1-2. Menni feiéch a tori emén mwirin an papatais?

 SIA pwapwa atun sia papatais me chóni án Jiowa we famili. A eú feiéch ach eáni eú ririéch ngeni Jiowa. Sia tipeeú ngeni alon Tafit, ewe soumakken kélfel, ewe mi apasa: “[Ra pwapwa] chokewe ka [Jiowa] filiretä o emwenireto pwe repwe nom lon leniom mi pin.”—Kölf. 65:4.

² Jiowa a filaatá ié kewe repwe chóni an we famili. Ussun met sia fen káé lón ewe lesen akkomw pwe I a filaatá le kkan ngeni chókkewe mi pwáári ar mochen ririéch ngeni. (Jem. 4:8) Lupwen ka fangoló manawom me papatais, ka eáni eú ririéch ngeni Jiowa lón eú napanap mi kkóló aúchean. Ka tongeni lúkúlúk pwe mwirin óm papatais, I epwe ‘ninätiu wom chomong sokun feiöch mi somwola.’—Mal. 3:10; Jer. 17:​7, 8.

3. Ifa wisen ekkewe Chón Kraist mi fangoló manawer me papatais? (Än Salomon Afalafal 5:​4, 5)

³ Papatais, ina chék poputáán óm áeá manawom le angang ngeni Jiowa. Mwirin óm féri ena, kopwe mochen achocho úkúúkún óm tufich le apwénúetá met ka pwonei ngeni Jiowa me akkamwéchú óm túppwél inaamwo iká kopwe nóm lón weires are kúna sóssótun óm lúkú. (Álleani Än Salomon Afalafal 5:​4, 5.) Pokiten en emén néún Jises chón káé, kopwe áppirú an leenien áppirú me apwénúetá an kewe allúk úkúúkún óm tongeni. (Mat. 28:​19, 20; 1 Pit. 2:21) Ei lesen epwe álisuk le féri ena.

 ‘TATTAPWELÓ MWIRIN’ JISES INAAMWO IKÁ A TORUK SÓSSÓT ME WEIRES

4. Epwe met weween án néún Jises kewe chón káé mwárei efóch “iráán ninni”? (Luk 9:23)

⁴ Mwirin óm papatais, kosap ekieki pwe esap toruk osukosuk. Ren enletin, Jises a fen affata pwe néún kewe chón káé repwe mwárei efóch “iráán ninni.” Ina met repwe féri “rán me rán.” (Álleani Luk 9:23.) Itá weween alon na pwe ekkewe chón tapweló mwirin repwe chék kúkkúna riáfféú? Aapw, a chék menlapei pwe me lúkún ar kúna feiéch, repwe pwal kúna riáfféú. Ekkóch me lein ekkena riáfféú, eli repwe fókkun áweires.—2 Tim. 3:12.

5. Ikkefa ekkewe feiéch Jises a pwonei ngeni chókkewe mi pennúkúóló mettóch fán iten Mwúún Kot?

⁵ Eli ka fen kúna riáfféú seni chón óm famili, are eli ka fen filaatá óm kosap awatteeló noum moni are achómmóngaaló pisekum fán iten óm kopwe akkomwa angangen án Kot we Mwú lón manawom. (Mat. 6:33) Iká ina, kopwe lúkúlúk pwe Jiowa mi silei met ka féri fán itan. (Ipru 6:10) Ese mwáál ka fen kúna enletin alon Jises ei: “Ese wor emén epwe likitaaló imwan are pwiin are mwongean are fefinan are inan are seman are néún are fénúan fán ásengesi me fán ásengesin ewe kapas allim, nge esap angei fán 100 iei lón ei fansoun imwan, pwiin, mwongean, fefinan, inan, néún, me fénúan, eti riáfféúmwáál, me pwal lón ewe ótóten fénúfan epwele feito, manaw esemuch.” (Mark 10:​29, 30) Ekkewe feiéch mi toruk ra fókkun watte lap seni met ka fen pennúkúóló.—Kölf. 37:4.

6. Pwata a chúen lamot óm kopwe fiffiu ngeni ekkewe “mochenian futuk” mwirin óm papatais?

⁶ A chúen lamot óm kopwe fiffiu ngeni ekkewe “mochenian futuk” mwirin óm papatais. (1 Jon 2:16) Popun pún kesaamwo unuséch. Eli fán ekkóch meefiom epwe pwal ussun meefien ewe aposel Paul, ewe mi makkeei: “Seni lón letipei úa fókkun pwapwaiti án Kot allúk, nge úa kúna me lón inisi pwal eú allúk mi ú ngeni allúkún ái ekiek me emmweniei ngeni ái úpwe fétek fán allúkún tipis ewe mi nóm lón inisi.” (Rom 7:​22, 23) Eli kopwe lichippúng pún a chúen lamot óm kopwe fiu ngeni óm kewe apwangapwang. Iwe nge, óm ekkekieki ussun óm pwon ngeni Jiowa atun ka fangoló manawom ngeni, epwe álisuk óm kopwe tipeppós le ú ngeni sóssót. Ren enletin, ena pwon epwe álisuk atun kopwe kúna sóssót. Ifa ussun?

7. Ifa ussun óm fangoló manawom ngeni Jiowa epwe álisuk le akkamwéchú óm túppwél ngeni?

⁷ Lupwen ka fangoló manawom ngeni Jiowa, ka pennúkú pwisin en. A wewe ngeni pwe ka filaatá óm kosap féri pwisin mochenum me met ka mochen achocho le tikeri iká repwe eletipengawa Jiowa. (Mat. 16:24) Ina minne, iká ka nóm fán sóssót are weires, ese lamot óm kopwe chúen ekieki pún ka fen silei met kopwe féri, weween kopwe akkamwéchú óm túppwél ngeni Jiowa. Kopwe tipeppós le apwapwaai Jiowa. Kopwe ussun Jop, inaamwo iká a fókkun kúna watteen riáfféú, nge fán tipeppós a erá: “Úsapw fangetá ái túppwél.”—Hiop 27:​5, NW.

8. Ifa ussun óm ekilonei óm iótekin fangoló manawom ngeni Jiowa epwe álisuk le ú ngeni sóssót?

⁸ Óm ekilonei óm we iótekin fangoló manawom ngeni Jiowa epwe apéchékkúlok le ú ngeni sóssót. Áwewe chék, kopwe núesik ngeni pwúlúwen emén? Fókkun aapw! Ka fen pwonei ngeni Jiowa pwe kesap fókkun féri ena esin mettóch. Iká ka túmúnú án mocheniangaw esap mámmááritá lón letipom, iwe esap weires óm kopwe ú ngeni. Kopwe kul seni “ewe leni ia ekewe aramasangau ra feila ie.”—SalF. 4:​14, 15.

9. Ifa ussun óm ekilonei óm iótekin fangoló manawom ngeni Jiowa epwe pwal álisuk óm kopwe akkomwa óm fel ngeni?

 ⁹ Nge ifa ussun iká emén a etiwok óm kopwe eáni eú angang mi tongeni efisi óm kopwe etiwaaló ach kewe mwiich? Ka fen silei met kopwe féri. Ka fen filaatá me mwan pwe kesap eáni eú angang mi eppeti óm kopwe fiffiti mwiich iteitan. Ina minne, epwe mecheres ngonuk óm kosap etiwa ena esin angang pwe kosap pwal weires le ekieki ifa ussun kopwe akkomwa Jiowa lón manawom. Óm ekilonei án Jises leenien áppirú epwe álisuk. I a tipeppós le apwapwaai Seman we. Kopwe áppirú Jises le mwittir péén sonuk mettóch meinisin mi tongeni eletipengawa ena Kot ka fangoló manawom ngeni.—Mat. 4:10; Jon 8:29.

10. Mwirin óm papatais, ifa ussun Jiowa epwe álisuk óm kopwe “tattapweló mwirin” Jises?

¹⁰ Atun a toruk osukosuk are sóssót, ina eú alen óm kopwe pwáraatá pwe ka mochen ‘tattapweló mwirin’ Jises. Me kopwe lúkúlúk pwe Jiowa epwe álisuk. Ewe Paipel a apasa: ‘Kot mi túppwél, me i esap mutatá óm kopwe kúna eú sóssót mi lap seni met kopwe tongeni likiitú ngeni, nge atun ena sóssót, i epwe pwal féri efóch alen towu pwe kopwe tongeni likiitú.’—1 Kor. 10:13.

MET KA TONGENI FÉRI PWE KOPWE TATTAPWELÓ MWIRIN JISES?

11. Ifa eú mettóch epwe fókkun álisuk óm kopwe tattapweló mwirin Jises? (Pwal ppii ewe sasing.)

¹¹ Jises a angang ngeni Jiowa ren unusen letipan, me a ikkiótek ngeni. (Luk 6:12) Ren enletin, eú mettóch epwe fókkun álisuk óm kopwe tattapweló mwirin Jises mwirin óm papatais, ina óm sópweeló le féfféri met ekkewe mi apéchékkúla óm riri ngeni Jiowa. Ewe Paipel a apasa: “Ese lifilifil úkúúkún feffeitáách, sipwe chék sópweeló le feffeitá lón ei esin napanap.” (Fil. 3:16) Fán ekkóch,  kopwe rongorong pwóróusen chienach kewe Chón Kraist mi filaatá le alapaaló ar angang ngeni Jiowa. Eli ra fiti ewe Sukulen Chón Afalafala ewe Mwú are ra mwékút ngeni ekkewe leeni mi osupwangen chón afalafal ie. Iká ka tongeni achocho le tikeri ena, iwe a fókkun múrinné óm kopwe achocho ngeni. Néún Jiowa kewe aramas ra pwapwa le alapaaló ar angang ngeni. (Féf. 16:9) Iwe nge, ifa ussun iká kese mwo tongeni féri ena iei? Kosap ekieki pwe ka lamotkisikis seni chókkewe mi tongeni féri ena. Ewe mi lamot, ina óm kopwe sópweeló le likiitú. (Mat. 10:22) Kosap ménúkaaló pwe ka fókkun apwapwaai Jiowa atun ka féri met ka tongeni mi lóngólóng wóón nónnómum iei. Ina eú mettóch mi aúchea ka tongeni féri pwe kopwe tattapweló mwirin Jises mwirin óm papatais.—Kölf. 26:1.

12-13. Met ka tongeni féri iká óm tinikken a kisikisiló? (1 Korint 9:​16, 17) (Pwal ppii ewe pwóór “ Sópweeló le Fiti ewe Kitir.”)

¹² Met ka tongeni féri iká ka meefi pwe óm iótek ese pop seni letipom, are kese chúen pwapwaiti ewe angangen afalafal epwe ussun me mwan? Ifa ussun iká kese chúen pwapwaiti óm álleaan Paipel epwe ussun me mwan? Iká ka meefi ekkena esin memmeef mwirin óm papatais, kosap ekieki pwe ese chúen nóm reom án Jiowa ngún mi fel. En emén aramas kese unuséch, me meefiom kewe ra tongeni sissiwil. Iká óm tinikken a kisikisiló, ekieki pwóróusen ewe aposel Paul. Inaamwo iká a achocho le áppirú Jises, nge fán ekkóch a silei pwe ese kon péchékkúl letipan an epwe féri met mi lamot an epwe féri. (Álleani 1 Korint 9:​16, 17.) A erá: “Ikáámwo úa féri esap seni mochenin letipei, Kot a chúen lúkúlúk wóói ái úpwe féri ei angang.” Weween pwe Paul a tipeppós le apwénúetá  an we angang inaamwo iká mi sókkóló meefian lón ena atun.

¹³ Kopwe pwal ussun Paul, kosap féri kefil epwe chék lóngólóng wóón met ka meefi. Kopwe tipeppós le féri minne mi pwúng inaamwo iká kese wesewesen mochen féri. Iká kopwe chék féfféri minne mi pwúng, iwe, ló, ló, ló, meefiom a tongeni ekkesiwil. Nge ren mwo iei, óm sópweeló le féfféri óm pwisin káé, ikkiótek, fiffiti mwiich, me fiffiti ewe angangen afalafal epwe álisuk le tattapweló mwirin Jises mwirin óm papatais. Atun chienom kewe Chón Kraist repwe kúna óm likiitú le angang ngeni Jiowa, iwe repwe kúna péchékkúl sonuk.—1 Tes. 5:11.

‘KOPWE KAN SÓSSÓTUNUK PWAL PWISIN ÁKKÁNNETA NGONUK’

14. Ikkefa ekkewe mettóch kopwe kan pwisin etittinok wóón, me pwata? (2 Korint 13:5)

¹⁴ Mwirin óm papatais, a lamot óm kopwe kan pwisin etittinok iteitan. (Álleani 2 Korint 13:5.) Fán ekkóch a múrinné óm kopwe ppii iká ka kan ikkiótek iteiten rán, ákkálleani Paipel me ekilon, fiffiti mwiich, me fiffiti ewe angangen afalafal. Achocho le kútta ifa ussun kopwe pwapwaiti ekkena angang me kúkkúna álillis seniir. Áwewe chék, kopwe pwisin eisinuk ekkeei esin kapas eis: ‘Úa tongeni áweweei ngeni aramas ekkewe popun afalafal lón Paipel? Met úpwe tongeni féri pwe úpwe pwapwaiti ái angangen afalafal? Ifa úkúúkún tichikin ái kewe iótek, me ra pwáári pwe úa unusen lúkúlúk wóón Jiowa? Úa kan fiffiti mwiich iteitan? Ifa ussun úpwe émúrinnéló ái aúseling lón mwiich me uwawu meefiei atun mwiich?’

15-16. Met ka káé seni pwóróusen emén Chón Kraist mwán lón an ú ngeni sóssót?

¹⁵ A pwal fókkun lamot óm kopwe etittinafichi met ka apwangapwang wóón. Iei met emén Chón Kraist itan Robert a apasa mi áweweei lamoten ena: “Atun ina epwe 20 ieri, úa angang part-time. Lón eú rán atun sári me angang, emén chienei chón angang fépwúl a etiwaei ngeni imwan we. Neminna a erá pwe áúpwe chék rúúeménúló me epwe fókkun apwapwa met áúpwe féri lefilem. Me akkomwan, ese kon péchékkúl ekkewe kapasen kúnetipingen úa ngeni, nge mwirin úa chék ereni pwe úse mochen, me áweweei ewe popun.” Robert a pworacho ngeni sóssótun we me a fókkun múrinné ena. Iwe nge, mwirin an lúkúsékúrú met a fis, a mirititi pwe epwe  itá siwili met a féri. A erá: “Úse mwittir péén seniei met ewe fépwúl a ereniei, úse ussun Josef ngeni pwúlúwen Potifar we. (Ken. 39:​7-9) Ren enletin, úa máirú ren weiresin ái péén seniei ewe sóssót. Minne a fis a álisiei le mirititi pwe a lamot ái úpwe apéchékkúlaló ái riri ngeni Jiowa.”

¹⁶ Kopwe kúna feiéch iká kopwe pwisin etittinok ussun met Robert a féri. Inaamwo iká ka pworacho ngeni sóssót, pwisin eisinuk, ‘Ifa úkúúkún ttamen ái péén seniei ei sóssót?’ Iká ka mirititi pwe mi lamot óm kopwe émúrinnéló napanapom, kosap lichippúng. Kopwe pwapwa pwe iei ka silei óm kewe apwangapwang. Kopwe iótek ngeni Jiowa ussun óm apwangapwang, me féri ekkewe mettóch mi tongeni álisuk le alapaaló óm mochen álleasochisi i.—Kölf. 139:​23, 24.

17. Ifa ussun pwóróusen Robert a kkúú iten Jiowa we?

¹⁷ A pwal wor met sia tongeni káé seni pwóróusen Robert. A pwal apasa: “Mwirin ái úse mochen etiwa án chienei we chón angang etiwaei, neminnewe a apasa, ‘Ka pás lón ewe sóssót!’ Úa eisini iká met weween alon we. Neminnewe a áweweei pwe emén chienan át, i mi piin Chón Pwáraatá, a ereni pwe meinisin ekkewe sáráfé Chón Pwáraatá ra eáni ruu sókkun manaw me repwe féri met mi ngaw iká a suuk ngeniir. Ina minne, neminna a ereni chienan na pwe epwe sótuniei iká ngang mi pwal ina ussun. Úa fókkun pwapwa lón ena atun pwe úa elingaaló iten Jiowa.”

18. Met ka tipeppós le féri mwirin óm papatais? (Pwal ppii ewe pwóór “ Ruu Lesen Kopwe Pwapwaiti.”)

¹⁸ Atun ka fangoló manawom ngeni Jiowa me papatais, ka pwáári pwe ka mochen epinaaló itan we ese lifilifil met epwe fis. Ka tongeni lúkúlúk pwe Jiowa mi silei ekkewe weires mi toruk me ekkewe sóssót ka pworacho ngeni. Epwe efeiéchú óm achocho le akkamwéchú óm túppwél ngeni. Kopwe lúkúlúk pwe ren álillisin an we ngún mi fel epwe fang ngonuk péchékkúl pwe kopwe chék túttúppwél. (Luk 11:​11-13) Ren án Jiowa álillis, ka tongeni tattapweló mwirin Jises mwirin óm papatais.