DANIEL ME MIRIAM ra apwúpwúlú lón September 2000, nge manawer lón Barcelona, Spain a nónnóméch. Daniel a áweweei: “Pokiten ám angangen moni, iwe aua tongeni mwéngé lón ekkewe leenien mwéngé mi múrinné, sáifetál, me pippisek ekkewe esin pisek mi múrinné. Aua pwal fiffiti ewe angangen afalafal.” Nge a wor och mettóch a fis.

Lón eú mwichelap lón ewe ier 2006, Daniel a rongorong eú afalafal mi eáni ei kapas eis: “Kich mi achocho úkúkún ach tongeni pwe sipwe álisi aramas ar repwe fetál wóón ewe alen manaw esemuch, iir kewe mi ‘äpäp ngeni ar repwe ninnila’?” (SalF. 24:11) Ena afalafal a áweweei pwe wisach ach sipwe afalafala ngeni aramas met Paipel a apasa pokiten manawer a lóngólóng wóón. (Föf 20:26, 27) Daniel a erá, “Ua meefi pwe Jiowa a fóffós ngeniei.” Lón ena afalafal a pwal erá pwe ika sia alapaaló ach angang ngeni Jiowa epwe pwal lapóló ach pwapwa. Daniel a pwisin kúna enletin ena ren met a fis ngeni Miriam, i a poputá le pioneer me a fókkun pwapwa.

Ena afalafal a fókkun kkúú letipen Daniel, iwe a filatá an epwele féri watteen ekkesiwil lón manawan. A poputá le angang chék fitu awa, poputá le pioneer, me ekieki usun pwapwaar me Miriam ika repwe ló álillis ikewe mi wor osupwangen chón afalafala pwóróusen ewe Mwúún Kot.

Lón May 2007, Daniel me Miriam ra pwisin atorowu seni ar kewe angangen moni me mwékút ngeni Panama, eú leeni ra fen piin ló ie. Ra kan afalafal lón fitu me lein ekkewe kúkkún fénú iter Bocas del Toro lón ewe Setin Carribean. Lap ngeni ekkewe aramas mi nónnóm ikena ie iir chón ewe einangen Ngabe. Daniel me Miriam ra ekieki pwe ra tongeni nóm walu maram lón Panama ren úkúkún néúr we moni ra fen isoni.

Ra kan fiti mwoota me pasiken le ló afalafal wóón ekkena fénú. Ra chúen chechchemeni ewe áeúin atun ra sái wóón waar kewe pasiken ren úkúkún 20 mwail. Lón ena atun ra ssá wóón panapanetá me a fókkun pwichikkar, iwe Daniel a fókkun pekkus, arapakkan epwe peló. Nge, ekkewe famili ra chuuriir, chón ewe einangen Ngabe, ra fókkun awasélaéchúúr, ákkáeúin mwirin án chókkana káé ekkóch kapasen leenier na. Ekiseló mwirin a wor 23 néúr chón káé.

Nge met a fis mwirin an a it néúr we moni? Daniel a apasa: “Fán súrún chénún mesem aua poputá le ekieki ám aupwele liwiniti Spain. Aua fókkun letipechou ren ám aupwele likitaló néúm kewe chón káé.” Nge eú maram mwirin, a toriir eú pwóróus mi apwapwa. Miriam a apasa: “Aua ketiw le fiti ewe angangen special pioneer. A ifa me apwapwaan pwe aua tongeni sópweló ám ei angang ikeei!”

Pokiten ekkewe siwil mi fis lón ach mwicheich, Daniel me Miriam ra kaúló le special pioneer lón ewe ier 2015. Iwe, met repwele féri? Ra lúkúlúk wóón ewe pwon mi mak lón Kölfel 37:5, a apasa: “Kopwe lükü ngeni ewe Samol mi Lapalap manauom o apilükülük ngeni, nge i epwe alisuk.” Ra kúnékún ar angangen moni mi tongeni atufichiir lón ar fiti ewe angangen regular pioneer, me iei ra álillis lón eú mwichefel lón Veraguas, lón Panama.

Daniel a apasa: “Me mwen ám ló seni Spain aua ekis tipemwaramwar ika aupwe tongeni eáni eú manaw mi menemenéch. Nge, ina ewe manaw aua manaweni iei, me ese wor met aua osupwangan mi enletin lamot ngenikem.” Ifa ewe ákkáeúin mettóch a atoto ngeniir pwapwa? Iei alór: “Ám álisi aramas mi tipetekison le káé usun Jiowa ina ewe mettóch mi atoto ngenikem pwapwa wachemwuk!”