot, kopwe atittinaei o silei letipei. Kopwe sotuniei o silei ai ekiek. Kopwe pi ika mi wor och mi ingau lon manauei, nge kopwe  emweniei won ewe al esemüch.” (Kölf. 139:​23, 24) Jiowa a efeiéchú iir kewe mi “enletin kúkkútta i.” Óm achocho le tikeri óm mochen fangoló manawom me papatais, a pwáári pwe ka féri ena.—Álleani Ipru 11:6.

KOPWE AKKARAP NGENI JIOWA

16-17. Ifa ussun Jiowa a pani ngeni pwisin I chókkewe semer me iner iir Chón Pwáraatá Jiowa? (Jon 6:44)

¹⁶ Jises a apasa pwe Jiowa a panato néún kewe chón káé. (Álleani Jon 6:44.) Ekieki úkúúkún amwararen ena me met weween ngonuk. Jiowa a kúna och mettóch mi múrinné lón emén me emén ekkewe aramas a paniir ngeni pwisin i. Me ren pwe emén me emén chókkana iir “aramas mi sókkóló öüchchear.” (Tut. 7:​6, Paipel mi Pin—Agapé) A pwal ina ussun an ekiek fán itom.

¹⁷ Iwe nge, eli en emén néún Chón Pwáraatá Jiowa. Eli ka meefi pwe ka chék angang ngeni Jiowa pokiten semom kewe me inom ra angang ngeni nge esap pokiten Jiowa a paanukoto. Iwe nge, ewe Paipel a apasa: “Oupwe arap ngeni Kot, iwe i epwe arap ngenikemi.” (Jem. 4:8; 1 Kron. 28:9) Iká kopwe akkomw mwékút le arap ngeni Jiowa, iwe i epwe pwal arap ngonuk. Me ren Jiowa esap chék en chón eú kúmi. I a panato emén me emén ngeni pwisin I, kapachelong emén me emén chókkewe mi mááritá lón ewe enlet. Lupwen ena esin aramas a akkomw mwékút le arap ngeni Jiowa, I epwe pwal arap ngeni ussun met Jemes 4:8 a apasa.—Apépééi ngeni 2 Tesalonika 2:13.

18. Met sipwe káé lón en lesen mwirin ei? (Kölfel 40:8)

¹⁸ Lupwen ka fangoló manawom ngeni Jiowa me papatais, ka áppirú Jises. A fang manawan ngeni Seman we an epwe féri ese lifilifil met a ereni epwe féri. (Álleani Kölfel 40:8; Ipru 10:7) Lón en lesen mwirin ei, sipwe pwóróusfengen wóón met epwe álisuk le sópweeló óm angang ngeni Jiowa fán túppwél mwirin óm papatais.