1. Mwirin án Atam me Efa tipis, met Jiowa a pwári usun chón oputach we?

ATAM a silei pwe ekkewe serepenit rese tongeni fós. Ina popun lupwen a silei pwe emén serepenit a fós ngeni Efa, eli a ekieki pwe ina i emén ngún a wesewesen fós ngeni. (Ken. 3:1-6) Atam me Efa rese silei ika ié ena. Iwe nge, Atam a filatá le fitaaló emén na ese sissilei me ú ngeni Seman we mi tong lón láng. (1 Tim. 2:14) Mwittir chék, Jiowa a poputá le pwáraaló ekkóch pwóróus usun ewe chón oput mi fókkun ngaw, me a pwonei pwe epwe ninniiló mwirin och fansoun. Nge ren mwo iei, Jiowa a éúréúrakich pwe ena ngún mi afósa ewe serepenit, epwe ú ngeni meinisin chókkewe mi tongei Kot.​—Ken. 3:15.

2, 3. Eli ifa ewe popun Jiowa ese pwári chómmóng pwóróus usun Satan me mwen warotoon ewe Messaia?

² Jiowa ese erenikich iten ena chónláng mi ú ngeni. * Nge a kerán pwári 2,500 ier mwirin ewe féfférún ú ngeni lón Eten. (Hiop 1:6) A silleló ren itelapan we “Satan,” mi wewe ngeni “Chón Ú Ngeni.” Áeúin Kronika, Hiop me Sekaraia ikkena  chék ekkewe úlúngát puk lón ewe Tesin Ipru mi féúni ewe it Satan. Pwata ese kon chómmóng pwóróusen ena chón oput mwen warotoon ewe Messaia?

³ Jiowa ese apachaalong lón ewe Tesin Ipru chómmóng pwóróus mi tichik usun Satan me féfférún kewe. Pún ren enletin, popun an kawor ewe Tesin Ipru pwe epwe álisi aramas le esilla ewe Messaia me tapweló mwirin. (Luk. 24:44; Kal. 3:24) Lupwen a war ewe Messaia, Jiowa a néúnéú i me néún kewe chón káé le pwári ekkewe pwóróus sia silei iei, usun Satan me chienan kewe chónláng. * Mi fich ena pokiten Jiowa epwe néúnéú Jesus me ekkewe mi kepit le nieló Satan me néún kewe chónláng.​—Rom 16:20; Pwär. 17:14; 20:10.

4. Pwata ese wor popun ach sipwe niweiti ewe Tefil?

⁴ Ewe aposel Petrus a áweweei pwe Satan ewe Tefil a usun “eman laion mi wörüwör,” me Johannes a apasa pwe i ewe ‘serepenit’ me ewe “trakon.” (1 Pet. 5:8; Pwär. 12:9) Nge itá ese wor popun ach sipwe niweiti ewe Tefil. An manaman mi chék kaúk. (Álleani James 4:7.) Sia nóm fán túmúnúen Jiowa, Jesus me ekkewe chónláng mi tuppwél. Ren ar álillis, sia tongeni ú ngeni chón oputach we. Nge, mi chúen lamot ach sipwe silei pélúwen ekkeei úlúngát kapas eis mi lamot: Ifa úkúkún chéúlóón án Satan etipetip? Ifa usun a sótun etipetipa aramas? Met ese tufichin féri? Sipwe pélúweni ekkena kapas eis me ppii ekkewe lesen sia tongeni káé seniir.

5, 6. Pwata mwúún aramas ese tongeni efisi ekkewe siwil aramas ra fókkun osupwangan?

⁵ Chómmóng chónláng ra fitaaló Satan lón an ú ngeni Kot. Me mwen ewe Noter, Satan a etipetipa ekkóch me leir ar repwe lisowumwáál ngeni ekkewe fin fénúfan. Ewe Paipel a áweweei ena lón och kapas áwewe lupwen a apasa pwe ewe trakon a amwékútú eú na aúlúngátin ekkewe fúú pwe repwe fiti lón an angangen rikiló. (Ken. 6:1-4; Jut. 6; Pwär. 12:3, 4) Lupwen ekkena chónláng ra likitaló án Kot we famili, ra onómu pwisin iir fán nemenien Satan. Sisap ekieki pwe ekkena chónláng mi ú ngeni Kot, iir eú kúmi ese kókkótéch. Lón ewe leeni Satan a nóm ie, a fen aota pwisin an nemenem mi áppirú nemenien Kot. A fen pwisin seikaatá pwe epwe wisen king, me a fen aotaló eú mwichen chónláng mi ngaw, a ngeniir manaman, me filiretá pwe repwe wisen sounemenemen fénúfan.​—Ef. 6:12, Testament Mi Fö.

⁶ Satan a áeá an we mwicheich le nemeni meinisin mwúún fénúfan. Sia tongeni silefichi ena pokiten Satan a ékúna ngeni Jesus “mwün fanüfan meinisin,” me a ereni: “Ngang üpwe ngonuk ar kewe nemenem meinisin pwal wöür kewe, pun ra nom fän nemeniei, nge ngang üa tongeni ngeni iö üa  mochen ngeni.” (Luk. 4:5, 6) Nge, chómmóng mwú ra féri met mi múrinné fán iten chókkewe mi nóm fán nemenier, me ekkóch sounemenem ra enletin mochen álisi aramas. Nge ese wor emén sounemenem a tongeni efisi ekkewe siwil sia fókkun osupwangan.​—Kölf. 146:3, 4; Pwär. 12:12.

7. Me lúkún án Satan áeá mwúún aramas, ifa usun a pwal áeá lamalam chofona me pekin business? (Ppii ewe sasing lepoputáán ei lesen.)

⁷ Satan me néún kewe chónláng ra pwal áeá lamalam chofona me pekin business le otupu “unusen chon fanüfan.” (Pwär. 12:9) Satan a áeá lamalam chofona le achéúfetálei kapas chofona usun Jiowa, me a pwal mwo nge sótun amonomonaló iten Kot we. (Jer. 23:26, 27) Iwe pokiten ena, ekkóch aramas mi letipwenechar ra ekieki pwe ra fel ngeni Kot nge ren enletin ra fel ngeni ekkewe chónláng mi ngaw. (1 Kor. 10:20; 2 Kor. 11:13-15) Satan a pwal áeá pekin business le achéwú kapas chofona, áwewe chék ewe kapas chofona pwe moni me pisek ra efisi án aramas pwapwa. (SalF. 18:11) Chókkewe mi lúkú ena kapas mi chofona ra áeá manawer le angang fán iten “wöün fanüfan” nge rese fen angang ngeni Kot. (Mat. 6:24) Ikaamwo ra fen tongei Kot me lóóm, nge ar aúcheani pisek a fókkun péchékkúl, iwe ar tong ngeni Kot a móróló.​—Mat. 13:22; 1 Joh. 2:15, 16.

8, 9. (a) Ikkefa ekkewe ruu lesen sia tongeni káé seni minne Atam, Efa, me ekkewe chónláng mi ú ngeni Kot ra féri? (b) Pwata mi éch ach sipwe silei pwe Satan a nemeni fénúfan?

⁸ A wor ruu lesen mi lamot sia tongeni káé seni minne Atam, Efa, me ekkewe chónláng mi ú ngeni Kot ra féri. Áeúin, sia káé pwe mi chék wor ruu pekin me mi lamot sipwe filatá eú me leir. Sia tongeni fiti pekin Jiowa are pekin Satan. (Mat. 7:13) Oruuan, sia káé pwe chókkewe mi fitaaló Satan ra angei feiéch nge ese nómottam. Áwewe chék, Atam me Efa ra tongeni pwisin apwúngaló met mi pwúng me met mi mwáál. Ekkewe chónláng mi ngaw ra angei manaman pwe repwe nemeni mwúún aramas. (Ken. 3:22) Nge án emén filatá le peni Satan epwe chék sósópwongaw fansoun meinisin. Ese wesewesen wor feiéchún!​—Hiop 21:7-17; Kal. 6:7, 8.

⁹ Pwata mi éch ach sipwe silei pwe Satan a nemeni fénúfan? A álisikich le eáni ekiek pwúng usun ekkewe mwú me a amwékútúkich le afalafala ewe kapas allim. Sia silei pwe Jiowa a mochen ach sipwe súféliti mwúún aramas. (1 Pet. 2:17) A mochen ach sipwe álleasochisi ar kewe allúk ika ekkena allúk rese ú ngeni an allúk. (Rom 13:1-4) Nge sia pwal silei pwe mi lamot ach sisap angolong lón mwékútúkútún ei fénúfan are álisi eú pekin lón politics are emén sounemenem. (Joh. 17:15, 16; 18:36) Pokiten sia mirititi pwe Satan a achocho le amonomonaló iten Jiowa we me eitengawa, iwe sia féri úkúkún ach tufich le áiti ngeni aramas ewe pwóróus mi enlet usun ach we Kot. Sia pwapwa pwe sia iteit seni itan we me néúnéú ena it. Ach tongei Kot a fókkun aúchea lap seni tongen moni are pisek.​—Ais. 43:10; 1 Tim. 6:6-10.

10-12. (a) Ifa usun neman Satan a áeá ammwon le etipetipa ekkóch chónláng? (b) Met sia tongeni káé seni met ekkena chónláng ra féri?

¹⁰ Satan a sip le áeá ekkewe minen otuputup le etipetipa aramas. Fán ekkóch a áeá ammwon, me fán ekkóch a sótun mesááni aramas ren an epwe etipetiper le féri letipan.

¹¹ Satan a áeá ammwon le etipetipa eú watteen mwichen chónláng. Ese mwáál ren fansoun langattam a kakkatol me kákkáé napanaper pwe epwe silei met epwe otupu ngeniir. Ekkóch chónláng ra tup me lisowumwáál ngeni fin fénúfan. Néúr kewe mi mwánemmong ra mwánesól me kirikiringaw ngeni aramas. (Ken. 6:1-4) Me lúkún án Satan áeá féfférún lisowumwáál le etipetipa ekkena chónláng, neman a pwal pwonei ngeniir pwe epwe ngeniir manamanen nemenem wóón aramas meinisin. Ren ena mettóch, Satan neman a sótun atai pwénútáán án Jiowa we oesini usun “mwirimwirin” ewe fefin. (Ken. 3:15) Nge Jiowa ese mut ngeni an epwe sópwéch. A awaraato ewe Noter pwe epwe atai meinisin án Satan me chienan kewe chónláng mi ngaw kókkót.

¹² Met sia tongeni káé seni ena mettóch? Féfférún lisowumwáál me lamalamtekia, ikkena ekkewe sókkun ammwon mi kon ngir. Ekkewe chónláng mi tup ren Satan, ra fen nóm ren Kot lón láng ren fite fite ier! Nge chómmóng me leir ra mut ngeni mochen mi ngaw epwe mááritá lón letiper, iwe ló, ló, ló, a fókkun péchékkúleló ekkena mochen. Mi lamot sipwe chechchemeni iteitan pwe ese lifilifil ika sia fen angang ngeni Jiowa ren fansoun langattam nge mocheniangaw a tongeni mááritá lón letipach. (1 Kor. 10:12) Ina popun mi lamot ach sipwe chechcheki masouen letipach me péútaaló ekiek mi ngaw are lamalamtekia!​—Kal. 5:26; álleani Kolose 3:5.

13. Ifa pwal eú sókkun ammwon Satan a áeá, me ifa usun sipwe ttii senikich?

¹³ Pwal eú sókkun ammwon Satan a áeá, ina án aramas mochen silei usun magic are angangen roong me énú. Ikenái, a sótun etipetipa aramas le mochen silei usun ekkewe chónláng mi ngaw ren an áeá lamalam  chofona me pwal ekkewe minen apwapwa. Ekkewe kachito, video games, me pwal ekkóch minen apwapwa ra tongeni ámmeef ngeni aramas pwe magic me énú ra ámmeseik. Ifa usun sipwe ttii senikich ena esin ammwon? Sisap ekieki pwe án Kot we mwicheich epwe tichikin ngenikich met sókkun minen apwapwa mi éch me mi ngaw. Mi lamot sipwe emiriti mwelien letipach pwe sipwe tongeni filiéch me ren án Jiowa kewe kapasen emmwen. (Ipru 5:14) Me ika ach tong ngeni Kot a “fokun wenechar,” iwe sipwe kefiléch. (Rom 12:9) Emén mi likótuputup ese kan apwénúetá met a apasa. Ina minne lupwen sipwe filatá ach minen apwapwa, sia tongeni pwisin eisinikich: ‘Ngang mi apwénúetá ekkewe kapasen emmwen ua kan pesei aramas ar repwe pwal apwénúetá? Met nei kewe chón káé are ekkewe aramas ua chuuriir repwe ekieki ika ra kúna ewe sókkun minen apwapwa ua filatá?’ Lupwen sia apwénúetá ewe kapasen emmwen sia pesei aramas ar repwe pwal apwénúetá, iwe epwe mecheres ngenikich ach sipwe ttii senikich án Satan kewe ammwon.​—1 Joh. 3:18.

14. Ifa usun Satan a sótun mesáánikich, me ifa usun sipwe péchékkúl le ú ngeni?

¹⁴ Satan a pwal sótun mesáánikich me eniwokkusukich pwe epwe ta ach tuppwél ngeni Jiowa. Áwewe chék, a tongeni etipetipa mwúún fénúfan an epwe pinei ach angangen afalafal. A tongeni etipetipa chienach kewe chón angang are chón sukul ar repwe epiita ach fiti allúkún Paipel kewe. (1 Pet. 4:4) Satan a pwal mwo nge tongeni etipetipa chón ach famili esap iir chón lúkú, neman ra enletin mochen álisikich ren ar sótun eppeti ach fiti mwich. (Mat. 10:36) Met sipwe tongeni féri pwe sipwe péchékkúl le ú ngeni án Satan mesáánikich? Satan a mauneikich, ina popun sisap máirú ren an kana sókkun angang. (Pwär. 2:10; 12:17) Pwal och, mi lamot sipwe chechchemeni ewe mettóch mi wesewesen lamot: Satan a erá pwe sia chék angang ngeni Jiowa lón fansoun mecheres, nge sipwe úkútiw le angang ngeni atun a weires ngenikich. (Hiop 1:9-11; 2:4, 5) A pwal lamot sipwe tittingor án Jiowa epwe apéchékkúlakich. Chechchemeni pwe Jiowa esap fókkun likitikicheló.​—Ipru 13:5.

15. Itá Satan a tongeni eriánikich le féri met sise mochen féri? Áweweei.

¹⁵ Satan ese tongeni eriáni aramas le féri met rese mochen féri. (Jas. 1:14) Chómmóng aramas rese mwo nge mirititi pwe ra peni Satan. Nge lupwen emén a silei ewe enlet, mi lamot epwe filatá ika epwe peni Jiowa are peni Satan. (Föf. 3:17; 17:30) Ika sia tipeppós le álleasochisi Kot, iwe Satan esap tongeni atai ach tuppwél.​—Hiop 2:3; 27:5.

16, 17. (a) Pwal met Satan me ekkewe chónláng mi ngaw rese tufichin féri? (b) Pwata sisap pireir le léúwommóng le iótek ngeni Jiowa?

¹⁶ Mi pwal wor ekkóch mettóch Satan me ekkewe chónláng mi ngaw rese tufichin féri. Áwewe chék, esap fán eú án Paipel apasa pwe ra tongeni silei masouen ekiekich are letipach. Jiowa chék me Jesus ra tongeni silei. (1 Sam. 16:7; Mark. 2:8) Ina minne, itá sipwe pireir le fós are léúwommóng le iótek ngeni Kot pwe sia ekieki pwe ewe Tefil me ekkewe chónláng mi ngaw repwe rongorong met sia apasa me áeá ena pwóróus le mauneikich? Aapw! Pwata? Ekieki usun ei pwóróus: Sise kan pireir me niwokkus le féri minne mi múrinné lón ach angang ngeni Jiowa inaamwo ika Satan a tongeni kúnakich. Pwal ina chék usun, sisap niwokkus le léúwommóng le iótek ngeni Kot inaamwo ika sia ekieki pwe ewe Tefil epwe tongeni rongorong ach iótek. Pwal och, ewe Paipel a erenikich fán chómmóng pwe néún Kot kewe chón angang ra léúwommóng le iótek, me ese apasa pwe ra pireir le iótek pokiten ra lólilen án ewe Tefil epwe rong. (1 King 8:22, 23; Joh. 11:41, 42; Föf. 4:23, 24) Ika sia féri úkúkún ach tufich le eáni ewe sókkun fós me féffér mi tipeeú ngeni letipen Kot, iwe sia tongeni lúkúlúk pwe Jiowa esap mut ngeni ewe Tefil an epwe féri ese lifilifil met ren an epwe eppeti ach sipwe kúna manaw esemuch.​—Álleani Kölfel 34:7.

¹⁷ Mi lamot sipwe silei chón oputach we, nge ese wor popun sipwe niweiti. Inaamwo ika sise unuséch nge ren án Jiowa álillis sia tongeni okkufu Satan! (1 Joh. 2:14) Ika sia ú ngeni, iwe epwe sú senikich. (Jas. 4:7; 1 Pet. 5:9) Ikenái, usun itá Satan a ákkáeúin maunei ekkewe kúkkún me sáráfé. Ifa usun repwe tongeni ú ngeni án ewe Tefil mauner? Sipwe pwóróus usun ena lón en lesen mwirin ei.