1-2. (a) Ifa nónnómun Paul atun a mak ngeni ekkewe chón Efisus, me pwata a mak ngeniir? (b) Ikkefa ekkewe kapas eis sipwele pwóróus wóór?

 ATUN aposel Paul a kalapus lón imwan we Rom, a mochen apéchékkúla chienan kewe Chón Kraist. Ese tongeni chuuriir lón féúféún aramas, ina popun a makkeei fitaché taropwe. A makkeei eché me leir ngeni ekkewe chón Efisus lón ina epwe ewe ier 60 are 61.—Efi. 1:1; 4:1.

² Arapakkan 10 ier mwen ena, Paul a mwo nónnóm Efisus pwe epwe afalafala me asukula ewe pwóróus allim. (Féf. 19:​1, 8-10; 20:​20, 21) A fókkun tongei chienan kewe Chón Kraist me a mochen álisiir le akkamwéchú ar túppwél ngeni Jiowa. Nge pwata a mak ngeni ekkewe Chón Kraist mi kepit ussun rochopwak me saram? Me ikkefa ekkewe lesen Chón Kraist meinisin ra tongeni káé seni minne a makkeei? Sipwele ppii pélúwen ekkena kapas eis.

SENI ROCHOPWAK NGENI SARAM

3. Ikkefa ekkewe kapas Paul a néúnéú lón néún we taropwe ngeni ekkewe chón Efisus?

³ Paul a makkeei ei ngeni ekkewe Chón Kraist mi nóm Efisus: “Me lóóm ámi oua rochopwak, nge iei oua saram.” (Efi. 5:8) Paul a néúnéú ekkewe kapas “rochopwak” me “saram” le affata úkúúkún siwililóón manawen ekkewe chón Efisus. Sipwele ppii pwata Paul a erá pwe ekkewe chón Efisus ra nóm lón “rochopwak” me lóóm.

4. Ifa ussun ekkewe chón Efisus ra nóm lón rochopwak?

⁴ Ra nóm lón rochopwak pokiten lamalam chofona. Me  mwen án ekkewe chón Efisus káé ewe enlet me wiliiti Chón Kraist, ra kémwéchúnúk wóón ar lúkú mi chofona me ra lúkú angangen roong. Ewe imwenfel fán iten ewe kot fefin itan Artemis a nóm lón ewe telinimw Efisus, me aramas lón na fansoun ra lúkú pwe ena imwenfel a múrinné seni meinisin. Aramas ra ló ngeni ena imwenfel pwe repwe fel ngeni ekkewe uluulun. A watte winnen chókkewe mi féri me amémé uluulun ewe imwenfel Artemis. (Féf. 19:​23-27) Pwal och, ena telinimw a silleló ren angangen roong.—Féf. 19:19.

5. Ifa ussun ekkewe chón Efisus ra pwal nóm lón rochopwak?

⁵ Ra nóm lón rochopwak pokiten ar féffér mi limengaw. Chón Efisus ra iteféúló ren ar féri ekkewe sókkun féffér mi fókkun limengaw me rese meefi ássáwen met ra féri. Fán chómmóng ar kewe sipai me ránin apwapwa ra ussun lisowu. (Efi. 5:3) Chómmóng chón Efisus “rese chúen meefi mengiringirin letiper.” Ekkena itiitin kapas a wewe ngeni pwe emén ese chúen meefi metek. (Efi. 4:​17-19) Me mwen ar káé met mi pwúng me mwáál, rese meefi pwe a ngaw féfférúr kewe, me rese pwal áfánni meefien Jiowa. Ina popun Paul a erá pwe “ar ekiek a rochopwak me ra towaw seni ewe manaw mi pop seni Kot.”

6. Pwata Paul a tongeni ereni ekkewe chón Efisus pwe ‘iei ra saram’?

⁶ Nge ekkóch chón Efisus ra likitaaló féfférúr kewe mi rochopwak. Paul a makkeei pwe ‘iei ra saram lón ewe Samol.’ (Efi. 5:8) Iei ra etipeeú manawer ngeni án Kot we Kapas, ina ewe saram mi emmweniir. (Kölf. 119:105) Ra likitaaló ar lúkú mi chofona me ar féffér mi limengaw. Me ra “áppirú Kot” me achocho úkúúkún ar tufich le fel ngeni i me apwapwaai.—Efi. 5:1.

7. Ifa ussun nónnómuch a léllé ngeni chómmóng Chón Kraist lón Efisus?

⁷ Pwal ina ussun ren kich, me mwen ach káé ewe enlet, sia nóm lón rochopwak pokiten sia fiti lamalam chofona me sia féri féffér mi limengaw. Me lóóm ekkóch me leich sia pinini ekkewe ráninipin mi pop seni lamalam  chofona, me féfféri met mi limengaw. Nge atun sia káé án Jiowa kewe emmwen ussun minne mi pwúng me mwáál, sia ekkesiwil. Sia poputá le etipeeú manawach ngeni an kewe allúk mi pwúng. Iwe mwirilóón, sia pwapwaiti chómmóng feiéch. (Ais. 48:17) Iwe nge iei, sia chúen kúkkúna sóssót. Ina popun a lamot ach sipwe ttii senikich rochopwak, ekkewe féffér sia fen lúkúsékúrú me sipwe “sópweeló le feffetál ussun chókkewe mi fetál lón saram.” Ifa ussun?

TTII SENIKICH ROCHOPWAK

8. Me ren Efisus 5:​3-5, met a lamot ekkewe chón Efisus repwe ttii seniir?

⁸ Álleani Efisus 5:​3-5. Ren án ekkewe Chón Kraist lón Efisus repwe ttii seniir féffér mi limengaw, a lamot repwe sópweeló le oputa ekkewe féffér mi eletipengawa Jiowa. A kapachelong lón ena, féfférún lisowumwáál me kapas mi annou. Paul a áchchema ngeni ekkewe chón Efisus lamoten ar repwe ttii seniir ekkena sókkun mettóch pwe epwe “wor álemwirier lón Mwúún ewe Kraist me Kot.”

9. Pwata a lamot ach sipwe fókkun ttii senikich ese lifilifil met epwe tongeni emmwenikich ngeni tipisin lisowumwáál?

⁹ A pwal lamot ach sipwe túmúnúéch ach sisap féri ekkewe mettóch “mi lamotongaw mi riri ngeni rochopwak.” (Efi. 5:11) A fen ffat pwe atun emén a kakkatol, akkaúseling ngeni, are fóffós ussun ekkewe mettóch mi limengaw, iwe a ámecheresi an epwe féri ekkewe mettóch mi mwáál. (Ken. 3:6; Jem. 1:​14, 15) Lón eú fénú, eú watteen kúmiin Chón Kraist ra chiechifengen me mammakfengen wóón ewe Internet. Me lepoputáán, ra kan aasoosun ekkewe mettóch lón pekin ngún. Iwe nge ló, ló, ló, ra poputá le fóffósun ekkewe mettóch rese apwapwaai Jiowa. A kon lap ar fóffósun ewe mettóch lisowu. Fitemén me leir ra pwáári pwe ar fósun minne mi limengaw a emmweniir ngeni tipisin lisowumwáál.

10. Met Setan a mochen ach sipwe lúkú? (Efisus 5:6)

¹⁰ Setan me chókkewe mi nóm fán nemenian ra fókkun achocho le otupukich, me efisi ach sipwe lúkú pwe ese wor ngawen ekkewe mettóch mi limengaw me ren Jiowa. (2 Pit. 2:19) Ese ámáirú ngenikich ena! Seni me lóóm, ewe Tefil a sótun orukaló aramas pwe resap mirititi minne mi pwúng me mwáál. (Ais. 5:20; 2 Kor. 4:4) Esap pwata iwe chómmóng kachito, prokram wóón TV, me website ra apéchékkúla pwóróus mi ú ngeni án Jiowa kewe allúk mi pwúng! Setan a mochen ach sipwe lúkú pwe lisowumwáál me ekkewe féffér mi limengaw mi chéúfetál lón ach ei fansoun, ra apwapwa me ese wor ngawer.—Álleani Efisus 5:6.

11. Ifa ussun pwóróusen Angela a áiti ngenikich lamoten ach sipwe apwénúetá ewe kapasen emmwen mi tipáchem lón Efisus 5:7? (Pwal ppii ewe sasing.)

¹¹ Setan a mochen ach sipwe chiechi ngeni chókkewe mi áweiresikich le álleasochisi án Jiowa kewe allúk. Ina popun, Paul a pesei ekkewe chón Efisus: “Ousap féri met iir ra féri,” weween chókkewe mi féfféri minne mi mwáál mwen mesen Jiowa. (Efi. 5:7) Iwe nge a lamot ach sipwe fókkun túmúnúéch lap seni ekkewe chón Efisus lóóm, pokiten lón ei fansoun sia chiechi ngeni aramas esap chék lón féúféún aramas nge pwal wóón ewe Internet. Angela, a seni Asia, a kúna efeiengawen chiechi wóón Internet. A erá: “Ekis me ekis a siwil ekieki. Úse chúen meefi pwe a ngaw ái chichchiechi ngeni chókkewe rese súféliti án Paipel kewe kapasen emmwen. Ló, ló,  ló, úa poputá le meefi pwe ese wor ngawen ái féfféri ekkewe mettóch mi eletipengawa Jiowa.” Nge ekkóch mwán mi ásimaw ra álisi Angela le féri siwil mi lamot. A erá: “Iei úa nefótófót wóón Jiowa me minne a ekieki nge esap wóón chienei kewe wóón Internet.”

12. Met epwe álisikich le kémwéchúnúk wóón án Jiowa kewe allúk ussun minne mi pwúng me mwáál?

¹² A lamot sipwe úkkú ngeni án chón ei fénúfan ekiek pwe ese wor ngawen féffér mi limengaw. Sia fen silei pwe ese pwúng ena. (Efi. 4:​19, 20) Iwe nge, a éch ach sipwe pwisin eisinikich ekkeei kapas eis: ‘Úa fókkun achocho pwe úsapw kon chiechi ngeni chókkewe lón ái leenien angang, sukul, are ekkewe pwal ekkóch rese súféliti án Jiowa kewe allúk? Úa penaatá án Jiowa kewe allúk fán pwora inaamwo iká ekkewe ekkóch repwe erá pwe ngang mi lifilifil aramas?’ Ussun met a mak lón 2 Timoty 2:​20-22, a pwal lamot ach sipwe túmúnú ié sia chiechiéch ngeni me lón pwisin ach mwichefel. Sipwe chemeni pwe eli ekkóch resap álisikich le akkamwéchú ach túppwél ngeni Jiowa.

“FEFFETÁL USSUN CHÓKKEWE MI FETÁL LÓN SARAM”

13. Met weween ach sipwe “sópweeló le feffetál ussun chókkewe mi fetál lón saram”? (Efisus 5:​7-9)

¹³ Paul ese chék pesei ekkewe Chón Kraist lón Efisus ar repwe sópweeló le úkkú ngeni rochopwak, nge repwe pwal “sópweeló le feffetál ussun chókkewe mi fetál lón saram.” (Álleani Efisus 5:​7-9.) Met weween ena? A wewe ngeni ach sipwe napanapeni me pwáári napanapen Chón Kraist mi enlet fansoun meinisin. Eú alen ach sipwe féri ena, ina ren ach achocho le ákkállea me kákkáé ewe Paipel fengen me ekkewe pwal ekkóch puk mi lóngólóng wóón Paipel. A ákkáeúin lamot ach sipwe nefótófót wóón pwóróusen manawan Jises Kraist “ewe saramen fénúfan” me an kewe káit.—Jon 8:12; SalF. 6:23.

14. Ifa ussun ewe ngún mi fel a tongeni álisikich?

¹⁴ A pwal lamot álillisin án Kot we ngún mi fel pwe sipwe tongeni sópweeló le napanapeni me pwáári napanapen “chókkewe mi fetál lón saram.” Pwata? Pokiten a weires ach sipwe akkamwéchú liméchúch lón  ei fénúfan mi uren limengaw. (1 Tes. 4:​3-5, 7, 8) Ewe ngún mi fel a tongeni álisikich le okkufu ekiekin chókkewe lón ei fénúfan rese eáni án Jiowa ekiek. A pwal tongeni álisikich le ámááraatá “meinisin sókkun múrinné me minne mi pwúng me enlet.”—Efi. 5:9.

15. Ikkefa alen ach sipwe angei ewe ngún mi fel? (Efisus 5:​19, 20)

¹⁵ Pwal eú alen ach sipwe angei ewe ngún mi fel, ina ach ikkióteki. Jises a erá pwe Jiowa epwe “fang ewe ngún mi fel ngeni chókkewe mi tittingorei i!” (Luk 11:13) Me atun sia mwareiti Jiowa lón ach kewe mwiich, sia pwal angei an we ngún mi fel. (Álleani Efisus 5:​19, 20.) Manamanen ewe ngún mi fel a tongeni álisikich le manaweni eú manaw mi apwapwaai Kot.

16. Met epwe álisikich le eáni kefil mi múrinné? (Efisus 5:​10, 17)

¹⁶ Atun sipwe eáni eú kefil mi chou a lamot ach sipwe weweiti “minne letipen Jiowa,” iwe mwirin apwénúetá. (Álleani Efisus 5:​10, 17.) Atun sia kúna án Paipel kewe kapasen emmwen mi kon weneitikich, ren enletin sia kan kúkkútta án Kot ekiek wóón ach we kefil. Iwe atun sia apwénúetá an kewe kapasen emmwen, sipwe tongeni eáni kefil mi múrinné.

17. Met a kapachelong lón ach sipwe alamotaéchú ach fansoun? (Efisus 5:​15, 16) (Pwal ppii ewe sasing.)

¹⁷ Paul a pwal éúréúra ekkewe Chón Kraist lón Efisus ar repwe alamotaéchú ar fansoun. (Álleani Efisus 5:​15, 16.) Setan “ewe mi ngaw,” ewe mi oputakich a mochen erikikicheló ren ekkewe chómmóngun mettóch lón ei fénúfan pwe esap wor ach fansoun fán iten Kot. (1 Jon 5:19) Emén Chón Kraist a tongeni poputá le nefótófót wóón moni, sukul, are angang nge esap wóón ekkewe mettóch a tongeni féri lón an angang ngeni Jiowa. Iká a fis ena, a ffat pwe a tupuló ren ekiekin ei fénúfan. Pwúngún pwe ese wor ngawen ekkena mettóch, nge sisap fókkun akkomwer lón manawach. Ren  ach sipwe feffetál “ussun chókkewe mi fetál lón saram,” a lamot ach sipwe ‘alamotaéchú ach fansoun’ me nefótófót wóón met mi kon aúchea.

18. Ikkefa ekkewe mettóch Donald a féri ren an epwe alamotaéchú an fansoun?

¹⁸ Kútta alen óm kopwe alapaaló óm angang ngeni Jiowa. Ina met Donald seni South Africa, a féri. A erá: “Úa ekieki ussun nónnómun manawei me úa sié ngeni Jiowa an epwe álisiei le alapaaló ái angang ngeni lón ewe angangen afalafal. Úa ióteki pwe úpwe kúnékún eú angangen moni epwe mut ngeniei ái úpwe alapaaló ái fansoun lón ewe angangen afalafal. Ren án Jiowa álillis, úa kúna eú angang mi fich. Iwe ám me pwúlúwei we áúa poputá le angang ngeni full-time.”

19. Ifa ussun sipwe sópweeló le feffetál “ussun chókkewe mi fetál lón saram”?

¹⁹ Ese mwáál néún Paul we taropwe ngeni ekkewe chón Efisus a fókkun álisiir le akkamwéchú ar túppwél ngeni Jiowa. Ena kapasen éúréúr seni Jiowa a pwal tongeni álisikich. Áwewe chék ren ach filiéchú ach minen apwapwa me kunou me ié sia chiechi ngeni. A apéchékkúlakich le káé ewe Paipel iteitan pwe saramen ewe enlet epwe ekkemmwenikich lón meinisin minne sia féri. Me néún na taropwe a menlapei lamoten ewe ngún mi fel, ewe a tongeni álisikich le ámááraatá ekkewe napanap mi múrinné. Ach apwénúetá minne Paul a makkeei a tongeni álisikich le eáni ekkewe sókkun kefil mi múrinné mi tipeeú ngeni ekiekin Jiowa. Ach féri ekkena mettóch epwe tongeni álisikich le ttii senikich rochopwaken ei fénúfan me nónnóm chék lón ewe saram.