1, 2. (a) Alon Jesus we lón Mateus 24:12, a akkomw weneiti ié? (b) Ifa usun minne a mak lón ewe puken Föför a pwáraatá pwe lap ngeni ekkewe popun Chón Kraist ra akkamwéchú péchékkúlen ar tong? (Ppii ewe sasing lepoputáán ei lesen.)

 LUPWEN Jesus a nóm wóón fénúfan, a áweweei ifa usun aramas repwe tongeni esilla “ewe fansoun sopolan.” Iei eú mettóch a erá epwe fis: “Epwe patapatala ewe chen lefilen aramas.” (Mat. 24:3, 12) Ekkewe chón Jus lón fansoun ekkewe aposel ra erá pwe iir néún Kot kewe aramas, nge ra mut ngeni ar tong ngeni Kot an epwe patapateló.

² Iwe nge, lap ngeni ekkewe Chón Kraist lón ena fansoun rese ina usun. Ra tinikken le afalafala ewe “Pworausen Manau pwe Jesus ewe Kraist” me ra pwáraatá ar tong ngeni Kot, chiener Chón Kraist, me pwal mwo nge chókkewe resaamwo silei ewe enlet. Ekkena Chón Kraist ra akkamwéchú péchékkúlen ar tong ngeni Kot. (Föf. 2:44-47; 5:42) Nge mi elichippúng pwe ekkóch lein ekkena popun Chón Kraist a patapateló ar tong. Pwata sia silei?

3. Met neman a efisi patapatelóón án ekkóch Chón Kraist tong?

 ³ Jesus a ereni ekkewe popun Chón Kraist lón Efisos: “Iei kosap chüen echeniei, usun om echeniei me lepoputän.” (Pwär. 2:4) Neman ekkewe Chón Kraist lón Efisos ra tipetipeló ren ekkewe aramas lón ena telinimw, iir kewe mi chék kútta pwisin pwapwaan inisiir. (Ef. 2:2, 3) Efisos ina eú telinimw mi wéúmmong, aramasen lón ra kon ekieki kinamweer, nónnóméchúr, me ar alapaaló pisekiir mi mémmong me ling lap seni mettóch meinisin. Chómmóng lón Efisos ra pwal eáni ewe sókkun manaw mi fókkun limengaw me sikepwach me rese súféliti án Kot kewe allúk. Ra kon ekieki pwapwaar lap seni ar repwe pwáraatá tong ngeni Kot me ekkewe ekkóch, ewe esin tong epwe amwékútúúr le pennúkú pwisin mocheniir.

4. (a) Ifa usun án aramas tong a patapateló lón ach ei fansoun? (b) Ikkefa úlúngát mettóch mi lamot sipwe túmúnú péchékkúlen ach tong lón?

⁴ Minne Jesus a oesini usun patapatelóón án aramas tong a pwal weneiti ach ei fansoun. A kan patapateló án aramas tong ngeni Kot ikenái. Fite fite million aramas rese chúen ápilúkúlúkú pwe Kot epwe pwákini osukosuken ei fénúfan, nge ra fen ápilúkúlúkú mwicheichen aramas. A chék patapateló ar tong. A pwal mwo nge tongeni patapateló án néún Jiowa kewe chón angang tong, usun met a fis lón ewe mwichefel lón Efisos lóóm. Iwe, sipwe pwóróus wóón ekkeei úlúngát mettóch mi lamot sipwe túmúnú péchékkúlen ach tong lón: (1) tong ngeni Jiowa, (2) tongei ewe enlet lón Paipel, me (3) tong ngeni pwiich kewe.

5. Pwata a lamot sipwe tongei Kot?

⁵ Ié itá sipwe tongei lap seni meinisin? Jesus a erá: “Kopwe echeni ewe Samol om Kot ren unusen lelukom, ren unusen ngünum pwal ren unusen ekiekum. Iei ewe allük mi lap me aüchea seni meinisin.” (Mat. 22:37, 38) Ach tong ngeni Kot a álisikich ach sipwe álleasochisi an kewe allúk, likiitú, me oputa minne mi ngaw. (Álleani Kölfel 97:10.) Nge Satan me an ei fénúfan ra sótun le apwangapwangaaló me atai ach ririin tong ngeni Kot.

6. Met a fis lupwen aramas rese chúen tongei Kot?

⁶ Ese pwúng án chón ei fénúfan ekiek usun tong. Chómmóng ra “tongei pwisin ir,” nge rese fen tongei Kot. (2 Tim. 3:2, Testament Mi Fö) Ra kon nefotofot wóón “mochenian fituk, mochenian lemas me lamalamtekian manauen aramas.” (1 Joh. 2:16) Ewe aposel Paulus a éúréúrakich usun met a tongeni fis ika sia akkomwa pwapwaach. A erá: “Are sia nonom fän nemenien fituk, sopolan mäla.” Pwata? Pún chókkewe mi féri ena ra wiliti chón ú ngeni Kot. (Rom 8:6, 7) Ekkewe aramas mi áeá manawer le alapaaló wéúúr are kúkkútta pwapwaan mocheniaingawen futuker ra fókkun lichippúng mwirin.​—1 Kor. 6:18; 1 Tim. 6:9, 10.

7. Ikkefa pwal ekkóch mettóch mi efeiengaw ra tongeni etipetipa Chón Kraist ikenái?

⁷ Chómmóng chókkewe mi lúkú pwe ese wor Kot, lúkú pwe Kot ese áfánni aramas, are lúkú pwe aramas ra pop seni man, iir ra kan sótun etipetipa aramas ar resap tongei Kot, are pwal mwo nge lúkú pwe ese wor Kot. Ra kan ámmeef ngeni aramas pwe chókkewe chék mi tiparoch me rese fiti sukul ra tongeni lúkú pwe mi wor emén Chón Fératá. Pwal eú, án chómmóng aramas fókkun ésúfélú ekkewe scientist a atowauereló seni ewe Chón Fératá. (Rom 1:25) Pwal mwo emén Chón Kraist a tongeni tipetipeló ren ekkena sókkun ekiek.  Ach riri ngeni Jiowa a tongeni apwangapwangoló me ach tong ngeni a tongeni patapateló.​—Ipru 3:12.

8. (a) Ikkefa ekkewe mettóch ra tongeni elichippúngú néún Jiowa aramas? (b) Ifa usun Kölfel 136 a tongeni oururukich?

⁸ Pokiten sia nóm lón án Satan ei ótót mi ngaw, iwe a wor chómmóng popun sia tongeni meefi lichippúng fán ekkóch. (1 Joh. 5:19) Nge ika sia mut ngeni ekkena mettóch ar repwe fókkun elichippúngúkich, iwe ach lúkú a tongeni apwangapwangoló me ach tong ngeni Kot epwe patapateló. Áwewe chék, neman sia weires pokiten sia chinnapeló, a apwangapwang inisich, are a wor ach osukosuk lón pekin moni. Are neman sia letipengaw pún sia lipwákingaw le féri ekkóch mettóch. Neman sia meefi lichippúng pún ekkóch mettóch sia áneánei lón manawach an epwe fis ese pwénútá. Nge ese lifilifil met sókkun weires sia kúna, itá sisap fókkun meefi pwe Jiowa a likitikicheló. Ekieki ekkeei kapas mi tongeni oururukich mi mak lón Kölfel 136:23, TF: “I mi chechemenikich lon ach riaffou, pun an we tong enlet epwe nonnom feilfeilo chok.” Sia tongeni lúkúlúk pwe Jiowa a kan rongorong ach “tüngor pwe epwe ümöümöch” ngenikich me i epwe pélúwenikich.​—Kölf. 116:1; 136:24-26.

9. Met a álisi Paulus an epwe tongeni akkamwéchú péchékkúlen an tong ngeni Kot?

⁹ Ewe aposel Paulus i emén chón angang ngeni Kot mi fókkun ekiekifichi ifa usun Jiowa a álisi i, me an féri ena a álisi an epwe akkamwéchú an péchékkúl. A makkeei: “Ewe Samol i ai Soualilis, üsap fokun niuokus, met aramas repwe tongeni föri ngeniei?” (Ipru 13:6) Án Paulus lúkúlúk wóón Jiowa a álisi an epwe likiitú ngeni mettóch mi áweires lón manawan. Lupwen Paulus a nóm lón weires, ese péút seni an lúkúlúk wóón Jiowa. Pwal mwo nge lupwen a nóm lón kalapus, a álisi chienan kewe Chón Kraist ren an mak ngeni ekkewe mwichefel taropwe mi apéchékkúler. (Ef. 4:1; Fil. 1:7; Filim. 1) Ese lifilifil menni osukosuk Paulus a kúna, nge a chék akkamwéchú péchékkúlen  an tong ngeni Jiowa. A lúkúlúk wóón “ewe Kot mi echipakich lon mettoch meinisin,” ewe a “akachipakich lon ach riaföü meinisin.” (2 Kor. 1:3, 4) Ifa usun sia tongeni áppirú Paulus?

10. Ifa usun sia tongeni akkamwéchú péchékkúlen ach tong ngeni Jiowa?

¹⁰ Paulus a áweweei eú mettóch epwe tongeni álisikich le akkamwéchú péchékkúlen ach tong ngeni Kot. A mak ngeni pwiin kewe Chón Kraist lón Tesalonika: “Oupwe iotek fansoun meinisin.” Mwirin, pwal ina chék met a makkeei ngeni ekkewe chón Rom. (1 Tes. 5:17; Rom 12:12) Pwata ewe mettóch iótek a tongeni álisikich le arap ngeni Kot? Lupwen sia iótek, sia pwóróus ngeni Kot. Ena mettóch a atufichikich ach sipwe ririéch ngeni i. (Kölf. 86:3) Lupwen sia ereni Semach we lón láng ekiekich me meefiach seni alóllóólun letipach, sia arap ngeni i. (Kölf. 65:2) Pwal eú, ach tong ngeni Jiowa a péchékkúleló atun sia kúna ifa usun a pélúweni ach kewe iótek. Sia lúkúlúk pwe “ewe Samol mi Lapalap a arap ngeni ir meinisin mi köri.” (Kölf. 145:18) Ach lúkúlúk wóón án Jiowa tong me an álillis epwe álisikich le likiitú ngeni ese lifilifil osukosuk epwe torikich iei me lón ekkan rán epwe feito.

11, 12. Ifa usun sia tongeni alapaaló ach aúcheani me tongei ewe enlet lón Paipel?

¹¹ Kich Chón Kraist sia fókkun aúcheani me tongei ewe enlet. Ewe enlet a nóm lón án Kot we Kapas. Jesus a ereni Seman we: “Om kapas a let.” (Joh. 17:17) Ren ach sipwe tongei ewe enlet lón Paipel, a lamot sipwe silei masouen Paipel. (Kol. 1:10) Nge ese naf ach sipwe chék silei ewe pwóróus lón Paipel. Ppii ifa usun ewe chón makkeei Kölfel 119 a álisikich le weweiti met mi lamot sipwe féri. (Álleani Kölfel 119:97-100.) Lón unusen eú rán, mi lamot sipwe awora fansoun le ekilonei, are ekiekifichi, minne sia álleani lón Paipel. Atun sia ekilonei ifa usun sia kúna feiéch seni ach apwénúetá ewe enlet lón pwisin manawach, epwe chék lallapóló ach aúcheani.

¹² Ewe soumakken kélfel a pwal erá: “Om kewe kapasen pwon ra fokun arar me rei, ra arar seni chönün chunen me lon awei.” (Kölf. 119:103) Ekkewe puk mi lóngólóng wóón Paipel án Jiowa we mwicheich a féri, ra usun chék mwéngé mi fókkun anné. Lupwen sia mwéngé ewe sókkun mwéngé sia sani, sia mochen akkammang pwe sipwe unusen pwapwaiti. Pwal ina chék usun lón ach káé, sise mochen atapwalapwal. Ika sia ina usun, sipwe enletin pwapwaiti ekkewe “kapas mi mürina” usun ewe enlet, me epwe mecheres ach sipwe chechchemeni minne sia álleani me áeá le álisi ekkewe ekkóch.​—SalAf. 12:10.

13. Met a álisi Jeremaia an epwe tongei án Kot kapas, iwe, met a meefi pokiten ena?

¹³ Ewe soufós Jeremaia a tongei me aúcheani án Kot kapas. A erá: “Üa iseis lon lelukei om kewe kapas, lupwen ra toriei. Om kapas a fis pwe ai pwapwa, lelukei a meseik ren, pun itom a föü woi, ai Kot Samol mi Unusen Manaman.” (Jer. 15:16) Jeremaia a ekilonei án Kot kewe kapas mi aúchea, me i a aúcheaniir. A meefi pwe a kúna feiéch ren an tupuni Jiowa me esilefeili an we pwóróus. Ika sia aúcheani ewe enlet lón Paipel, sipwe mirititi úkúkún aúchean wisach we Chón Pwáraatá fán iten Jiowa me afalafalafeili pwóróusen ewe Mwúún Kot lón ekkeei ránin lesópwólóón.

14. Met sia pwal tongeni féri pwe sipwe alapaaló ach aúcheani ewe enlet lón Paipel?

 ¹⁴ Met a pwal tongeni álisikich le alóllóólaaló ach tongei ewe enlet lón Paipel? A lamot sipwe fiti ach kewe mwich iteitan, pwe me ikena ie sia angei káit me ren Jiowa. Ach káé Paipel iteiten wiik ren ach néúnéú Ewe Leenien Mas ina eú me lein ekkewe mettóch Jiowa a ákkáeúin áeá pwe epwe asukulakich. Ika sia mochen ach sipwe unusen feiéch seni ei mwich, a lamot sipwe ammólnatá me mwan. Áwewe chék, sia tongeni álleani meinisin ekkewe wokisin mi mak lón ewe lesen. Ikenái, a mecheres ngeni chómmóng ar repwe álleani are kapiinawu Ewe Leenien Mas wóón néúr mechá pún a kawor lón chómmóng fósun fénúfan wóón ewe website jw.org me pwal lón ewe JW Library app. Lón ekkóch fós, sia tongeni kapiinirewu lón ekkewe napanap mi ámecheresi ach sipwe suuk ngeni ekkewe wokisin mi mak lón. Iwe nge, ese lifilifil menni napanap sia filatá ach sipwe káé eú me eú lesen lón, nge ika sia álleaniéchú ekkewe wokisin me ekiloner, ach tongei ewe enlet lón Paipel epwe lapóló.​—Álleani Kölfel 1:2.

15, 16. (a) Me ren Johannes 13:34, 35, menni allúk Jesus a ngenikich? (b) Ifa usun ach tong ngeni Kot me ewe Paipel a riri ngeni ach tong ngeni pwiich kewe?

¹⁵ Lón ewe sáingoon pwinin án Jesus manaw wóón fénúfan, a ereni néún kewe chón káé: “Iei üpwe ngenikemi eu allük mi fö: Oupwe echenifengenikemi lefilemi. Usun ngang üa echenikemi, iei usun pwal ämi oupwe echenifengenikemi. Are oupwe echenifengenikemi, aramas meinisin repwe silei, pwe ämi nei chon kaiö.”​—Joh. 13:34, 35.

¹⁶ Ach tongei pwiich kewe Chón Kraist a riri ngeni ach tongei Jiowa. Ika sise tongei Kot, sise tongeni tongei pwiich kewe. Me ika sise tongei pwiich kewe, sise tongeni tongei Kot. Ewe aposel Johannes a makkeei: “Are emon esap tongei pwin we mi a fen nengeni, iwe, esap tongeni tongei Kot mi ese mo nengeni.” (1 Joh. 4:20, TF) Ach tong ngeni Jiowa me pwiich kewe a pwal riri ngeni ach tongei ewe  Paipel. Pwata? Pún ika sia tongei minne sia káé lón Paipel, epwe amwékútúkich le álleasochisi ekkewe allúk mi mak lón usun ach sipwe tongei Kot me pwiich kewe.​—1 Pet. 1:22; 1 Joh. 4:21.

17. Ikkefa ekkóch mettóch sia tongeni féri pwe sipwe pwári ach tong?

¹⁷ Álleani 1 Tesalonika 4:9, 10. Ikkefa ekkóch mettóch sia tongeni féri pwe sipwe pwári ach tongei pwiich kewe lón ach mwichefel? Emén pwiich chinnap neman a osupwangen waan le ló fiti ekkewe mwich me pwal liwinto ngeni imwan. Emén fefin mi má seni pwúlúwan neman a lamot ngeni álillis ren mettóch mi ta me lón imwan. (Jas. 1:27) Mi lamot ngeni pwiich kewe mi lichippúng, letipeta, are nóm lón pwal ekkóch sókkun osukosuk ach sipwe átenekiir, apéchékkúler, me oururuur. (SalF. 12:25; Kol. 4:11) Sia pwáraatá pwe sia tongei “chokewe mi nom lon ewe familien chon lükülük” ren minne sia apasa me féri.​—Kal. 6:10.

18. Met epwe álisikich le ataweei osukosuk lefilach me pwiich kewe?

¹⁸ Ewe Paipel a erá pwe lón “ekewe ränin lesopolan” ei ótót mi ngaw, chómmóng repwe ekieki chék pwisin iir me repwe tipemmóng. (2 Tim. 3:1, 2) A lamot kich Chón Kraist sipwe angang weires pwe sipwe akkapéchékkúla ach tong ngeni Jiowa, an we Kapas, me pwiich kewe. Pokiten kich sise unuséch, neman epwe wor fansoun epwe wor ekis osukosuk lefilach me pwiich kewe. Nge pokiten ewe tongfengen lefilach, sipwe achocho le mwittir ataweei ach kewe osukosuk fán kirekiréch. (Ef. 4:32; Kol. 3:14) Sisap mut ngeni ach tong epwe patapateló! Nge sipwe sópweló le akkamwéchú ach tong mi péchékkúl fán iten Jiowa, an we Kapas, me pwiich kewe.